Duru kei na Rarama

Na noqu itukutuku e baleti ira era lomaleqataka na nodra ivakadinadina baleta nira se bera ni sotava e dua na gauna vakasakiti vakayalo. Au masulaka niu na rawa niu solia eso na vakacegu kei na yalodei.

Na Vakalesui mai ni kosipeli i Jisu Karisito a tekivu ena dua na kacabote ni rarama kei na dina! E dua na cauravou itabagone mai New York, na yacana ko Josefa Simici, a curuma e dua na veikau me masu. A lomaleqa ena vuku ni yalona kei na nona itutu ena mata ni Kalou. A kerea na veivosoti ena vuku ni nona ivalavala ca. Ka veilecayaki se na lotu cava me lewena. E gadreva me kila na dina ka kunea na vakacegu—e gadreva na rarama kei na kilaka.¹

Ni tekiduru ko Josefa me masu ka “cabora na gagadre ni [yalona] vua na Kalou,” a ologi koya e dua na butobuto vavaku. E dua na ca, dauveisaqa, dina a tovolea me tarovi koya—me vesuka na yamena me kua ni vosa rawa. Sa kaukauwa sara na butobuto ka nanuma kina ko Josefa ni sa voleka ni mate. Ia e “solia na nona igu taucoko me kaciva na Kalou me sereki [koya] mai na kaukauwa ni meca oqo ka sa vesuki koya tu.” Ia, “ena gauna sara ga sa vakarau me lutudromu kina ena yaluma ka soli [koya] yani me rusa,” ni sa sega ni kila se na rawa me vosota tale se sa sega, a cilava na veikau e dua na iserau lagilagi, ka talabusesetaka na butobuto kei na meca ni yalona.²

A lutuki koya e dua na “duru ni rarama” ka uasivita na rarama ni matanisiga A rairai mai e dua na tamata, oti qai basika mai e dua tale.³ Na kedrau “iserau kei na lagilagi e sega ni vakamacalataki rawa.” Na kena imatai, na Tamada Vakalomalagi, a cavuta na yacana, “dusia na kena ikarua—[I Josefa!] Oqo na Noqu Gone ni Toko. Mo Rogoci Koya!”⁴

Ia ena kacabote levu oya ni rarama kei na dina, sa tekivu kina na Veivakalesui mai. Ena luvuci ena ivakatakila mai lagi kei na veivakalougatataki: na ivolanikalou vou, vakalesui mai ni lewa ni matabete, apositolo kei na parofita, cakacaka vakalotu kei na veiyalayalati, kei na tauyavutaki tale ni nona Lotu dina ka bula na Turaga, ka na vakasinaita na vuravura ena dua na siga ena rarama kei na ivakadinadina bula i Jisu Karisito kei na Nona kosipeli vakalesui mai.

Na ka kece oqori, kei na vuqa tale, a tekivu ena nona masu ni vakatakekere e dua na gonetagane kei na duru rarama.

O keda talega e dui tu na noda gagadre bibi. O keda talega eda gadreva na sereki mai na veilecayaki vakayalo kei na butobuto vakavuravura. Sa gadrevi talega meda na vulica vakai keda.⁵. Oqori e dua na vuna sa sureti keda kina o Peresitedi Russell M. Nelson me da “luvuci [keda] ena rarama lagilagi ni Veivakalesui mai.”⁶

E dua na dina cecere ni Veivakalesui oya ni sa tadola tu na lomalagi—o keda talega eda rawa ni ciqoma na rarama kei na vuku mai cake. Au vakadinadinataka ni dina oya.

Ia meda qaqarauni ena dai vakayalo. Ena so na gauna eso na lewe ni Lotu yalodina era sa dau yalolailai ka ciri tani yani baleta nira se bera ni sotava e dua na gauna vakasakiti vakayalo—baleta ni ra se bera mada ni vakila na nodra duru vakayalo. A veivakasalataki kina o Peresitedi Spencer W. Kimball, “Ni sa dau namaka tikoga na ka lelevu, e levu ena calata saraga kina na drodro mai vagauna ni ivakatakila.”⁷

A nanuma lesu o Peresitedi Joseph F. Smith ni, “Turaga a sega ni vakaraitaka mai vei au na veika talei [niu se gone], ka vakaraitaka vei au na dina, na laini ena laini, na ivunau ena ivunau, vakalailai eke vakalailai e kea.”⁸

Oqori na nona iwalewale na Turaga, taciqu kei na ganequ. Sega ni vakauta mai vei keda na Turaga na duru rarama, ia e vakauta mai e dua na cina rarama, oti qai dua tale, qai dua tale.

Na cina rarama oqori sa dau sovaraki tikoga mai vei keda. E vakavulica na ivolanikalou nio Jisu Karisito na “rarama kei …na bula kei vuravura,”⁹ na “Yalo[na] sa vakararamataki ira na tamata sa lako mai ki vuravura,”¹⁰ kei na Nona rarama sa “vakasinaita na maliwa lala,” sa solia na “bula kina ka kecega.”¹¹ Na Rarama i Karisito sa vakavolivoliti keda kecega.

Kevaka eda sa ciqoma na isolisoli ni Yalo Tabu ka da segata tiko meda cakacakataka na vakabauta, veivutuni, ka rokova noda veiyalayalati, eda sa qai kilikili kina me ciqoma e veigauna na memena vakalou oqo. Na malanivosa guilecavi dredre nei Elder David A. Bednar, “eda sa bula tiko ena ivakatakila.’”⁹

Ia, o keda taucoko eda duidui. E sega ni rawa ni tautauvata vakavinaka na sala erau vakila kina e rua na tamata na nona rarama kei na dina na Kalou. Taura mada eso na gauna mo vakasamataka na sala o sotava kina na rarama kei na Yalo ni Turaga.

Oni rairai sa sotava beka na kacabote oqo ni rarama kei na ivakadinadina ni sa “vakacegui na noda vakasama me baleta e dua na ka a vakaleqa tiko na lomada.¹³

Se dua beka na veivakauqeti—e dua na domo malua lailai—ka laki dabe “ena nomu vakasama kei na yalomu”¹⁴ ka uqeti iko mo cakava e dua na ka vinaka, me vaka nomu vukea e dua.

Rairai o tiko beka ena dua na kalasi mai valenilotu—se dua na keba ni itabagone—ka vakila e dua na gagadre kaukauwa mo muri Jisu Karisito ka yalodina tiko.¹⁵ Rairai o tucake sara beka ka wasea e dua na ivakadinadina o nuitaka ni dina ka qai vakila ni vaka kina.

Se o masu tiko beka ka vakila na veivakadeitaki rekitaki ni lomani iko na Kalou.¹⁶

O rogoca beka ni wasea e dua nona ivakadinadina kei Jisu Karisito qai tara na yalomu ka vakasinaiti iko ena inuinui.¹⁷

Rairai o wilika tiko beka na iVola i Momani qai vosa i yalomu e dua na tikina, me vaka beka ni a biuta tu kina na Kalou me baleti iko.¹⁸

O vakila beka na loloma ni Kalou baleti ira na tani ena nomu qaravi ira tiko.¹⁹

Se rairai beka o dau dredre mo vakila na Yalotabu ena vuku ni lomaocaoca se nuiqawaqawa ia e tiko ga na isolisoli ni loloma ka kila na nuinui mo railesuva na “yalololoma dina ni Turaga”²⁰

Na ka au via tukuna tiko ni vuqa na sala meda ciqoma kina na rarama vakalomalagi ni ivakadinadina. Oqo e vica wale ga, e dina. Sega soti beka ni dau laurai levu, ia o ira kece era bulia cake na noda ivakadinadina.

Taciqu kei na ganequ, au se bera ni raica e dua na duru rarama, me vakataki iko, au sa vakila oti e vuqa na ramase ni cina. Ena veiyabaki sa oti, au ovolea meu vakamareqeta na veigauna vaqori. Au kunea niu cakava vakakina, au raica ka nanuma e vuqa tale vei ira. Oqo eso na ivakaraitaki mai na noqu bula. Era sega beka ni taleitaki vei ira eso, ia era vakamareqeti sara vei au.

Au nanuma na noqu a kosakosa tiko ena dua na papitaiso niu se cauravou. Ni vakarau tekivu na soqoni, au vakaila ni uqeti au na Yalotabu meu dabe ka vakarokoroko. Au a dabe sobu ka vagagalu tiko ena vo ni gauna ni soqoni.

Ni bera noqu kaulotu au leqataka ni se sega ni kaukauwa vinaka na noqu ivakadinadina. Sega ni dua ena noqu vuvale e sa kaulotuoti, au sega ni kila kevaka au rawa ni cakava. Au nanuma na noqu a vuli ka masu vakalevu meu rawata e dua na ivakadinadina tudei kei Jisu Karisito. Ena dua na siga, niu vakatakekere tiko vei Tamada Vakalomalagi, au vakila vakaukauwa na rarama kei na raragi. Ia au kila. Au kila deivaki.

Au nanuma na noqu a vakayadrati ena dua na bogi ena noqu vakila na “kilaka savasava” ka tukuna vei au niu na kacivi meu veiqaravi ena kuoramu ni italatala qase.²¹ Ena rua na macawa ka tarava au sa kacivi.

Au nanuma e dua na koniferedi raraba ka cavuta kina e dua na lewe ni Kuoramu ni iApositolo Le Tinikarua na mala ni ivakadinadina vata sara ga au tukuna vua e na itokani au namaka meu rogoca.

Au nanuma noqu tekiduru vata kei ira e drau vakadrau na turaga me masulaki e dua na itokani lomani sa cibati koya toka ena dua na misini ni cagi ena dua na valenibula lailai vakayawa sara ni sa tu vakadua na nona uto. Nida vakaduavatataka na yaloda meda kerea na nona bula, a yadra mai ka dreta tani na paipo ni cagi mai nona itagitagi. Nikua sa veiqaravi tiko vakaperesitedi ni dua na iteki.

Kau nanuma na noqu yadra mai kei na vakanananu vakayalo kaukauwa ni oti e dua na tadra baleta e dua na itokani lomani ka dauvakasala e matedole, ka biuta tu mai e dua na galili levu ena noqu bula. A matadredredre tu ka mamarau. Au kila ni vinaka tu o koya.

Oqo eso na noqu memena taleitaki: Sa yaco talega na nomu gauna o iko—na kacabote ni nomu ivakadinadina sinai ena rarama. Nida raica, nanuma, ka sokumuna na cina rarama oqo “me dua ga,”²² sa tekivu me yaco e dua na ka vakasakiti. “Na rarama sa sala vata ga kei na rarama”—na dina sa rekitaka ga na dina.”²³ Na dina kei na mana ni dua na rarama ni ivakadinadina e vakaukauwataka ka cokovata kei na dua tale, qai dua tale, qai dua tale. Laini ena laini, ivunau ena ivunau, dua na memena eke, ka dua na memena e kea—dua na gauna lailai mareqeti vakayalo ena dua na gauna—ka tubu cake kina e lomada e dua na ibini gauna vakayalo sinai ena rarama. Rairai e sega ni dua na rarama e rauta na kena kaukauwa se me tara e dua na ivakadinadina taucoko, ia nira tuvata e rawa ni yaco me rarama ka na sega ni vakaseyavutaka rawa na butobuto ni vakatitiqa.

Ia e dina li na ka oqo?” A taroga o Alama. “Au sa kaya vei kemuni, Io, baleta ni rarama.”²⁴

“Na veika sa vu mai vua na Kalou e veivakararamataki,” e vakavuvulitaka na Turaga, “kei koya sa ciqoma na rarama, ka tudei tiko ga vua na Kalou, ena vakararamataki vakalevu; io ena tubu cake tiko ga na nona rarama me yacova na siga uasivi ko ya.”²⁵

Kena ibalebale, na taciqu kei na ganequ, ena kena gauna, ena “gugumatua,”²⁶ eda na rawata talega na noda duru rarama—dua na cina rarama ena dua na gauna. Ia ena loma ni duru oqori, eda na raica talega e dua na Tama Vakalomalagi dau loloma ni kaciva mai na yacada, dusi keda vua na noda iVakabula, o Jisu Karisito, ka sureti keda meda “Rogoci Koya!”

Au vakadinadinataki Jisu Karisito, ni sai koya na rarama ka vunibula kei vuravura—kei na nomu vuravura vakatamata yadua kei na noqu.

Au vakadinadinataka nio Koya na Luvena dina na Kalou bula, ka tu o Koya ena ulu ni Lotu dina ka bula oqo.

Meda kila ka ciqoma na Nona rarama lagilagi ka qai digitaki Koya mai na butobuto ni vuravura—vakawasoma me tawamudu. Ena yacai Jisu Karisito, emeni.