Zaj Lus Tshaj Tawm Raug Cai 1
Phau Npaivnpaum thiab Phau Ntawv Maumoos qhia hais tias kev yuav ib tug txij nkawm yog Vajtswv txoj cai ntawm kev sib yuav tsuas yog Nws hais txawv xwb (saib 2 Xamuyees 12:7–8 thiab Yakhauj 2:27, 30). Tom qab Joseph Smith txais ib txoj kev tshwm sim, cov mej zeej ntawm lub Koom Txoos pib yuav ntau tus poj niam thaum xyoo 1840 (saib tshooj 132). Thaum xyoo 1860 txog 1880, tsoom fwv Amelikas tau tsa tej kev cai ua rau txoj kev yuav ntau tus poj niam no txhaum cai. Tom qab ntawd pawg U.S. Supreme Court tau pom zoo rau tej kev cai no. Tom qab tau txais kev tshwm sim, Thawj Tswj Hwm Wilford Woodruff tshaj tawm zaj Lus Qhia Tawm nram qab no, zaj uas lub Koom Txoos lees txais pom zoo tias muaj hwj chim thiab muaj cai tiag thaum lub Kaum Hli Ntuj hnub tim 6, xyoo 1890. Yog li ntawd nov yog qhov kawg ntawm kev yuav ntau tus poj niam nyob hauv lub Koom Txoos.
Rau tus Xav Paub Txog:
Vim tau xa tej ntawv xov xwm uas muab luam mus deb rau tej hom phiaj ntawm kev kav teb kav chaw, ntawm Salt Lake City mus, uas hais tias Utah Pab Neeg Tswj Cai, nyob hauv lawv tsab ntawv xov xwm nyuam qhuav xa mus rau tus Thawj Tswj tej Ciam Teb Chaws, liam hais tias tseem ua txoj kev cai sib yuav ntau tus poj niam thiab hais tias txij thaum lub Rau Hli Ntuj tas los yog lub xyoo tas los tau muaj plaub caug tawm txoj kev sib yuav zoo li ntawd nyob hauv Utah, thiab hais tias, nyob hauv tej kev qhia cov neeg, cov thawj coj ntawm lub Koom Txoos tau qhia, tau yaum thiab tau hais kom coj txoj kev muaj niam loj niam yau mus ntxiv—
Yog li ntawd, kuv, uas yog tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, ntawm txoj kev ua tiag tiag, tshaj tawm hais tias tej kev liam no yog cuav. Peb tsis qhia kom muaj ntau tus poj niam los yog kom muaj niam loj niam yau, los yog cia ib tug neeg twg mus ua li ntawd, thiab kuv xyeej qhov uas hais tias muaj plaub caug los sis pes tsawg txoj kev sib yuav muaj ntau tus poj niam nyob rau lub sij hawm ntawd uas ua kab ke sib yuav nyob hauv peb cov Tuam Tsev los yog nyob rau lwm qhov chaw hauv lub Ciam Teb Chaws.
Tau hnov txog ib txub, uas cov neeg ntawd liam hais tias tau ua txoj kev sib yuav nyob hauv lub Tsev Vaj Txiaj Ntsim, nyob hauv Salt Lake City, thaum lub Caij Nplooj Ntoo Hlav ntawm xyoo 1889, tiam sis kuv tsis paub hais tias leej twg tau ua txoj kab ke ntawd; yog ua li cas zoo li no los kuv tsis paub. Los ntawm txoj kev liam hais tias muaj li no, thiaj tau muab lub Tsev Vaj Txiaj Ntsim rhuav, tsis pub muaj kev ncua, los ntawm kuv txoj kev txib.
Rau qhov Pawg Tsoom Fwv Tsim Kev Cai tau tsa tej kev cai txwv tsis pub muaj ntau tus poj niam, tej kev cai uas lub tsev txiav txim siab tshaj plaws tau hais tias yeej yog raws li txhooj lij choj, kuv thiaj li tshaj tawm kuv txoj kev txiav txim siab coj raws li cov kev cai ntawd, thiab siv kuv lub hwj huam hloov nrog cov mej zeej ntawm lub Koom Txoos uas kuv tswj hwm kom lawv ua tib yam nkaus.
Twb tsis muaj dab tsi nyob hauv tej lus kuv qhia rau lub Koom Txoos los yog nyob hauv tej uas cov neeg nrog kuv qhia, nyob rau lub sij hawm tau hais ntawd, uas yuav muab txhais tau hais tias yog txhawb los sis yaum kev muaj ntau tus poj niam; thiab thaum ib tug Txwj Laug twg ntawm lub Koom Txoos tau hais tej lus uas zoo li yog qhia txog tej kev qhia tej ntawd, nws yeej raug muab ntuas sai sai. Thiab nim no kuv tshaj tawm rau sawv daws hais tias kuv lo lus ntuas rau Tsoom Haiv Neeg Ntseeg hauv Hnub Nyoog Kawg yog kom tsis txhob ua ib txoj kev cai sib yuav twg uas txoj kev cai ntawm lub teb chaws tau txwv tsis pub.
Wilford Woodruff
Thawj Tswj Hwm ntawm Yexus Khetos lub Koom Txoos ntawm
Tsoom Haiv Neeg Ntseeg Hauv Hnub Nyoog Kawg.
Thawj Tswj Hwm Lorenzo Snow muab cov lus nram no rau sawv daws xav:
“Kuv xav hais tias, vim peb paub hais tias Wilford Woodruff yog tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab yog tib tug txiv neej nyob hauv lub ntiaj teb rau lub sij hawm ziag no uas tuav cov yawm sij ntawm tej kab ke sib khi, peb yeej suav hais tias nws muaj cai tag nrho los ntawm nws txoj hauj lwm los muab Zaj Lus Qhia Tawm no uas tau muab nyeem rau peb hnov, thiab tau muab sau thaum lub Cuaj Hlis Ntuj hnub tim 24, xyoo 1890, thiab hais tias peb yog ib lub Koom Txoos tau sib sau ua ke nyob hauv Tuam Rooj Sab Laj, peb txais yuav qhov nws tau tshaj tawm ntsig txog kev yuav ntau tus poj niam hais tias yog txoj cai thiab tij lim.”
Salt Lake City, Utah, lub Kaum Hli Ntuj hnub tim 6, xyoo 1890.
Tej Nqe Lus Los ntawm Peb zaj Hais Lus Los ntawm
Thawj Tswj Hwm Wilford Woodruff
ntsig txog Zaj Lus Qhia Tawm
Tus Tswv yuav tsis cia kuv los yog lwm tus txiv neej uas los ua tus Thawj Tswj Hwm ntawm lub Koom Txoos no coj nej mus yuam kev ib zaug li. Ua li no tsis yog Vajtswv txoj hau kev. Ua li no tsis yog Vajtswv lub siab nyiam. Yog hais tias kuv sim ua li ntawd, tus Tswv yuav muab kuv tshem tawm ntawm kuv qhov chaw mus, thiab Nws yuav ua tib yam nkaus rau lwm tus txiv neej uas sim coj noob neej kom yuam kev ntawm Vajtswv tej kev tshwm sim thiab ntawm lawv tej dej num mus. (Lub Tuam Rooj Sab Laj Thib Rau Caum Ib ntawm lub Koom Txoos, Hnub Ib, lub Kaum Hli Ntuj, hnub tim 6, xyoo 1890, Salt Lake City, Utah. Tshaj tawm hauv Deseret Evening News, lub Kaum Hli Ntuj hnub tim 11, xyoo 1890, p. 2.)
Tsis ua li cas txawm hais tias leej twg nyob los yog leej twg tuag, los sis tus Tswv hu leej twg los coj lub Koom Txoos no, lawv yuav tsum coj lub Koom Txoos no los ntawm txoj kev tshoov siab ntawm tus Vajtswv uas Muaj Hwj Chim Tag Nrho. Yog hais tias lawv tsis ua raws li ntawd, ces lawv yuav coj tsis tau kiag li. …
Kuv nyuam qhuav txais kev tshwm sim ob peb zaug, thiab muaj tej uas tseem ceeb heev rau kuv, thiab kuv yuav qhia rau nej tias tus Tswv tau hais dab tsi rau kuv. Cia kuv coj nej lub cim xeeb los xav rau qhov uas hu ua zaj lus qhia tawm. …
Tus Tswv tau qhia kuv kom nug ib lo lus nug rau Tsoom Haiv Neeg Ntseeg hauv Hnub Nyoog Kawg, thiab Nws kuj tau qhia kuv hais tias yog lawv mloog tej uas kuv tau hais rau lawv thiab teb lo lus uas nug lawv, los ntawm tus Ntsuj Plig thiab Vajtswv lub hwj chim, ces lawv sawv daws yuav teb zoo ib yam, thiab lawv sawv daws yuav ntseeg zoo ib yam txog qhov no.
Lo lus nug yog li no: Txoj kev twg thiaj yog txoj kev uas zoo tshaj plaws rau Tsoom Haiv Neeg Ntseeg hauv Hnub Nyoog Kawg taug—txoj kev sim coj raws li kev muaj ntau tus poj niam, es ua rau lub teb chaws tej kev cai thiab rau caum plhom tus neeg tawm tsam qhov ntawd, thiab ua rau tag nrho tej Tuam Tsev raug txeeb thiab poob, thiab ua rau tag nrho tej kab ke uas nyob rau hauv tej tuam tsev tsum, tag nrho rau cov ciaj thiab cov tuag, thiab ua rau Thawj Pawg Thawj Tswj Hwm thiab Kaum Ob tug Thwj Tim thiab cov thawj ntawm tej tsev neeg nyob hauv lub Koom Txoos raug coj mus tso rau hauv lub tsev kaw, thiab ua rau cov neeg poob lawv tej teej tug (yog poob tag tej teej tug yuav ua rau kom tsum txoj kev coj ntawd); los sis, tom qab tej uas peb tau ua thiab tej uas peb tau raug los ntawm tej uas peb tau ua raws txoj ntsiab cai no es cia li tsum txoj kev coj no thiab ywj raws txoj kev cai, thiab yog hais tias ua li no ces yuav cia tau cov Yaj Saub, cov Thwj Tim thiab cov txiv tsev nyob tom vaj tom tsev, kom lawv thiaj yuav qhia tau cov neeg thiab ua tau tej dej num ntawm lub Koom Txoos, thiab cia cov Tuam Tsev rau hauv Haiv Neeg Ntseeg txhais tes, xwv kom lawv thiaj mus ua tau tej kab ke ntawm txoj moo zoo, tag nrho rau cov ciaj thiab cov tuag?
Tus Tswv tau qhia rau kuv paub tseeb tseeb los ntawm txoj kev ua yog toog thiab kev tshwm sim txog tej uas yuav muaj los yog hais tias peb tsis tsum txoj kev coj no. Yog hais tias peb tsis tau tsum qhov ntawd, nej yuav tsis muaj chaw siv dab tsi rau … cov txiv neej nyob hauv lub tuam tsev hauv Logan no; vim tag nrho tej kab ke yuav nres nyob thoob plaws thaj av Xi-oos. Kev ntxhov hnyo yuav kav thoob plaws Ixayees, thiab ntau tus txiv neej yuav raug tso rau hauv lub tsev kaw. Qhov teeb meem no yuav los rau cov Ntseeg sawv daws, thiab peb yuav raug yuam kom tsum txoj kev coj ntawd. Nim no, lo lus nug yog, saib puas tsum kev coj no raws li no, los sis raws li qhov uas tus Tswv tau qhia tawm los rau peb, es cia peb cov Yaj Saub thiab cov Thwj Tim thiab leej txiv ua neeg ywj pheej, thiab cia tej tuam tsev nyob hauv cov neeg tes, xwv kom yuav txhiv tau cov tuag dim. Cov neeg no twb tso tau coob leej dim lub tsev kaw nyob hauv lub ntuj ntsuj plig, thiab yuav ua txoj hauj lwm mus ntxiv los sis tsum xwb? Lo no yog lo lus nug uas kuv muab tso rau Tsoom Haiv Neeg Ntseeg hauv Hnub Nyoog Kawg. Nej yuav tsum txiav txim siab rau nej tus kheej. Kuv xav kom nej teb rau nej tus kheej. Kuv yuav tsis teb; tiam sis kuv hais rau nej hais tias ntshe nov yog tej yam uas peb haiv neeg yuav raug yog hais tias peb tsis xaiv txoj hau kev uas peb tau xaiv.
… Kuv tau pom kiag qhov uas yuav muaj los yog hais tias peb tsis tau ua dab tsi. Kuv tau muaj txoj kev xav no nyob hauv kuv los lawm ntev. Tiam sis kuv xav hais li no: Ntshe kuv twb cia tag nrho tej tuam tsev poob ntawm peb tes mus; ntshe kuv twb tau mus nyob hauv lub tsev kaw, thiab cia txhua tus txiv neej mus nyob hauv nkuaj thiab, yog hais tias tus Vajtswv saum ntuj ceeb tsheej tsis tau txib kom kuv ua qhov uas kuv tau ua; thiab thaum txog lub sij hawm uas Vajtswv txib kom kuv ua qhov ntawd, txhua yam twb meej pem rau kuv. Kuv tau mus cuag tus Tswv, thiab kuv tau sau tej uas tus Tswv tau qhia kom kuv sau. …
Kuv muab qhov no tso rau nej, rau nej ntsuam thiab xav. Tus Tswv twb ua hauj lwm nrog peb. (Ceg Txheem Ntseeg Cache Rooj Sab Laj, Logan, Utah, Hnub Xya, lub Kaum Ib Hlis Ntuj hnub tim 1, xyoo 1891. Tshaj tawm nyob hauv Deseret Weekly, lub Kaum Ib Hlis Ntuj hnub tim 14, xyoo 1891.)
Nim no kuv yuav qhia rau nej saib tau muab dab tsi qhia tawm los rau kuv thiab saib Vajtswv Leej Tub tau ua dab tsi los ntawm qhov no … Ntshe twb muaj tag nrho tej yam no lawm, vim tus Vajtswv uas Muaj Hwj Chim Tag Nrho muaj sia zees nyob, yog hais tias tsis tau muab Zaj Lus Qhia Tawm ntawd los. Yog li ntawd, Vajtswv Leej Tub tau pom hais tias zoo kom muab yam ntawd qhia rau lub Koom Txoos thiab rau cov neeg hauv ntiaj teb rau tej hom phiaj ntawm nws tus kheej. Tus Tswv tau tshaj tawm kom txhim tsa Xi-oos. Nws tau txib kom ua lub tuam tsev no tiav. Nws tau tshaj tawm kom ua txoj kev cawm seej ntawm cov ciaj thiab cov tuag nyob hauv cov vos hav no ntawm cov roob no. Thiab Vajtswv uas Muaj Hwj Chim Tag Nrho tau tshaj tawm kom tus Dab Ntxwg Nyoog yuav tsum txhob rhuav tej no. Yog nej muaj peev xwm to taub qhov ntawd, ces qhov ntawd yog ib tug yawm sij rau tej hauj lwm no. (Los ntawm ib txoj kev hais lus nyob rau zaum thib rau ntawm txoj kev fij lub Tuam Tsev Salt Lake, Plaub Hlis Ntuj xyoo 1893. Ntawv Tshuab Ntaus ntawm tej Kev Sib Ntsib Fij Tuam Tsev, Chaw Cia tej Ceev Xwm Txheej, Pawg Koom Txoos Keeb Kwm, Salt Lake City, Utah.)