Kaungaan te Ibuobuoki

Tariu aika tangiraki, I rangin ni kakaitau ibukin reken te tai n taetae nakoimi n te maungatabu ni kabuta ae kakawaki aei. Ti a tia ni kamatoa Beretitenti Russell M. Nelson bwa te ka 17 ni Beretitenti n Ana Ekaretia Iesu Kristo ibukiia Aika Itiaki ni Boong Aika Kaitira. Ngkai I a tia ni kakabwaiaki ni mwakuri ma ngaia ni katoabong, I a tia n namakina ana kamatoa te Tamnei bwa Beretitenti Nelson e weteaki mairoun te Atua bwa e na kaira ana Ekaretia te Uea ae koaua.

Iai naba au kakoaua bwa e a tia te Uea ni wetea Unimwaane Gerrit W. Gong ao Unimwaane Ulisses Soares bwa a na beku bwa kaain te Kooram n te Tengaun ma Uoman. I tangiriia ao I buotokaiia. Ao anne, man aia mwakuri, a na kakabwaiai maiuia ni kabuta te aonaaba.

Te maungatabu aei e kakawaki ni bukina riki teuana. E a tia Beretitenti Nelson ni katanoata te mwaneka ae kaunganano nakon ana babaire te Uea ibukin Ana Ekaretia. Iai inanon te babaire ae boou ibukiia kaain te kooram n te uoote ao titeiki bwa ti aonga ni kona ni kakoroa raoi nanon tabera n te nakoanibonga. Katabeaki aikanne a bane ni irekereke ma ara tararua n te nakoanibonga irouia natin Tamara.

Ana babaire te Uea ibukiia Aika Itiaki ni katauraoa te tararua n tangira e a tia ni korobukina ni kawai aika a mwaiti inanon ririki. N taai ake ngkoa i Nauvoo, te Burabeti Iotebwa Timiti e kainnanoa te kawai ae baireaki raoi n tabeakiniia aika tibwa rairaki aika angiia kainnano n roko nako nanon te kaawa. Aman tibutoru a mena ibuakoia—ana utu Eyring, Bennions, Romneys, ao Smith. Te Burabeti e bairea aron tabeakinaia Aika Itiaki man aia tabo. I Illinois tibwatibwakin kaawa aikanne a atongaki bwa “uoote.”

Ngke a mwananga Aika Itiaki rinanon te rereua, aia tararua ibukiia e baireaki nakon aia “kurubu.” Temanna tibutoru te mwaane e oki man ana mition i Oklahoma ngke e kaitibo ma temanna iaon kawain te turein. E rangin ni mamaara imwiin te aoraki ngaia are ngaia ao toana a mena ibukin te waekon ae uarereke.

Te mataniwi n te kurubu e kanakoia uoman ataeinnaine bwa a na ibuobuoki nakon ane inanon te waekon ae maroaa. Temanna mai ibuakoia, te kairake n titita are e rairaki i Switzerland, e taraa temanna te mitinare ao e nanoangaia. E kamaiuaki man aia iraorao naake a Itiaki aikanne. E a rangin ni marurung n nakonako n nikiran te kawai nakon te Salt Lake Valley ma ana tia ibuobuoki ae te kairake i irarikina. A kareke tangira ao a mare. E riki bwa te tibutoru te mwaane Henry Eyring, ao tibutoru te aine Maria Bommeli Eyring.

Ririki imwiina, ngke aomata a taekina te kaangaanga ae korakora n te mwainging ni kabutaa te aba, e taku, “O tiaki, e aki kaangaanga. Ngke ti nakonako, ti taekinna inanon kawaira te kakai ae a tia n riki bwa ti uaia ni kunea ana euangkerio Iesu Kristo ae koaua. Bon te tai ae te kabanea ni kakukurei ae I kona n uringnga.”

Man te tai anne, e a tia te Uea ni kabonganai kawai aika a kakaokoro ni buokiia Aika Itiaki ibukiia n tatabemaniia. Ngkai e a tia ni kakabwaiaira ma te korakora ao te kooram ae katiteuanaki n te uoote ao n te titeiki—kooram ake a mwakuri n reitaki ma botakin nako te uoote.

Uoote ma tiaia aika a tia ni baireaki, kurubu, ao kooram aika kakorakoraaki a bane ni kainnanoi bwaai aika uoua bwa aonga ni kakoroa ana kantaninga te Uea bwa ana kona Aika Itiaki n tabeakiniia bon irouia n te kawai ae E karaoia ibukiia. A nakoraoi ngke Aomata Aika Itiaki a namakina ana tangira Kristo ibukiia n tatabemaniia n aron Ana tararua riaon riki are a tangiria. E atongaki ni booki aika tabu bwa te “tangira ae kororaoi … bon ana tangira Kristo ae itiaki” (Moronaai 7:47). Ao a tokanikai ngke te Tamnei ae Raoiroi e kaira te tia tararua n ata te bwai ae ataia te Uea bwa te kabanea n nakoraoi ibukin te aomata are e kataia n buokia.

Inanon wiiki aika aki maan n nako, a tia kaain te Ekaretia ni mwakuri ngke I raoniia n aron ae kanga A ataa te bwai ae e na karaoia te Uea, n aron are e a tia n taekinaki ikai n te bong aei. I tangiria n tibwauaia ma ngkami ti uoua katooto. Teuana, te marooro n te toa iroun te tia reirei ae 14-ana ririki n te Nakoanibonga ae te Aaron ae ataia bwa tera ae a kona ni kakoroa bukina kaain te nakoanibonga n aia mwakuri ibukin te Uea. Te Kauoua, naake iai irouia te Nakoanibonga ae te Merekitereka ake, ma ana tangira Kristo, a kaungaaki bwa e na buoka te utu.

Te moan, N na tibwauaia ma ngkami ana taeka te ataeinimwaane ngke e taetae n ana bootaki n toa te uoote. I mena ikekei. Kataia n uringa aekakim ngke 14 am ririki ao kakauongo n ongora irouna n taekina ae raka riki nakon ae kona te kairake n ataia:

“I a tia n rangin n tangiraki ngke I riki bwa te membwa n aia kooram taan reirei n ara uoote ngke e koro au ka-14 n ririki n te ririki ae nako. Te tia reirei e teimatoa n tabena ni kabane n te riikan n raonaki ma tabeua aika boou.

“Ngkai tabeman mai ibuakora bon taan reirei, tabeman ana riki n te tai teuana, ao kaain te Ekaretia ana kakabwaiaki iroun te ibonga, ngaia ae e kakawaki ibukira bwa ti na ataa riki taben te tia reirei.

“Te moan ni bwai, Reirei ao Berita aika Tabu 20:53 e taekinna, ‘Taben te tia reirei bon tararuaan te ekaretia n taai nako, ao n raonia ao ni kakorakoraia.’

“Are imwiina, Reirei ao Berita aika Tabu 20:54–55 e taekinna:

“‘Ao n taraia bwa e na akea te buakaka n te ekaretia, ke te a kaiangatoa imarenaia, ke te kewe, te winnanti, ke taekinan ae buakaka;

“‘Ao n taraia bwa e na aki toki ana botaki te Ekaretia, ao n taraia naba bwa ni kabane kaain te ekaretia a riai ni karaoa tabeia.’”

E reitianako te ataeinimwaane:

“E tuangiira te Uea bwa bon tabera bwa ti na aki ti tabe ibukin te Ekaretia ma ti na tabe naba ibukiia aomata inanon te Ekaretia te kawai are e na karaoia Kristo bukina bwa aio Ana Ekaretia. Ngkana ti kataia ni kawakin tuua, akoi imarenami, bwaina te kokoaua, riki bwa raao aika raraoi, ao kimwareirei ni kabane, ngkanne ti na kona ni karekea te Tamnei ma ngaira ao n ata te bwai ae tangiria te Tama are i Karawa bwa ti na karaoia. Ngkana ti aki, ngkanne ti aki kona ni kakoroa nanon nakoara.”

E reitianako n taku:

“Ngkana e rineia te tia reirei bwa e na katea te katooto ae eti n riki bwa te tia reirei n te mweenga ae tamaroa, butimwaia membwa n te taromauri, katauraoan te toa, ibuobuoki n te mweenga, ao n riki bwa taan raoi, e rineia bwa e na karinea ana nakoanibonga ao ni kakoroa nanon ana wewete.

“Te riki bwa te tia reirei ae tamaroa e aki ti nanonaki bwa ko na bukintaeka ngkana ti taromauri ke n ana waaki ni kakukurei te Ekaretia. E reirei te Abotoro ae Bwauro, “Ko na riki ba aia tia kakairi aomata aika onimaki, n te taeka, n te aro ni maeka, n te tangira, n te onimaki, ao n te itiaki’ (1 Timoteo 4:12).”

Ngkanne e taku te ataeinimwaane:

“N aki tabe bwa ti mena ia ke tera ae ti karaoia, ti kona n riki bwa te katooto ae tamaroa n te raoiroi n tainako ao n tabo ni kabane.

“Tamau ao ngai ti karaoa te reirei n te mweenga nakon ana utu Brown.¹ N tainako ngkana ti kawara ana utu Brown, e reke au tai n taetae ao ni manikangare ao ni kinaiia raoi riki. Teuana te bwai ae I rangin n tangiria ibukin ana utu Brown bwa n tainako ngkana ti roko irouia, a bane ni kan ongora ao iai n tainako aia karaki aika tamaroa n tibwauaia.

“Ngkana ti kinaia raoi aomata n te uoote anne ibukin te reirei n te mweenga e kabebetea ni karaoa taben te tia reirei, ao anne are butimwaeaia membwa n te taromauri. Buokaia aomata n namakina te butimwaeaki ao ni karinaia n te taromauri e buokiia membwa n te uoote bwa ana namakina te tangira ao n tauraoi ni taua te toa.

“Imwiin butimwaeaia membwa ake a roko n taromauri, a ibuobuoki taan reirei ni katoa Tabati ni katauraoan te toa. I rangin ni kukurei ni kabuta ao ni katauraoa te toa n te uoote aei bukina bwa a bane ni karinerine. I namakina te Tamnei n tainako ngkana I katauraoa ao ni kabuta te toa. Bon te kakabwaia ni koaua nakoiu are I a kona ni karaoia ni katoa Tabati.

“Tabeua mwakuri n ibuobuoki n aron kabutan te toa bon te bwai teuana ae a noria aomata ao a kaitauira ibukin karaoana, ma ibuobuoki tabeua n aron katauraoan te toa e kakaraoaki n akea temanna ae ataia. E aki kakawaki ngkana a noriira aomata ni beku; tera ae kakawaki e ataia te Uea ae ti a tia ni beku Ibukina.

“Ngkai ngaira taan reirei, ti riai n tainako ni kataia ni kakorakora te Ekaretia, raoraora, ao ara utu man kakoroan nanon tabera n ara nakoanibonga. E aki bebete n tainako, bwa e na bon aki anga te kaetieti te Uea nakoira ‘ma ti ngkana e a tia ni katauraoa te kawai [ibukira ni] ni kakoroa bukin te bwai are e tua nakoia’ (1 Nibwaai 3:7).”

Ngke e motikia te ataeinimwaane arei, I teimatoa ni miimi n ikawaina ao ni wanawanana. “I ataia bwa ti nakoraoi riki ngkana ti rineia bwa ti na ira [Iesu Kristo].”

Te karaki riki teuana n te mwakuri n ibuobuoki n te nakoanibonga e taekinaki teuana te namwakaina n nako n ana bootaki n toa te uoote. Riki, I mena ikekei. N te tai aei, te aomata ae iai irouna te nakoanibonga e aki ataia ngke e taetae ae e kabwarabwara raoi te bwai ae tangiria te Uea bwa e na riki ngaia bwa kaain te kooram n te nakoanibonga aika kakorakoraaki. Aio kabwarabwaraan ana rongorongo aika moan te kakawaki:

Ngaia ma toana n reirei n te mweenga a katabeaki bwa ana buokiia utu aika itiua. Angina mai buakoia a aki tangira te kakawari ni mweengaia. Ngke taan kakawari n te mweenga a nakon aia ruu aki kukurei ni kauka te mataroa. Ngkana a tareboon, aki kaekaaki. Ngkana a katuka aia rongorongo, ao te tareboon e aki kaekaaki. Te tinia kaombaenion e iangoia bwa e na reitaki ma te utu aei ni korea te reta nakoia kaain te utu aei. E kataia naba ni kabongana te enweroubu ae babobo n te kantaninga are ana karekea te kaeka.

Teuana mai ibuakoia utu ake itiua bon te titita ae aki bati ni kakaonimaki are e roko mai i Europe. Iai uoman natina aika uarereke.

Imwiin kakatai aika a mwaiti n tareboniia, e karekea te tekiti n ana tareboon. E waekoa n tuangnga bwa e aki kona n reke ana tai ni kaitibo ma ana tia reirei n te mweenga. Iai uoua ana mwakuri ao e mena naba n te taanga ni buaka. Oin raoi ana mwakuri bon te bureitiman, ao ana kouru n ana mwakuri bwa e na riki bwa te tia kareke rongorongo ao imwiina e na okira abana ao n reitanako ana mwakuri ikekei.

E a bon aki kona n reke ana tai ana tia reirei n te mweenga ni kawaria ni mweengana. N tainako ao e aki toki n tekiti nakoina. Ni katoa namwakaina e aki toki ni kakanakoa ana reta, ao e kanakoi naba kaati ibukia ana ataei.

Akea naba te kaeka ae karekea. Ma neiei e bon ataia ana tia reirei n te mweenga, e ataia naba arona n reitaki ma ngaia, ao a na teimatoa n te mwakuri n te nakoanibonga aei.

N te bong teuana e karekea ana tekiti mairouna ae kawaekoa. E rangin ni kainnanoa te ibuobuoki. E aki ataia bwa antai te bitiobi, ma e ataia taan kakawaria.

Inanon tabeua te bong, e na kitana te aba ibukin ana kataneiai ni kamarurung n te taanga ni buaka. E aki kona ni kairiia natina. Tinana, are e na tabeakiniia natina, e a tibwa tia ni kibanako nako Europe bwa e na tararua buna bwa are e kakaiaki aorakina.

Te ataeinnaine ae aki kakaonimaki aei e rawata ana mwane ni kaboa ana tiketi nako Europe ibukin ana kabanea ni uarereke n nati ma tiaki ibukin natina te mwaane ae 12-ana ririki, Eric.² E titirakina ana tia reirei n te mweenga ngkana e kona ni kakaea te utu n te LDS ae tamaroa ae na uota Eric nakon mwengaia 30 te bong man ngkai!

Te tia kakawari n reirei n te mweenga e tekiti rikaaki n tuangnga bwa e na karaoa ana kabanea ni kona. Ngkanne e reitaki ma ana mataniwi n te nakoanibonga. Te bitiobi, are e tararuaia ibonga aika rietata, e anganna te kariaiakaki bwa e na kawaria membwa n te kauntira n te uoote, n raonaki ma te beretitenti n te Bootaki n Aine.

Te beretitenti n te Bootaki n Aine e waekoa ni kuneia aman utu aika tamaroa n te LDS, ma natia aika ti tebo aia ririki ma Eric, are e na uotia nakon mweengaia n te maan ae teuana te wiiki. N te namwakaina are imwiina, utu aikai a kamwarakea Eric, a karekea ana ru n aia auti ae tau are e a kaman onrake ke ni uarereke, kairia n aia waaki ni kakukurei n aia utu n te tiamwa ae a kaman baireia, a kataromauria, kairia n aia bootaki n utu n te tairiki, ao a mwaiti riki.

Iai inanon utu tabeua ataeinimwane ae roron Eric, ao a karinna n ai botaki n aia kooram n rikan ao n aia waaki ni kakukurei. Inanona te 30 ni bong aei, Eric e nanako n te taromauri ni katoa Tabati n te moan tai.

Imwin okin tinana man te kataneiai, Eric e teimatoa n nakon te taromauri, n tainako ma temanna maibuakoia aman taan anganano n utuun te LDS ke tabeman ake a tia n riki bwa raoraona, n raonaki ma ana taan reirei n te mweenga tinana. N tokina, e katabuaki bwa te rikan ao ni moana kabutan te toa.

Ngkai, tia iangoa aron Eric nakon taai aika ana roko. Ti na aki kubanako ngkana e a riki bwa te tia kairiiri n te Ekaretia n aban tinana ngkana a oki ana utu nako ikekei—ni kabane ibukiia Aika Itiaki aika a mwakuri ma te katiteuanaki ni beku iaan mwaakan te Tamnei ae Raoiroi ao ibukin te tangira inanoia.

Ti ataia bwa e kakawaki te tangira ibukira bwa ti na kamaiuaki n abanuean te Atua. E koroia Moronaai, “Ao ngkana akea iroumi te tangira ae kororaoi ao kam bon aki kona ni kamaiuaki n uean te Atua” (Moronaai 10:21; taraa naba Ita 12:34).

Ti ataia naba bwa te tangira ae kororaoi bon te bwaintangira ae a tia ni katokaki iaomi imwiin aika ti kona ni karaoi. Ti riai n “tataro nakon te Tama ma korakoran nanora ni kabane, bwa [ti] na kaonaki n te tangira aio, are e a tia ni katoka iaoia ni kabane ake taan irira Natina, are Iesu Kristo ni koaua” (Moronaai 7:48).

Irou e taraa n ae ti na karekea Tamnein te Atua riki ngkana ti kabanea ara tai ni buokiia tabeman. Anne bukina ngkai ti karekea taben te nakoanibonga bwa e na beku ibukin te Tia Kamaiu. Ngkana ti katabeaki n ibuobuoki nakoia tabeman, ti naaki rangin ni iangoira, ao te Tamnei ae Raoiroi e na tauraoi riki n roko nakoira ao ni buokiira n ara kekeiaki ni maiura aei ni karekea ana bwaintangira te tangira ae aki toki ni katokaaki iaora.

I kaota nakoimi au kakoaua bwa e a tia te Uea ni moana te rikirake ae tamaroa n Ana babaire ibukira ni kaungaaki ao n nanoanga n ara mwakuri n ibuobuoki n te nakoanibonga. I kakaitau ibukin Ana tangira, are E a tia n anganiira ma te tituaraoi. I kakoaua n aran Iesu Kristo ae tabu, amen.