Saili Atu ia Keriso i Mafaufauga Uma

I lana viiga faatusisolo o le faaneetaga, na tautino mai ai e le Faisalamo:

“Ieova e ua e suesue mai ia te a’u, ua e silafia lava a’u.

“O oe lava ua e silafia lo’u nofo i lalo ma lo’u tulai i luga, ua e silafia mamao mai o’u manatunatu.

“Ua e suesue i lo’u savali ma lo’u taoto, ua e masani lava ma o’u ala uma.”¹

I le mamanu faavaogagana foliga tutusa o lenei solo, o loo viia ai e le Faisalamo le uiga faaleatua paia o Iesu Keriso, e silafia mea uma aua e moni lava Na te silafia itu uma o o tatou agaga.² O le silafia ai o mea uma e tatau ai mo i tatou i lenei olaga, ua valaaulia ai e le Faaola i tatou e saili atu ia te Ia i mafaufauga uma ma mulimuli ia te Ia ma o tatou loto uma.³ Ua aumaia ai ia i tatou le folafolaga e faapea e mafai ona tatou savavali i Lona malamalama ma o Lana taitaiga e puipuia mai ai le tosinaga a le pouliuli i o tatou olaga.⁴

O le saili atu ia te Ia i mafaufauga uma, ma mulimuli ia te Ia ma o tatou loto uma e manaomia ai lo tatou faaogatasia o o tatou mafaufau ma manaoga ma Ona.⁵ O loo faasino le mau i lenei faaogatusaina o le “tumau i le Alii.”⁶ O lona uiga ia tatou faatautaia pea lava o tatou olaga ia ogatasi ma le talalelei a Keriso ma taulai atu i aso taitasi i mea uma e lelei.⁷ Ua na o iina lava e mafai ai ona tatou maua “le manuia mai le Atua, o loo silisili lava i mea uma e manatu i ai” ma o le a “leoleoina ai [o tatou] loto atoa ma mafaufau e ala” ia Keriso Iesu.”⁸ Na ta’u atu e le Faaola lava Ia i toeaina o le Ekalesia ia Fepuari 1831, “Ia teu i o outou loto nei mea, ma ia tuu le tulaga-mamalu o le faavavau ia mau i luga o o outou mafaufau.”⁹

E ui i a tatou taumafaiga faifai pea e saili atu i le Alii, ae e mafai ona aafia o tatou mafaufauga i manatu e le talafeagai. A oo ina faatagaina na mafaufauga ma valaaulia e nofo ai, e mafai ona faafoliga ai manaoga o o tatou loto ma taitai atu ai i tatou i le mea o le a avea ai i tatou i lenei olaga, ma le mea o le a fai mo tatou tofi e faavavau.¹⁰ Sa faamamafa mai foi e Elder Neal A. Maxwell lenei mataupu faavae i le faapea mai, “O manaoga … e fuafua ai taunuuga, e aofia ai le mafuaaga “e toatele e valaaulia, ae toaitiiti e filifilia.”¹¹

Na faamanatu mai pea lava pea e o tatou perofeta anamua ma ona po nei ia i tatou e tetee atu i faaosoosoga ina ia aloese ai mai le see ese mai lo tatou ala faaleagaga, ma feluafesasi ai, fenumia’i, ma masalosalovale i le olaga.

I le vaogagana faavaliata, o le gauai atu i faaosoosoga e pei o le lalata atu i se maneta ma se metale. O le malosiaga e le tinoa o le maneta e faatosina maia le metale ma u’umauina. E leai se malosiaga o le maneta i le metale pe a tuu faamamao mai ai le metale. O le mea lea, e faapei ona le mafai e le maneta ona faaaoga lona malosiaga i se metale e mamao mai ai, a tatou teena foi faaosoosoga, e mou atu ma leai so latou malosiaga i o tatou mafaufau ma loto, ma faapena foi i a tatou faatinoga.

E faamanatu mai e lenei tala faatusa se aafiaga sa faasoa mai e se tagata faamaoni o le Ekalesia ia te a’u i se taimi ua mavae. Sa fai mai lenei tagata ia te au e faapea, ina ua ala ae i se tasi taeao patino, sa oo ane i lona mafaufau se manatu mataga na te lei mafaufauina muamua. E ui ina sa faateia atoa ai o ia i le fefe, ae sa vave ona ia tali faasaga atu i lea tulaga, ma faapea ifo ia te ia lava ma lena mafaufauga, “E leai!” ma suia i se mea lelei e tataiese ai lona mafaufau mai le mafaufauga e lei manaomia. Na ia fai mai ia te au, a o ia faaaogaina lana faitalia e tatau ai i le amiotonu, sa vave ona mou atu lena uunaiga mataga e lei fuafuaina.

Ina ua valaau atu Moronae i tagata ia talitonu ia Keriso ma ia salamo, sa ia uunaia i latou e o mai i le Faaola ma o latou loto uma, ma ia o ese mai i latou lava mai amioga le mama uma. E le gata i lea, sa valaaulia foi i latou e Moronae e ole atu i le Atua, ma le naunautaiga e le aunoa, ina ia aua nei o latou pauu atu i le faaosoosoga.¹² O le faaaogaina o nei mataupu faavae i o tatou olaga e manaomia ai le sili atu i le na o se talitonuga; e manaomia ai le fetuunai o tatou mafaufau ma loto i nei mataupu faavae faalelagi. O ia fetuunaiga e manaomia ai se taumafaiga faifai pea a le tagata lava ia i aso taitasi, e faaopoopo i le faalagolago i le Faaola, talu ai o le a le te’ite’i lava mou atu o tatou naunauga leaga. O le tau faasaga i faaosoosoga e manaomia ai se olaga o le maelega ma le faamaoni. Ae faamolemole ia silafia ua saunia le Alii e fesoasoani mai ia i tatou i a tatou taumafaiga patino ma ua folafola mai faamanuiaga ofoofogia pe afai tatou te tumau e oo i le iuga.

I le taimi faapitoa o faigata ina ua le maua e Iosefa Samita ma ona uso a pagota i le Falepuipui o Liperate le saolotoga i soo se mea, sei vagana ai o latou mafaufauga, sa tuuina atu e le Alii se fautuaga aoga ma se folafolaga ia i latou lea ua faasopo mai ia i tatou uma.

“Ia tuu foi lou loto ia tumu i le alofa mama i alii uma [ma tamaitai], ma i le auaiga o le faatuatua, ma ia tuu le amiomamā e teuteuina ai ou mafaufauga e lē aunoa; ona solo malosi ai lea o lou lototele i luma o le Atua; …

“O le a avea le Agaga Paia ma āu soa e lē aunoa, ma o lou tootoo o le a avea ma se tootoo lē feliuliuaʼi o le amiotonu ma le upumoni.”¹³

O le faia o lena mea, o le a teuteuina ai pea lava pea e mafaufauga paia o tatou mafaufau ma o le a taitai e manaoga mama a’ia’i i tatou i faatinoga amiotonu.

Sa faamanatu atu foi e Moronae i lona nuu ia aua nei puleaina i latou e o latou tuinanau.¹⁴ O le upu tuinanau e faasino i se moomoo ma le loto ma se naunauga e le tatau mo se mea.¹⁵ E aofia ai soo se mafaufauga pogisa po o manaoga mataga e afua ai ona taulai atu se tagata i faiga manatu faapito po o oa o le lalolagi nai lo le faia o mea lelei, agalelei, tausiga o poloaiga a le Atua, ma isi mea faapena. E tele ina faaalia e ala i lagona e aupito sili ona faasalemausau o le agaga. Na faailoa mai e le Aposetolo o Paulo nisi o nei lagona, e pei o le “le mama, mataitu, inoino, matau’a, finauvae, lotoleaga, ma isi mea faapena.”¹⁶ E le gata i itu leaga uma o le tuinanau, e le mafai ona tatou faagaloina le faaaogaina e le fili e fai mana auupega faalilolilo e faasagatau mai ai ia i tatou pe a ia faaosoosoina i tatou e fai se mea sese.

O’u uso e ma tuafafine pele, ou te molimau atu a tatou faalagolago i le papa o le togiola, o le Faaola lea o o tatou agaga, ma mulimuli i le fautuaga a Moronae, o le a matuai faateleina lo tatou gafatia e pulea ai o tatou mafaufauga. E mafai ona ou faamautinoa atu ia te outou e faapea, o le a tuputupu ae lo tatou matutua faaleagaga i se saoasaoa faateleina, e suia ai o tatou loto, ma avea atili ai i tatou e faapei o Iesu Keriso. E le gata i lea, o le a atili maopo ai le tosinaga a le Agaga Paia ma faaauau ai pea i o tatou olaga. Ona taitasitasi ai lea ona leai o se mana o faaosoosoga a le fili ia i tatou, ma taunuu ai i se olaga e sili ona tausaafia ma fiafia.

Mo i latou o e, po o le a lava le mafuaaga, ua pauu atu i faaosoosoga ma ua nonofo ai i faatinoga amioletonu, ou te faamautinoa atu ia te outou, e i ai se auala e toe foi ai, o loo i ai le faamoemoe ia Keriso. I ni nai tausaga talu ai, sa ou maua ai le avanoa e talanoa ai ma se uso pele o Le Ekalesia a Iesu Keriso o le Au Paia o Aso e Gata Ai o le sa i ai i se taimi faigata tele i lona olaga ina ua mavae lona faia o se solitulafono matuia. Ina ua ou vaai ia te ia, sa mafai ona ou vaaia le faanoanoa i ona mata, faatasi ai ma se susulu o le faamoemoe i ona mata. O ona foliga na atagia mai ai se loto ua faamaulalo ma ua suia. Sa avea o ia o se Kerisiano tuuto ma sa matua faamanuiaina o ia e le Alii. Peitai, sa ia faatagaina se mafaufauga e le tatau ai e osofaia lona mafaufau, lea la na taitai atu ai i isi. A o faifai malie pea ona ia nopia’i i nei mafaufauga, sa lei pine ae maua’a i lona mafaufau ma sa amata ai ona matua o’oo’o i lona loto. Sa iu ina ia faatinoina nei naunauga le aoga, lea na ta’ita’i ai o ia e faia ia faaiuga e faasagatau i mea uma sa sili ona taua i lona olaga. Sa ia ta’u mai ia te au, pe ana fai na te le’i tuuina se avanoa i lena mafaufauga faavalevalea e amata ai, semanu e le faavaivaia o ia ma toilalo i faaosoosoga a le fili---faaosoosoga na aumaia le faanoanoaga tele i lona olaga, pe a mo sina taimi.

O le mea e lelei ai, e faapei o le atalii faamaumau oa i le faataoto lauiloa o loo maua i le tusi a Luka, “na ia iloa e ia lava” ma sa alafa’i mai lena malu’ia.¹⁷ Sa ia toefaafoua lona faatuatuaina o le Alii ma sa lagonaina le salamo moni ma sa ia maua le naunautaiga e toefoi i le lafu a le Alii. Sa ma tofu lagonaina i lena aso le alofa togiola o le Faaola mo i tatou. I le faaiuga o la ma talanoaga puupuu, sa taufai faatumulia i ma’ua i lagona ootia, ma e oo mai i le aso nei, ou te manatuaina pea le matagofie o le olioli i ona foliga ina ua ma tuua lo’u ofisa.

A’u uo pele, pe a tatou tetee atu i nai faaosoosoga laiti, ia e tele ona oo mai e aunoa ma se faamoemoeina i o tatou olaga, ua faaauupegaina lelei i tatou e taumamao mai solitulafono matuia. E pei ona saunoa mai Peresitene Spencer W. Kimball: “E seasea lava ona oo atu se tasi i ni soligatulafono e sili atu ona mamafa e aunoa ma le gauai atu muamua i nai soligatulafono laiti, lea e tatala ai le faitotoa i mea tetele. … “O se fanua mama [e le] faafuasei [ona] vaoa.”¹⁸

A o tapenapena e faataunuu Lana misiona paia i le lalolagi, sa faaa’oa’o mai e le Faaola, o Iesu Keriso le taua o le teena e le aunoa o mea uma e ta’a’ina ese mai ai i tatou mai le faataunuuina o lo tatou faamoemoega e faavavau. Ina ua mavae le mau osofaiga e lei faamanuiaina e le fili, o le sa taumafai e tataiese o Ia mai Lana misiona, sa tuliesea e aunoa ma le fefe e le Faaola le tiapolo e ala i le fetalai atu: “Alu ese ia oe, Satani. … Ona tuua ai lea o ia e le tiapolo, faauta foi, ua o mai agelu ma auauna mai ia te ia.”¹⁹

Mata o le a so outou manatu, o’u uso e ma tuafafine, o le a le mea semanu e tupu pe ana mafai ona tatou aumaia le malosiaga ma le lototoa mai le Faaola ma fai atu “E leai” ma “Aluese ia oe” i ni mafaufauga e le mama i lena uluai taimi e oo mai ai i o tatou mafaufau? Mata o le a le aafiaga i faanaunauga o o tatou loto? E faapefea e taunuuga o a tatou faatinoga ona tausisia ai lo tatou latalata atu i le Faaola ma faatagaina ai le tosinaga faifai pea a le Agaga Paia i o tatou olaga? Ou te iloa o le mulimuli i le faataitaiga a Iesu Keriso, o le a tatou aloese ai mai le tele o mala ma amioga e ono afua ai faafitauli faaleaiga ma feeseeseaiga, o lagona e le lelei ma mea e lilifa atu i ai, o le faia o mea e le tonu ma sauaga i isi, o le faapologa e ala i vaisu leaga, ma soo se isi lava mea o le a faasagatau i poloaiga a le Alii.

I lana savali faaletalafaasolopito ma le faamomoiloto mai ia Aperila o le tausaga nei, na faia ai e lo tatou perofeta pele, o Peresitene Russell M. Nelson se folafolaga e faapea o i latou uma o e naunau e “faalogo ia te Ia” —faalogo ia Iesu Keriso—ma usiusitai i Ana poloaiga “o le a faamanuiaina i le mana faaopoopo e taulima ai tofotofoga, luitau, ma vaivaiga” ma o le a faateleina lo tatou gafatia e lagonaina ai le olioli, e oo lava i afa malolosi ua faateleina nei.²⁰

Ou te molimau atu o folafolaga ua tuuina mai lo tatou perofeta pele, o folafolaga mai lo tatou Faaola lava Ia. Ou te valaaulia outou ia “faalogo ia te Ia” i mafaufauga uma ma mulimuli ia te Ia ma o outou loto atoa ina ia mafai ai ona maua le malosiaga ma le lototoa e fai atu ai “E leai” ma “Alu ese ia oe” i mea uma e ono aumaia ai le le fiafia i o tatou olaga. Afai tatou te faia, ou te folafola atu o le a auina mai e le Alii se fuataga faaopoopo o Lona Agaga Paia e faamalolosia ma faamafanafanaina i tatou, ma mafai ai ona avea i tatou ma tagata e tusa ai ma le finagalo o le Alii lava ia.²¹

Ou te tuuina atu la’u molimau, o loo soifua Iesu Keriso ma e ala atu ia te Ia, e mafai ai ona tatou manumalo i tosinaga leaga a le fili ma tatou agavaa ai e ola e faavavau faatasi ma le Alii ma i le afioaga o lo tatou Tama pele i le Lagi. Ou te molimau atu i nei upumoni ma lo’u alofa atoa mo outou ma mo lo tatou Faaola matagofie, o lona suafa ou te avatu i ai le viiga, mamalu, ma le faaneetaga e faavavau. Ou te fai atu ai nei mea i le suafa paia o Iesu Keriso, amene.