’A haere mai nō te ’ite i te tā’amura’a

Terā rā, ’ua hau atu te rirora’a ’ei pipi nā Iesu Mesia i te paraparaura’a ’e te a’ora’a i te Mesia. Nā te Fa’aora iho i fa’aho’i mai i tāna ’Ēkālesia nō te tauturu ia tātou i ni’a i te ’e’ā, nō te riro-rahi-atu-ā-ra’a mai iāna te huru. Tē hōro’a nei te fa’anahora’a o Te ’Ēkālesia a Iesu Mesia i te Feiā Mo’a i te mau Mahana Hope’a nei i te rāve’a nō te ha’api’ipi’i i te mau ’ite niu o te ti’ara’a pipi. Maoti te ’ohipara’a i roto i te ’Ēkālesia tātou e ha’api’i ai ’ia ’ite ’e ’ia ’ohipa mai te au i te mau muhumuhu a te Vārua mo’a. E ha’api’i tātou i te vai ineine nō te toro i te rima nō te aumihi ’e te hāmani maita’i ia vetahi ’ē.

E tauto’ora’a teie nō te orara’a tā’āto’a, e tītau te reira i te ha’api’ipi’ira’a.

E ’ohipa te mau mā’ona rahi e rave rahi roa hora nō te ha’api’ipi’i i te mau ’ite niu o tā rātou tū’aro. Te mau tuati ma’i, te mau rave ’ohipa nā ni’a i te natirara, te mau ’aivāna’a ’ātōmī, ’e ’o vau iho nei e tata’u nei ia Harriet i te pae nō te tunura’a mā’a, e maita’i mai tātou ’e e ’aravihi ho’i ’ia ha’api’ipi’i itoito tātou i tō tātou tōro’a.

’Ei tōmānā manureva, pinepine au i te ha’api’ipi’i i te mau pairati i ni’a i te hō’ē manureva ha’avare—e mātini huru vāna’a e fa’ahōho’a i te rerera’a manureva. ’Aita te mātini e tauturu noa i te mau pairati ’ia ha’api’i i te mau ’ite niu nō te rerera’a ; e ha’api’i ato’a rā rātou ’ia fa’aruru i te mau ’ohipa tīa’i-’ore-hia i roto i te manureva mau, ’e ’ia rave rātou i te mau fa’aotira’a.

E tano ato’a te reira mau parau tumu nō te mau pipi a Iesu Mesia.

Nā te ’āmui-itoito-ra’a i roto i te ’ohipa a te ’Ēkālesia a Iesu Mesia ’e te mau rāve’a rahi ’e rau i reira, e tauturu ia tātou ’ia fa’aineine maita’i a’e nō te mau tauira’a o te orara’a, noa atu ā te huru ’e te teimaha o te reira. ’Ei melo nō te ’Ēkālesia, tē fa’aitoitohia nei tātou ’ia utuhi ia tātou i roto i te mau parau a te Atua nā roto i tāna mau peropheta, nō tahito rā ’e nō teienei. Nā roto i te pure ateate ’e te ha’eha’a i tō tātou Metua i te Ao ra, e ha’api’i tātou ’ia ta’a maita’i i te reo o te Vārua mo’a. E fāri’i tātou i te mau pi’ira’a ’ia tāvini, ’ia ha’api’i, ’ia fa’anaho, ’ia aupuru ’e ’ia fa’atere. I teie mau rāve’a e ti’a ai ia tātou ’ia tupu i te rahi i te pae vārua, i te pae nō te ferurira’a ’e i roto i tō tātou huru.

E tauturu te reira ia tātou ’ia fa’aineine nō te rave ’e nō te ha’apa’o i te mau fafaura’a mo’a e ha’amaita’i ia tātou i roto i teie nei orara’a ’e te orara’a nō muri iho.

Tē ani nei mātou i te mau tamari’i ato’a a te Atua ’ati a’e i te ao nei ’ia ’āmui mai i roto i teie tauto’ora’a rahi. Haere mai e hi’o ! Noa atu ā teie tau fifi nō te ma’i COVID-19, fārerei ana’e nā ni’a i te natirara. Fārerei i tā tātou mau misiōnare nā ni’a i te natirara. ’Ia ’ite ’outou iho e aha mau teie ’Ēkālesia ! ’Ia oti teie tau fifi, fārerei ana’e i roto i tō mātou mau fare ’e tō mātou mau vāhi ha’amorira’a !

Tē ani nei au ia ’outou ’ia haere mai e tauturu ! ’A haere mai e tāvini nā muri ia mātou, e aupuru i te mau tamari’i a te Atua, e pe’e i te mau ta’ahira’a o te Fa’aora ’e e fa’ariro i teie nei ao ’ei vāhi maita’i a’e.

’A haere mai nō te ’ite i te tā’amura’a ! E pūai atu ā mātou ia ’outou. ’E e maita’i atu ā ’outou, e hāmani maita’i atu ā ’e e ’oa’oa rahi atu ā. E hōhonu atu ā tō ’outou fa’aro’o ’e te tupu atu ā—e pāto’i atu ā i te mau ’āoira’a ’e te mau fifi tīa’i-’ore-hia o te orara’a.

’E nāhea i te ha’amata ? E rave rahi rāve’a.

Tē ani nei mātou ia ’outou ’ia tai’o i te Buka a Moromona. ’Aita tā ’outou e buka ra, e nehenehe ’outou e tai’o i ni’a i te ChurchofJesusChrist.org⁴ ’aore rā e fa’auta uira i te fa’anahora’a Buka a Moromona. Te Buka a Moromona, ’o te tahi atu ïa ’ite nō Iesu Mesia ’e e hoa nō te Faufa’a Tahito ’e te Faufa’a ’Āpī. ’Ua here mātou i teie mau pāpa’ira’a mo’a ato’a, ’e te ha’api’i nei mātou i roto i te reira.

Tē ani nei mātou ia ’outou ’ia hi’ohi’o i te ComeuntoChrist.org nō te ’ite e aha tā te mau melo o te ’Ēkālesia e ha’api’i nei ’e e ti’aturi nei.

’A ani i te mau misiōnare ’ia paraparau ia ’outou nā ni’a i te natirara ’aore rā i roto i te ’ōmo’e o tō ’outou fare mai te mea e nehenehe—e poro’i nō te tīa’ira’a ’e te fa’aorara’a tā rātou. Teie mau misiōnare, ’o tā mātou mau tamaiti iti ïa ’e te mau tamāhine iti e tāvini nei i te mau vāhi rau ’ati a’e i te ao nei, tē fa’atusia nei rātou i tō rātou taime ’e te moni.

I roto i te ’Ēkālesia a Iesu Mesia, e ’ite mai ’outou i te ’utuāfare ta’ata ’aita i ta’a ’ē roa ia ’outou. E ta’ata tei hina’aro i tā ’outou tauturu ’e ’o tē hina’aro e tauturu ia ’outou, ’a tūtava ai ’outou ’ia tae i tō ’outou huru maita’i roa a’e—te ta’ata tā te Atua i hāmani ia ’outou ’ia riro.

E mana’o paha ’outou ē : « ’Ua hape au i roto i tō’u orara’a. ’Aita vau e mana’o ē, e tupu mai terā mana’o tā’amura’a i te ’Ēkālesia a Iesu Mesia. E’ita te Atua e ha’apa’o mai i te ta’ata mai iā’u nei ».

Tē ha’apa’o rahi nei rā Iesu te Mesia i te mau tamari’i tāta’itahi a te Atua, noa atu ā ’o ’oia « te Ari’i o te mau ari’i »,⁵ te Mesia a te ’āti Iuda, « te Tamaiti a te Atua ora ».⁶ Tē ha’apa’o nei ’oia noa atu ā te ti’ara’a o te ta’ata—noa atu ā te veve ’e te moni rahi, te mau hapehape ’e te maita’i. I roto i tōna orara’a i te tāhuti nei, ’ua tāvini te Fa’aora i te mau ta’ata ato’a : te ta’ata ’oa’oa ’e tei manuia, te ta’ata fāfati ’e tei mo’e ’e te ta’ata ’aita tōna e tīa’ira’a. Pinepine roa te ta’ata tāna i tāvini ’e i aupuru, e ’ere ïa i te ta’ata ti’ara’a teitei ’e te nehenehe ’e te moni. Pinepine roa te ta’ata tāna i fa’ateitei, ’aore re’a tāna nō te fa’aho’i mai maori rā te hō’ē noa māuruuru, te ’ā’au ha’eha’a ’e te hina’aro ’ia fa’aro’o.

Mai te mea pa’i ’ua tāvini Iesu i roto i tōna orara’a tāhuti nei i « te taea’e iti ha’iha’i »,⁷ e aha ïa ’ōna e ’ore ai e here ia rātou i teie mahana ? ’Aita ānei e pārahira’a i roto i tāna ’Ēkālesia nō te mau tamari’i ato’a a te Atua ? Nō rātou ato’a tē mana’o ra e ’ere rātou i te mea ti’amā, ’ua mo’ehia rātou ’aore rā tē vai ’ōtahi ra ?

’Aita e fāito maita’i rahi tei tītauhia ’ia tāpae nō te fāri’i i te maita’i o te Atua. ’Aita e tītauhia ’ia pūai maita’i tā ’outou pure mai te hō’ē ’ōrero ’aore rā ’ia tano maita’i te tarame nō te tāpae i ni’a i te ra’i.

Te parau mau, ’aita tō te Atua terā mana’o fa’anavenave⁸—tā te ao e ha’afaufa’a nei, ’aita hō’ē a’e faufa’a nōna. ’Ua ’ite ’oia i tō ’outou ’ā’au, ’e ’ua here ’oia ia ’outou noa atu ā te ti’ara’a, te faufa’a moni rahi ’aore rā te rahira’a feiā ’āpe’e i ni’a ia Instagram.

’Ia fāriu tō tātou ’ā’au i ni’a i tō tātou Metua i te Ao ra ’e ’ia ha’afātata tātou iāna, e putapū tātou i tōna ha’afātatara’a mai ia tātou nei.⁹

E mau tamari’i here tātou nāna.

’O rātou ato’a ho’i e pāto’i nei iāna.

’O rātou ato’a ho’i, mai te tamari’i onoono ’e te fa’aro’o ’ore ra, e riri i te Atua ’e i tāna ’Ēkālesia, ’e ’ua rave atu ra i tāna mau tauiha’a, ’a tuō ai nā roto i te ’ōpani ē, tē haere ra rātou, e’ita e ho’i fa’aho’i mai.

’Ia haere te hō’ē tamari’i i rāpae i te fare, ’aita paha ’oia e ’ite ra i te pe’ape’a o te mau metua e hi’o ra nā roto i te ha’amāramarama. Ma te ’ā’au marū, tē hi’o nei rātou i tā rātou tamaiti ’aore rā tamāhine tē haere ra—ma te tīa’i ē, e ha’api’i mai teie tama iti i te tahi mea i roto i teie ’ohipa ’oto rahi ’e penei a’e e ’ite mai ’oia i te orara’a ma te mata ’āpī—’e e ho’i mai ’oia i te hope’a.

Mai te reira ato’a nō tō tātou Metua here i te Ao ra. Tē tīa’i nei ’oia i tō tātou ho’ira’a.

Tē tīa’i nei tō tātou Fa’aora i tō ’outou ho’ira’a, ma te roimata o te here ’e te aumihi. Noa atu ā tō ’outou mana’o ātea i te Atua, e ’ite mai ’oia ia ’outou ; e tupu tona mana’o aumihi ia ’outou ’e e horo atu ’oia e tauahi ia ’outou.¹⁰

’A haere mai nō te ’ite i te tā’amura’a.

E mau rātere tātou e haere ra i te hō’ē vāhi mo’a nā ni’a i te ’ē’a o te tāhuti nei, e tere ’imira’a i te aura’a o te mau mea ’e te parau mau hope roa. Pinepine tātou i te ’ite noa i te purūmu i mua noa mai ia tātou—’aita tātou e ’ite nei tē haere ra te mau tīpu’ura’a i hea. ’Aita tō tātou Metua here i te Ao ra i hōro’a ia tātou i te mau pāhonora’a ato’a. Tē tītau nei ’oia ’ia feruri tātou i te mau mea e rave rahi nō tātou iho. Tē tītau nei ’oia ’ia ti’aturi tātou—noa atu ā e taime fifi nō te reira.

Tē tītau nei ’oia ’ia ti’a mai tātou i ni’a ’e ’ia ha’apāpū ri’i ā i tā tātou fa’aotira’a—ha’apūai i te hina’aro—’ia tu’u i te ’āvae i mua.

Mai te reira tātou e ha’api’i ai ’e e tupu ai.

’Ua hina’aro mau ānei tātou ’ia tatara-hu’ahu’a-hia mai te mau mea ato’a ? ’Ua hina’aro mau ānei tātou ’ia pāhonohia mai te mau uira’a ato’a ? ’Ia rēnihia te mau tāpaera’a ato’a ?

I tō’u mana’o e fiu ’oi’oi paha te rahira’a o tātou i teie huru fa’aterera’a pōihu. Tē ’apo nei tātou i te mau ha’api’ira’a faufa’a rahi maoti te mau ’ohipa e rātere tātou i roto i te orara’a. Nā roto i te ’apora’a i te ha’api’ira’a mai roto i tā tātou mau hape. Nā roto i te tātarahapara’a ’e te ’itera’a tātou iho ē, « e ’ore roa te peu ’ino i te ’oa’oa ».¹¹

’Ua pohe Iesu Mesia, te Tamaiti a te Atua, ’ia ’ore tā tātou mau hape ’ia fa’ahapa ia tātou ’e ’ia tāpe’a a muri noa atu i tō tātou haerera’a i mua. Maoti ’oia tātou e nehenehe ai e tātarahapa, ’e tā tātou mau hape e nehenehe ai e riro mai ’ei ’ōfa’i ta’ahira’a i te hanahana rahi a’e ra.

’Eiaha ’outou e haere ’ōtahi noa i ni’a i te ’ē’a. ’Aita tō tātou Metua i te Ao ra e vaiiho nei ia tātou ’ia ’ōvere i roto i te pōiri.

Nō reira, i te tau fa’atupura’a rā’au nō 1820, ’ua fā mai ’oia ’e tāna Tamaiti Iesu Mesia, i te taure’are’a ra ia Iosepha Semita.

’A feruri ri’i na i te reira. ’Ua fā mai te Atua o te ra’i nui ātea i te hō’ē ta’ata !

’O te fārereira’a mātāmua ïa i roto ia Iosepha ’e te Atua, ’e te tahi ato’a mau tino nō te ra’i mai. E rave rahi mau parau tā teie mau tino hanahana i parau iāna tei pāpa’ihia i roto i te mau pāpa’ira’a mo’a a Te ’Ēkālesia a Iesu Mesia i te Feiā Mo’a i te mau Mahana Hope’a nei. E mea ’ōhie ia noa’a mai te reira. E nehenehe te mau ta’ata ato’a e tai’o ’e e ha’api’i nō rātou iho i te poro’i a te Atua nō tātou i tō tātou nei ’anotau.

Tē ani nei mātou ia ’outou ’ia tuatāpapa ’outou iho i te reira.

E mea huru ’āpī Iosepha Semita ’a fāri’i ai i teie mau heheura’a. Te rahira’a tei tae mai nā mua a’e i tōna 30 matahiti.¹² ’Aita tōna ’ite rahi roa, ’e nō vetahi, e au paha ’oia i te mā’ua nō te riro mai ’ei peropheta nā te Fatu.

Noa atu rā, ’ua pi’i te Fatu iāna—mai te au i te fa’anahora’a e ’itehia i roto i te mau pāpa’ira’a mo’a.

’Aita te Atua i tīa’i i tē hō’ē ta’ata fāito maita’i roa nō te fa’aho’i mai i tāna ’evanelia.

’Āhani ’oia i nā reira, tē tīa’i noa ra ïa ’oia.

Mai ia ’outou ’e iā’u nei ato’a ’o Iosepha. Noa atu ’ua rave Iosepha i te tahi mau hape, ’ua fa’a’ohipa rā te Atua iāna nō te rave i tāna mau ’ōpuara’a rahi.

Pinepine te peresideni Thomas S. Monson e parau i teie mau parau : « Te taʼata tā te Fatu e piʼi, tā te Fatu ïa e faʼaʼaravihi ».¹³

’Ua paraparau te ’āpōsetolo Paulo i te feiā mo’a i Korinetia : « E feruri na i tō ’outou pi’ira’ahia, e au mau taea’e e au mau tuahine : ’aita re’a e ta’ata pa’ari i te hi’ora’a a te ta’ata nei, ’aita re’a e ta’ata mana, ’aita re’a e ta’ata teitei fānau i parauhia ».¹⁴

Tē fa’a’ohipa nei te Atua i te feiā paruparu ’e te mea noa nō te fa’atupu i tāna mau ’ōpuara’a ; e fa’a’itera’a pāpū teie parau mau ē, nā te mana o te Atua, e ’ere nā te ta’ata, e fa’atupu nei i tāna ’ohipa i ni’a i te fenua nei.¹⁵

I te fāra’a te Atua ia Iosepha Semita, ’ua fa’a’ite ’oia i tāna Tamaiti, ia Iesu Mesia ma te parau ē : « ’A fa’aro’o iāna ! »¹⁶

Nō reira te toe’a o tōna orara’a ’ua fa’aro’o Iosepha iāna ’e ’ua pe’e ho’i iāna.

Mai ia Iosepha, e ha’amata tō tātou ti’ara’a pipi ma te fa’aotira’a e fa’aro’o ’e e pe’e i te Fa’aora Iesu Mesia.

’Ua hina’aro ’outou i te pe’e iāna, ’a putuputu i tō ’outou fa’aro’o ’e ’a rave i ni’a ia ’outou i tāna satauro.

E ’ite mai ’outou ē, e tā’amura’a mau tō ’outou i tāna ’Ēkālesia—e vāhi māhanahana ’e e vāhi fāri’ira’a ’o tā ’outou e nehenehe e tomo atu i roto i te ’imira’a i te ti’ara’a pipi ’e te ’o’a’oa.

Maita’i ē, i roto i teie matahiti nō te piti-hānere-ra’a o te ’Ōrama mātāmua, ’ia feruri tātou ’e ’ia ’apo ho’i tātou i te ha’api’ira’a mai roto i te Fa’aho’i-fa’ahou-ra’a o te ’Ēkālesia a Iesu Mesia, e ’ite mai tātou ē, e ’ere te reira i te hō’ē ’ohipa rahi noa i tupu. E tuha’a faufa’a rahi tā ’outou ’e tā’u nei i roto i teie ’ā’amu rahi e tupu noa ra.

E aha ïa tā ’outou tuha’a ’e tā’u nei ?

’O te ha’api’ira’a ïa mai roto mai ia Iesu Mesia. Tuatāpapa i tāna parau. Fa’aro’o iāna ’e pe’e iāna nā roto i te ’āmui-pāpū-ra’a i roto i teie ’ohipa rahi. Tē ani nei au ia ’outou ’ia haere mai nō te ’ite i te tā’amura’a !

’Aita i tītauhia i te fāito maita’i roa. Tei tītau-noa-hia, ’o te hina’aro ïa e fa’arahi i tō ’outou fa’aro’o ’e e ha’afātata atu ā iāna i te mahana tāta’itahi.

Tā tātou tuha’a, ’oia ho’i, e here ’e e tāvini i te Atua, ’e e here ’e e tāvini i te mau tamari’i a te Atua.

’A nā reira ai ’outou, e hā’ati te Atua ia ’outou i tōna here, te ’oa’oa ’e te arata’ira’a pāpū i roto i teie orara’a, noa atu ā te mau vaira’a fifi rahi ’e te rahi atu ā.

Tē parau pāpū nei au nō te reira ma te vaiiho ia ’outou i tā’u nei ha’amaita’ira’a, nō tō’u māuruuru rahi ’e te here ia ’outou tāta’itahi, i te i’oa mo’a o tō tātou Fa’aora, tō tātou ’Orometua—i te i’oa o Iesu Mesia, ’āmene.