E Bibi Na Vosa

Taciqu kei na ganequ, kei na itokani e veiyasai vuravura, e ka dokai vei au meu vosa kina ivavakoso levu oqo, ka vuqa vei kemuni oni lewe ni noda Lotu ka vuqa era itokani era qai vakarorogo mai vakadua kina koniferedi kaburaki oqo. Ni sa bula!

Na itukutuku ka na wasei mai na tevale oqo ena vakadewataki yani ena vosa. Ena soli yani ena vosa vaka Valagi ka vakadewataki kina voleka ni 100 na duivosavosa. Ia e tautauvata tiko ga na kena yavu. Oya na vosa. Na vosa e ka bibi. Meu kaya tale mada oya. E bibi na vosa!

Era yavu ni noda veisemati; era matataka na noda vakabauta, yavunibula, kei na itovo ni noda rai. So na gauna eda cavuta na vosa, kei na so tale na gauna eda vakarorogo. Na vosa era vakarautaka e dua na ituvatuva. Era tukuna na noda vakanananu, na ka eda vakila, ka sotava, se ka vinaka se ka ca.

E ka ni rarawa, ni vosa e rawa ni tawaveinanumi, vakariri, ka mosimosi. Ni sa cavuti oti, eda na sega ni rawa ni taura lesu. Era rawa ni veivakamavoataki, veitotogitaki, veibutuki sobu, ka veimuataki kina ivalavala e veivakarusai. Era rawa ni vakalomaocaocataki keda sara.

E yasana kadua, na vosa e rawa ni marautaka na qaqa, solia na inuinui ka veivakayaloqaqataki. Era rawa ni vakauqeti keda meda vakasama tale mada, tekivu vou tale, ka vakadodonutaka na noda ilakolako. Na vosa era rawa ni dolava na noda vakasama kina dina.

Oya na vuna, era bibi taumada kina, na vosa ni Turaga.

Ena iVola i Momani, na parofita o Alama kei ira na nona tamata e Amerika makawa era a sotava na ivalu tawa oti rawa kei ira era a sega ni kauwaitaka na vosa ni Kalou, vakaukauwataka na lomadra, ka vakadukadukalitaka na nodra itovo ni bula. Era rawa ni vala na yalodina, ia o Alama a vakasalataka: “Me vaka ni dau vakayarayarataki ira na tamata me ra vakayacora na ka e dodonu na vunautaki ni vosa ni Kalou—io, raica sa kaukauwa sara na vosa ni Kalou kina nodra vakanananu na tamata ka mucu na iseleiwau, se dua tale na ka e sa yaco vei ira—o koya e sa nanuma kina ko Alama ni sa kilikili me ra na vakatovolea na kena mana na vosa ni Kalou.”¹

Na “vosa ni Kalou” e uasivita na veimataqali vosa tale eso. Sa vaka tu mai kina oya tekivu mai na Buli ni vuravura ni kaya na Turaga: “Me rarama mai: a sa rarama mai.”²

A lako mai vua na iVakabula na veivakadeitaki oqo mai na Veiyalayalati Vou: “Ena takali ko lomalagi kei vuravura, ia na noqu vosa ena sega ni takali.”³

Kei koya oqo: “Kevaka sa lomani au e dua, ena talairawarawa ki na noqu vosa: ena qai lomani koya ko Tamaqu, ia keirau na lako mai kivei koya, ka tiko ga vua.”⁴

Mai vei Meri, na tinai Jisu, a lako mai kina na vakaidinadina malumalumu oqo, “Raica na vada ni Turaga; me yaco ga vei au me vaka na nomuni vosa.”⁵

Na vakabauta kei na muri ni vosa ni Kalou ena kauti keda vakavoleka vei Koya. O Peresitedi Russell M. Nelson e yalataka, “Kevaka oni na vulica na Nona vosa, ena vakalevutaki na nomuni igu moni vakataki Koya vakalevu cake.”⁶

Eda sega beka ni vinakata kece oya, me vaka e kaya na serenilotu, “meu kalougata ka savasava—cake, na iVakabula, meu ucui kemuni”?⁷

Au nanuma na gonetagane o Josefa Simici ni tekiduru tu ka rogoca tiko na domo i Tamana mai Lomalagi: “[Josefa,] Oqo na noqu Gone ni Toko. Mo Rogoci Koya!”⁸

Eda “rogoci Koya” mai na vosa ni ivolanikalou, ia eda muria beka na ka e tukuni kina, se eda kila beka ni vosa tiko o Koya vei keda? Eda veisau beka?

Eda “rogoci Koya” mai na ivakatakila yadua kei na veivakauqeti ni Yalo Tabu, isau ni masu, kei na veigauna o Jisu Karisito duadua ga, ena kaukauwa ni Nona Veisorovaki, e rawa ni laveta na noda icolacola, vosoti keda ka vakacegui keda, ka ovici keda “ena liga ni nona loloma.”⁹

iKarua, e bibi na nodra vosa na parofita.

O ira na parofita era vakadinadinataka na ituvaki vakalou i Jisu Karisito. Era vakavulica na Nona kosipeli ka vakaraitaka na Nona loloma vei ira kece na tamata.¹⁰ Au vakadinadinataka ni noda parofita bula, o Peresitedi Russell M. Nelson, e rogoca ka tukuna na vosa ni Turaga.

O Peresitedi Nelson e rakorako ena vosa. A kaya o koya, “Tiko ga ena salatu ni veiyalayalati,”¹¹ Vakasoqoni Isireli,”¹² Me Qaqa Duadua Ga na Kalou,”¹³ Tara wavu ni veikilai,”¹⁴ Vakavinavinaka,”¹⁵ Vakatubura nomu vakabauti Jisu Karisito,”¹⁶ Taukena nomu ivakadinadina,”¹⁷ ka “Yaco mo dua na dautataro.”¹⁸

Wale tiko ga oqo, a kerei keda o Koya meda “vakasama vakasilesitieli.” “Nio sotava na lomalomarua,” a kaya o koya “vakasama vakasilesitieli! Nio vakatovolei ena veitemaki, vakasama vakasilesitieli! Ni vakanadakui iko na bula se o ira na daulomani, vakasama vakasilesitieli! Ni dua e mate vaka sakasaka, vakasama vakasilesitieli.Ni solegi iko na veivakasosataki ni bula, vakasama vakasilesitieli! … Nio vakasama vakasilesitieli, ena veisau mai vakamalua na lomamu, … o na raica na veivakatovolei kei na veisaqasaqa ena dua na rai vou. … [ka] na vakalevutaki na nomu vakabauta.”¹⁹

Nida vakasama vakasilesitieli, eda na raica na “ka ena kedra ituvaki dina, ka … na yaco me vaka dina kina.”²⁰ Ena vuravura oqo ka bikai ena veilecayaki kei na veisaqasaqa, eda gadreva taucoko na rai vaka oya.

O Elder George Albert Smith, ni bera nona yaco me Peresitedi ni Lotu, a vosa me baleta na nona tokoni na parofita kei na vakamuri ni nona vosa. E tukuna: “Na ilesilesi eda vakayacora nida laveliga … sa ka tabu sara. … E kena ibalebale … nida na tokoni koya; eda na masulaki koya; … ka da na saga meda cakava na nona ivakasala ni veidusimaki kina na Turaga.”²¹ Se meda, na cakacakataka ena yalodina na nona vosa na noda parofita.

Niu dua vei ira na 15 na parofita, daurairai, ka dauivakatakila ka tokoni ena noa mai na noda Lotu e vuravura raraba, au via wasea vei kemuni edua na ka au sotava ena nona tokoni na parofita kei na ciqomi ni nona vosa. Vei au e a via vaka na parofita o Jekope, o koya ka tukuna, “Au a rogoca na domo ni Turaga ni sa vosa vakaidina vei au.”²²

Ena Okotova sa oti na watiqu, o Melanie, keirau a tiko mai Bangkok, Thailand, niu a vakavakarau tiko kina vakatabui na ika 185 ni valetabu ni Lotu.²³ Vei au, na ilesilesi oya a vaka na tadra ka veivakayalomalumalumutaki talega. Oqo e a imatai tiko ni valetabu ena ucunivanua ena tokalau cevaceva kei Esia.²⁴ E a mataitaki vakamaqosa sara—taba ono, ciwa na kena matana ki lagi, ka “sema vata kina”²⁵ me dua na vale ni Turaga. Au a vakasamataka tu na veivakatabui oya me vica na vula. Na ka au a qai kila rawa ni matanitu oya kei na valetabu e tokoni ka maroroi tu ena nodra veiqaravi na iapositolo kei na parofita. O Peresitedi Thomas S. Monson a kacivaka na valetabu²⁶ kei na kena vakatabui o Peresitedi Nelson.²⁷

Au vakarautaka na masu ni kena vakatabui ena vica na vula yani e liu. Na veivosa tabu oqori era sa vakadewataki oti ki na 12 na vosa. Keitou sa vakarau tu. Mai na noqu nanuma.

Ena bogi ni bera na kena vakatabui, au vakayadrati mai na noqu moce ena veilecayaki, kei na nuiqawaqawa me baleta na masu ni veivakatabui. Au tovolea meu biliga vakatikitiki na veiuqeti, niu nanuma ni sa vakarautaki tu na masu. Ia e sega ni biuti au na Yalo Tabu. Au vakila ni vica na vosa e yali tiko, a vakatakilai vei au ena ituvatuva vakalou, au vakacuruma na veivosa oqo kina masu volekata na kena itinitini: “Meda qai vakasama vakasilesitieli, ka vakatara Na Yalomuni me qaqa tiko ga ena neimami bula, ka segata me dautataro e veigauna kece.”²⁸ Na Turaga a vakananumi au tiko meu rogoca na vosa ni noda parofita bula: “Vakasama Vakasilesitieli,” “me qaqa duadua ga na Yalomuni,” “segata me dautataro.” Na vosa ni parofita e bibi vua na Turaga ka vakakina vei keda.

iKatolu, ka rui bibi sara, sai ira na noda vosa. Oqo na ka dina, ena vuravura ka sinai ena noda imoji,²⁹ na noda vosa e bibi.

Na noda vosa e rawa ni veitokoni se veicudruvi, solia na reki se rarawa, yalololoma se veibiligi tani. Ena gauna ni cudru, na vosa e cavuti e rawa ni mosimosi ka lutu vakatitobu sara kina yalo—ka tiko kina. Na noda vosa ena initaneti, ena talevoni veikauyaki, ena vatavata ni itukutuku raraba, e rawa ni vakadewataki cala. O koya gona mo qarauna na ka o tukuna kei na ivakarau ni nomu tukuna. Ena noda veimatavuvale, vakabibi vei rau na veiwatini, kei ira na gone, na noda vosa e rawa ni kauti keda vata mai se tawasei keda.

Meu tukuna mada e tolu na malanivosa ka rawa nida vakayagataka me kauta tani na bati gaga mai na dredre kei na duidui, meda veilaveti ka veivakadeitaki kina vakaikeda:

“Vinaka vakalevu.”

“Vosoti au.”

Kei na “Au lomani iko.”

Kua ni maroroi ira na veivosa oqo me qai vakayagataki ga ena dua na gauna digitaki se ena gauna ni leqa. Vakayagataki ira wasoma ena yalodina, nira vakaraitaka nodra kauwaitaki na tani. Na vosa sa cavuti tu ga vakasabalia nikua; kakua ni muria na ivakarau oya.

Eda rawa ni cavuta “vinaka vakalevu” ena ikabakaba livaliva, ena ikelekele ni motoka, ena makete, e valenivolavola, ena laini, se vei ira eda tiko veivolekati se itokani. Eda rawa ni cavuta “vosoti au” nida cakava edua na cala, calata edua na bose, guilecava edua na siganisucu, se da raica ni mosi tiko edua. Eda rawa ni cavuta “au lomani iko” era tukuna tiko na veivosa oqori “niu nanumi iko tiko,” “au kauwaitaki iko,” “au tiko oqo me baleti iko,” se “o iko o bibi ki na noqu bula.”

Meu wasea mada e dua na ivakaraitaki mai na noqu bula. Tagane vakawati, ni rogoca vinaka. Kemuni na ganequ oqo ena vukei kemuni talega. Ni bera niu mai taura noqu ilesilesi tudei ena Lotu, au a dau veilakoyakoyaki vakalevu ena vuku ni noqu kabani. Au dau gole vakalevu kina veivanua vakayawa sara e vuravura. Ni oti edua na siga, se vanua cava au tiko kina, au na dau qiri ga ki vale. Ni tomika cake na watiqu, o Melanie, na talevoni kau vosa yani, edau veimuataki na neirau veitalanoa kina neirau tukuna “au lomani iko.” Ena veisiga kece, na veivosa oqori era vaka edua na ivakadei ki yaloqu kei na noqu ivakarau, ena taqomaki au mai na inaki ca. “Melanie, au lomani iko” e tukuna tiko na veivakabauti talei ena keirau maliwa.

E dau tukuna tu o Peresitedi Thomas S. Monson, ni “Tu na yava meda vakadeitaka, na liga meda qumia, na vakasama meda vakayaloqaqataka, na yalo meda vakauqeta, kei na tamata meda vakabula.”³⁰ Na tukuni ni “vinaka vakalevu,” “vosoti au,” “au lomani iko” ena vakayacora sara ga na veika oya.

Taciqu kei na ganequ, e bibi na vosa.

Au yalataka ni kevaka eda “kana magiti ena vosa i Karisito”³¹ ka veimuataki ki na veivakabulai, na vosa ni noda parofita ka na veidusimaki ka vakayaloqaqataki keda, kei na noda vosa era tukuni keda kei na veika eda vakamareqeta, ena sovaraki mai vei keda na kaukauwa vakalomalagi. “Na vosa i Karisito sa tukuna vei kemudou na veika kece mo dou kitaka.”³² Eda sa Luvena e noda Kalou o Koya, ka namaka vei keda meda vosa “ena vosa ni agilosi”³³ ena kaukauwa ni Yalo Tabu.³⁴

Au lomana na Turaga o Jisu Karisito. Sai Koya, ena vosa ni Aisea na parofita mai na Veiyalayalati Makawa me “Ko Veivakurabuitaki, Na iVakavuvuli, Na Kalou Kaukauwa, Na Tama ni gauna tawamudu, Na Tui ni Sautu.”³⁵ Me vaka e vakamatatataka o Joni na iApositolo, nio Karisito Vakaikoya “na Vosa.”³⁶

Au vakadinadinataka oqo vaka dua na iApositolo ka kacivi ki na veiqaravi vakalou ni Turaga—meu vunautaka na Nona vosa—ka kacivi meu duri me dua Nona ivakadinadina digitaki. Ena yaca i Jisu Karisito, emeni.