Te mau fare maita’i a’e

’Aita i maoro a’e nei, ’ua haru tō’u mata i ni’a i te hō’ē tāpura parau fa’atīani i Roto Miti. Tē fa’atīani ra te reira i te hō’ē taiete ho’o tauiha’a fare ’e te fa’anahora’a nō roto i te fare. E mea ’ōhie roa te parau, tē nā ’ō ra, « nō te tāvini i te mau fare maita’i a’e i Roto Miti ».

E mea au roa te parau poro’i—e aha te hō’ē « fare maita’i a’e ? » ’Ua feruri pāpū vau i taua uira’a ra, nō ni’a iho ā rā i te mau tamari’i tā māua o Kathy i ha’apa’o ’e te mau tamari’i tā rātou e ha’apa’o nei i teie mahana. Mai te mau metua i te mau vāhi ato’a, ’ua ha’ape’ape’a māua ’e ’ua pure nō tō māua ’utuāfare. Tē nā reira noa nei ā māua. Tē hina’aro pāpū nei māua i te mea maita’i roa nō rātou. Nāhea e nehenehe ai ia rātou ’e i tā rātou mau tamari’i ’ia ora i roto i te mau fare maita’i a’e ? ’Ua feruri au i te mau fare o te mau melo o te ’Ēkālesia tā māua o Kathy i fāna’o i fārerei. ’Ua anihia māua ’ia haere i roto i te mau fare i Korea ’e i Kenia, i te mau fenua Philipino ’e i Peru, i Laos ’e i Latvia. Tē hina’aro nei au e fa’a’ite atu ia ’outou e maha mana’o nō ni’a i te mau fare maita’i.

’A tahi, i te hi’ora’a a te Fatu, te ha’amaura’a i te mau fare maita’i a’e, tei te huru ïa o te mau ta’ata e ora ra i reira. ’Aita teie mau fare i ha’amaita’ihia ma te huru faufa’a ’aore rā ’ia vai maoro nā roto i tō rātou mau tauiha’a i roto, ’aore rā, tō rātou moni ho’o, ’aore rā, te ti’ara’a tōtiare o te mau ta’ata e fatu ra i te reira. Te huru maita’i a’e o te hō’ē fare o te hōho’a ïa o te Mesia e ’itehia i roto i te feiā e noho ra i roto. Te mea faufa’a a’e ’o te fa’anahora’a roto ïa o te mau vārua o te mau ta’ata i roto, ’eiaha tōna iho huru hāmanira’a.

E roa’a teie mau huru tō te Mesia i « te roara’a o te tau »¹ nā roto i te hō’ē haerera’a i mua ’ōpuahia i ni’a i te ’ē’a o te fafaura’a. E fa’a’una’una te mau huru mai tō te Mesia i te orara’a o te feiā e tūtava ’ia ora ma te maita’i. E fa’a’ī te reira i te fare i te māramarama o te ’evanelia, noa atu ē, e tahua repo ’aore rā, e tahua maremora. Noa atu ē, ’o ’outou ana’e i roto i tō ’outou fare ’o tē ha’apa’o nei i te tītaura’a ’ia « ’imi i teie mau mea »,² e nehenehe ’outou e tauturu i te fa’a’īra’a i tō ’outou fare ’utuāfare i te mau tauiha’a fare pae vārua.

E pe’e tātou i te a’ora’a a te Fatu ’ia « ha’amau nā ia [tātou iho] ; ’a fa’aineine i te mau mea ato’a e hina’arohia ra ; ’e ’a ha’amau i te hō’ē fare » nā roto i te fa’anahora’a, te fa’aineinera’a, ’e te ha’amaura’a i tō tātou orara’a pae vārua, ’eiaha i tā tātou ’ohipa ho’ora’a fenua. Mai te mea ē, e tāmau noa tātou i te haere nā ni’a i te ’ē’a o te fafaura’a o te Fa’aora, e riro mai tō tātou fare « ’ei fare nō te hanahana, ’ei fare nō te ha’apa’o, [’e] ’ei fare ho’i nō te Atua ».³

Te piti, te feiā e noho i roto i te mau fare maita’i a’e, e fa’ata’a rātou i te taime nō te tuatāpapa i te mau pāpa’ira’a mo’a ’e i te mau parau a te mau peropheta ora i te mau mahana ato’a. ’Ua ani manihini mai te peresideni Russell M. Nelson ia tātou ’ia « taui » ’e ’ia « fa’a’āpī » i tō tātou mau fare nā roto i te tuatāpapara’a i te ’evanelia.⁴ ’Ua ’ite tāna anira’a manihini ē, tei roto i te mau fare maita’i a’e te ’ohipa marū ’e te faufa’a o te tupura’a i te rahi o te ta’ata iho ’e te fa’a’āpīra’a i tō tātou mau paruparu. Te tātarahapara’a i te mau mahana ato’a, ’o te hō’ē ïa mauiha’a tauira’a, ’o te tauturu ia tātou ’ia maita’i a’e, ’ia here rahi atu, ’e ’ia hāro’aro’a rahi atu. ’Ia tuatāpapa tātou i te mau pāpa’ira’a mo’a, nā te reira e ha’afātata ia tātou i te Fa’aora, ’e nā tōna here ’e te aroha hōro’a noa e tauturu ia tātou i roto i tō tātou tupura’a i te rahi.

Tē fa’ati’a nei te Bibilia, te Buka a Moromona, ’e te Poe Tao’a Rahi i te mau ’ā’amu o te mau ’utuāfare, nō reira, e’ita e māerehia ē, terā mau buka hanahana, e mau buka arata’i ïa ’aita e fa’aaura’a nō te hāmani i te mau fare nehenehe roa a’e. Tē fa’ati’a nei rātou i te mau ha’ape’ape’ara’a o te mau metua, te ’ati rahi o te fa’ahemara’a, te upo’oti’ara’a o te parauti’a, te mau tāmatara’a o te o’e ’e te ’auhune, ’e te mau ’ohipa ri’ari’a o te tama’i ’e te mau maita’i o te hau. Tē fa’a’ite tāmau mai nei te mau pāpa’ira’a mo’a ia tātou ē, nāhea te mau ’utuāfare e manuia ai maoti te hō’ē orara’a parauti’a, ’e nāhea ho’i rātou e topa ai mai te mea ē, e tāmau noa rātou i roto i te tahi atu mau haere’a.

Te toru, tē pe’e nei te mau fare nehenehe a’e i te hōho’a i hāmanihia e te Fatu nō tōna fare nehenehe a’e, te hiero. E ha’amata te patura’a o te hō’ē hiero nā roto i te mau ta’ahira’a tumu—tāmā i te uru aihere ’e e fa’anivo i te fenua. Terā mau tūtavara’a mātāmua nō te fa’aineine ïa i te fenua, e nehenehe e fa’aauhia i te ha’apa’ora’a i te mau fa’auera’a tumu. Te mau fa’auera’a ’o te niu ïa e patuhia ai te ti’ara’a pipi. E arata’i te ti’ara’a pipi pāpū ia tātou ’ia pa’ari, ’ia vai maite, ’e ’ia vai ’āueue ’ore,⁵ mai te ’āuri hā’ati nō te hō’ē hiero. E tauturu teie rā’au hā’ati pāpū i te Fatu ’ia tono mai i tōna Vārua nō te taui i tō tātou ’ā’au.⁶ Te fāri’ira’a i te hō’ē tauira’a rahi o te ’ā’au, e au ïa mai te tu’u-fa’ahou-ra’a i te mau mea nehenehe i roto i te hō’ē hiero.

Mai te mea ē, e tāmau noa tātou ma te fa’aro’o, e taui marū noa te Fatu ia tātou. E fāri’i tātou i tōna hōho’a i roto i tō tātou huru, ’e e ha’amata tātou i te fa’a’ite i te here ’e i te nehenehe o tōna huru.⁷ ’A riro mai ai tātou mai iāna te huru, e au ra tei tō tātou iho fare tātou i roto i tōna fare, ’e e au ra iāna tei te fare ’oia i roto i tō tātou.

E nehenehe tātou e tāpe’a noa i te tā’atira’a piri roa o tō tātou fare i tōna, nā roto i te fa’ati’amāra’a ia tātou ’e te fa’a’ohipa-pinepine-ra’a tātou i te hō’ē parau fa’ati’a nō te hiero, ’a fa’ati’a mai ai te huru orara’a. Mai te mea e nā reira tātou, e vai ato’a mai te mo’ara’a o te fare o te Fatu i roto i tō tātou fare.

E mea fātata roa mai te hiero nehenehe nō Roto Miti. Nā te mau pionie i patu ma te fa’a’ohipa i te mau mauha’a tahito, te mau mātēria nō te fenua iho, ’e te ’ohipa teimaha hope’a ’ore, ’ua hāmanihia te hiero mai te matahiti 1853 e tae atu i te matahiti 1893. Te mea maita’i roa a’e tā te mau melo mātāmua o te ’Ēkālesia i ti’a ’ia hōro’a i roto i te ’ohipa mātini, te hāmanira’a fare, ’e te fa’anahora’a o roto o te fare, ’ua fa’atupu te reira i te hō’ē ’ohipa fa’ahiahia tei ’itehia nā te rahira’a mirioni ta’ata.

Fātata e 130 matahiti i ma’iri, mai te taime ’a ha’amo’ahia ai te hiero. Mai tā Elder Gary E. Stevenson i parau inanahi ra, te mau parau tumu pae mātini tei fa’a’ohipahia nō te hāmani i te hiero, ’ua monohia ïa i te mau mea ’āpī a’e ’e te pāruru maita’i a’e. ’Ia ’ore ana’e te pae mātini o te hiero e ha’amaita’ihia ’e te mau paruparu i te pae o te tino fare e tātā’ihia, tē ’ōfati ra ïa te reira i te ti’aturira’a o te mau pionie, tei rave i te mau mea ato’a e ti’a ia rātou ’ia rave, ’e ’ua vaiiho mai i te ’atu’atura’a o te hiero i te mau u’i nō muri mai.

’Ua ha’amata te ’Ēkālesia i te hō’ē ’ōpuara’a fa’a’āpīra’a e maha matahiti te maoro, nō te ha’amaita’i i te pa’ari o te hiero i te pae hāmanira’a ’e i te pae pārurura’a i te mau ’ati ’aueuera’a fenua.⁸ E ha’apa’arihia te niu, te mau tahua, ’e te mau papa’i. Nā te ’itera’a maita’i a’e i te pae o te mau rāve’a e vai nei i teie ’anotau, e tauturu ’ia tu’u i te hiero i ni’a i te mau tītaura’a o teie tau. E’ita e ti’a ia tātou ’ia ’ite i te mau tauira’a i te pae hāmanira’a, tō rātou rā mau hope’ara’a, tē vai mau ra ïa ’e te faufa’a ho’i. I roto i teie mau ’ohipa ato’a, e tāpe’a-māite-hia te nehenehe o te mau fa’anahora’a o roto o te hiero.

E ti’a ia tātou ’ia pe’e i te hi’ora’a tei hōro’ahia mai ia tātou nā te fa’a’āpīra’a o te hiero nō Roto Miti, ’e ’ia rave i te taime nō te hi’opo’a i tō tātou iho hāmanira’a pae vārua nō te ha’apāpū ē, tē ti’a noa ra te reira. Te hi’opo’ara’a tāmau ’ia tātou iho, ’āpitihia i te anira’a i te Atua ē, « E aha tē toe ra iā’u ? »⁹ e nehenehe te reira e tauturu ia tātou tāta’itahi i te hāmanira’a i te hō’ē fare nehenehe a’e.

Te maha, ’ua riro te mau fare maita’i a’e ’ei mau ha’apūra’a i mua i te mau vero o te orara’a. ’Ua fafau mai te Fatu ē, te feiā e ha’apa’o i te mau fa’auera’a a te Atua « e maita’i ïa i te fenua nei ».¹⁰ Te ruperupe o te Atua o te mana ïa ’ia haere i mua noa atu te mau fifi o te orara’a nei.

I te matahiti 2002, ’ua ha’api’i mai au i te hō’ē ha’api’ira’a faufa’a roa nō ni’a i te mau fifi. Tei Asunción, Paraguay au, ’ua fārerei au i te mau peresideni titi nō te ’oire. I taua taime ra, tei roto o Paraguay i te hō’ē fifi moni rahi, ’e e rave rahi melo o te ’Ēkālesia tei fifi roa, ’aita e nava’i fa’ahou te orara’a. ’Aita vau i ho’i i Amerika apato’a mai te tau mai ā o tā’u misiōni ’e ’aita vau i tae a’e nei i Paraguay. Tau hepetoma noa tō’u tāvinira’a i roto i te reira Peresidenira’a ārea. Ma te taiā nō tō’u ’aravihi ’ore ’ia hōro’a i te arata’ira’a i te reira mau peresideni titi, ’ua ui au ia rātou ’ia fa’a’ite mai iā’u e aha te mau mea i tere maita’i i roto i tā rātou titi. ’Ua parau mai te peresideni titi mātāmua iā’u nō ni’a i te mau mea i tere maita’i. ’Ua fa’ahiti mai tō muri iho i te mau mea tei tere maita’i ’e te tahi mau fifi. ’Ia tae mātou i ni’a i te peresideni titi hope’a, ’ua fa’ahiti noa mai ’oia i te tahi mau tītaura’a fifi. ’A fa’ata’a mai ai te mau peresideni titi i te ’ā’ano o te tupura’a o te ’ohipa, ’ua haere noa tō’u pe’ape’a i te rahi, fātata roa ’aita hō’ē rāve’a fa’ahou, nō ni’a i te mea tā’u e parau.

I te taime iho ā ’a fa’aoti ai te peresideni titi hope’a i tāna parau, ’ua tae mai te hō’ē mana’o i roto iā’u : « Elder Clayton, ’a ui ia rātou i teie uira’a : ‘E te mau peresideni, i roto i te mau melo i roto i tā ’outou titi e aufau nei i te tuha’a ’ahuru ti’a, e aufau nei i te hō’ē tuha’a moni ha’apaera’a mā’a maita’i, e fa’arahi nei i tō rātou mau pi’ira’a i roto i te ’Ēkālesia, e fārerei nei i tā rātou mau ’utuāfare ’ei mau ha’api’i ’utuāfare ’aore rā, ’ei mau taea’e hāhaere ’utuāfare¹¹ i te mau ’āva’e ato’a, e fa’atupu nei i te pō ’utuāfare, e tuatāpapa nei i te mau pāpa’ira’a mo’a, ’e e fa’atupu nei i te purera’a ’utuāfare i te mau mahana ato’a, e hia o rātou e fārerei nei i te mau fifi e’ita e roa’a ia rātou iho ’ia fa’a’āfaro ma te ’ore te ’Ēkālesia e tomo atu i roto nō te tātara i tō rātou mau fifi?’ »

Nō te pāhono i te mana’o tei tupu mai i roto iā’u, ’ua ui au i te mau peresideni titi i teie uira’a.

’Ua hi’o mai ra rātou i ni’a iā’u ma te māere ’e te muhu ’ore, ’e i muri iho, nā ’ō mai nei ē, « Pues, ninguno », te aura’a ra, « nā reira, ’aita hō’ē ». ’E ’ua parau mai ra rātou iā’u ē, ’aita hō’ē o te mau melo tei rave i terā mau mea tā’āto’a i fifihia tei ’ore i roa’a ia rātou iho i te tātara. Nō te aha ? Nō te mea ’ua ora rātou i roto i te mau fare nehenehe a’e. Nā tō rātou orara’a ha’apa’o maita’i i hōro’a ia rātou i te pūai, te ’ōrama, ’e te tauturu a te ra’i ’o tā rātou i hina’aro i roto i te fifi i te pae fa’arava’ira’a faufa’a e hā’ati ra ia rātou.

’Aita teie e parau nei ē, e’ita te feiā parauti’a e pohehia i te ma’i, e pēpē i roto i te ’ati purūmu, e fārerei i te mau fifi i te pae ’imira’a faufa’a, ’aore rā, e fārerei e rave rahi atu mau fifi i roto i te orara’a. E hōro’a mai te tāhuti nei i te mau fifi i te mau taime ato’a, terā rā, i te mau taime e rave rahi, ’ua ’ite au ē, te feiā e tūtava ’ia ha’apa’o i te mau fa’auera’a, e ha’amaita’ihia rātou nō te ’imi i tō rātou haere’a i roto i te hau ’e te ti’aturi. E roa’a teie mau ha’amaita’ira’a i te tā’āto’ara’a.¹²

’Ua parau o Davida ē, « ’ia ’ore Iehova ’ia patu i te fare ra, e ’ohipa faufa’a ’ore tā te feiā i patu ra ».¹³ Noa atu te vāhi e orahia ra e ’outou, noa atu te huru o tō ’outou fare, ’e noa atu te fāito o tō ’outou ’utuāfare, e nehenehe ’outou e tauturu i te patu i te fare nehenehe a’e nō tō ’outou ’utuāfare. Tē hōro’a mai nei te ’evanelia tei fa’aho’i-fa’ahou-hia mai a Iesu Mesia i te mau hōho’a nō taua fare ra. ’O te Fa’aora te ’aivāna’a, te tāmuta ’e te ta’ata fa’anaho o roto maita’i a’e. Tāna ’ōpuara’a ’o te maita’i hope ïa ’e te ’oa’oa mure ’ore o tō tātou vārua. Mā tāna tauturu here, e nehenehe tō ’outou vārua e riro i te mau huru ato’a ’o tāna e hina’aro ’e e nehenehe ’outou e riro ’ei hōho’a maita’i roa a’e nō ’outou iho, tei ineine nō te fa’anaho ’e ’ia ora i roto i te hō’ē fare nehenehe a’e.

Tē fa’a’ite pāpū nei au ma te māuruuru ē, tē ora nei te Atua ’e te Metua nō tātou pā’āto’a. Tāna Tamaiti, te Fatu ’o Iesu Mesia, o te Fa’aora ïa ’e te Tāra’ehara o te ta’ata ato’a nei. ’Ua here hope roa rāua ia tātou. Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o te bāsileia ïa o te Atua i ni’a i te fenua nei. Nā te mau peropheta ora ’e te mau ’āpōsetolo e arata’i nei i te reira i teie mahana. E parau mau te Buka a Moromona. ’Ua riro te ’evanelia tei fa’aho’i-fa’ahou-hia mai a Iesu Mesia ’ei hōho’a maita’i roa nō te fa’anaho i te mau fare nehenehe a’e. I te i’oa o Iesu Mesia, ’āmene.