Sukohk Engan ke Akahsruhi Wosasuc
Oasr Pahpah Luhngse tuhmasr Inkuhsrao, suc sanwekuht in forlah nuh Sel Elan kuh in ahkinsewowoye moul lasr ac moul luhn mwet raunikuhtlac.
Sie on luhn U luhn Tuhlihk Srihsrihk pahiyuck luhk muhtwacwacack ke kahs inge:
Nga mwet se luhn Alu luhn Jisus Kraist luhn Mwet Luhlahlfongi Lal ke Lwen-sahflah.
Nga etuh suc nga uh.
Nga etuh plwacn luhn God.
Ngac ukwel ke luhlahlfongi.
Nga luhlahlfongi ke Mwet Lahngo, Jisus Kraist.1
Kahs fihsrihsr ac kahto pa inge ke ma pwacye kuht luhlahlfongi!
Ke mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah, kuht etuh suc kuht uh. Kuht etuh lah “God El Pahpah tuhmuhn nguhnasr. Kuht … tuhlihk Nahtuhl, ac El luhngse kuht. Kuht muhta [yohrohl inkuhsrao] met liki kuht [tuhkuh] nuh facluh.”
Kuht etuh plwacn luhn God. Kuht oasr yohrohl ke pacl se El ahkkahlwemye plwacn ah. “Srihpac nohfohhn [luhn Pahpah tuhmasr Inkuhsrao]—orekma Lal ac wolacna Lal—pa in oruh kais sie sesr in engankihn mwe insewowo nuhkwewa Lal. El … ahkolah plwacn suwohswohs in ahkfalye srihpac Lal. Kuht kahlwem ac insese nuh ke plwacn se inge … luhn ma engan, … moliyucklac, ac … molwelah” met liki kuht tuhkuh nuh facluh.
“Jisus Kraist El infulwacn plwacn luhn God. Ke Iwaclah Lal, Jisus Kraist El ahkfalye srihpac luhn Pahpah Tuhmwacl ac oruh kais sie sesr in kuh in engankihn moul kawihl ac moul ma pahtpaht. Setuhn, kuh devil, el mwet lokoalok se nuh sin plwacn luhn God” ingena ac ke muhtwacwacackiyac ah.
“Suhkohsohk in sulwaclah pa mwe sang yohk emet luhn God nuh sin tuhlihk nahtuhl. … Kuht enenuh sulwaclah in ukwel Jisus Kraist kuh ukwel Setuhn.”2
Pa inge ma pwacye fihsrihsr kuht kuh in akacsruhi yurin mwet sahyac.
Lwelah nga in akacsruhi ke pacl se ninac kiyuck el akacsruhi ma pwacye fihsrwacsr ke el tiac sahngweng in sramsram ac akihlen pacl wo.
Yac pucspucs somlah, ninac kiyuck el tuh fohlohk nuh acn Argentina in muhtwacta yurin mukul wiyuck ah. Ninac kiyuck el tiac luhngse wi oak sok ah, el siyuck sie sin wen nuhtihk in sang nuh sel mwe insewowo se in ahkmihs ac karihngihnyuck el. El oacyacpac moklweyuck ah in ahkinsewowoye ninac mahtuh tuhmwacl ke kolyuck wolacna luhn Nguhn Muhtahl in ahkkweye ac puhrakack insiyacn mwet puhkantwen suc kena lohng ke wosasuc uh.
Ke acn luhn oak sok Salt Lake, ninac kiyuck ac mukul wiyuck ohsun nuh sin tuhlihk muhtwacn se matwac yac itkohsr suc tuh fohlohk sin fuhfahsryucsr in ski soko yurin sucu lal. Ninac pahpah tuhmwacl akihlen lusen pacl el sramsram nuh sin ninac kiyuck ac mukul wiyuck ac sulwaclah in weluhlos. Elos muhtwacwacack fahk lah inaclos pa Eduardo ac Maria Susana ac acn nahtuhlos pa Giada Pol. Oasr kuhpahsr na wolacna se nuh sin sucu sacohk inge ah.
Sucu kwewana inge elos tuh rahrah in tuhkweni fuhfahsryucsr ah ke oak sok sac pacna nuh ke acn Buenos Aires, Argentina. Ke sramsram lalos kalweni, ninac kiyuck el akihlen lah nwe ke pacl inge ah, sucu inge soenna lohng ke Alu luhn Jisus Kraist fohlohkihnyuckyak.
Kihsen siyuck se emet Susana el siyuck ah pa “Kuh kom kuh in fahk nuh sihk kuhtuh ke museum kahto se ma oasr statue kol se lucng ah?”
Ninac kiyuck el fahk lah lohm kahto sacn tiacna museum soko tuh tempuhl soko luhn Leum ac kuht oraclah olweacng nuh sin God we kuht in kuh in fohlohk nuh yohrohl sie lwen. Susana el fahk nuh sin ninac kiyuck ah lah met liki fuhfahsryucsr lalos nuh acn Salt Lake, el tuh pruhe ke ma se in ahkkweye nguhn lal.
Ke pacl in oak sok ah, ninac kiyuck el fahkwack luhlahlfongi fihsrwacsr ac fokoko lal ke wosasuc ac suli Susana elan sukohk misineri in acn sel ah. Susana el siyuck ninac kiyuck ah, “Ngac sohkacltahlack fuhkah?”
Ninac kiyuck topuk, “Kom tiac kuh miss eltahl; eltahl mukul luo nokohmacng wes fasrfasr kuh muhtwacn luo ke nuknuk kahto, ac eltahl nokohmacng tag se oasr ineltahl ac oacyacpac ‘Alu luhn Jisus Kraist luhn Mwet Luhlahlfongi Lal ke Lwen-sahflah.’”
Sucu luo inge sang nuh sie sin sie phone number lalos ah ac fahk fah ohsun ke acn in oak sok Buenos Aires. Susana, suc ekihn kawuck wowo se luhk, tuh fahk nuh sihk pacl puhkantwen lah el puhla ahsor na pwacye ke pacl sac el fahlac liki ninac kiyuck ke acn oak sok ah. El fahk, “Kahlwemack luhman ninac kiom ah. Nga tiac kuh in ahkkuhtweye, tuh oasr yohrohl sie sahromrom fokoko ma nga tiac kena kahingkihn.”
Ke Susana el fohlohk nuh acn sel ah, el ac acn nahtuhl, Giada, sa na akacsruhi ma wo inge nuh yurin ninac kiyacl Susana, suc muhta fototo nuh lohm selos ah. Ke elos kahsruhsr ke sitosah, Susana liyeack mukul fuhsr luo fahsr ke inkacnek ah nokohmwacng nuknuk oacna ahkkuhtweyuck sin ninac kiyuck ah. El tui infulwen inkacnek ah, srolah, ac siyuck mukul fuhsr luo inge, “Kuh komtacl sahp mwet ke Alu luhn Jisus Kraist?”
Eltahl fahk, “Ahok.”
“Misineri?” el siyuck.
Eltahl kwewana fahk, “Ahok, kuht misineri!”
Na el fahk, “Sroacng nuh in sitosah ohkuck; komtacl ac fah tuhkuh nuh lohm sihk in lutiyuc.”
Mahlwem luo fahsruh, Maria Susana el tuh paptaislac ah. Acn nahtuhl, Giada, el oacyacpac paptaislac ke pacl se el sun yac yuc. Kuht srwackna kahsrwacl Eduardo, suc kuht luhngse finne fuhkah ma uh.
Nwe mihsenge, Susana el tuh ekihn sie misineri suc wo emet ke misineri nga etuh ah. El oacna wen nahtuhl Mosiah, suc us nguhna puhkantwen nuh yurin Kraist.
Ke sie sramsram lasr ah, nga siyuck sel, “Meac lukmac se lom? Kom akacsruhi wosasuc fuhkah yurin mwet sahyac?”
El fahk nuh sihk, “Arlac fihsrihsr ma inge. Kais sie lwen met liki nga som liki lohm sihk ah, nga pruhe, ac siyuck sin Pahpah tuhmasr Inkuhsrao in kolyuc nuh sin mwet se suc enenuh wosasuc in moul la uh. Kuhtuh pacl uh nga us tuhkuh Puk luhn Mormon in akacsruhi yorohlos kuh card srihsrihk nuhtin misineri ah—ac ke pacl nga muhtwacwacack sramsram nuh sin mwet se, nga siyuck na elos fin lohng ke Alu uh.”
Susana el oacyacpac fahk, “Pacl sahyac ah nga kwacna isracsr ke nga sano ke train ah. Sie lwen ah mukul ngwetma ac fahk, ‘Meac se kom isracsr kac uh?’ Nga kwacna lut ke fahk se lal ah.
“Nga topuk, ‘Nga isracsr ke srihpacn nga engan!’
“Na el fahk, ‘Ac meac se kom arulacna engan kac uh?’
“Nga topuk, ‘Nga mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah, ac ma inge oruh nga in engan. Kuh kom lohng kac Alu se inge ah?’”
Ke el fahk moh, Susana el sang nuh sel card srihsrihk ke Alu uh ac suli elan wi Alu ke Sacnri tok ah. Sacnri tok ah, el ohsun nuh sel ke sruhnguhl ah.
Prestuhn Dallin H. Oaks el luti:
“Oasr ma tolu mempucr uh kuh in oruh in akacsruhi wosasuc uh. …
“Ma se met, kuht kwewa kuh in pruhe in oasr kena in kahsruh ke ip enenuh ke orekma luhn molwelah se inge. …
“Ahkluo, kuht kuh in sifacna liyacacng masap. … Mempucr yohk luhlahlfongi la fah eis Nguhn luhn Mwet Lahngo in … weluhlos in kohlohlos ke elos suk in wi orekma yohk se ke akacsruhi wosasuc fohlohkihnyuckyak se luhn Jisus Kraist uh.
Ahktolu, kuht kuh in pruhe ke moklweyuck ke ma kuht kuh in oruh … in akacsruhi wosasuc yurin mwet sahyac … [ac] pruhe ke olwelah se in mukwikwi ke mwe mokleyuck [kuht] eis an.”3
Tamuhlwel, tahmtahel, tuhlihk, ac mwet fuhsr, yac kuht kuh in oacna kawuck se luhk Susana ac akacsruhi wosasuc yurin mwet sahyac? Yac kuht kuh in suli kawuck se suc tiac wi luhlahlfongi lasr elan tuhkuh wi kuht Alu ke Sacnri uh? Kuh kuht kuh in akacsruhi sie Puk luhn Mormon nuh yurin mwet se ke sucu lasr kuh kawuck se lasr? Yac kuht kuh in kahsruh mwet sahyac sukohk mwet mahtuh wiyacltahl ke FamilySearch kuh akacsruhi yurin mwet sahyac ke ma kuht lotwelah ke wik se fahlac ke kuht lutlut ke Tuhkuh, Ukweyuc? Yac kuht kuh in eklac in oacna Mwet Lahngo lasr, Jisus Kraist, yohk likina met ac akacsruhi yurin mwet sahyac ma luhn moul lasr uh tuh kuht eis mwe engan kac? Top nuh ke kihsensiyuck nuh kwewa inge pa ahok! Kuht kuh in oruh ma inge!
Ke ma suhmuhslah kuht riti lah “mempucr ke Alu luhn Jisus Kraist elos suhpwaclah ‘in orekma ke inimac lal ke molwelah luhn nguhnin mwet uh’ (Doctrine and Covenants 138:56). Orekma in molwelah inge nein orekma in misineri luhn mempucr uh, ahkkweye mempucr sasuc, ahkkweye mempucr suhka wi alu, orekma luhn tempuhl ac mwet mahtuh, ac luti wosasuc uh.”4
Kawuck sacohk luhk, Leum El enenuh kuht in oracni mwet Israel. Ke Doctrine and Covenants, El fahk, “Tiac nuhnkuh met ke ma kowos ac fah fahk; tuh kowos in motko in nuhnak lowos uh kahs luhn moul, ac ac fah utuhkuh nuh suwos ke oa sac pacna ma fal nuh sin mwet nuhkwewa.”5
Oacyacpac, El olwelah nuh sesr:
“Ac kowos fin orekma ke lwen lowos nohfohn in luti auliyak nuh sin mwet sahyac uh ac use mwet se na nuh Yohrohl, ac fah oasr engan yohk lowos wi mwet sacn ke tohkohsrahi luhn Pahpah!
“Ac ingena, fin engan lowos uh yohk ke sie mwet suc kom use nuh yuruk nuh ke tohkohsrahi luhn Pahpah tuhmuhk uh, fuhkah yohkiyacn engan lowos fin kowos use mwet pucspucs nuh yuruk!”6
On luhn U luhn Tuhlihk Srihsrihk ma nga muhtwacwacack kac ah ahksahfye ke kahs fokoko inge:
Nga luhlahlfongi Mwet Lahngo, Jisus Kraist.
Ngac ahkfuhlwactye Inel.
Ngac oruh ma pwacye.
Ngac ukwe kahlwem Lal.
Ma pwacye Lal ngac fahkwack.7
Nga fahkwack kahs inge pwacye ac lah oasr Pahpah Luhngse tuhmasr Inkuhsrao, suc sanwekuht in forlah nuh Sel El in kuh in ahkinsewowoye moul lasr ac moul luhn mwet raunikuhtlac. Finsrak in oasr kena lasr in us tamuhlwel ac tahmtahel wiyacsr nuh yurin Kraist pa pruhe luhk ke inen Jisus Kraist, amen.