Ia Dou Vakaisulu, ena Turaga ko Jisu Karisito

Ni rau tubu tiko mai na luvei keirau gone, au kunea na ivola eso e veivakamarautaki ka veirawai ia e vakayagataka na ivakatakilakila ena italanoa. Ni keitou wiliwili vata ena yakavi, au taleitaka niu vukei rau na luvequ me rau kila na ivakatakilkila e vakayagataka o dauvolaivola me vakavulica eso na ivakavuvuli titobu, na ivakavuvuli ni kosipeli.

Au kila ni sa kilai vinaka sara, ena dua na siga na luvequ gone tagane se yabaki tini vakacaca. Sa qai tekivu wilika e dua na ivola vou ka vinakata me marautaka na italanoa, ia nona vakasama e saga tiko ga me kunea na ibalebale titobu ni veika kece e wilika tiko. E vakacudrui koya, ia, au dredre lo.

E veivakavulici o Jisu ena italanoa kei na ivakatakilakila¹—dua na soreni mosita me vakatavulica na kaukauwa ni vakabauta,² dua na sipi sa yali tu me vakavulica na talei ni tamata yadua,³ dua na gone cidroi me vakavulica na ivakarau ni Kalou.⁴ Nona italanoa vakatautauvata e ivakatakilakila e rawa ni vakavulici kina o Koya na lesoni titobu vei ira sa “vakadaligana me rogoca.”⁵ Ia, ko ira na vakasaqara na kena ibalebale titobu era na sega ni kila,⁶ me vakai ira na lewevuqa era wilika na vuqa na italanoa vata oqo au wilika vei ratou na luvequ, era na sega beka ni kila na ibalebale titobu kei na veika e vuqa eda rawa ni vulica mai na italanoa eso oqori.

E solia na Kalou na Tamada na Luvena edua Bau ga me sorovaki keda, o Jisu Karisito vakataki Koya a yaco me ivakatakilakila cecere duadua ni Nona loloma uasivi ni Tamada Vakalomalagi vei keda.⁷ O Jisu Karisito na Luve ni Kalou.⁸

E noda na madigi kei na veivakalougatataki nida sureti meda sema ena veiyalayalati kei na Kalou, ka rawa ni yaco me ivakatakilakila ni noda veiyalayalati na noda bula. Na veiyalayalati e tauyavutaka na mataqali isema ni veiwekani e vakatara na Kalou me veisautaki keda ka moici keda ka laveti keda meda vakataka na iVakabula, ka vakavolekataki keda sara Vua kei na Tamada⁹ ka mena qai vakarautaki keda meda curu yani kina Nodaru iserau.

Na tamata yadua e lako mai ki vuravura e luvena tagane se luvena yalewa lomani na Kalou.¹⁰ Nida sa digia meda tiki ni dua na veiyalayalati, e vakaqaqacotaka ka vakatitobutaka na noda isema ni veiwekani kei Koya. E vakatavulica o Peresitedi Russell M. Nelson ena gauna eda digia kina meda vakayacora na veiyalayalati kei na Kalou, na noda isema ni veiwekani kei Koya ena rawa ni veivolekati sara mai na gauna eda se bera ni veiyalayalati kina, ka vakatara Vua me vakalougatataki keda ena ivakarau ni Nona loloma veivueti, e dua na veiyalayalati ni loloma ka vakatokai me hesed ena vosa vaka Iperiu.¹¹ Na salatu ni veiyalayalati e baleta taucoko na noda veiwekani kei na Kalou—na noda veiwekani vaka hesed kei Koya.¹²

E vinakata na Tamada e dua na isema ni veiwekani titobu kei ira na Luvena tagane kei na yalewa.¹³ ia, o Koya ena sega ni vakasaurarataki keda. Nida digia meda toro voleka Vua mai na dua na isema ni veiyalayalati, e vakatara vei Koya me toro volekati keda mai¹⁴ ka vakalougatataki keda ena Nona kaukauwa meda na rawaka vakalevu cake.

E vakarautaka na Kalou na veika e gadrevi me caka ena veiyalayalati.¹⁵ Nida digia meda curuma na isema ni veiwekani oya, eda vakadinata Vua ena ivakatakilakila ni veiyalayalati nida vinakata meda vauci ena veika sa navuca o Koya.¹⁶ Ena noda rokova na noda veiyalayalati, eda vatara na Kalou me sovaraka mai e vuqa na veivakalougataki e okati vata kei na veiyalayalati eso oqo,¹⁷ oka kina na kaukauwa vakalevui meda veisau ka yaco meda vakataka na noda iVakabula. O Jisu Karisito e usutu ni veiyalayalati kece eda cakava, ka vakarautaki na veivakalougatataki ni veiyalayalati baleta na Nona veisorovaki.¹⁸

Na papitaiso ena tabadromuci e wai e imatamata vakatakilakila eda curu yani kina isema ni veiwekani ni veiyalayalati kei na Kalou. Noda tabadromuci e wai kei na noda mata cake mai e ivakatakilakila ni mate ni iVakabula kei na Tucake tale, kina bula vou.¹⁹ Nida sa papitaiso, eda sa vakatakilakilataka na mate kei na sucu tale kina matavuvale i Karisito ka vakaraitaka nida vinakata meda taura vei keda na Yacana.²⁰ Keda vakataki keda eda vakaraitaka na ivakatakilakila ni veiyalayalati. Ena Veiyalayalati Vou eda wilika, “Ni sai Karisito dou sa vakasulumi kemudou kina, oi kemudou yadua sa papitaisotaki vei Karisito.”²¹ Nida papitaiso eda ivakatakilakila i Karisito.

Na cakacaka vakalotu ni sakaramede e dusimaki keda vua na iVakabula. Na madrai kei na wai e ivakatakilakila ni yago i Karisito kei na dra e dave ena vukuda.²² Na isolisoli ni Nona Veisorovaki e ivakatakilakila sa soli vei keda e veimacawa, na matabete ka matataka tu na iVakabula, e solia vei keda na madrai kei na wai. Ena gauna eda sa kania ka gunuva na ivakatakarakara ni Nona dra kei na yago, oqo e vakatakilakilataka nio Karisito sa tiki ni noda bula.²³ Eda biuti Karisito vei keda ena noda cakava vou na noda veiyalayalati e veimacawa.²⁴

Ena gauna eda vakayacora kina na veiyalayalati kei na Kalou ena vale ni Turaga, eda vakatitobutaka na isema ni veiwekani kei Koya.²⁵ Na veika kece eda cakava e valetabu e dusimaki keda kina ituvatuva nei Tamada baleti keda, ka tiko saraga e lomadonu na iVakabula kei na Nona Veisorovaki.²⁶ Ena vakavulici keda na Turaga vosa ena vosa²⁷ ena ivakatakilakila ni cakacaka vakalotu kei na veiyalayalati nida dolava na lomada ka vakasaqara ena masumasu mo kila vakatitobu na kena ibalebale.

E tiki ni edaumeni ena valetabu, vei ira na marama kei na turaga na lewa mera daramaka na qameni ni matabete tabu. E itavi ka madigi vakatabui.

E vuqa na ivakarau vakalotu makawa, era daramaka na isulu e tuba me ivakatakilakila ni nodra vakabauta kei na yalayala vua na Kalou,²⁸ ka daramaki na isulu ni soqoni vei ira na liutaka na soqoni. Na isulu vakatabui oqo e tiko na kena ibalebale titobu vei ira era daramaka. Eda wilika ena ivolanikalou ena veigauna makawa, na isulu tabu ni soqoni e daramaki me salavata kei na cakacaka ni valetabu.²⁹

Me vaka nida lewe ni Lotu i Jisu Karisito ni Yalododnu Edaidai, o keda eda digitaka meda veiyalayalati kei na Kalou ena vale ni Turaga eda daramaka na isulu tabu ni soqoni ena gauna ni sokalou e valetabu, ka ivakatakilakila ni sulu e daramaki e valetabu ena gauna eliu. Eda daramaka na qameni ni matabete tabu, ena gauna ni sokalou ena valetabu kei na noda bula e veisiga.³⁰

Na qameni ni matabete tabu e ivakatakilakila bibi ka dusi vua na iVakabula. Ena gauna erau kania kina na vuanikau o Atama kei Ivi ka rau sa biuta na Were ko Iteni, a soli veirau na kote ka caka mai na kuli ni manumanu me ubi rau.³¹ E vakacabori e dua na manumanu me rawa ni caka kina na kote koya—ivakatakilakila ni nona isoro na iVakabula baleti keda. Kaphar na vosa vaka Iperiu ni veisorovaki, ka dua na kena ibalebale me ubia.”³² Na noda qameni ni valetabu e vakananuma vei keda na iVakabula kei na Nona Veisorovaki ena ubi keda ena noda bula taucoko. Nida daramaka na qameni ni matabete tabu e veisiga, na ivakatakilakila talei oqori sa tiki ni noda bula.

Ena Veiyalayalati Vou ena vola i Roma, eda wilika kina: “Sa vakarau oti na bogi, a sa voleka na siga: o koya meda qai luvata tani na ivalavala butobuto, ka meda vakaiyaragi tu ena rarama. Ia dou vakaisulu, ena Turaga ko Jisu Karisito.”³³

Au vakavinavinakataka na madigi meu daramaka na qameni ni matabete tabu me vakananuma vei au ni iVakabula kei na Nona veivakalougatataki ni veisorovaki tawamudu e ubi au ena noqu ilakolako kece ni bula oqo. E vakananuma talega vei au niu sa maroroya na veiyalayalati au vakayacora kei na Kalou ena vale ni Turaga, au sa daramaki Karisito, o Koya na iyaragi ni rarama. Ena taqomaki au mai na ca,³⁴ solia vei au na kaukauwa levu cake,³⁵ ka noqu rarama kei na idusidusi³⁶ ena butobuto kei na dredre ni vuravura oqo.

E tiko nai balebale talei ka titobu ni qameni ni matabete tabu kei na kena isema vei Karisito. Au vakabauta na noqu vinakata³⁷ meu daramaka na qameni tabu e noqu ivakatakilakila Vua.³⁸ Oqo na noqu ivakatakilakila vakataki au vua na Kalou, ka segai ni ivakatakilakila vei ira na tani.³⁹

Au vakavinavinakataka na noqu iVakabula, o Jisu Karisito.⁴⁰ Na Nona veisorovaki me baleti keda sa yaco me ivakatakilakila ni Nona loloma tawamudu baleti keda,⁴¹ ena ivakatakilakila kilai ni loloma kei na soli bula oqori—na mawe e tu e ligana, yavana kei na sarena na iVakabula—e tiko ga ena gauna madaga sa Tucake tale kina o Koya.⁴²

Niu maroroya na noqu veiyalayalati kei na itavi vua na Kalou, oka kina na kena daramaki na qameni ni matabete tabu, na noqu bula e rawa ni yaco me ivakatakilakila ni noqu loloma kei na vakavinavinaka titobu vua noqu iVakabula, o Jisu Karisito, kei na noqu gagadre me tikoga kei au o Koya.

Kevaka o se bera ni vakayacora vakakina, au sureti kemuni moni digia e dua na isema ni veiwekani kei na Kalou ena noda vakayacora na veiyalayalati kei Koya ena Nona vale na Turaga. Vulica na vosa ni noda parofita (oka kina na iyau talei era tiko ena ivakamacala e vakamatataki e ra ena nona vosa, e dau tiko ena vuqa na vosa ni koniferedi). Sa tukuna vakavuqa o koya baleta na veiyalayalati ena veiyabaki ka vakabibi ni sa yaco me Peresitedi ni Lotu. Vuli mai na nona ivakavuvuli baleta na veivakalougatataki talei kei na kaukauwa mana e levu cake kei na kaukauwa e rawa ni nomu ena nomu vakayacora ka maroroya na veiyalayalati kei na Kalou.⁴³

Na iVola Dusidusi Raraba e tukuni kina ni sega ni gadrevi me dua nomu veikacivi vaka daukaulotu se mo sa vosaki mo vakamau mo rawa ni veiyalayalati ena valetabu.⁴⁴ Me sa yabaki 18 e dua na tamata, ka sa sega ni vuli tiko ena koronivuli torocake se tautauvata, ka lewe ni Lotu me rauta e dua na yabaki. E gadrevi talega e dua na ivakarau ni ivakatagedegede ni bula vakatabui.⁴⁵ Kevaka sa tiko vei iko na gagadre mo vakatitobutaka na nomu veisemati kei na Tamada mai Lomalagi kei Jisu Karisito ena nomu vakayacora na veiyalayalati tabu ena vale ni Turaga, au sureti iko mo veitalanoa kei na nomu bisopi se peresitedi ni tabana ka vakaraitaka vei koya na nomu gagadre. Ena vukei iko o Koya mo kila na sala mo vakavakarau kina me rawa niko ciqoma ka rokoba na veiyalayalati eso oqori.

Ena isema ni veiwekani ni veiyalayalati kei na Kalou, na noda bula sa rawa ni ivakatakilakila ni noda yalayala kei na loloma titobu baleta na Tamada Vakalomalagi, noda hesedVua,⁴⁶ kei na noda gagadre meda tubu tiko ga ka yaco meda vakataka na noda iVakabula, vakarau meda curu kina Nodrau iserau ena dua na siga. Au vakadinadinataka ni veivakalougatataki cecere oya ni isema veiwekani ni veiyalayalati e veirauti kei na kena isau. Ena yacai Jisu Karisito, emeni.