Ko ʻEtau Tamai Moʻoni ʻa e ʻOtuá

Ko e ʻOtuá ko ʻetau Tamai Hēvaní Ia, ko e Tamai ʻa hotau ngaahi laumālié. ʻOkú Ne kau ʻi he Toluʻi ʻOtuá fakataha mo Sīsū Kalaisi pea mo e Laumālie Māʻoniʻoní. Ko ha kakai makehe kinautolu mo honau ngaahi fatongia makehe ka ʻoku nau taha pē ʻi he taumuʻá. Ko e foʻi moʻoni ko ʻení, fakataha mo ha ngaahi moʻoni kehe, naʻe mole ia ʻi he hili ʻa e pekia ʻa Sīsū Kalaisi mo ʻEne Kau ʻAposetoló, lolotonga e vahaʻa taimi naʻe ʻiloa ko e Hē mei he Moʻoní.

Naʻe kamata ke fakafoki mai ʻe he ʻEikí ʻa e ngaahi moʻoni ko ʻeni ne molé ʻi he faʻahitaʻu failau ʻo e 1820, ʻi he taimi naʻe lotu ai ʻa e kiʻi tamasiʻi taʻu 14 ko Siosefa Sāmitá ʻi he vao ʻakau ofi ki hono ʻapí ʻi he Kolo ko Manisesitaá, ʻi Niu ʻIoke, ke ne ʻilo pe ko e fē ʻa e siasi ke kau ki aí. Ko e tali ʻo ʻene lotú, naʻe mamata ai ki he ʻOtua ko e Tamaí mo Sīsū Kalaisi. Naʻe hiki ki mui ʻe he Palōfita ko Siosefa Sāmitá ʻene mata-meʻa-hā maí ʻo pehē: “Naʻe folofola mai ʻa e toko taha kiate au, ʻo ne ui au ʻaki hoku hingoá ʻo ne tuhu ki he tokotahá ʻo pehē—Ko hoku ʻAlo ʻOfaʻangá ʻeni. Fanongo kiate Ia!” (Siosefa Sāmita—Hisitōlia 1:17).

ʻI he ʻaho 16 ʻo Fēpueli 1832, naʻe maʻu ai ʻe he Palōfitá mo Sitenei Likitoni ha fakahā. ʻI he talateu ʻo e fakahaá, naʻá na fakamoʻoniʻi ai ʻa Sīsū Kalaisi mo e ʻOtua ko e Tamaí ʻo pehē: “Pea ko ʻeni, hili ʻa e ngaahi fakamoʻoni lahi kuo fai ʻo kau kia [Sīsū Kalaisí], ko e fakamoʻoni fakamuimui taha ʻeni, ʻa ia ʻokú ma fai ʻo kau kiate iá: ʻOkú ne moʻui! He naʻá ma mamata kiate ia, ʻio ʻi he toʻukupu toʻomataʻu ʻo e ʻOtuá; peá ma fanongo ki he leʻo ʻoku fakamoʻoniʻi ko ia ʻa e ʻAlo pē Taha naʻe Fakatupu ʻo e Tamaí”— (D&C 76:22–23).

Ngaahi tokāteline ʻokú ne fakamoʻoniʻi ʻa e ʻOtua ko e Tamaí:

1. Naʻe fakatupu ʻa kitautolu ʻi he tatau ʻo e ʻOtuá (vakai, Mōsese 2:26).

2. Ko e ʻOtuá ko e Fungani Tupuʻangá ia, pea “ ʻoku fakahā ʻe he meʻa kotoa pē ʻoku ʻi ai ha ʻOtua” (ʻAlamā 30:44).

3. Ko ʻetau Tamai Hēvaní ʻa e ʻOtuá, ko ha mātuʻa fakalaumālie moʻoni (vakai, Hepelū 12:9).¹

4. ʻOku maʻu ʻe he ʻOtua ko e Tamaí ha sino ʻo e kakano mo e hui (vakai, T&F 130:22).

5. Naʻe foaki mai ʻe heʻetau Tamai Hēvaní ʻa e palani ʻo e fakamoʻuí (vakai, ʻAlamā 34:9).

Ngaahi founga te tau lava ai ke ʻilo ʻa ʻetau Tamai Hēvaní:

1. Keinanga ʻi he ngaahi folofolá (vakai, 2 Nīfai 32:3).

2. Hoko ʻo ʻilo ʻa Sīsū Kalaisi (vakai, Sione 14:9).

3. Talangofua ki he ngaahi fekau ʻa e ʻOtuá mo muimui ki he kau palōfitá (vakai, Sione 14:21; T&F 1:38).

4. Lotu ki he ʻOtuá ʻi he loto tui, ʻi he huafa ʻo Sīsū Kalaisí (vakai, Sēmisi 1:5; 3 Nīfai 18:20).