Phau Ntawv Maumoos qhia tias “txhua tus yeej zoo tib yam rau Vajtswv,” tsis hais “cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej” (2 Nifais 26:33). Nyob thoob plaws hauv lub Koom Txoos tej keeb kwm, cov neeg ntawm txhua haiv neeg nyob hauv ntau lub teb chaws twb tau ua kev cai raus dej thiab tau ua neej li cov mej zeej uas rau siab ntseeg nyob hauv lub Koom Txoos. Thaum Joseph Smith tseem ua neej nyob, twb muaj ob peb tug txiv neej dub uas yog mej zeej ntawm lub Koom Txoos uas tau tsa rau lub pov thawj hwj. Tsis ntev tom qab lub Koom Txoos zaj keeb kwm pib, cov thawj coj ntawm lub Koom Txoos tsum tsis muab lub pov thawj hwj rau cov txiv neej dub uas yog xeeb leej xeeb ntxwv ntawm cov neeg Afikas. Lub Koom Txoos cov ntaub ntawv ceev xwm txheej tsis qhia meej hais tias vim li cas ho pib ua li no. Cov thawj coj ntawm lub Koom Txoos ntseeg tias ib txoj kev tshwm sim los ntawm Vajtswv xwb thiaj hloov tau txoj kev ua li no lawv thiaj tau thov Vajtswv kom paub ua li cas. Txoj kev tshwm sim tau los rau tus Thawj Tswj Hwm ntawm lub Koom Txoos Spencer W. Kimball thiab qhia rau lwm tus thawj coj ntawm lub Koom Txoos nyob hauv lub Tuam Tsev Salt Lake thaum lub Rau Hli Ntuj hnub tim 1, xyoo 1978. Txoj kev tshwm sim no tshem tag nrho txhua txoj kev txwv ntsig txog haiv neeg thiab lub pov thawj hwj, uas ua ntej no tau muaj.