Tu Kuh ke Olwelah ac Wuhlweacng Lasr

Tamuhlwel ac tahmtahel, ke kuht kaliyac toeni se inge, lwelah kuht in sruohk ke insiyacsr luhlahlfongi lasr ke ma pwacye luhn wosasuc luhn Jisus Kraist. Kuht akinsewowoyeyuck in akacsruhi pacl sacohk lasr tuhkweni ac ahkkweye olwelah lasr nuh sin Leum Jisus Kraist tuh kuht mwet kuhlwacnsap Lal ac lah El Mwet Lahngo lasr.

Ma yohk sriphac in oraclah ac karihngihn olwelah ac wuhlweacng oasr ke nuhnak luhk. Yohk srihpac nuh sum in oruh ma kom fahk? in luhlahlfongiyuck? in oruh ma kom fahk kom ac oruh? in oaru in liyacacng wuhlweacng muhtahl lom? in mwet suwohs se? Ke moulkihn fal nuh ke olwelah nuh sin Leum ac mwet sahyac, kuh fahsrkihn inkacnek wuhlweacng in fohlohk nuh Pahpah tuhmasr Inkuhsrao ac puhla luhngse Lal ke moul lasr.

Mwet Lahngo lasr, Jisus Kraist, pa mwet srihkasrak lasr in oraclah ac karihngihn olwelah ac wuhlweacng lasr. El tuhkuh nuh facluh ac olwaclah in oruh kena luhn Pahpah. El luti ip yohk luhn wosasuc ke kahs ac orekma. El kihsac ke ma koluk lasr tuh kuh in moulyak. El ahkfalyac kais sie sin olwelah nohfohn Lal.

Kuh in ma inge pwacye ke kais sie sesr? Meac sikyak kuht fin kikiacp kuhtuh, tahfonglac kuhtuh, kuh tiac ahkfalye olwelah lasr? Meac sikayk kuht fin fahsr liki wuhlweacng lasr? Kuh mwet sahyac ac tuhkuh nuh Kraist ke srihkasrak lasr? Kuh kahs lom yohk srihpac nuh sum? In karihngihn olwelah uh tiac ma kuht oruh na; pa ohiyacn mwet tuhma lutlut luhn Kraist.

Ke srihpen el fohsrngakihn muhnahs lasr ke moul, Leum El olwelah, “Enganwack, ac tiac sahngweng, tuh nga Leum wi kom, ac fah tu siskom.”¹ Nga puhla lah el oasr yuruk ke nga enenuh kahsruh, ahkweyeyuck, etweyuck luhn nguhn, ac nga ahkinsepuhsisaclyeyuck ac kuloh ke kahsruh muhtahl Lal.

Leum El fahk, “Kais sie mwet suc auliyak ke ma koluk lal ac tuhkuh nuh yuruk, ac pahngon inek, ac ahkos puhsrwek, ac karihngihn masap luhk, fah liye muhtuhk ac etuh tuh nga moul.”² Sahp pa inge olwelah na yohk Lal.

Nga etwaclah tuh yohk srihpac in oruh ma nga olwelah ke nga fuhsr. Sie srihkasrak ke nga tuh ac kalweni kahs ke Scout Oath. Kuhpasr lasr ke Boy Scouts of America, ke sahflah inge, yohk srihpac nuh sihk ac Alu uh. Nuh sin Scouting uh, ac mukul ac muhtwacn pucs suc kuhlwacnsap ke mwet kol, ac ninac uh—pa yohk uh—ac mukul fuhsr ma wi Scouting, kuht fahk, “Kuloh.”

Ke toeni se inge, mwet pahluh sacohk lasr, Prestuhn Russell M. Nelson, ac Elder Quentin L. Cook ahkkahlwemye eklac ma lohacng nuh ke mwet fuhsr ac ahksuwohsye u lasr ke ma pwacye. In wi ma inge, Sacnri tari ah, Prestuhn Nelson ac Prestuhn M. Russell Ballard ahkuhtweyac plwacn sasuc ke Tuhlihk ac Mwet Fuhsr ke Alu luhn Jisus Kraist luhn Mwet Luhlahlfongi ke Lwen-sahflah ke Alu uh. Ma inge sikyak ke facluh nohfohn lohacng nuh ke Lwem ac Mwet Lahngo lasr, Jisus Kraist. Prestuhnsi Se Met ac U luhn Mwet Sap Singucul Luo tuhkweni ke ma sasuc inge, ac nga ahklohye tuh Leum El kol kuht ke ip nuhkwewa. Nga rahrahlac ke tuhlihk ac mwet fuhsr luhn Alu uh in puhlakihn lohacng se inge nuh selos ke lohm ac alu—nuh ke etwaclah luhn wosacsuc, kuhlwacnsap ac toeni, ac ahkwoye sifacna.

Sifac luhn Mwet Fuhsr ke yac fahsruh, 2020, sramsram ke olwelah lal Nephi in “som ac oruh.” El suhmuhslah, “Ac tukun ma inge nga, Nephi, fahk nuh sin pahpah tuhmuhk: nga ac fah som ac oruh ma suc Leum El sapkihn, tuh nga etuh lah Leum El tiac sang kuhtwena masap nuh sin tuhlihk nuhtin mwet, sahyacn El fah ahkolah sie inkacnek nuh selos tuh elos in kuh in oraclah ma suc El sapkihn nuh selos.”³ Finne fahkyuck ke pacl tari ah, kuht ke Alu uh tu ke olwelah sacn mihsenge.

In “som ac oruh” kalmac in som lucng liki ma luhn facluh, eis ac mukwikwi ke fwackyuck sifacna, moul suwohs ke finsrak ac luhlahlfongi ke pacl in tuhkuh, oraclah ac karihngihn wuhlweacng in ukwe Jisus Kraist, ac ahkyohkye luhngse lasr nuh Sel, Mwet Lahngo luhn facluh.

Wuhlweacng pa sie olwelah inmahsrlosr ac Leum. Ke member luhn Alu uh, kuht olwelah ke pacptais in eis nuh fesr inen Jisus Kraist, in moul oacna El moul. Oacna elos suc pacptaislac ke kof luhn Mormon, kuht olwelah in Mwet Lal, “in akacsruhi ke ma toasr luhn kais sie, tuh ma inge in muhlahlahlac; … “ahsor weluhlos suc ahsor; … ahkenganyaclos suc enenuh in ahkenganyeyuck, ac in tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa ma kowos oasr we.”⁴ In karihngihn sie sin sie ke Alu uh ahkkahlwemye oaru lasr in ahkfalye olwelah ingwacn.

Ke kuht ipeis ke kuhfa luhn Leum, kuht ahksasucye wuhlweacng se in eis nuh facsr Inel ac olwelah in ahkwoye moul lasr. Nuhnak ac mukwikwi lasr lwen nuhkwewa, yohk kuh srihk, ahkkahlwemye oaru lasr nuh Sel. Na olwelah muhtahl Lal nuh sesr, “Ac kowos fin esamyuc pacl nuhkwewa kowos fah eis Nguhnihk in wi kowos.”⁵

Kihsen siyuck luhk mihsenge pa, kuht tu ke olwelah ac wuhlweacng lasr kuh fin olwelah lasr tiac ma fokoko uh, ma kuht fihsrwacsr in oraclah ac fihsrwacsr in kuhnaoslah? Ke kuht fahk nuh sin mwet se, “nga ac pruhe keim,” yac kuht oruh? Ke kuht olwelah, “nga ac tuhkuh in kahsruh,” yac kuht oruh? Ke kuht olwelah in moul soemoul lasr, yac kuht oruh? Ke kuht oreyack pahosr in ahkkweye mempucr wiyacsr ke kunohkohn sasuc se, kalmac in kahsrwelos, yac kuht oruh?

Sie ekuh ke nga fuhsr ah ninac kiyuck el muhta yuruk sisken mwe oan kiyacl ac sramsram nuh sihk ke yohk srihpacn masap luhn Kahs in Lahlmwetmwet. “Nga etuh ke moul luhn mwet sahyac, kuh yac tari ah,” el fahk, “wacngihnlac luhn nguhn muhtahl ma tuhkuh ke mwet se seahkos masap luhn Kahs in Lahlmwetmwet.” El ngetweacng nuh ke muhtuhk ac nga puhla kahs lal insiyuck: “Olwelah nuh sihk, Ronnie, mihsenge (el pahngonyuc Ronnie), tuh kom in moulkihn Kahs in Lahlmwetmwet nwe tohk.” Nga ke inse pwacye oraclah olwelah sacn nuh sel, ac nga ahkos ke yac puhkantwen inge.

Olwelah sacn kahsreacng nuh sihk ke nga wi kawuck luhk ke pacl fuhsr luhk ac ke yac tohk ke nga orekma ac puhkantwen mwe sruhi oasr we. Nga sulwaclah met in ukwe masap luhn God, ac nga tiac sulpac nuhkuh kac. Leum El olwelah, “Nga, Leum, enenuh in ahkfalye ke kowos oruh ma nga fahk; tuh ke kowos tiac oruh ma nga fahk, wacngihn ma uliyuck nuh sum.”⁶ Meac El fahk nuh selos suc ahkos masap ke Kahs in Lahlmwetmwet? Tuh in uliyucklac nuh sesr tuh kuht in kuh, fokoko, lahlmwetmwet, etatwen, ac lipufacn in karihngihn kuht.⁷

Kuhtuh yac tari ah, Tahmtahel Rasband ac nga oasr ke Tempuhl acn Salt Lake in wi siliyuck luhn sie sin muhtwacn nahtuhsr. Ke kuht tu lihkihn tempuhl wi sie muhtwacn fuhsr nahtuhsr, suc tiac mahtuh fal in wi akwuck sac, kuht sramsram tuh arlac yohk srihpac in siliyuck ke tempuhl muhtahl luhn God. Oacna ninac kiyuck el lutiyuc ke yac tari ah, kuht fahk nuh sin tuhlihk muhtwacn nahtuhsr, “Kuht ke kom siliyucklac lun tempuhl, ac kuht ke kom in olwelah nuh sesr lah ke kom konwacwack mukul kom in pahyuck nuh se, tuh kom in oraclah placn se yohrohl in siliyucklac lun tempuhl.” El olwelah nuh sesr.

Petsac

Tuhlihk nahtuhl Elder Rasband ac mukul tuhmwacl

Tohk el fahk nuh sesr tuh sramsram lasr ac olwelah lal karihnguhnuhl ac akacmakuhnuhl ke “ma yohk srihpac emet.” Tohk el oraclah wuhlweacng muhtahl ke el siliyucklac nuh sin mukul tuhmwacl lun tempuhl.

Prestuhn Nelson el luti: “Kuht … ahkyohkye kuh luhn Mwet Lahngo ke moul lasr ke kuht oraclah wuhlweacng muhtahl ac karihngihn suwohs wuhlweacng ingwacn. Wuhlweacng lasr kapri kuht nuh sel ac use nuh sesr kuh luhn God.”⁸

Ke kuht karihngihn olwelah lasr sie sin sie kuht ac karihngihn olwelah lasr nuh sin Leum. Esam kahs luhn Leum: “Pwayena nga fahk nu suwos, ke kowos oru ma inge nu sin sie su srik liki nukewa sin mwet lik, kowos oru nu sik.”⁹

Wi yuc motko ke olwelah lun ma suhmuhslah. Ammon ac tuhlihk nahtuhl Mosiah ke Puk luhn Mormon olwelah “in luti kahs luhn God.”¹⁰ Ke Ammon el sruokyucki sin un solse luhn mwet Laman utuckyang el met liki Tohkohsrahi Lamoni luhn mwet Laman. El olwelah nuh sin tohkohsrahi ah, “nga fah mwet kuhlwacnsap lom.”¹¹ Ke mwet puhsrapasr tuhkuh in pihsrwelah sheep nahtuhl tohkohsrahi ah, Ammon el suhpuhklah paholtacl. Tohkohsrah el lut na pwacye, el lohng nuh ke pweng lal Ammom luhn wosasuc ac eklac moul lal.

Ruth, ke Wuhlweacng Mahtuh, fahk nuh sin ninac kiyacn mukul tuhmacl, “Tuh yen kom som nuh we, nga fah som pac nuh we.”¹² El moul pwacye nuh ke kahs lal. Sie Mwet Samaria Wowo, ke puhlpuhlyak se ke Wuhlweacng Sasuc, olwelah nuh sin mwet ma liyeacng lohm sac lah fin el karihngihn mwet sac, “Na nga fah akfalye nuh sum kutwena ma kom sislah kacl.”¹³ Zoram, ke Puk luhn Mormon, el olwelah in som nuh ke acn mwesis wi Nephi ac tahmuhlwel wiyacl. Nehpi el suhmuhslah, “Ke Zoram el tuh oraclah sie olwelah nuh sesr, sahngweng lasr kacl wacngihnlac.”¹⁴

Ac meac ke olwelah mahtuh “nuh sin pahpah” oacna ahkuhtweyucki ke ma suhmuhslah tuh “insiyacn tuhlihk ac forwacng nuh sin pahpah tuhmwaclos”?¹⁵ Ke moul met liki moul facluh ke kuht sulaclah plwacn luhn God, kuht tuh olwelah in wi kahsruh oracni Israel ke mwet moul ac misac. “Kuht wi tuhkweni se yurun Leum,” Elder John A. Widtsoe el ahkuhtweyac yac kuhtuh tari ah. “Orekma luhn placn sac tiac orekma luhn Pahpah, ac Mwet Lahngo muhkwena, tuh oacyacpac orekma lasr.”¹⁶

“Oreniyacn mwet Israel ma yohk srihpac emet fin facluh mihsenge,” Prestuhn Nelson el fahk ke el som forfor luti fin facluh nohfohn. “Ke kuht sramsramkihn oreni, kuht sramsram ke ma fihsrwacsr se inge: kais sie sin tuhlihk nuhtin Pahpah Tuhmasr Inkuhsrao, mwet moul ac misac, enenuh in lohng ke pweng luhn wosasuc fohlohkihnyuck luhn Jisus Kraist.”¹⁷

In ekihn sie Mwet Sap luhn Leum Jisus Kraist, nga ahksafhye ke mwe solsol se ac olwelah se. Met, mwe solsol uh: nga suli kowos in nuhnkuh ke olwelah ac wuhlweacng kowos tuh oraclah ke Leum, ac mwet sahyac, ke suwohs, in etuh tuh ma kowos olwelah yohk srihpac. Ahkluo, nga olwelah nuh suwos, lah ke kowos oruh ma inge, Leum ac fah ahkmuhtahlye kahs ac orekma lowos ke kowos oaru in ahkkweye moul lowos, sucu lowos, ac Alu luhn Jisus Kraist luhn Mwet Luhlahlfongi ke Lwen-sahflah. El fah wi kowos, tamuhlwel ac tahmtahel sacohk wiyuck, ac kowos kuh in, ke luhlahlfongi, finsrak in “eisyuck nuh inkuhsrao, tuh ohinge [kowos] fah muhta yurun God ke sie ohiyac engan wacngihn sahflahiyac … tuh Leum God El sramsramkihn.”¹⁸

Ke ma inge nga fahkwack ac olwelah ke inen Jisus Kraist, amen.