Te mana fa’aora ’o Iesu Mesia

Mai te ’ōmuara’a o teie matahiti, ’ua fa’aruru tātou e rave rahi mau ’ohipa mana’o-’ore-hia. Te pohera’a te tahi mau ta’ata ’e te ’orera’a te moni ’ohipa, nō te fifi ’o te ma’i pe’e nā te ao nei, tei ha’afifi roa i te mau fenua ’e te fa’arava’ira’a faufa’a ’ati a’e te ao nei.

Te mau ’āueuera’a fenua, te mau ’ati auahi ’e te mau pape pu’e i terā vāhi ’e terā vāhi o te ao nei, ’e te tahi atu mau ’ati nō ni’a i te huru ’o te reva, ’ua fa’atupu te reira i te mana’o pūai ’ore, te rāve’a ’ore, ’e te ’ā’au ’oto, ma te uiui ē, e ora fa’ahou ānei rātou mai tei mātarohia.

E fa’ati’a atu vau ia ’outou i te hō’ē ’ā’amu nō’u iho nō ni’a i te ’oto rahi.

I te ’āpīra’a tā māua mau tamari’i, ’ua hina’aro rātou e ha’api’i i te fa’ata’i i te piāna. ’Ua hina’aro tā’u tāne, ’o Rudy ’e ’o vau e hōro’a i teie rāve’a i tā māua mau tamari’i, terā rā, ’aita tā mātou e piāna. E’ita tā māua e nehenehe e ho’o mai i te hō’ē piāna ’āpī, nō reira, ’ua ha’amata ’o Rudy i te hi’ohi’o i te hō’ē piāna tahito.

I taua matahiti ra, nō te noela, ’ua fa’ahitimahuta ’oia ia mātou pā’āto’a i te hō’ē piāna, ’e ’ua ha’api’i tā māua mau tamari’i i te ha’uti i te roara’a o te mau matahiti.

’A pa’ari mai ai tā māua mau tamāroa ’e ’a fa’aru’e mai ai rātou i te ’utuāfare, ’ua vai noa te piāna tahito ’ei ha’aputura’a repo, nō reira ’ua ho’o māua i te reira. ’Ua ma’iri tau matahiti, ’e ’ua ha’aputu māua i te moni. I te hō’ē mahana, ’ua parau ’o Rudy : « ’Ia mana’o vau, ’ua tae i te taime nō te ho’o mai i te hō’ē piāna ’āpī ».

’Ua ani au, « nō te aha hō’ē piāna ’āpī, ’aita ho’i hō’ē ’o tāua e ha’uti nei ? »

Nā ’ō mai ra ’oia, « Aaahhh, e nehenehe e rave mai hō’ē piāna nāna iho e ha’uti ! Ma te fa’a’ohipa i te iPad, e nehenehe ’oe e fa’anaho i te piāna nō te ha’uti hau atu i te 4 000 hīmene, tae noa atu i te mau hīmene purera’a, te mau hīmene a te pupu hīmene nō te Fare Menemene, pauroa te mau hīmene Paraimere, ’e e rave rahi atu ā ».

E ta’ata ho’o tao’a ’aravihi roa ’o Rudy, e ’ere i te fa’arahira’a.

’Ua ho’o mai māua i te hō’ē piāna ’āpī nehenehe roa, ’e e piti mahana i muri iho, ’ua ’āfa’i mai e piti nā ta’ata rahi ’e te pūai i te reira i tō māua fare.

’Ua fa’a’ite au ia rāua i te vāhi tā’u i hina’aro e tu’u i te reira, ’e ’ua fa’aātea.

E piāna « ’aiū » rarahi teimaha mau, ’e nō te fa’ahaere nā roto i te ’ūputa, ’ua tātara rāua i te mau ’āva’e, ’e ’ua fa’ata’oto i te piāna i ni’a i te pere’o’o tura’i tā rāua i ’āfa’i mai.

Tei ni’a tō māua fare i te hō’ē vāhi teitei ri’i, ’e tē fifi rā i taua mahana ra, ’ua topa mai te hiona, e mea rarirari ’e e mea he’ehe’e te mau mea ato’a. Tē ’ite ra ānei ’outou, e aha tā’u e parau ra ?

’E ’a tura’ihia ai te piāna nā ni’a i terā vāhi teitei, ’ua he’e a’era, ’e ’ua fa’aro’o vau i te hō’ē hāruru rahi. ’Ua topa te piāna i rāpae i te pere’o’o tura’i ’e ’ua topa i ni’a i te repo ma te teimaha, ’ua ’āpo’o roa te repo.

’Ua parau a’era vau : ’Auē ho’i ē. E aha te huru ? »

Aua’e ’aita nā ta’ata i fifi.

’Ua ’ara’ara tō rāua mata i te hi’ora’a te tahi ’e te tahi, ’e i muri iho ’ua hi’o mai ra i ni’a iā’u, ’e nā ’ō mai ra, « ’Eiaha e ’ino’ino mai. E fa’aho’i māua i te piāna i te fare toa ’e e tāniuniu mai te ra’atira ia ’ōrua ».

’Aita i maoro, ’ua paraparau mai te ra’atira ia Rudy nō te fa’anaho i te ’āfa’ira’a mai i te hō’ē piāna ’āpī. E mea maita’i ’o Rudy ’e te mana’o fāri’i, ’e ’ua parau ’oia i te ra’atira ē, ’aita e fifi mai te mea ē, e tātā’i noa rātou i te mau vāhi pēpē, ’e ’a fa’aho’i mai ai i taua piāna ra, terā rā, ’ua onoono te ra’atira ’ia fāri’i māua i te hō’ē piāna ’āpī.

’Ua pāhono ’o Rudy ma te parau ē: « E ’ere i te mea ’ino roa. ’A tātā’i noa ’e ’a fa’aho’i mai ».

Nā ’ō mai ra te ra’atira, « ’ua pararī te rā’au, ’e ’ia pararī ana’e te rā’au, e taui te ta’i. E fāri’i ’ōrua i te hō’ē piāna ’āpī ».

E te mau tuahine ’e te mau taea’e, e ’ere ānei tātou pā’āto’a mai teie piāna, ’ua pararī ri’i, ’ua ’afā ri’i, ’e ’ua ’ino ri’i, ma te feruri ē, e’ita tātou e riro fa’ahou mai te mātāmua ra ? Terā rā, ’a haere ai tātou ia Iesu Mesia ra ma te fa’a’ohipa i te fa’aro’o iāna, te tātarahapara’a ’e te ravera’a ’e te ha’apa’ora’a i te mau fafaura’a, tō tātou fatira’a—noa atu te huru o te tumu—e nehenehe tātou e fa’aorahia. Teie fa’anahora’a, ’o tē ani i te mana fa’aorara’a a te Fa’aora i roto i tō tātou orara’a, e’ita e fa’aho’i noa ia tātou mai te mātāmua ra, e ha’amaita’i atu ā ra te reira ia tātou hau atu i nā mua a’enei ’Ua ’ite au ē, nā roto i te Fa’aora ia Iesu Mesia, e nehenehe tātou pā’āto’a e tātā’ihia, e fa’aho’ihia te tā’āto’ara’a, ’e ’ia fa’aoti i tā tātou mau ’ōpuara’a, mai te hō’ē piāna ’āpī maita’i ’e te nehenehe.

’Ua ha’api’i mai te peresideni Russell M. Nelson : « ’Ia tupu ana’e mai te mau tāmatara’a māuiui i ni’a ia tātou, ’ua tae ïa i te taime nō te fa’ahōhonu i tō tātou fa’aro’o i te Atua, nō te rave pūai i te ’ohipa, ’e nō te tāvini ia vetahi ’ē. I reira ’oia e fa’aora ai i tō tātou ’ā’au ’oto. E hōro’a mai ’oia i te hau ’e te tāmāhanahana ia tātou. E’ita te reira mau hōro’a rahi e ha’amouhia, noa atu nā te pohe ». ¹

’Ua parau Iesu :

« E haere mai ’outou iā’u nei, ’e te feiā ato’a i ha’a rahi ’e tei teiaha i te hōpoi’a, ’e nā’u ’outou e fa’aora.

« ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou vārua.

« Tē marū nei ho’i tā’u zugo ’e tē māmā nei tā’u hōpoi’a » (Mataio 11:28–30).

Nō te rāpa’au i te ’oto nā roto i te haerera’a iāna ra, e tītauhia ia tātou ’ia roa’a te fa’aro’o ia Iesu Mesia. « Te roa’ara’a te fa’aro’o ia Iesu Mesia, te aura’a, ’o te ti’aturi-hope-ra’a i ni’a iāna—te ti’aturira’a i tōna mana hope ’ore …’e te here Tei roto i te reira te ti’aturira’a i tāna mau ha’api’ira’a. Te aura’a te ti’aturira’a ē, noa atu ’aita tātou e hāro’aro’a ra i te mau mea ato’a, ’ōna rā, ’oia ïa. Nō tōna ’itera’a i tō tātou mau māuiui ato’a, tō tātou mau ’oto, ’e tō tātou paruparu, ’ua ’ite ’oia nāhea ’ia tauturu ia tātou ’ia ti’a i ni’a a’e i tō tātou mau fifi i te mau mahana ato’a ». ²

’A haere ai tātou iāna ra, « e nehenehe tātou e fa’a’īhia i te ’oa’oa, te hau ’e te tāmāhanahana. E nehenehe te mau mea [’eta’eta ’e te teimaha] ato’a o te orara’a, e fa’a’āfarohia nā roto i te tāra’ehara a Iesu Mesia ». ³ ’Ua a’o mai ’oia ia tātou, « ’a hi’o mai iā’u nei i tō mau mana’o ato’a na; ’eiaha e fē’a’a, ’eiaha e mata’u ». (Te Parau Ha’api’ira’a ’e te mau Parau Fafau 6:36).

I roto i te Buka a Moromona i te taime ’a fātata ai Alama ’e tōna mau ta’ata i te perehu i raro a’e i te mau hōpoi’a tei fa’autahia i ni’a ia rātou, ’ua tāparu te ta’ata ’ia ha’amāmāhia rātou. ’Aita te Fatu i ’īriti i tā rātou mau hōpoi’a ; ’ua fafau rā ’oia ia rātou :

« E nā’u ho’i e ha’amāmā i te mau hōpoi’a teiaha i tu’uhia i ni’a i tō ’outou tapono, e’ita roa o tō ’outou tapono e māuiui ’oi vai a’e ’outou i te tītīra’a ; e nā’u te reira e rave, ’ia ti’a māite ’outou ’ei ’ite nō’u e muri nei, ’e ’ia ’ite pāpū ’outou ē, tē hi’o aroha ra vau, te Fatu te Atua ra, i tō’u ra mau ta’ata i tō rātou mau ’ati.

« I ha’amāmāhia ihora te mau hōpoi’a i tu’uhia mai i ni’a iho ia Alama e tōna ra mau taea’e ; ’oia ïa, nā te Atua rātou i fa’aitoito, i ti’a ai ia rātou i te fa’a’oroma’i i te mau ’ati ma te paruparu ’ore, ’e ’ua auraro ihora rātou ma te ’ā’au tae ’e te fa’a’oroma’i i te hina’aro ato’a o te Fatu » (Mosia 24:14–15)

Nō ni’a i te ti’ara’a o te Fa’aora ’ia fa’aora ’e ’ia ha’amāmā i te mau hōpoi’a, ’ua ha’api’i mai ’o Elder Tad R. Callister :

« Hō’ē o te mau ha’amaita’ira’a o te tāra’ehara ’oia ho’i, e nehenehe tātou e fāri’i i te mau mana fa’aora ’o te Fa’aora. E rave rahi taime tō Isaia paraparaura’a nō ni’a i te huru tāmarū ’e te fa’aora ’o te Fatu. ’Ua fa’a’ite pāpū ’oia ē, ’ua riro te Fa’aora « ’ei pāruru nō te ta’ata ri’i ; ’ei pāruru nō tei ’ati i tōna ’atira’a ra, ’ei ha’apūra’a nō te vero ra, ’ei maru nō te ve’ave’a ra » (Isaiah 25:4). Nō rātou e mamae nei, ’ua parau ’o Isaia ē, tei te Fa’aora te mana nō te « ha’amāhanahana i te feiā i mihi ra » (Isaia 61:2), ’e « e horoi i te roimata i te mau mata ato’a ra » (Isaia 25:8 ; hi’o ato’a Apokalupo 7:17) ; « ’ei fa’a’ana’anaea i te ’ā’au o tei ha’aha’a ra » (Isaia 57:15) ; ’e « ’ei fa’aora ho’i i te feiā ’ā’au ’oto » (Isaiah 61:1 ; hi’o ato’a Luka 4:18 ; Salamo 147:3). Nō te rahi o tōna mana fa’aora, ’ua ti’a iāna ’ia « hōro’a atu ia ratou i te ’una’una ’ei mono i te rehu auahi, ’e te mono’i ra o te ’oa’oa ’ei mono i te ’oto, ’e te ’ahu pū га i te ha’amaita’i ’ei mono i te ’ā’au taiā » (Isaia 61:3).

« ’Auē ho’i ē, e aha te ti’aturira’a e mara’a nei i roto i teie mau parau fafau ! E fa’aora tōna vārua ; e ha’amaita’i ’oia ; e tāmāhanahana ’oia ; e hōro’a ’oia i te hō’ē ora ’āpī i te mau ’ā’au ’aore e ti’aturira’a fa’ahou. E mana tōna nō te taui i te mau mea hā’iri’iri ’e te ri’ari’a ’e te faufa’a ’ore i roto i te orara’a nei, ’ei mea ’una’una rahi ’e te hanahana. E mana tōna nō te huri i te mau rehu auahi o te tāhuti nei ’ei mau ’una’una nō te tau a muri atu ». ⁴

Tē fa’a’ite pāpū nei au ē, ’o Iesu Mesia tō tātou Fa’aora here, tō tātou tāra’ehara, te Fatu Fa’aora ’e tō tātou hoa pāpū. Mai te mea e fāriu tātou i ni’a iāna, e fa’aora ’oia ia tātou, ’e e tāta’i fa’ahou ia tātou. Tē fa’a’ite pāpū nei au ē, teie tāna’Ēkālesia, ’e tē fa’aineine nei ’oia nō te ho’i fa’ahou mai, nō te fa’atere ma te mana ’e te hanahana i ni’a i teie fenua. I te i’oa o Iesu Mesia, ’āmene.