Sa Kilai Oti Tu mo Veiqaravi

Bogi nikua, au vosa vei ira na itabagone ena Lotu, na itabatamata cauravou kei na goneyalewa era tu mera iliuliu ni vei siga ni mataka.

Ena Okotova 2013, a tukuna kina na noda parofita lomani, o Peresitedi Russell M. Nelson: “Sa kilai iko tu na Tamamu Vakalomalagi ena dua na gauna balavu sara. O iko, me vaka nio Luvena tagane se yalewa, o digitaki mai Vua mo lako mai i vuravura ena gauna sara ga oqo, mo veiliutaki ena Nona cakacaka cecere e vuravura.”¹

Ena rua na yabaki sa oti, a tomana o Peresitedi Nelson:

“Nikua au vakadeitaka tale vakaukauwa na nona kerekere na Turaga, na cauravou bula kilikili ka tu vinaka tu nona bula yadua sara me vakavakarau ka lako i kaulotu. Vei ira na cauravou Yalododonu Edaidai, na veiqaravi vakadaukaulotu e itavi ni matabete. O kemuni na cauravou oni maroroi tu me baleta na gauna oqo ni sa vakayacori tiko kina na vakasoqoni vata kei Isireli sa yalataki tu. …

“Vei ira na yalewa gone ka tu vinaka na nodra bula, na kaulotu talega e dua na madigi qaqa, ia meda qai digitaka, . … Masu mo kila kevaka e vinakata na Turaga mo kaulotu, e vosa i yalomu kei na nomu vakasama na Yalo Tabu.”²

E vakaraitaka na noda parofita ni maroroi ira tu na itabagone ni gauna oqo na Turaga me baleta na gauna oqo ni vakasoqoni kei Isireli kei na nona veisureti mera masulaka mera kila na ka e vinakata na Turaga mera cakava, e dua na tikina, sa dusia na bula oni bulataka kei na veivakalougatataki oni ciqoma ni bera nio ni sucu mai i vuravura.³ O keda kece eda sucu mai i vuravura oqo eda bula taumada tu kei na Tamada Vakalomalagi vaka-Luvena vakayalo.⁴ A tukuna vei Mosese na Turaga, “Ia koi Au, na Turaga na Kalou, au bulia oti tu vakayalo na veika kece au sa tukuna, ni bera ni ra qai vakavotukanataki e delai vuravura.”⁵

Ena Nona buli kemuni vakayalo, a lomani kemuni me vaka nio ni Luvena tagane kei na yalewa vakayalo ka vakatikora vei kemuni yadua e dua na ituvaki vakalou kei na icavacava tawamudu.⁶

Ena nomu bula taumada, “o sa tara kina na kemu ivakatakilakila ka vakalevutaka cake na nomu rawaka vakayalo.”⁷ Oni vakalougatataki ena isolisoli ni galala ni digidigi, na kaukauwa moni digidigi vakataki kemuni, ka oni sa vakatauca na lewa bibi eso, me vaka na nomu muria na ituvatuva ni marau nei Tamada Vakalomalagi, sai koya “meda mai taukena e dua na yago ka mai bula e vuravura me da toso … ka yaco me kila na nomu icavacava tawamudu na taukeni ni bula tawamudu.”⁸ Na lewa oqo a vakayacoka ena nomu bula oya, ka sa vakayacoka tiko ena nomu bula oqo.⁹ Me vaka nio luvena na Kalou ka bula tiko ena bula taumada, sa “tubu na nomuni kila ka ka ko ni sa vulica mo ni taleitaka na dina.”¹⁰

Ni bera nio sucu mai sa lesi kemuni na Kalou moni mai qarava na itavi eso ena nomuni bula vakayago e vuravura.¹¹ Kevaka oni bula kilikili tiko ga, na veivakalougatataki ni lawa taumada oya ena donui iko kina na veimataqali madigi kecega ena bula oqo, oka kina na madigi ni veiqaravi ena Lotu ka vakaitavi ena cakacaka bibi duadua e yaco tiko e vuravura ena gauna oqo: na vakasoqoni vata kei Isireli.¹² Na veiyalayala kei na veivakalougatataki taumada oqori era vakatokai me nomu veitabaki taumada. Na ivunau ni veitabaki taumada e yaco vei ira kece na lewe ni Lotu.¹³ Na veitabaki taumada e sega ni vakadeitaka nio na ciqoma e dua na veikacivi se itavi. Na veivakalougatataki kei na madigi oqo e yaco mai ena bula oqo ka vua ni nomu vakayagataka vakadodonu na nomu galala ni digidigi, me vaka ga ni a vua ni nomu buladodonu na nomu veitabaki taumada ena nomu bula taumada.¹⁴ Nio vakadinadinataka na nomu bula kilikili ka toso tiko ena salatu ni veiyalayalati oqo, ona ciqoma na madigi mo veiqaravi ena nomu kalasi ni Goneyalewa se kuoramu ni matabete. Ona vakalougatataki mo veiqaravi ena valetabu, mo dua na dauveiqaravi tagane se yalewa, ka daukaulotu vakatisaipeli i Jisu Karisito.

Na cava e bibi kina mo segata mo kila na nomu a tabaki taumada mai? Ena dua na gauna ni sa basika na taro, ni lewe levu era sa segata mera kila na kedra ivakatakilakila, na dina ni kilai keda ka sa vakalougatataki keda yadudua ni se bera mada ga nida sucu mai e vuravura kei na “veitovo ni bula … taumada, oqo, kei na ivakatakilakila tawamudu kei na inaki” e kauta mai na vakacegu kamica kei na veivakadeitaki kina noda vakasama kei na yaloda. Nomu kila o cei o iko e tekivu ena nomu kila na veivakalougatataki taumada ni Kalou a solia vei iko ni se bera mada ga nio sucu mai i vuravura. Na Tamada Vakalomalagi e gadreva me vakatakila vei iko na nomu ilesilesi taumada, ka na vakayacora vakakina o Koya ni o segata mo vulica ka muria na Lomana.

Au dau taleitaka meu wilika na itukutuku nei Peresitedi Nelson ena Instagram. E dua au taleitaka vakalevu a kabira ena ika 20 ni Julai, 2022. A vakaoqo:

“Au vakabauta ni kevaka e vosa tiko vakadodonu vei iko na Turaga, na imatai ni ka ena vakadeitaka o Koya mo kila ocei dina o iko. A kaya o koya: “Kemuni na noqu itokani lomani, oni luvena vakayalo dina na Kalou. …

“… Oqo na ka dina: Na nomu ituvaki e ka vakalou. Ena nomu vakasaqaqara vagumatua, na Kalou ena solia vei iko mo raica se o cei o na rawa ni yaco mo vakakina.”¹

Meu wasea mada vei kemuni na ivakarau a vakavulici au kina na tamaqu vakavuravura meu kila na kequ ivakatakilakila kei na ituvatuva ni Kalou kina noqu bula?

Ena dua na mataka ni Vakarauwai niu yabaki 13, au kotiva tiko na co ni oqori na noqu itavi ena vei macawa. Niu sa oti, au rogoca na sogo ni katuba ena daku ni neitou vale kau raici tamaqu ni kaci tiko mai meu lako yani vua. Au taubale yani kina varada e muri, ka sureti au o koya meu dabe vata kaya ena ikabakaba. Sa dua na mataka talei. Au nanuma tiko ga ni dabe voleka vei au ka veitaratara sara toka na tabai keirau. A tekivu ena nona kaya ni lomani au. A taroga se cava na noqu inakinaki ena bula oqo. Au vakasama, “O, rawarawa sara.” Au vakadeitaka e rua: Au vinakata meu balavu cake, kau vinakata meu dau lai keba vakalevu cake. Au tamata rawarawa tu. A matadredredre, cegu vakalailai, ka kaya: “Steve, au vinakata meu wasea vei iko e dua na ka bibi sara vei au. Au sa masuta me vakavuna na Tamada Vakalomalagi na veika au na tukuna qo vei iko me na kua ni taqusi rawa mai na nomu vakasama kei na yalomu mo kakua kina ni guilecava.”

Sa vesuka taucoko tu noqu vakasama o tamaqu. A vuki, raici au e mataqu ka kaya, “Luvequ, taqomaka na nomu veigauna taudua ena nomu bula.” A dua na cegu balavu ni laiva me lutu vakatitobu na kena ibalebale e yaloqu.

A qai tomana : “Kila na veigauna oya, nio tiko duadua voli ga ka sega tale ni dua e kila na ka o cakava tiko? Na veigauna oya nio nanuma na ka au cakava oqo ena sega ni vakayacoka vua tale e dua, vei au ga

Oti qai kaya o koya, “Vakalevu cake ena nomu bula, na veika o cakava ena gauna o tiko duadua kina ena levu duadua na kena revurevu ena nomu sotava na bolebole kei na mosiniyalo ena yaco mai; kei na veika o cakava ena veigauna taudua ni nomu bula ena levu talega na kena revurevu ena ivakarau o sotava kina na bula qaqa kei na reki e yaco mai ena veigauna kecega ni nomu bula.”

A ciqoma o tamaqu na gagadre ni yalona. Na rorogo kei na itautau ni domona, kei na loloma au vakila ena nona vosa, a sega ni taqusi rawa mai na noqu vakasama kei na yaloqu ena siga oya.

Au vulica ni cakacaka mana levu duadua oya na noqu cavuikalawa ni veisiga mai vale, ena noqu bula, ka rawa niu lako vua na Kalou meu ciqoma na ivakatakila. A vakavulica tiko vei au o tamaqu na ivakarau au rawa ni vulica kina na veivakalougatataki taumada ni Kalou. Ena veigauna ni tiko taudua oqori, au sa vulica kina ni vosa ni Kalou na iVola i Momani. Au vulica ni lesi au taumada mai na Kalou meu kaulotu. Au vulica ni kilai au na Kalou, e dau rogoca ka sauma na noqu masu. Au vulica nio Jisu na Karisito, na noda iVakabula ka noda Dauveivueti.

E dina ni levu na noqu cala me tekivu mai na gauna guilecavi dredre oya kei tamaqu, na sasaga me maroroi na veigauna ni nomu bula ena yaco me iyaqa ena cava ni bula ka rawa kina meu saga na ivakaruru vinaka kei na veivakalougatataki veivakabulai, veivaqaqacotaki ni nona loloma kei na isoro ni veivakaduavatataki na iVakabula.

Kemuni na taciqu kei na ganequ itabagone, nio tmaroroya na veigauna vinaka ni nomu bula, vakarorogo kina ivakatagi veilaveti, wili ivolanikalou, masu vakaibalebale e veigauna eso, ka sasaga mo ciqoma ka vakananuma nomu veivakalougatataki vakapeteriaki, ona ciqoma na ivakatakila. Ena vosa nei Peresitedi Nelson, ena yaco me “tadola vakalevu na matamudou kina dina ni bula oqo e gauna dina mo vakatulewataka kina na bula vakacava o vinakata mo bulataka me tawamudu.”¹⁸

Ena sauma na Tamamu Vakalomalagi na nomu masu, vakauasivi na nomu masu e cabori ena gauna o tu duadua kina. Ena vakatakila vei iko o Koya na nomu isolisoli kei na taledi taumada, o na vakila na Nona loloma ni ologi iko, kevaka ona kerea ena yalodina ka gadreva mai vuniyalomu mo kila. Nio qarauna mo taqomaka na nomu gauna ni tiko duadua ena nomu bula, ena vakaibalebale vakalevu cake na nomu vakaitavi ena cakacaka vakalotu kei na veiyalayalati ni kosipeli. O na vauci iko taucoko vakalevu cake vua na Kalou ena veiyalayalati o vakayacora vata kei Koya, ka laveti me levu cake na nomu inuinui, vakabauta, kei na veivakadeitaki ena yalayala sa vakayacora vei iko o Koya. O vinakata beka mo kila na ituvatuva ni Kalou vei iko? Au vakadinadinataka ni vinakata o Koya mo kila, ka vakauqeta o Koya na Nona parofita e vuravura me sureti keda yadua meda masu ka ciqoma na veika e sa tadola e matada ena vukuda.¹⁹ Au vakadinadinataka na dina kei na mana ni nona isoro ni veivakaduavatataki na noda iVakabula ka rawa kina meda bula ka rekitaka na veivakalougatataki taumada kece ni Kalou, ena yaca i Jisu Karisito, emeni.