1 N. Hiav txwv ci li iav uas Yauhas hais txog, hauv Tshwm Sim tshooj 4, thiab nqe 6 yog dab tsi?T. Hiav txwv ci li iav ntawd yog lub ntiaj teb, lub sij hawm uas lub ntiaj teb dawb huv, tsis txawj tuag, thiab nyob mus ib txhis.

2 N. Peb yuav tsum to taub dab tsi txog plaub tug tsiaj, uas hais txog nyob hauv tib nqes ntawd?T. Lawv yog kev ua piv txwv, uas tus Txais Kev Tshwm Sim, uas yog Yauhas, siv kom piav txog ceeb tsheej, Vajtswv lub yeeb tsheej, txoj kev zoo siab ntawm tib neeg, thiab ntawm cov tsiaj, thiab tej yam uas txawj nkag mus kev, thiab ntawm tej noog saum nruab ntug; sab ntsuj plig muaj yam ntxwv zoo li sab cev nqaij daim tawv; thiab sab cev nqaij daim tawv muaj yam ntxwv zoo li sab ntsuj plig; tib neeg tus ntsuj plig muaj yam ntxwv zoo li nws lub cev, thiab tus ntsuj plig ntawm tus tsiaj kuj zoo li no, thiab tag nrho lwm tus tsiaj uas Vajtswv tau tsim.

3 N. Plaub tug tsiaj puas yog nyias piv txog nyias xwb, los yog lawv sawv cev txog tej pawg los sis tej theem?T. Lawv tsuas yog hais txog plaub tug tsiaj ntawd xwb, uas tau muab rau Yauhas pom, los piv txog lub yeeb koob ntawm tej yam tsiaj txhu nyob hauv lawv theem los yog lawv qhov chaw raws li Vajtswv tau txib kom tsim lawv, uas nyob txaus siab vim lawv kaj siab lug mus ib txhis li.

4 N. Peb yuav tsum to taub dab tsi txog qhov muag thiab cov tis, uas cov tsiaj muaj?T. Lawv qhov muag piv txog txoj kev kaj thiab kev txawj ntse, los yog hais tias, lawv muaj puv nkaus txoj kev txawj ntse; thiab lawv cov tis piv txog lub hwj chim, kev txawj txav, kev txawj ua, thiab ntxiv.

5 N. Peb yuav tsum to taub dab tsi txog nees nkaum plaub tus txwj laug, uas Yauhas hais txog?T. Peb yuav tsum to taub hais tias cov txwj laug uas Yauhas pom no, yog cov txwj laug uas tau rau siab ua txoj hauj lwm qhuab qhia thiab tau tuag lawm; cov uas zwm rau xya pawg ntseeg, thiab tom qab ntawd mus nyob hauv Vajtswv lub yeeb tsheej.

6 N. Peb yuav tsum to taub dab tsi txog phau ntawv uas Yauhas pom, uas tau muab xya lub cim nias rau sab nraum qab?T. Peb yuav tsum to taub hais tias phau ntawv no ntim Vajtswv lub siab nyiam, tej txuj ci uas neeg paub tsis txog, thiab tej hauj lwm uas tau tshwm sim los; tej yam nraim nris ntawm nws txoj kev tswj hwm ntsig txog lub ntiaj teb no nyob rau lub sij hawm xya txhiab xyoo ntawm lub ntiaj teb txoj kev muaj nyob, los yog txoj kev muaj nyob ntawm sab cev nqaij daim tawv.

7 N. Peb yuav tsum to taub dab tsi txog xya lub cim uas tau muab nias rau lawm?T. Peb yuav tsum to taub hais tias nyob hauv thawj lub cim muaj tej yam ntawm thawj ib txhiab xyoo, thiab lub cim thib ob muaj tej yam ntawm ib txhiab xyoo thib ob, thiab li ntawd mus kom txog lub cim thib xya.

8 N. Peb yuav tsum to taub dab tsi txog plaub tug tim tswv, uas hais txog nyob hauv Tshwm Sim tshooj 7 thiab nqe 1?T. Peb yuav tsum to taub hais tias lawv yog plaub tug tim tswv uas Vajtswv xa los, cov uas tau muab hwj chim rau lawv los kav plaub ceg kaum hauv lub ntiaj teb, los cawm txoj sia thiab ua kom puas tsuaj; cov no yog cov muaj txoj moo zoo uas kav ib txhis coj mus muab rau txhua haiv neeg, txhua xeem neeg, txhua yam lus, thiab txhua yam neeg; lawv muaj hwj chim los kaw loo rooj ntug, muab khi tseg cia rau txoj sia, los yog muab ntiab tawm mus rau hauv tej thaj tsam uas tsaus ntuj nti.

9 N. Peb yuav tsum to taub dab tsi txog tus tim tswv uas sawv tuaj mus tim sab hnub tuaj, Tshwm Sim tshooj 7 thiab nqe 2?T. Peb yuav tsum to taub hais tias tus tim tswv uas sawv tuaj mus tim sab hnub tuaj yog tus uas tau muab lub cim ntawm tus Vajtswv muaj sia zees nyob rau los saib xyuas kaum ob xeem neeg Ixayees; yog li ntawd, nws qw nrov nrov rau plaub tug tim tswv uas muaj txoj moo zoo uas kav ib txhis, hais tias: Tsis txhob ua rau ntiaj teb, thiab hiav txwv, thiab tej xyoob ntoo raug txom nyem, kom txog thaum peb tau muab cim nias rau peb tus Vajtswv cov tub qhe hauv pliaj tso. Thiab, yog nej txais qhov no ces, tus no twb yog tus Eli-as uas yuav los sau cov xeem neeg Ixayees los ua ke thiab muab txhua yam txum tim rov qab los.

10 N. Yuav tsum ua tej yam uas hais txog nyob hauv tshooj no kom tiav thaum lub sij hawm twg?T. Yuav tsum ua tej no kom tiav nyob rau hauv rau txhiab xyoo, los yog thaum qhib lub cim thib rau.

11 N. Peb yuav tsum to taub dab tsi txog kev muab cim nias rau ib puas plaub caug plaub txhiab leej, tawm hauv tag nrho cov xeem Ixayees los—kaum ob txhiab leej tawm hauv txhua xeem los?T. Peb yuav tsum to taub hais tias cov uas muaj lub cim nias rau lawv yog cov pov thawj hlob, uas tau tsa rau Vajtswv tus txheej txheem dawb huv, mus qhuab qhia txoj moo zoo uas kav ib txhis; vim lawv yog cov uas tau tsa tawm hauv txhua haiv neeg, txhua xeem neeg, txhua yam lus, thiab txhua yam neeg, los ntawm cov tim tswv uas tau muab hwj chim rau los kav tej haiv neeg hauv ntiaj teb, mus coj kom tag nrho cov uas yuav los rau hauv lub koom txoos ntawm tus Tub Hlob.

12 N. Peb yuav tsum to taub dab tsi txog txoj kev tshuab cov raj hlau, uas hais txog nyob hauv Tshwm Sim tshooj 8?T. Peb yuav tsum to taub hais tias ib yam li Vajtswv siv rau hnub los tsim lub ntiaj teb, thiab nyob rau hnub xya nws ua nws txoj hauj lwm tiav, thiab muab hnub ntawd hloov ua ib hnub dawb huv, thiab muab tej hmoov av los puab tsim ua neeg, twb ib yam li ntawd, nyob rau thaum pib ntawm xya txhiab xyoo tus Tswv uas yog Vajtswv muab lub ntiaj teb hloov ua dawb huv, thiab ua txoj kev cawm tib neeg tiav, thiab txiav txim rau txhua yam, thiab yuav txhiv txhua yam, tsuas yog tej uas nws tsis tau muab rau nws kav xwb, thaum nws twb muab txhua yam khi tseg cia lawm, rau qhov kawg ntawm txhua yam; thiab txoj kev tshuab cov raj hlau ntawm xya tus tim tswv yog txoj kev npaj thiab kev ua nws txoj hauj lwm tiav, nyob rau thaum pib ntawm xya txhiab xyoo—yog kev npaj txoj kev ua ntej lub sij hawm nws los.

13 N. Yuav ua kom tej ntawd tiav rau lub sij hawm twg, tej uas tau sau cia rau hauv Tshwm Sim tshooj 9?T. Yuav tsum ua kom tej ntawd tiav tom qab qhib lub cim thib xya, ua ntej Khetos los.

14 N. Peb yuav tsum to taub dab tsi txog phau ntawv me me uas Yauhas muab noj, li uas hais txog nyob hauv Tshwm Sim tshooj 10?T. Peb yuav tsum to taub hais tias phau ntawv me me yog ib txoj ntiag tug hauj lwm, thiab ib txoj kab ke, rau nws kom sau tej xeem neeg Ixayees ua ke; saib seb, tus no yog Eli-as, tus uas yuav tsum los thiab muab txhua yam txum tim rov qab los, raws li sau cia lawm.

15 N. Peb yuav tsum to taub dab tsi txog ob tug tim khawv, nyob hauv Tshwm Sim tshooj kaum ib?T. Nkawd yog ob tug yaj saub uas yuav sawv los mus rau haiv neeg Yudais nyob rau hauv hnub nyoog kawg, rau lub sij hawm ntawm txoj kev txum tim rov qab los, thiab los mus qhia tej yuav muaj los yav tom ntej rau cov Neeg Yudais tom qab lawv sib sau thiab tau txhim tsa lub nroog Yeluxalees nyob hauv lawv cov yawg koob thaj av.