E mafai faapefea ona ou faamalamalama atu i isi le taua o le faaipoipoga ma le aiga?

Faaaoga ia punaoa o i lalo ina ia malamalama atili ai e uiga i le auala e faamatala atu ai le taua o faaipoipoga ma aiga. O ou lava aafiaga i le faamatalaina atu o le aoaoga faavae i isi o le a fesoasoani ia te oe ina ia lelei le aoaoina atu. Mafaufau pe o faapefea ona fesoasoani ia gaoioiga o i lenei otootoga i le autalavou e aoao ai i le auala e aoao atu ai.

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Neil L. Andersen, “O Asiosio Faaleagaga,” Ensign po o le Liahona, Me 2014, 18-21

D. Todd Christofferson, “Aisea e Faaipoipo Ai, Aisea e Fai ai se Aiga,” Ensign po o le Liahona, Me 2015, 50–53

“Faaipoipoga,” Faamaoni i le Faatuatua (2004), 38–42

“Faaipoipoga e Faavavau” ma “Malumalu ma Talafaasolopito o le Aiga,” Tala’i La’u Talalelei (2004), 89–90

Aoao atu i le ala a le Faaola

Na valaaulia e Iesu Keriso i latou sa Ia aoao e faatino le faatuatua ma ola i upumoni na Ia aoaoina. O Ana aoaoga uma sa Ia taulai atu ai i le fesoasoani i e mulimuli ia te Ia e ola i le talalelei ma o latou loto atoa. E faapefea ona e fesoasoani i le autalavou e faatino i le faatuatua ia mea ua latou aoaoina?

Ata

Vitio: “Tuu Mai Matou te Aoao Atu”

Matamata atili

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

• Fai i le autalavou e faasoa mai se auala na faataitaia ai e se tagata o le aiga ia i latou se mataupu faavae o le talalelei.

• Valaaulia se tagata e tautala i se isi gagana (pe a talafeagai, o se tagata o le vasega) e sau i luma o le vasega ma tautala atu i lena gagana. Valaaulia le autalavou e faamatala mai pe faapefea ona faape’i le faalogologo atu i se gagana latou te le malamalama i ai ona pei o le faalogologo atu i se tagata o le Ekalesia o faamalamalama atu ia upumoni o le talalelei i isi e faaaoga ai ni upu e le masani ai, e pei o le faaipoipoga e faavavau, faamauga, po o le malo selesitila.

O le a fesoasoani gaoioiga taitasi nei i le autalavou i le auala e faamatala ai i isi le taua o le faaipoipoga ma le aiga. I le mulimuli ai i le uunaiaga a le Agaga, filifili se tasi pe sili atu e aoga mo lau vasega:

• Fesili atu i le autalavou pe na talosagaina i latou e faamatala atu le tulaga o le Ekalesia e uiga i le faaipoipoga i le itupa e tasi. Na faapefea ona latou tali atu? Fai atu ia i latou e faitau mai ia parakalafa na filifilia mai le saunoaga a Elder D. Todd Christofferson “Aisea e Faaipoipo Ai, Aisea e Fai ai se Aiga” po o ni vaega o le saunoaga a Elder Neil L. Andersen “O Asiosio Faaleagaga.” O le a se mea na aoaoina e le autalavou e uiga i le taua o le faaipoipoga i le va o se alii ma se tamaitai? Uunaia le autalavou e fuafua pe faatino se tala o mea latou te ono tau atu i se isi taimi latou te maua ai se avanoa e faailoa atu ai lo latou talitonuga e uiga i le faaipoipoga.

• Valaaulia le autalavou e mafaufau ma lisi i luga o le laupapa ni fesili o loo i ai i nisi e le auai i la tatou faatuatuaga e uiga i le faaipoipoga ma le aiga, e pei o le, “Aisea e tatau ai ona ou faaipoipo ma fai se fanau?” po o le “Aisea e tatau ai ona faaipoipo i le va o se alii ma se tamaitai?” Fai atu i le autalavou e filifili ni fesili o loo lisiina ma saili ni tali i totonu o tusitusiga paia (mo ni faataitaiga o mau, tagai i mau na o loo faasino i ai i le vaega o “Faaipoipoga” ma le “Aiga” o le Faamaoni i le Faatuatua ma i le “O Le Aiga: O Se Folafolaga i le Lalolagi”). Uunaia le autalavou e saunia se tali e tasi le minute i fesili latou te filifilia, aloese mai upu ma fuaitau lea e ono faigata ona malamalama i ai isi, e pei o le faaipoipoga faaselesitila po o le faamauga. Tuu atu se taimi ia i latou e faasoa mai ai a latou tali,

• Fai atu i le autalavou e tusi se tala failipoti e uiga i le taua o le faaipoipoga ma le aiga. E mafai ona faapuupuu lenei tala ma e ono faaalia mai i se nusipepa a le aoga pe tusi foi i luga o se poloka [blog]. Valaaulia le autalavou e faasoa se mea sa latou saunia i le vasega.

• Faitau o se vasega le “Aiga” i le Mo le Malosi o le Autalavou. Valaaulia le autalavou e saunia e aoao atu nisi o aoaoga faavae sa latou aoaoina e faatatau i aiga i tamaiti Peraimeri. Mo se faataitaiga, e mafai ona latou aoao atu ia tamaiti i le faaaogaina o le fesili “Aisea e taua ai le aiga?” Fai atu ia i latou e fatu se otootoga lea o le a fesoasoani ia i latou e faamatala atu ma le faigofie ma le puupuu lena mataupu. Faatasi ai ma se faatagaga mai le epikopo ma le au peresitene o le Peraimeri, faatulaga se taimi mo le autalavou e aoao atu ai a latou lesona. A uma ona latou maua se avanoa e aoao atu ai, fai atu ia i latou e talanoa i le auala na latou aoao atu ai lenei mataupu faavae o le talalelei.

• Faatasi ai ma se faatagaga mai le epikopo, valaaulia ni faifeautalai faamisiona e faasoa mai i le vasega le auala la te faamatalaina atu ai aoaoga faavae e uiga i le faaipoipoga ma aiga i isi. Vaevae le vasega i ni vaega se lua, ma fai atu i le tasi vaega e saunia e aoao atu e uiga i le faaipoipoga e faavavau ma le isi vaega e saunia e aoao atu e uiga i malumalu ma le talafaasolopito o aiga, e faaaoga ai punaoa na fautuaina mai i lenei otootoga (po o nisi e mafai ona latou mauaina). A uma ona latou saunia ni faamatalaga faigofie ma pupuu i a latou autu, valaaulia le autalavou e aoao atu se tasi mai le isi vaega e uiga i le aoaoga faavae sa latou suesueina.

Fai atu i le autalavou e faasoa mai mea ua latou aoaoina i le aso. Pe o latou malamalama i le auala e faamalamalama atu ai le taua o le faaipoipoga ma le aiga i isi? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.