Inā Malū Ia

A o laiti le ma fanau, sa faaaluina e lo matou aiga ni nai aso i se vaituloto matagofie. I se tasi aoauli na tui ai e nisi o le fanau ni ofu faaola a o le’i fepuna i latou mai le fola [o le vaa] i totonu o le vai. Sa matamata le ma tama teine laitiiti ma le faatuai, ma matauina ma le faaeteete ona tei. Ma le lototoa uma na mafai ona ia mauaina, sa ia pupuniina lona isu i le lima e tasi ma puna. Sa vave ona ia ea ifo i luga ma faatasi ai ma sina fefe i lona leo sa ia alaga mai, “Fesoasoani mai ia te a’u! Fesoasoani mai ia te a’u!”

Ia, sa le’i i ai o ia i se tulaga lamatia faaletino, sa faia e lona ofu faaola lana galuega, ma sa ia faaopeopea ma le saogalemu. Sa mafai lava ona ma aapa atu ma toe toso mai o ia i luga o le fola o le vaa i se taumafaiga itiiti. Peitai, mai lana vaaiga, sa ia manaomia le fesoasoani. Atonu ona o le malūlū o le vai po o le fou o le aafiaga. I soo se tulaga, sa ia toe pe’a mai i luga o le fola o le vaa, lea na ma aui ai o ia i se solo mago ma faamālo ia te ia i lona lototoa.

Pe tatou te matutua pe laiti, e toatele i tatou ua i ai i taimi o faanoanoaga, ua faaleoa faananati upu e pei o le “Fesoasoani mai ia te a’u!” “Lavea’i a’u!” po o le “Faamolemole, tali mai la’u tatalo!”

E faapea se mea na tupu i soo o Iesu i le taimi o Lana galuega i la le tino. I le Mareko tatou te faitau ai faapea “na amata ona a’oa’o atu [Iesu] e latalata i le vai: ua potopoto mai ai ia te ia le motu o tagata e toatele.”¹ Na amata ona toatele naua le motu o tagata ma o lea na “maliu ae ai [Iesu] i le va’a”² ma fetalai mai i lona taumua. Sa Ia aoao atu i le aso atoa tagata i faataoto a o latou nonofo i luga o le auvai.

“[Ma] … ina ua oo i le [afiafi],” Ua fetalai atu i Ona soo, “Ina tatou o atu ia i le tasi itu. Ma ina ua latou tuua le motu o tagata,”³ sa latou o ese mai le auvai ma agai atu i le Sami o Kalilaia. O le mauaina o se vaega i tua o le vaa, na taoto ai i lalo Iesu ma vave ona tōfa. E lei leva “ona to mai lea o le afā, o le matagi tele lava, ona fati mai ai lea o peau i totonu o le vaa, sa [toetoe] a tumu ai le vaa”⁴ i vai.

O le toatele o soo o Iesu o le au faifaiva ua lava le tomai ma sa silafia le auala e taulimaina ai se vaa i se afā. Sa Ia faatuatuaina i latou—e moni lava, o Ona—soo pele. Sa latou tuua galuega, fiafiaga faaletagata lava ia, ma aiga ina ia mulimuli ia Iesu. O lo latou faatuatua ia te Ia sa iloagofie i lo latou i ai i totonu o le vaa. Ma o le taimi lea sa i ai lo latou vaa i le ogatotonu o se afā ma sa toetoe lava a magoto ifo.

Tatou te le iloa po o le a le umi na latou tauivi ai ina ia faaopeopea le vaa i le afā, ae sa latou fagua Iesu ma sina atuatuvale i o latou leo, ua faapea atu:

“Le a’oa’o e, e te le manatu mai ea ia te i matou a fano?”⁵

“Le Alii e, ia e faaola mai ia te i matou.”⁶

Sa latou valaauina o Ia “Matai,” ma o Ia lava o le Matai. O Ia foi o “Iesu Keriso, o le Alo o le Atua, o le Tamā o le lagi ma le lalolagi, o le Foafoa o mea uma mai le amataga.”⁷

Mai Lona tulaga i totonu o le vaa, sa tu Iesu ma vavao i le matagi ma fetalai atu i peau o le vai, “Ina malū ia. Ona [mate ai lea] o le matagi, i le ua matuā malū.”⁸ Na aoao foi e le Faiaoga Sili, o Iesu Ona soo e ala i ni fesili faigofie ae agaalofa se lua. Sa Ia fesili.

“Se a le mea tou te fefefe ai faapea?”⁹

“O i fea ea lo outou faatuatua?”¹⁰’”

O loo i ai se tulaga faaletagata, e oo lava i se faaosoosoga, lea pe a tatou mauaina i tatou lava i le ogatotonu o tofotofoga, faafitauli, po o mafatiaga [tatou te] alaga atu, “Le a’oa’o e, e te le manatu mai ea ia te i matou a fano? Lavea’i a’u.” E oo lava ia Iosefa Samita na augani atu mai se falepuipui leaga tele, “Le Atua e, o fea o i ai oe? Ma o fea o i ai le faapaologa ua ufi ai lou afioaga lafi?”¹¹

E moni, ua malamalama le Faaola o le lalolagi i o tatou tapulaa faaletino, aua ua Ia aoao i tatou i le ala e lagona ai le filemu ma le toafimalie e ui ina agi malosi le matagi o siomia ai i tatou, ma taufaafefe mai peau maualuluga e faamagoto ifo o tatou faamoemoe.

Ia i latou o i ai le faatuatua ua faamaonia, le faatuatua e pei o se tamaitiiti, e oo lava i sina vaega o le faatuatua¹² ua valaaulia mai e Iesu, e faapea, “O mai ia te au”;¹³ “Talitonu i lou igoa.”¹⁴ “Aoao mai ia te aʼu, ma faalogo mai i aʼu upu.”¹⁵ Na Ia poloai mai ma le agaalofa, “Salamo ma [ia] papatiso i lo’u igoa,”¹⁶ “Ia outou fealofani; faapei ona ou alofa atu ia te outou,”¹⁷ ma “Manatua pea a’u.”¹⁸ Na faamautinoa e Iesu, ma faamatala atu: “Ua ou fai atu nei mea ia te outou, ina ia outou maua le manuia ia te a’u. E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”¹⁹

E mafai ona ou vaai faalemafaufau i soo o Iesu i le vaa na felafoa’i e le afā, o se mea na tatau ai, sa pisi e matamata i galu o pisi i luga o le fola [o le vaa] ma asu i fafo le vai. E mafai ona vaai ia i latou o loo taulimaina la [o le vaa] ma taumafai e faatumauina sina puleaina o le latou tamai vaa. Sa latou taulai i le ola ai i le taimi lena, ma o la latou aioiga mo se fesoasoani sa faanatinati ma faamaoni.

E leai se eseesega mo le toatele o i tatou i o tatou aso. O mea na tutupu lata mai nei i le lalolagi i o tatou atunuu, nuu, ma aiga ua taia ai i tatou i tofotofoga lēmāvaaia. I taimi o faigata, e mafai ona lagonaina le matuā tofotofoina o lo tatou faatuatua i tulaga o’oo’o o lo tatou onosai ma le loto malamalama. O galu o le fefe e mafai ona faalavelaveina i tatou, ma mafua ai ona galo ia i tatou le agalelei o le Atua, ma tapulaa ai lo tatou vaaiga ma see ese ma le taulaiga. Ae o nei taimi faigata o la tatou faigamalaga e mafai ai ona tofotofoina ma faamalosia ai lo tatou faatuatua.

E ui lava i o tatou tulaga, e mafai ona tatou faia ni taumafaiga ma le faamoemoe e fausia ai ma faateleina lo tatou faatuatua ia Iesu Keriso. E faamalosia pe a tatou manatua o i tatou o fanau a le Atua ma e alofa o Ia ia i tatou. E tuputupu a’e lo tatou faatuatua pe a tatou faata’ita’ia le afioga o le Atua i le faamoemoe ma le filiga, ia taumafai i le mea sili tatou te mafai e mulimuli i aoaoga a Keriso. E faateleina lo tatou faatuatua pe a tatou filifili e talitonu nai lo le masalosalo, faamagalo atu nai lo le faamasino atu, salamo nai lo le fouvale. E faamamāina lo tatou faatuatua pe a tatou faalagolago ma le onosai i galuega ma le alofa mutimutivale ma le alofa tunoa o lo tatou Mesia Paia.²⁰

“E ui o le faatuatua e lē o le malamalama atoatoa lea,” na saunoa ai Elder Neal A. Maxwell, “ae na te aumaia le faalagolago loloto i le Atua o Lē ua atoatoa Lona malamalama.”²¹ E oo lava i taimi faigata, o le faatuatua i le Alii o Iesu Keriso e lototoa ma tumau. [O le faatuatua] e fesoasoani e aveese i tatou mai faalavefau e lē taua. [O le faatuatua] e uunaia i tatou ina ia agai pea i luma i luga o le ala o feagaiga. E tuleia e le faatuatua le faavaivai ma faatagaina i tatou e fetaiai ma le lumanai ma le naunautai ma le lototoa. E na te uunaia i tatou e ōle atu mo le lavea’iga ma le toomaga a o tatou tatalo atu i le Tama i le suafa o Lona Alo. Ma a foliga mai e lē talia aioiga ma le agaga tatalo, o le a maua e lo tatou faatuatua tumau ia Iesu Keriso le onosai, lotomaualalo, ma le tomai e faaleo atu ai upu ma le migao, “Ia faia lou finagalo.”²²

Na aoao mai Peresitene Russell M. Nelson:

“Ae e le tatau ona tatou faatagaina o tatou popolega e suitulaga i lo tatou faatuatua. E mafai ona tatou faafeto’aia na popolega e ala i le faamalosia o lo tatou faatuatua.

“Amata i lau fanau. … Ia latou lagonaina o outou faatuatua, e tusa lava pe oo atu ai i o outou luga ni tofotofoga faigata. Ia taulai atu o outou faatuatua i lo tatou Tama Faalelagi agalelei ma Lona Alo Pele, o le Alii o Iesu Keriso. … Aoao ia alii po o tamaitai faapelepele taitoatasi, o ia o se atalii/afafine o le Atua, na foafoaina i Lona faatusa, ua i ai se faamoemoega paia ma gafatia. Ua fananau mai i latou taitoatasi ma ni luitau e faatoilalo ma atiina ae le faatuatua.”²³

Sa ou faalogo talu ai nei i fanau e toalua e ta’i 4 tausaga o loo faasoa mai lo la faatuatua ia Iesu Keriso a o la taliina le fesili “E faapefea ona fesoasoani Iesu Keriso ia te oe?” Na fai mai le tamaitiiti muamua, “Ou te iloa e alofa Iesu ia te a’u ona na Ia maliu mo a’u. E alofa foi o Ia i tagata matutua.” Na fai mai le tamaitiiti lona lua, “E Na te fesoasoani mai ia te a’u pe a ou faanoanoa ma ita. Na te fesoasoani mai foi ia te a’u pe a ou feagai ma taimi faigata.”

Na tautino mai Iesu, “O lea, soo se tasi e salamo ma sau ia te a’u e pei o se tamaitiiti, o ia lea o le a ou talia, ona ua faapea i latou o le malo o le Atua.”²⁴

“Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”²⁵

Talu ai nei, na folafola mai ai e Peresitene Nelson “o le a mulimuli mai le faaitiitia o le fefe ma le faatuatua faateleina” a o tatou “amata ona toetuuto moni atu e faalogo, lagona, ma usitai i afioga a le Faaola.”²⁶

Uso e ma tuagane, o o tatou tulaga luitauina o i ai nei e lē o lo tatou taunuuga mulimuli lea e faavavau. I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua tatou tauaveina i o tatou luga le suafa o Iesu Keriso e ala i feagaiga. Ua ia i tatou le faatuatua i Lona mana togiola ma le faamoemoe i Ana folafolaga sili ma le taua. Ua ia i tatou mafuaaga uma e olioli ai, aua o loo silafia lelei e lo tatou Alii ma le Faaola o tatou faafitauli, popolega, ma faanoanoaga. E pei ona sa i ai Iesu faatasi ma Ona soo anamua, o loo faatasi mai lava o Ia ma i tatou! Ou te molimau atu ua Ia foai mai Lona soifua ina ia le fano outou ma a’u. Tau ina ia tatou faalagolago atu ia te Ia, usitai i Ana poloaiga, ma le faatuatua ia lagona o Ia o fetalai mai, “Inā malū ia.”²⁷ I le suafa paia ma le mamalu o Iesu Keriso, amene.