E mea ti’aturi au i te mau melahi

Te mau taea’e ’e te mau tuahine, e mea ti’aturi au i te mau mēlahi, ’e tē hina’aro nei au e fa’a’ite i te mau ’ohipa i tupu nō’u ’e rātou. ’A nā reira ai au, tē pure nei au ē, maita’i ē e ’ite mai ’outou i te faufa’a rahi o te mau mēlahi i roto i tō tātou orara’a.

Teie te mau parau a Elder Jeffrey R. Holland i te hō’ē ’āmuira’a rahi i ma’iri : « ’Ia paraparau ana’e tātou nō te feiā tei riro ’ei mauha’a i roto i te rima o te Atua, e fa’aha’amana’ohia tātou ē, ’aita te tā’āto’ara’a o te mau mēlahi nō te tahi atu pae o te pāruru. Tē haere nei ’e tē paraparau nei tātou i te tahi o rātou—i’ō nei, i teie nei taime, i te mau mahana ato’a. Tē pārahi nei te tahi o rātou i roto i tō tātou iho mau vāhi nohora’a… ’Oia mau e au ra ē ’ua piri roa mai te ra’i ’ia ’ite ana’e tātou i te here o te Atua i roto i te maita’i ’e te itoito o te mau ta’ata maita’i ’e te mā, ’e te parau mātāmua ’o tē puta mai i roto i te ferurira’a ’o te parau ïa nō te mēlahi » (« Te utuutura’a a te mau mēlahi », Liahona, Nov. 2008, 30).

’O te mau mēlahi i teie nei pae o te pāruru tā’u e paraparau atu. Te mau mēlahi e haere nei i rotopū ia tātou i tō tātou mau mahana ato’a, e mau fa’aha’amana’ora’a pūai ïa nō te here a te Atua ia tātou.

Te mau mēlahi mātāmua tā’u e fa’ahiti atu, ’o nā tuahine misiōnare ïa e piti tei ha’api’i iā’u i te ’evanelia i tō’u ’āpīra’a : te tuahine Vilma Molina ’e te tuahine Ivonete Rivitti. ’Ua anihia māua tō’u tuahine ’ia haere i te hō’ē ’ohipa ri’i nā te ’Ēkālesia ’ei reira māua i te fārereira’a i teie nā mēlahi e piti. ’Aita vau i mana’o a’enei i te huru teie ’ohipa ’ōhie i taui i tō’u orara’a.

’Aita tō’u nā metua ’e tō’u mau taea’e ’e tuahine i ’ana’anatae roa e ha’api’i rahi atu ā nō ni’a i te ’Ēkālesia i terā taime. ’Aita rātou i te hina’aro e fāri’i i te mau misiōnare i tō mātou fare, nō reira ’ua haere au i te mau ha’api’ira’a misiōnare i te fare purera’a. ’Ua riro mai terā piha iti o te fare purera’a ’ei « uru rā’au mo’a » nō’u.

Hō’ē ’āva’e i muri mai i te vauvaura’ahia te ’evanelia iā’u e teie nau mēlahi, ’ua bāpetizo vau. 16 matahiti tō’u. ’Aita rā tā’u e hōho’a nō teie taime mo’a, e hōho’a rā tā’u nō te haerera’a māua tō’u tuahine i terā ’ohipa i te fare purera’a. E fa’ata’a ri’i atu vau ’o vai i ni’a i te hōho’a. ’O vau te ta’ata roa a’e i te pae ’atau.

Mai tā ’outou e nehenehe e feruri, e mea pa’ari nō te hō’ē taure’are’a ’ia fa’aitoito noa i roto i te ’Ēkālesia, ’ua taui ho’i te huru orara’a ’e ’aita tō’u ’utuāfare i ni’a ato’a i terā ’ē’a.

’A tāmata ai au i te fa’atano i ni’a i tō’u orara’a ’āpī, te ta’ere ’āpī ’e te mau hoa ’āpī, ’ua tae mai tō’u mana’o huru ’ē. ’Ua tae mai te mana’o ’ōtahi ’e te fa’ataiā e rave rahi taime. I ’ite na vau ’o te ’Ēkālesia mau, ’ua tāfifi rā vau i te fa’aō iā’u i roto i te reira. ’A vai noa ai terā mana’o au ’ore ’e te pāpū ’ore i te tāmatara’a i te fa’atano i ni’a i tā’u ha’apa’ora’a ’āpī, ’ua noa’a mai te itoito e haere i te hō’ē ’āmuira’a feiā ’āpī toru mahana, ’o tā’u i mana’o ē e tauturu mai ’ia noa’a te mau hoa ’āpī. I reira ïa tō’u fārereira’a i te tahi fa’ahou mēlahi fa’aora, tōna i’oa ’o Mônica Brandão.

E mea ’āpī ’oia i terā vāhi, nā te tahi atu pae nō Beresiria. ’Oi’oi roa vau i te ’itera’a iāna ’e ’aua’a a’e maoti, ’ua fāri’i mai ’oia iā’u ’ei hoa. ’Ia mana’o vau, ’ua hi’o mai ’oia ’o roto iā’u, ’eiaha rā ’o rāpae.

Nō te mea ’ua fa’ahoa māua, ’ua fārerei atu ra vau i tōna mau hoa, ’e ’ua riro mai rātou ’ei hoa nō’u ’a haere ai au i te mau ’ohipa ri’i e rave rahi nā te feiā ’āpī i muri iho. E mea faufa’a rahi roa teie mau ’ohipa ri’i nō te fa’aōra’a iā’u i roto i teie orara’a ’āpī.

E ’ohipa ta’a ’ē rahi tā teie mau hoa maita’i i fa’atupu, ’āre’a rā nō te ’orera’a te ’evanelia e ha’api’ihia i tō’u fare ’e nō te ’orera’a tō’u ’utuāfare e turu iā’u, e mea ataata noa ïa tō’u fa’afāriura’a tau maoro ’e te tāmau. E mea faufa’a roa atu ïa te mau ’aitauira’a ’evanelia i te fare purera’a nō tō’u fa’afāriura’a ’e te tupura’a. ’Ei reira e piti fa’ahou ā mēlahi tei tonohia e te Fatu nō te tauturu mai.

Te hō’ē, ’o Leda Vettori ïa, tō’u ’orometua séminaire i te po’ipo’i. Maoti tōna here fāri’i ’e tāna mau ha’api’ira’a fa’auru, ’ua hōro’a mai ’oia i te tahi tōpata tāmahana nō te « parau maita’i a te Atua » (Moroni 6:4), tei hina’aro-roa-hia i te roara’a o te mahana. ’Ua tauturu mai te reira ’ia noa’a te pūai pae vārua nō te tāmau ā i te haere i mua.

Te tahi fa’ahou mēlahi tei tonohia mai nō te tauturu iā’u, ’o te peresideni feiā ’āpī tamāroa ïa, ’o Marco Antônio Fusco. ’Ua fa’aue-ato’a-hia ’oia ’ia riro ’ei hoa hāhaere ’utuāfare nō’u, ’ōna te fa’atere. Noa atu ā te iti o tō’u ’ite ’e tō’u hōho’a ta’a ’ē, ’ua hōro’a mai ’oia iā’u i te mau fa’auera’a ha’api’ira’a i roto i tā mātou mau rurura’a pupu tahu’a ’e te hāhaera’a ’utuāfare. ’Ua fa’afāna’o ’oia iā’u ’ia rave ’e ’ia ha’api’i, ’eiaha e hi’o noa i te ’evanelia. E mea ti’aturi ’oia iā’u, hau atu i tā’u i ti’aturi iā’u iho.

Māuruuru i teie mau mēlahi, ’e tē vai atu ra, tā’u i fārerei i roto i terā mau matahiti mātāmua faufa’a roa a’e, ’ua noa’a mai iā’u te pūai e nava’i nō te vai noa i ni’a i te ’ē’a nō te fafaura’a ’a noa’a ai tō’u ’ite pae vārua nō te parau mau.

’E ’ia ’ite ’outou, terā mēlahi tamāhine ra, ’o Mônica ? I te otira’a māua i te tāvini i tā māua misiōni, ’ua riro mai ’oia ’ei vahine nā’u.

’Aita vau e mana’o nei ē, e mea hape noa teie mau hoa maita’i, te mau hōpoi’a i roto i te ’Ēkālesia ’e te fa’a’amura’ahia i te parau maita’i a te Atua i roto i teie ’ohipa tau maoro. ’Ua ha’api’i te peresideni Gordon B. Hinckley ma te pa’ari ē : « E ’ere i te ’ohipa ’ōhie te ravera’a i te tauira’a nō te tomora’a mai i roto i te ’Ēkālesia. Tōna aura’a ’o te tāpūra’a ïa i te mau tā’amura’a tahito. Tōna aura’a ’o te fa’aru’era’a ïa i te mau hoa. Te tahi ato’a aura’a, ’o te vaiihora’a ïa i te mau ti’aturira’a herehia. E tītau ato’a te reira i te hō’ē tauira’a o te mau peu ’e te fa’a’orera’a i te mau hia’ai. E rave rahi hi’oraa, ’o te vai-’ōtahi-ra’a ïa ’e te mata’u ato’a i tei ta’a ’ore. Tītauhia te aupurura’a ’e te fa’aitoitora’a i roto i teie pu’e tau fifi o te orara’a o te hō’ē ta’ata fa’afāriu » (« There Must Be Messengers », Ensign, ’Ātopa 1987, 5).

I muri ri’i mai ’ua ha’api’i ato’a ’oia ē : « E toru ’ohipa tā rātou e hina’aro : hō’ē hoa, hō’ē hōpoi’a, ’e ’ia fa’a’amuhia i te parau maita’i a te Atua’ » (« Converts and Young Men », Ensign, Mē 1997, 47).

Nō te aha vau e fa’a’ite nei ia ’outou i teie mau ’ohipa ?

’A tahi, nō te fa’atae i te poro’i ia rātou e nā roto ra i teie huru ’ohipa i teienei. Penei a’e e ta’ata fa’afāriu ’āpī, ’aore rā tē ho’i mai ra i te purera’a i muri iho i te haere-’ē-ra’a i te hō’ē tau, ’aore rā tē tāfifi nei i te fa’aō i roto. ’Eiaha na e fa’aru’e i tā ’outou mau tauto’ora’a nō te fa’aō i roto i teie ’utuāfare rahi. ’O te ’Ēkālesia mau teie nā Iesu Mesia.

Mai te mea e ’ohipa nō tō ’outou ’oa’oa ’e te fa’aorara’a, e mea ho’ona ïa te tauto’ora’a ’ia tāmau noa i te tāmata. E mea ho’ona te tauto’ora’a ’ia fa’atano i tō tātou huru orara’a ’e te ta’ere. ’Ua ’ite te Fatu i te mau fifi tā ’outou e fa’aruru nei. ’Ua ’ite ’oia ia ’outou, ’ua here ’oia ia ’outou ’e tē parau fafau nei au ē, e tono mai ’oia i te mau mēlahi nō te tauturu ia ’outou.

Mai tā te Fa’aora iho i parau : « E haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui… ’ei roto ho’i tō’u Vārua i tō ’outou [’ā’au], ’e ta’u mau mēlahi ho’i e ’ati noa a’e ia ’outou na, ’ia ha’amara’a mai ia ’outou i ni’a » (Te Parau Ha’api’ira’a ’e te mau Parau Fafau 84:88).

Te piti o te fā nō te fa’a’itera’a i teie mau ’ohipa, ’o te fa’ataera’a ïa i te hō’ē poro’i i te mau melo ato’a o te ’Ēkālesia—ia tātou pā’āto’a. ’Ia ha’amana’o tātou ē, e ’ere i te mea ’ōhie nō te feiā fa’afāriu ’āpī, te mau hoa e ho’i mai nei ’e ratōu ma te huru orara’a ta’a ’ē, ’ia fa’aō mai i reira ra. ’Ua ’ite te Fatu i te mau fifi tā rātou e fa’aruru nei, ’e tē ’imi ra ’oia i te mau mēlahi tei ineine nō te tauturu atu. E mea ’imi noa te Fatu i te mau ta’ata ineine e hōro’a i tō rātou taime nō te riro ’ei mēlahi i roto i te orara’a o vetahi ’ē.

Te mau taea’e ’e te mau tuahine, ’ua hina’aro ānei ’outou ’ia riro ’ei mauiha’a i roto i te rima o te Fatu ? ’Ua hina’aro ānei ’outou ’ia riro ’ei hō’ē o teie mau mēlahi ? Nō te riro ’ei ti’a tonohia, nō ’ō mai i te Atua, mai teie atu pae o te pāruru, nō te ta’ata tāna e ha’ape’ape’a ra ? ’Ua hina’aro ’oia ia ’outou. ’Ua hina’aro rātou ia ’outou.

E mea pāpū iho ā ïa e nehenehe e ti’aturi i ni’a i tā tātou mau misiōnare. Tei reira noa rātou, ’o rātou tei tāpa’o mātāmua i tō rātou i’oa nō teie ’ohipa a te mēlahi. ’Aita rā e nava’i.

Mai te mea e hi’o maita’i ’outou ’ati a’e ia ’outou e ’ite mai ’outou e rave rahi ta’ata tei hina’aro i te tauturu a te mēlahi. ’Aita paha teie mau ta’ata i roto i te ’ahu ’uo’uo, te ’ahu roa ’aore rā te tahi noa atu ’ahu sābati. Tē pārahi ’ōtahi ra paha, i muri roa i te fare purera’a ’aore rā te piha ha’api’ira’a, i te tahi taime ma te mana’o ē, ’aita rātou e ’itehia nei. E mea ’ē ri’i paha tō rātou hōho’a rouru, ’aore rā e mea ta’a ’ē tā rātou huru paraparau, tei reira rā rātou ’e tē tāmata ra.

Tē vai ra tē uiui nei : « E ho’i fa’ahou ānei ? » E tāmata fa’ahou ānei ? » Tē uiui ra vetahi e māhana ānei e fāri’ihia rātou ’e e herehia rātou. E mea tītauhia te mau mēlahi, i teie iho nei taime ; e mau mēlahi tei ineine i te vaiiho i tō rātou vāhi orara’a au nō te fāri’i ia rātou ; « [E ta’ata] maita’i ’e te mā, ’e te parau mātāmua e puta mai i roto i te ferurira’a [nō ni’a ia rātou, o te parau mēlahi ïa] » (Jeffrey R. Holland, « Te utuutura’a a te mau mēlahi », 30).

Te mau taea’e ’e te mau tuahine, e mea ti’aturi au i te mau mēlahi ! Tei ’ō nei tātou pā’āto’a i teie mahana, e nu’u rahi roa ’ino o te mau mēlahi tei fa’ata’ahia nō teie mau mahana hope’a nei, nō te tāvini ia vetahi ’ē ’ei rima toro o tei Hāmani here. Tē parau fafau nei au ē, mai te mea e ineine tātou nō te tāvini, e fa’afāna’o mai te Fatu i te rāve’a nō te riro ’ei mēlahi aupuru. ’Ua ’ite ’oia ’o vai tei hina’aro i te tauturu a te mēlahi, ’e e tu’u ’oia ia rātou i ni’a i tō tātou ’ē’a. E mea tu’u te Fatu i te feiā tei hina’aro i te tauturu a te mēlahi i ni’a i tō tātou ’ē’a i te mahana tāta’itahi.

’Ua māuruuru vau nō te mau mēlahi e rave rahi tā te Fatu i tu’u i ni’a i tō’u ’ē’a i te roara’a o tō’u orara’a. E mea hina’arohia rātou. ’Ua māuruuru roa vau nō tāna ’evanelia ’o tē tauturu nei ia tātou ’ia taui ’e ’o tē fa’afāna’o ia tātou i te rāve’a nō te ha’amaita’i ia tātou.

E ’evanelia nō te here teie, e ’evanelia aupuru. ’O tā’u ïa e fa’a’ite pāpū nei i te i’oa o Iesu Mesia, ’āmene.