Fa’aro’o iāna

E au mau taea‘e, e au mau tuahine here, e māuruuru rahi tō’u i te mea ē, nā roto i te fa’a’ohipara’a i te rāve’a ’aravihi o teie tau, ’ua ti’a ia tātou ’ia putuputu ’e ’ia ha’amori i teie po’ipo’i sābati. ’Ua ha’amaita’i-mau-hia tātou ’ia ’ite ē, ’ua fa’aho’ihia mai te ’evanelia a Iesu Mesia i te fenua nei !

I te mau hepetoma e rave rahi i ma’iri a’e nei, ’ua fāri’i te rahira’a o tātou i te mau ha’ape’ape’ara’a i roto i tō tātou orara’a. Te mau ’āueuera’a fenua, te mau ’ati auahi, te pape pu’e, te mau ’ati rahi, ’e tō rātou mau hope’ara’a, ’ua fa’a’ārepurepu te reira i tō tātou orara’a, ’e ’ua fa’atupu i te ’o’e mā’a, te mau mā’a tumu ’e te ha’aputura’a moni.

I roto i teie mau mea tā’āto’a, tē ha’apōpou ’e tē ha’amāuruuru atu nei au ia ’outou nō tō ’outou fa’aotira’a e fa’aro’o i te parau a te Fatu i roto i teie taime ’ārepurepu, nā roto i te ’āmuira’a mai ia mātou i roto i teie ’āmuira’a rahi. Nā te pōiri rahi ’o tē ’āpe’e nei i te mau ’ati, ’e fa’arahi atu i te ’ana’ana o te māramarama o Iesu Mesia. ’A feruri na i te maita’i tā tātou tāta’itahi e nehenehe e rave i roto i teie pu’e tau ’ārepurepu nā te ao ato’a nei. E nehenehe tō ’outou here ’e tō ’outou fa’aro’o i roto i te Fa’aora e riro ei tumu maita’i roa nō te ’itera’a te hō’ē ta’ata i te fa’aho’i-fa’ahou-ra’a-hia mai te ’īra’a o te ’evanelia a Iesu Mesia.

I roto i nā matahiti e piti i ma’iri a’e nei, ’ua fārerei māua te tuahine Nelson e rave rahi tauatini o ’outou ’ati a’e te ao nei. ’Ua ta’iruru māua ’e o ’outou i ni’a i te mau tahua tū’aro ’e i roto i te mau piha orira’a nō te hōtera. I roto i te reira mau vāhi ato’a, ’ua fāri’i au i te mana’o ē, tei mua vau i te aro o te mau ta’ata mā’itihia e te Fatu, ’e tē ’ite ra vau i te tupura’a ’o te ha’aputuputura’a o Iseraela i mua i tō’u mata.

Tē ora nei tātou i te tau « tā tō tātou hui tupuna i tīa’i onoono noa ».¹ Tei ni’a tātou i te mau pārahira’a i mua roa nō te ’ite mata i te mea tā te peropheta Nephi i ’ite i roto noa i te ’ōrama, ’oia ho’i, tē poura’a mai « te mana o te ’Ārenio a te Atua » « i ni’a iho ho’i i te feiā i ma’itihia ’e te Fatu ra, ’o tei purara i te mau fenua o te ao ato’a nei ; ’o te parauti’a ’e te mana o te Atua i hanahana rahi ra, ’o tā rātou ïa mauha’a »²

E au mau taea’e ’e e au mau tuahine, tei roto ’outou, i terā mau tāne, terā mau vahine, ’e terā mau tamari’i tā Nephi i ’ite. ’A feruri na i te reira !

Ta’a ’ē noa atu te vāhi tā ’outou e noho nei ’aore rā, te huru o tō ’outou orara’a, ’o Iesu Mesia tō ’outou Fa’aora, ’e te peropheta o te Atua, ’o Iosepha Semita, tō outou ïa peropheta. ’Ua fa’atōro’ahia ’oia hou te fa’atumura’ahia o teie fenua ’ei peropheta nō teie tau tu’ura’a hope’a, te hō’ē tau « e ’ore roa te hō’ē mea e tāpe’ahia atu »³ i te feiā mo’a. Tē tāmau noa nei te heheura’a i te tae mai nō ’ō mai i te Fatu ra i roto i teie ’ohipa o te fa’aho’i-fa’ahou-ra’a mai e tupu tāmau noa nei.

E aha te aura’a nō ’outou te parau ē, ’ua fa’aho’ihia mai te ’evanelia a Iesu Mesia i te fenua nei ?

Tē aura’a ra, ’oia ho’i, e nehenehe ’outou ’e tō ’outou ’utuāfare e tā’ati-’āmui-hia e a muri noa atu ! Te aura’a ra, ’oia ho’i, maoti tō ’outou bāpetizora’ahia nā te hō’ē ta’ata tei mau i te mana nō ’ō mai ia Iesu Mesia ra, ’e te ha’amaura’ahia ’ei melo nō tāna ’Ēkālesia, e nehenehe ’outou e fāna’o i te auhoara’a tāmau o te Vārua Maita’i. E arata’i ’e e pāruru ’oia ia ’outou. Tē aura’a ra, ’oia ho’i, e ’ore roa ’outou e vaiiho-noa-hia ma te tāmāhanahana ’ore ’aore rā, ma te ’ore e fāri’i i te mana o te Atua nō te tauturu ia ’outou. Tē aura’a ra, ’oia ho’i, e nehenehe te mana autahu’ara’a e ha’amaita’i ia ’outou ’a fāri’i ai ’outou i te mau ’ōro’a faufa’a ’e ’a rave ai i te mau fafaura’a ’e te Atua ’e ’a ha’apa’o ai i te reira. ’Auē ïa tūtau teie mau parau mau nō tō tātou vārua, i roto iho ā rā i teie taime vero rahi.

Tē fa’ati’a nei te Buka a Moromona i te ti’ara’a mai ’e te topara’a e piti nūna’a tumu. Tē fa’a’ite nei tō rāua ’ā’amu i te ’ōhie nō te rahira’a o te ta’ata ’ia ha’amo’e i te Atua, ’ia fa’aru’e i te mau fa’aarara’a a te mau peropheta o te Fatu, ’e ’ia ’imi i te mana, te ro’o, ’e i te mau fa’a’ana’anataera’a o te tino.⁴ ’Ua parau tāmau mai te mau peropheta nō tahito ra « i te mau mea rarahi ’e te ta’a ’ē ra i te feiā, ’o tei ’ore ïa i fa’aro’ohia e rātou ».⁵

’Aita te reira i ta’a ’ē atu i tō tātou nei ’anotau. I te roara’a o te mau matahiti, ’ua fa’aro’ohia te mau mea rarahi ’e te fa’ahiahia nā ni’a mai i te mau terōno ’ati a’e te ao nei. Terā rā, ’aita te rahira’a o te ta’ata e fāri’i nei i teie mau parau mau—te tumu, nō tō rātou ’ite ’ore i hea e ’imi ai i te reira⁶ ’aore rā, nō te mea tē fa’aro’o nei rātou i te feiā ’aita e mau nei i te tā’āto’ara’a o te parau mau, ’aore rā, nō te mea ’ua pāto’i rātou i te parau mau nō te ha’afaufa’a i te mau mea o te ao nei.

E mea māramarama te ’enemi. E rā ’ē nā te tau tōna fa’arirora’a i te maita’i ’ei ’ino ’e te ’ino ’ei maita’i.⁷ E mea pūai ri’i ’e te itoito ’e te fa’ateitei tāna mau parau poro’i.

Terā rā, e mea māere mau te huru ta’a ’ē o te mau parau poro’i a tō tātou Metua i te ao ra. ’Ia paraparau mai ’oia, e mea ’ōhie, e mea marū, ’e e mea māramarama ho’i, e’ita tātou e ’ore e māramarama iāna.⁸

’Ei hi’ora’a, i te mau taime ato’a ’a fa’a’ite ai ’oia i tāna Tamaiti fānau tahi i te ta’ata i ni’a i te fenua nei, mea iti roa tāna mau ta’o i fa’a’ohipa. I ni’a i te mou’a nō te fa’ahuru-’ē-ra’a ’ua parau te Atua ia Petero, Iakobo ’e Ioane, « Tā’u Tamaiti here teie : ’a fa’aro’o iāna ».⁹ Teie tāna mau parau i te ’āti Nephi i Bunetifula i tahito ra « inaha, ’o tā’u Tamaiti here, ’ua māuruuru roa vau iāna, ’ua ha’amaita’i ho’i au i tō’u i’oa iāna ; ’a fa’aro’o mai iāna.¹⁰ ’E ia Iosepha Semita, i roto i tāua fa’ahitira’a parau ra tei ’īriti i teie tau tu’ura’a, ’ua parau ’ōhie noa mai te Atua, « tā’u Tamaiti here teie. ’A fa’aro’o iāna ! »¹¹

Teienei, e au mau taea’e, e au mau tuahine here, ’a feruri na ē, i roto i teie nā hi’ora’a e toru i fa’ahitihia atu, nā mua noa a’e ’a fa’a’ite ai te Metua i te Tamaiti, te mau ta’ata i reira, tei roto rātou i te mata’u, i te tahi taime, tei roto i te hepohepo.

’Ua mata’u te mau ’āpōsetolo i tō rātou ’itera’a ia Iesu Mesia tei hā’atihia i te hō’ē anuanua i ni’a i te mou’a o te fa’ahuru-’ē-ra’a.

’Ua mata’u te ’āti Nephi nō te mea i vai noa nā rātou i roto i te ha’amoura’a ’e te pōiri e rave rahi mahana.

’Ua haruhia o Iosepha Semita nā te hō’ē pūai o te pōiri nā mua noa a’e ’a vetea mai ai te ra’i.

’Ua ’ite te Metua ē, ’ia hā’atihia tātou i te mana’o tapitapi ’e te mata’u, te mea o tē tauturu rahi a’e ia tātou o te fa’aro’ora’a ïa i tāna Tamaiti.

Nō te mea, ’ia ’imi ana’e tātou ’ia fa’aro’o—’ia fa’aro’o mau—e arata’ihia tātou ’ia ’ite ē, e aha tē rave i roto i te mau huru tupura’a ato’a.

Te ta’o mātāmua roa i roto i Te Parau Ha’api’ira’a ’e te mau Parau Fafau ’oia ho’i ’a fa’aro’o mai nā.¹² Tōna aura’a « ’ia fa’aro’o mā te hina’aro e ha’apa’o »¹³ Te aura’a nō te parau ’a fa’aro’o mai nā, ’oia ho’i, « ’a fa’aro’o iāna »—’ia fa’aro’o e aha tā te Fa’aora e parau nei, ’e i muri iho ’ia ha’apa’o i tāna a’ora’a. I roto i teie nā ta’o e toru— « ’A fa’aro’o iāna »—tē hōro’a nei te Atua ia tātou i te hōho’a nō te manuia, nō te ’oa’oa, ’e nō te pōupou i roto i teie orara’a. Tītauhia ia tātou ’ia fa’aro’o i te mau parau a te Fatu, ’ia fa’aro’o i te reira, ’e ’ia ha’apa’o i tāna i parau mai ia tātou !

’A ’imi ai tātou ’ia riro ’ei mau pipi nā Iesu Mesia, ’ia riro tā tātou mau tūtavara’a ’ia fa’aro’o iāna ’ei mau tūtavara’a ’ā’au tae mau. ’Ei tūtavara’a ferurihia ’e te tāmau māite tā tātou nō te fa’a’ī i tō tātou orara’a i te mau mahana ato’a i tāna mau parau, i tāna mau ha’api’ira’a, i tāna mau parau mau.

E’ita tā tātou e nehenehe e ti’aturi i te mau ha’amāramaramara’a tā tātou e ’ite i ni’a i te mau tūreiara’a tōtiare. I roto i te rahira’a miria ta’o i ni’a i te ’ītenati, ’e i roto i te hō’ē ao tei ’ī roa i te ’ohipa tapiho’ora’a, ma te ’āpitihia mai e te mau tauto’ora’a māniania ’e te ’ino a te ’enemi, e haere ti’a tātou i hea nō te fa’aro’o iāna ?

E nehenehe tātou e haere i roto i te mau pāpa’ira’a mo’a. Tē ha’api’i mai nei te reira ia tātou nō ni’a ia Iesu Mesia ’e tāna ’evanelia, te fa’ahiahia o tōna tāra’ehara, ’e te fa’anahora’a rahi nō te ’oa’oa ’e nō te fa’aorara’a a tō tātou Metua. E mea faufa’a rahi te utuhira’a i roto i te parau a te Atua i te mau mahana ato’a nō te oraora pae vārua, i roto iho ā rā i teie mau mahana ’ārepurepu rahi. ’A ’oa’oa ai tātou i te mau parau a te Mesia i te mau mahana ato’a, e parau mai te mau parau a te Mesia ia tātou nāhea ’ia pāhono i te mau fifi ’aita roa atu tātou i feruri ē, e fārerei tātou.

E nehenehe ato’a tātou e fa’aro’o iāna i roto i te hiero. Te fare o te Fatu ’o te fare ïa nō te ha’api’ira’a mai I reira te Fatu e ha’api’i ai nā roto i tāna iho ravera’a. I reira te ’ōro’a tāta’itahi e ha’api’i ai nō ni’a i te Fa’aora. I reira tātou e ha’api’i ai ’ia vāhi i te pāruru ’e ’ia paraparau pāpū a’e i te ra’i. I reira tātou e ha’api’i mai ai ’ia fa’ahapa i te ’enemi ’e ’ia fāna’o i te mana autahu’ara’a o te Fatu nō te ha’apūai ia tātou ’e ia rātou tā tātou i here. ’Auē ïa tō tātou hina’aro onoono ’ia ’imi i te ha’apūra’a i reira.

’Ia tae i te taime e ’īritihia teie mau ’ōpanira’a tau poto nō ni’a i te COVID-19, a fa’anaho nā i te hō’ē taime tāmau nō te ha’amori ’e nō te tāvini i roto i te hiero. E ha’amaita’i te mau minuti tāta’itahi o tāua taime ra ia ’outou ’e i tō ’outou ’utuāfare i te hō’ē fāito ’aore roa hō’ē mea ’ē atu e nehenehe ’ia nā reira. ’A rave i te taime nō te feruri hōhonu i te mea tā ’outou e fa’aro’o ’e e ’ite ’a vai ai ’outou i reira. ’A ani i te Atua ’ia ha’api’i ia ’outou ’ia ’īriti i te mau ra’i nō te ha’amaita’i i tō ’outou orara’a ’e i te orara’a o tei herehia e ’outou ’e o tā ’outou e tāvini nei.

I teie taime, ’aita tātou e nehenehe e haere i te hiero, nō reira, tē ani nei au ia ’outou ’ia fa’arahi i tā ’outou ’ohipara’a i roto i te ’ā’amu ’utuāfare, mai te mā’imira’a ’e te fa’ahorora’a ’ā’amu ’utuāfare. Tē fafau atu nei au ia ’outou ē, mai te mea e rave itoito ’outou i te ’ohipa o te hiero ’e te ’ā’amu ’utuāfare, e rahi atu ’e e maita’i atu tō ’outou ’aravihi ’ia fa’aro’o iāna.

E fa’aro’o ato’a tātou iāna ma te pāpū maita’i mai te mea ē, e ha’amaita’i tātou i tō tātou ’aravihi ’ia ’ite i te mau muhumuhu o te Vārua Maita’i. ’Ua hau roa atu te faufa’a i teienei ’ia ’ite ē, nāhea te Vārua ’ia paraparau mai ia ’outou. I roto i te atuara’a, ’o te Vārua Maita’i te ve’a. E tu’u mai ’oia i te mau mana’o i roto i tō ’outou ferurira’a tā te Metua ’e te Tamaiti e hina’aro ’ia fāri’i ’outou. ʼO ʼoia te tāmāhanahana. E tu’u mai ’oia i te mana’o hau i roto i tō ’outou ’ā’au. E fa’a’ite pāpū mai ’oia i te parau mau ’e e ha’apāpū i te parau mau ’a fa’aro’o ai ’e ’a tai’o ai ’outou i te parau a te Fatu.

Tē fa’a’āpī fa’ahou nei au i tā’u tāparura’a ia ’outou ’ia rave i te mau mea ato’a e tītauhia nō te fa’ananea i tō ’outou ’aravihi pae vārua ’ia fāri’i i te heheura’a.

’Ia nā reira ’outou, e tauturu te reira ia ’outou ’ia ’ite nāhea ’ia haere i mua i roto i tō ’outou orara’a, ’ia ’ite i te ’ohipa e rave i te mau taime fifi, ’e nāhea ’ia ’ite ’e ’ia ’ape i te mau fa’ahemara’a ’e te mau ha’avarera’a a te ’enemi.

’E, i te pae hope’a, e fa’aro’o tātou iāna mai te mea e ha’apa’o tātou i te mau parau a te mau peropheta, te mau hi’o, ’e te mau heheu parau. Tē fa’a’ite pāpū nei te mau ’āpōsetolo fa’atōro’ahia a Iesu Mesia iāna. Tē fa’a’ite nei rātou i te ’ē’a ’a haere ai tātou nā ni’a i tō tātou ’ē’a i roto i te mau fifi o te orara’a tahuti nei.

E aha te tupu, mai te mea ē, e fa’aro’o mau tātou, ’e e ha’apa’o i tā te Fa’aora i parau ’e tāna e parau nei i teienei nā roto i tōna mau peropheta ? Tē fafau atu nei au ē, e ha’amaita’ihia ’outou i te mana hau atu nō te ārai i te fa’ahemara’a, te mau ’arora’a, ’e te mau paruparu. Tē fafau atu nei au e tupu te temeio i roto i tō ’outou fa’aipoipora’a, te mau autā’atira’a ’utuāfare, ’e te ’ohipa i te mau mahana ato’a. ’E tē fafau atu nei au ē, e nanea atu tō ’outou ’aravihi nō te ’ite i te ’oa’oa, noa atu ē, te rahi noa atura te ’ārepurepu i roto i tō ’outou orara’a.

I teie ’āmuira’a rahi nō ’Ēperēra 2020 ’e taime ïa nō tātou nō te ha’amana’o i te hō’ē ’ohipa tei tupu ’o tei taui i te ao nei, ’A heheu atu ai mātou i teie 200ra’a o te matahiti o te ’Ōrama Mātāmua o Iosepha Semita, ’ua uiui te Peresidenira’a Mātāmua ’e te Pupu nō te Tino ’Ahuru ma piti ’āposetōlo e aha tā mātou e ti’a e rave nō te ha’amana’o tano i teie ’ohipa hō’ē roa i tupu.

’Ua fa’aō mai teie fāra’a i te Fa’aho’i-fa’ahou-ra’a mai o te ’īra’a o te ’evanelia a Iesu Mesia ’e ’ua ’avari i te tau nō te ’īra’a o te mau tau.

ʼUa uiui mātou e tiʼa ānei e fa’ati’a i te hō’ē ’ōfa’i fa’aha’amana’ora’a. Ma te ferurira’a rā i te tupura’a o te tua’ā’ai hō’ē roa ’e nā te ao nei o te ’Ōrama mātāmua, ’ua fāri’i mātou ma te māere e hāmani i te hō’ē tihi ha’amana’ora’a ’eiaha i te ’ōfa’i tarai ’aore rā i te ’ōfa’i ’arā, i te mau parau rā—te mau parau poro fa’ateniteni ’e te mo’a—pāpa’ihia, ’aita i nana’ohia i ni’a i te « papa ’ōfa’i » e nana’ohia rā i ni’a i te mau « papa ta’ata » o tō tātou ’ā’au.¹⁴

Mai te fa’anahora’ahia te ’Ēkālesia, e pae ana’e porora’a tei ha’apararehia, te hope’a ’o « Te ’utuāfare : E Poro’i i tō te Ao nei », tei vauvauhia e te peresideni Gordon B. Hinckley i te matahiti 1995.

I teienei ’a hi’ohi’o ai tātou i teie tau faufa’a roa o te tua’ā’ai o te ao nei ’e te hōpoi’a a te Fatu ’ia ha’aputuputu ia Iseraela tei purara ’ei fa’aineinera’a nō te tae-piti-ra’a mai o Iesu Mesia, mātou, te Peresidenira’a Mātāmua ’e te Pupu nō te Tino ’Ahuru ma Piti ’āposetōlo, tē ha’aparare atu nei mātou i teie poro’i. Tōna upo’o parau ’oia ho’i « Te Fa’aho’i-fa’ahou-ra’a-hia mai te ’īra’a o te ’Ēvanelia a Iesu Mesia : Hō’ē poro’i nā te ao nei nō te piti-hānere-ra’a o te matahiti ». ’Ua pāpa’ihia nā te Peresidenira’a Mātāmua ’e te Pupu nō te Tino ’Ahuru ma Piti ’āposetōlo nō Te ’Ēkālesia a Iesu Mesia i te Feiā Mo’a i te mau Mahana Hope’a Nei. Te tai’o mahana, ’o ’Ēperēra 2020 ïa. Nō te fa’aineine iā’u nō teie mahana, ’ua fa’aharuharu a’ena vau i teie poro’ira’a i roto i te Uru rā’au mo’a, i reira Iosepha Semita i ’ite mata ai nō te taime mātāmua roa i te Metua ’e te Tamaiti.

« Tē parau pāpū atu nei mātou ē ’ua here te Atua i tāna mau tamari’i nō te mau nuna’a ato’a o te ao nei. ’Ua hōro’a mai te Atua te Metua ia tātou i te fānaura’a hanahana, te ora fāito ’ore ’e te tusia tāra’ehara mure ’ore a tāna Tamaiti here, ’o Iesu Mesia. Nā roto i te mana o te Metua, ’ua ti’afa’ahou mai Iesu ’e ’ua upo’oti’a i ni’a i te pohe. ’O ’oia tō tātou Fa’aora, tō tātou Hi’ora’a ’e tō tātou Arai.

« E piti hānere matahiti i ma’iri iho nei, i te hō’ē po’ipo’i nehenene nō te fa’atupura’a rā’au nō te matahiti 1820, te tamaiti ’āpī ra ’o Iosepha Semita, ma te ’imira’a ’ia ’ite i tei hea ’ēkālesia e ’āmui atu, ’ua haere i roto i te uru rā’au nō te pure i piha’i iho noa i tōna fare i apato’erau nō te tuha’a fenua nō New York, i Marite. E mau uira’a tāna nō ni’a i te fa’aorara’a o tōna vārua ’e ’ua ti’aturi ē e arata’i te Atua iāna.

« Ma te ha’eha’a, tē parau atu nei mātou ē ’ei pāhonora’a i tāna pure, ’ua fā mai te Atua te Metua ’e tāna Tamaiti, ’o Iesu Mesia ia Iosepha Semita ’e ’ua ’āvari i te tau ‘e ti’a ai te mau mea ato’a’ (Te Ohipa 3:21) mai tei heheuhia i roto i te Bibilia. I roto i te reira ’ōrama, ’ua ha’api’i mai ’oia ē i muri a’e i te pohera’a o te mau ’āposetōlo tumu, ’ua mo’e te ’Ēkālesia o te Faufa’a ’Āpī a te Mesia i ni’a i te fenua nei. ’O Iosepha te mauiha’a nō tōna fa’aho’i-fa’ahou-ra’a mai.

« Tē ha’apāpū atu nei mātou ē i raro a’e i te arata’ira’a a te Metua ’e te Tamaiti, ’ua haere mai te mau ve’a o te ra’i e ha’api’i ia Iosepha ’e ’ua fa’anaho fa’ahou i te ’Ēkālesia a Iesu Mesia. ’Ua fa’aho’i mai ’o Ioane Bāpetizo tei ti’afa’ahou i te mana nō te bāpetizora’a utuhi ’ia mātara te hara. E toru o nā ’ahuru ma piti ’āposetōlo tumu—Petero, Iakobo, ’e Ioane—’ua fa’aho’i mai i te fa’aterera’a ’āposetōlo ’e te mau tāviri nō te ha’amanara’a o te autahu’ara’a. ’Ua haere ato’a mai vetahi, mai ia Elia, tei fa’aho’i mai i te ha’amanara’a ’ia ’āmui e a muri noa atu i te mau ’utuāfare i roto i te mau aura’a mure ’ore ’o te hau atu i te pohe.

« Tē fa’a’ite pāpū ato’a nei mātou ē ’ua fāri’i Iosepha Semita i te hōro’a ’e te mana o te Atua nō te ’īriti i te hō’ē pāpa’ira’a tahito : Te Buka a Moromona—Te tahi fa’ahou ’ite nō Iesu Mesia. Tē vai nei i roto i te mau ’api o teie pāpa’ira’a mo’a te hō’ē parau poto nō te ’ohipa iho a Iesu Mesia i rotopū i te mau ta’ata nō te mau ’api fenua tō’o’a o te rā i muri mai i tōna ti’afa’ahoura’a. Tē ha’api’i nei te reira i te fā o te orara’a ’e tē fa’ata’a nei i te haʼapiʼiraʼa tumu a te Mesia, tei te tumu ïa o teie fā. ’Ei pāpa’ira’a mo’a hoa ’āpiti nō te Bibilia, tē fa’a’ite pāpū nei te Buka a Moromona ē e mau tamaiti ’e e mau tamāhine te mau ta’ata tāhuti ato’a nā te hō’ē Metua here i te ao ra, ē e fa’anahora’a hanahana tāna nō tō tātou orara’a ’e tē paraparau ato’a nei tāna Tamaiti o Iesu Mesia i teie mahana, mai tahito ra.

« Tē parau nei mātou ē Te ’Ēkālesia a Iesu Mesia i te Feiā Mo’a i te mau Mahana Hope’a nei, tei fa’ati’ahia i te 6 nō ’Ēperēra 1830, ’o te ʼĒkālesia ïa o te Faufa’a ’Āpī a te Mesia tei fa’aho’i-fa’ahou-hia mai. ’Ua tūtauhia teie ’Ēkālesia i roto i te orara’a maita’i roa o tāna ’ōfa’i tihi tumu, ’o Iesu Mesia ’e i roto i tāna tāra’ehara mure ’ore ’e te ti’afa’ahoura’a mau. ’Ua pi’i fa’ahou Iesu Mesia i te mau ’āposetōlo ’e ’ua hōro’a ia rātou i te ha’amanara’a o te autahu’ara’a. Tē ani manihini nei ’oia ia tātou ’ia haere mai iāna ra ’e i tāna ’Ēkālesia, ’ia fāri’i i te Vārua Maita’i, te mau ’ōro’a nō te fa’aorara’a ’e ’ia roa’a i te ’oa’oa hope ’ore.

« ’Ua topa iho nei e piti hānere matahiti mai te taime ā o teie fa’aho’i-fa’ahou-ra’a mai tei fa’atupuhia e te Atua te Metua ’e tāna Tamā’iti here ’o Iesu Mesia. ’Ua mirioni te ta’ata na te ao nei tei fāri’i i te ’itera’a o teie mau ’ohipa i tupu tei tohuhia.

« Tē parau nei mātou ma te ’oa’oa ē tē tāmau noa nei te fa’aho’i-fa’ahou-ra’a mai tei fafauhia nā roto i te heheura’a e tāmau noa nei. E’ita te ao nei e riro fa’ahou mai te reira, nō te mea e ‘’āmui ai [te Atua] i te mau mea ato’a i te Mesia ra’ (Ephesia 1:10).

« Ma te fa’atura ’e te māuruuru, mātou, tāna mau ’āposetōlo, tē ani atu nei i te tā’āto’ara’a ’oia ho’i—mai tā mātou e rave nei—ē ’ua vetea te mau ra’i. Tē ha’apāpū atu nei mātou ē e fa’a’ite mai te Atua i tōna hina’aro nō tāna mau tamaiti ’e tāna mau tamāhine. Tē fa’a’ite pāpū nei mātou ē, te feiā e tuatāpapa nā roto i te pure i te poro’i nō te Fa’aho’i-fa’ahou-ra’a mai ’e ’e rave ma te fa’aro’o e ha’amaita’ihia rātou i te roa’ara’a i tō rātou iho ’itera’a pāpū nō tōna hanahana ’e nō tāna fā i te fa’aineinera’a i te ao nei nō te tae-piti-ra’a mai o tō tātou Fatu ’e Fa’aora, ’o Iesu Mesia tei fafauhia ».¹⁵

Te mau taea’e ’e te mau tuahine here, teie ïa tā mātou poro’i nō te piti-hānere-ra’a i tō te ao nei nō ni’a i te fa’aho’i-fa’ahou-ra’a-hia mai o te ’Evanelia a Iesu Mesia i roto i tōna ’īra’a. ’Ua ’īritihia te reira nā roto e 12 reo. E nā muri mai te tahi atu mau reo i muri nei. E roa’a ’oi’oi te reira i ni’a i te tahua natirara a te ’Ēkālesia, ’o tā ’outou e nehenehe e fāri’i hō’ē hōho’a. ’A tuatāpapa i te reira ’ei ta’ata hō’ē ’e e te mau melo o tō ’outou ’utuāfare ’e tō ’outou mau hoa. ’A feruri i te mau parau mau ’e ’a feruri i tā teie mau parau mau e fa’atupu mai i ni’a i tō ’outou orara’a mai te mea e fa’aro’o ’outou i te reira, e ha’afatafata i tō ’outou tari’a i te reira ’e e ha’apa’o i te mau fa’auera’a ’e te mau fafaura’a o te ’āpe’e mai i te reira.

’Ua ’ite au ē, ’ua fa’atōro’a-a’ena-hia o Iosepha Semita ’ei peropheta ’o tā te Fatu i mā’iti nō te ’īriti i teie tau tu’ura’a hope’a. Nā roto iāna, ’ua fa’aho’i-fa’ahou-hia mai te ’Ēkālesia a te Fatu i te fenua nei. ’Ua tītiro o Iosepha i tōna ’itera’a pāpū i tōna toto. E here rahi tō’u iāna ’e te fa’atura iāna !

Tē ora nei te Atua ! ’O Iesu te Mesia ! ‘Ua fa’aho’i-fa’ahou-hia mai Ta’na Ekalesia! Tē ara nei ’oia ’e tōna Metua, tō tātou Metua i te ao ra, i ni’a iho ia tātou. Tē fa’a’ite pāpū nei au i te reira i te i’oa mo’a o Iesu Mesia, ’āmene.