Tuu Ma Oe le Sui

Uso e, o se fiafiaga le faatasi ai ma outou.

Faapea ua e alu i totonu o se faleoloa e faatau se mea. Afai e na te tuu atu le [tupe] e sili atu i le tau o se mea, o le a tuu atu e le kesia ia te ia le sui.

Sa aoao atu e le Tupu o Peniamina lona nuu i Amerika anamua e uiga i faamanuiaga maoae ua tatou maua mai lo tatou Faaola o Iesu Keriso. Sa Ia foafoaina le lagi ma le lalolagi ma le matagofie uma ua tatou sapi ai. ¹ E ala i Lana Togiola alofa, ua Ia saunia ai se ala mo i tatou e laveai ai mai le agasala ma le oti. ² Pe a oo ina tatou faaali atu lo tatou lotofaafetai ia te Ia e ala i le ola ma le maelega i Ana poloaiga, Na te vave faamanuiaina i tatou, ma tuua ai pea lava i tatou e nofoaitalafu ia te Ia.

Ua tele naua mea ua Ia foai mai mo i tatou, e sili atu nai lo le tau o mea e mafai ona tatou toe faafoi atu ia te Ia. O lea la, o le a se mea tatou te avatu ia te Ia, o le sa totogia le tau e le mafaatauina mo a tatou agasala? E mafai ona tatou avatu ia te Ia le suiga. E mafai ona tatou avatu ia te Ia lo tatou suiga. E mafai o se suiga o mafaufauga, se suiga i mausa, po o se suiga io le itu tatou te agai i ai. O le taui mo Lona totogia e lē mafaatauina mo i tatou taitoatasi, ua talosagaina i tatou e le Alii mo se suiga o le loto. O le suiga ua Ia talosagaina mai ia i tatou e lē mo Lona manuia, ae mo lo tatou manuia. Peitai, e le pei o le e alu e faatau mai i le maketi e na te toe aveina le sui tatou te ofoina atu, e geno mai mai lava le Faaola alofa ia i tatou e tuu ma oe le sui.

Ina ua mavae ona faalogo atu i upu a le Tupu o Peniamina, sa alalaga lona nuu, ma tautino atu ua suia o latou loto ma faapea atu, “Ona o le Agaga o le Alii Mamana Aoao, lea ua ia faia se liuga tele i totonu o i matou, … ua le toe i ai so matou manao e fai mea leaga, ae ia faia mea lelei e le aunoa.” ³ E le o faapea mai le mau na atoatoa ai loa lava i latou, ae, faapea na uunaia e lo latou naunau i latou e faatino. O lo latou liuga o le loto o lona uiga o le aveesea lea o le alii po o le tamaitai natura ma gauai atu i le Agaga a o tauivi malosi ia avea atili e faapei o Iesu Keriso.

Ua aoao mai Peresitene Henry B. Eyring: “O le liua moni e faalagolago i le sailia e aunoa ma le tau uuna’ia i le faatuatua, faatasi ai ma se taumafaiga tele ma sina tiga. Ona mafai lea e le Alii ona to mai … le vavega o le faamamaaga ma le suiga.” ⁴ O le tuufaatasia o a tatou taumafaiga ma le mafai e le Alii ona suia i tatou, e avea ai i tatou ma tagata fou.

A o ou laitiiti, sa ou mafaufau o la ou te savali agai i luga i se ala e faatu i luga e agai atu i la’u sini o le ola e faavavau. O taimi taitasi sa ou faia ai pe tautala i se mea sese, sa ou lagonaina lo’u se’e mai i lalo o le ala, ma toe amata atoa ai la’u malaga. Sa pei o le tulaueleele i luga o lena faatafafa e tasi i le taaloga a tamaiti o Gata ma Apefa’i, lea e toe faase’e atu ai oe i lalo mai le tumutumu o le laupapa e toe amata ai le taaloga! O se mea e faalotovaivaia ai! Ae ina ua amata ona ou malamalama i le mataupu a Keriso ⁵ ma le auala e faaaoga ai i aso taitasi i lo’u olaga, sa ou maua le faamoemoe.

Ua uma ona tuuina mai e Iesu Keriso ia i tatou se mamanu faifai pea mo le suiga. Ua Ia valaaulia i tatou e faaaoga le faatuatua ia te Ia, lea e musuia ai i tatou e salamo—”o le faatuatua ma le salamo lea e aumaia ai se suiga o le loto.” ⁶ Pe a tatou salamo pe liliu atu o tatou loto ia te Ia, tatou te maua se naunautaiga sili atu e osia ma ola ai i feagaiga paia. Tatou te tumau e oo i le iuga e ala i le faaauau pea ona faaaoga nei mataupu faavae i o tatou olaga atoa ma valaaulia le Alii ina ia suia i tatou. O le tumau e oo i le iuga o lona uiga o le suia e oo i le iuga. Ua ou malamalama nei faapea ou te le o toe amata mai i a’u taumafaiga taitasi e le manuia, ae o taumafaiga taitasi, o loo ou faaauau pea i la’u faagasologa o le suia.

E i ai se fasifuaitau musuia i le autu a Tamaitai Talavou o loo ta’ua ma’oti mai ai, “Ou te faatauaina le meaalofa o le salamo ma saili ia lelei atili i aso taitasi.” ⁷ Ou te tatalo ia tatou faatauaina lenei meaalofa matagofie ma tatou saili ma le loto le suiga. O nisi taimi o suiga e manaomia ona tatou faia, e fesootai ma se agasala matuia. Ae o le tele o taimi, tatou te taumafai malosi ai e faaleleia o tatou tagata ina ia ogatasi i tatou lava ma uiga faaleatua o Iesu Keriso. O a tatou filifiliga i aso taitasi o le a fesoasoani pe faatuatuai ai foi lo tatou alualu i luma. O suiga iti, ae mautinoa, ma i ai faamoemoega o le a fesoasoani tatou te faaleleia ai. Aua e te lotovaivai. O le suia, o se faagasologa i le olaga atoa. Ou te faafetai ona o a tatou tauiviga e sui, e onosai mai lava le Alii.

E ala atu ia Iesu Keriso, ua tuuina mai ia i tatou le malosi e faia ai suiga tumau. Pe a e liliu atu ia te Ia ma le lotomaualalo, o le a Ia faateleina lo tatou gafatia e suia ai.

E le gata i le mana o le Togiola a lo tatou Faaola e suia ai, o le a lagolagoina e le Agaga Paia ma taiala i tatou a o tatou tuu atu la tatou taumafaiga. E mafai foi ona fesoasoani o Ia ia tatou iloa pe o a suiga e manaomia ona tatou fai. E mafai foi ona tatou maua le fesoasoani ma le faamalosiauga e ala i faamanuiaga faaleperisitua, tatalo, anapogi, ma le o i le malumalu.

E faapena foi, ona mafai e tagata faatuatuaina o le aiga, taitai, ma uo ona fesoasoani ia tatou taumafaiga e suia. Ina ua 8 o’u tausaga, sa ma faaaluina ai ma lo’u tuagane e matua atu o Lee se taimi e taaalo ai ma a ma uo i lala o se laau i le matou pitonuu. Ma te fiafia lava i le matou mafutaga faatasi ma a ma uo i le paolo o lena laau. I se tasi aso, na pa’u ai Lee mai le laau ma gau ai lona lima. O le gau o lona lima sa faigata ai mo ia ona a’e na o ia i le laau. Ae o le taaalo foi i le laau sa le tutusa e aunoa ma ia. O lea, o nisi o i matou sa ‘apo’apo maia o ia mai tua a o tosoina e isi i lona lima lelei, ma e aunoa ma se taumafaiga tele, sa toe foi Lee i luga o le laau. Sa gau pea lona lima, ae sa matou toe faatasi ma ia ma olioli ai i le li’o o la matou faauooga a o tālia lona toe malosi.

E tele taimi ou te mafaufau ai i lo’u aafiaga i le taaalo ai i le laau, e faapei o se faatusa o lo tatou malolosi i le talalelei a Iesu Keriso. I le paolo o lala o le talalelei, tatou te olioli ai i le mau faamanuiaga e fesootai ma a tatou feagaiga. O nisi atonu e pauu mai le saogalemu o a latou feagaiga ma manaomia ai la tatou fesoasoani e toe fe’a’ei ai i le saogalemu o le talalelei. E mafai ona faigata ona toe foi mai lava i latou. Pe mafai lava ona tatou faamane’e malie teisi ii, ma si’i malie a’e i o e fesoasoani ai e toefaaleleia ai a o latou olioli i la tatou faauooga?

Afai o e mafatia i se manu’a mai se pa’u, faamolemole faataga isi e fesoasoani ia e toe foi i au feagaiga ma faamanuiaga o aumaia ai. E mafai ona fesoasoani le Faaola ite oe e malolo ma sui a o siosiomia oe e i latou e alolofa ia te oe.

E tele ina ou fetaiai ma uo ou te lei toe vaai i ai mo se taimi umi, po o le tele foi o tausaga. O nisi taimi latou te fai mai, “E te le’i suia lava!” O taimi taitasi ou te faalogo ai i lena tala, ou te tau mā, aua ou te faamoemoe ua ou sui i le aluga o tausaga. Ou te faamoemoe ua ou sui talu mai ananafi! Ou te faamoemoe ua fai si o’u agalelei teisi atu, ua ou tau le faamasinosino, ma ua sili atu ona agaalofa. Ou te faamoemoe ua vave ona ou tali atu i manaoga o isi, ma ou te faamoemoe foi ua fai si o’u onosai teisi.

Ou te fiafia lava e sopo i mauga e lata ane i lo’u fale. E tele taimi, e mau se tama’i maa i lo’u seevae ao ou savali i le alasopo. E iu lava ina ou tu, ma lulu lo’u seevae. Ae ou te ofo i le umi ou te savali ai ma le tiga faatoa ou tu ai e aveese le mea ua tiga ai.

A o tatou faimalaga i le ala o feagaiga, o nisi taimi e mau ai ma’a i o tatou seevae i ituaiga o mausa le lelei, po o uiga faaalia leaga. O le vave ona tatou luluesea mai o tatou olaga, o le tele foi lea o lo tatou fiafia ma le olioli o le a i ai i la tatou malaga fai i le olaga nei.

O le tausisia o suiga e manaomia ai taumafaiga. Ou te le mafai ona mafaufau e toe tu i le alasopo e tau ina toe tuu i lo’u seevae le ma’ama’a faalavelave ma le tiga sa faatoa ou aveesea. Ou te le toe manao e toe fai lena mea, nai lo na o se lelefua matagofie ua filifili e toefoi i lona ‘afu’afu.

Ou te molimau atu e faapea, o Iesu Keriso, e mafai ai ona tatou suia. E mafai ona tatou fetuunaia o tatou mausa, fesuia’i o tatou mafaufauga, ma faaleleia o tatou tagata ia avea atili ai e faapei o Ia. Ma faatasi ai ma Lana fesoasoani, e mafai ai ona tuu ma tatou le sui. I le suafa o Iesu Keriso, amene.