Tshooj 80
Kev tshwm sim uas tus Yaj Saub Joseph Smith tau txais kom qhia Stephen Burnett, nyob hauv Hiram, Ohio, lub Peb Hlis Ntuj hnub tim 7, xyoo 1832.
1–5, Tus Tswv hu Stephen Burnett thiab Eden Smith mus tshaj tawm txoj moo zoo rau qhov chaw twg uas nkawd xaiv.
1 Tseeb tiag, tus Tswv hais li no rau koj kuv tus tub qhe Stephen Burnett: Koj cia li mus, koj cia li mus rau cov neeg hauv ntiaj teb thiab tshaj tawm txoj moo zoo rau txhua tus neeg uas hnov koj lub suab.
2 Thiab rau qhov koj xav tau ib tug khub, kuv mam muab kuv tus tub qhe Eden Smith nrog koj.
3 Yog li ntawd, neb cia li mus thiab tshaj tawm kuv txoj moo zoo, txawm yog mus rau sab qaum teb los sis sab qab teb, mus rau sab hnub tuaj los sis sab hnub poob, tsis ua li cas, vim neb yuav tsis ua yuam kev.
4 Yog li ntawd, tshaj tawm tej yam uas neb tau hnov, thiab ntseeg tiag, thiab paub hais tias muaj tseeb.
5 Saib seb, qhov no yog raws li lub siab nyiam ntawm tus uas tau hu neb, neb tus Txhiv Dim, tus uas twb yog Yexus Khetos. Amees.