A Taetae Anera ni Mwaakan te Tamnei ae Tabu

Tariu ao mwaneu aika kam tangiraki, n taabo nako aika kam mena iai, I a kan kaota au kakaitau ae nano ibukin ami tai ni kamatoa ngkoananoa. I namakina te nanorinano ao te aki tau kanga aron Mote, e karauaki nanou n ana taeka te Uea nakoina:

“Antai ae karaoa win te aomata? ke antai ae karaoa te aomata ba e na bae newena, ke n taningabono, ke a noraba, ma ni mataki? tiaki boni Ngai ae te Uea?

““Ma ngaia ae ko na nako ngkai, ao N na mena i wim, ma n rereiniko am taeka.” (Te Otinako 4:11–12; taraa naba te kibu 10).

I rang mweengaraoi n ana tangira ao n ana boutoka kainnabau. E a tia n riki bwa te katooto n te tamaroa, tangira, ao motinnano ae babane nakon te Uea nakoiu ao au utu. I tangiria ma nanou ni kabane, ao i kakaitau ibukin ana bitaki aika tamaroa aika e a tia ni karikia iaora.

Tariu ao mwaneu, I kakoaua nakoimi bwa Beretitenti Russell M. Nelson bon ana burabeti te Atua iaon te aba. Akea ae I a tia n nooria ae akoi riki man tangira nakoina. E ngae ngke I namakinna bwa i aki tau nakon te wewete ae tabu aei, ana taeka ao taraakin matana ae akoi ngke e kanakoa te tibwanga aei I namakinna bwa I kaonaki n ana tangira te Tia Kamaiu. Ko rabwa, Beretitenti Nelson. I kamatoako ao I tangiriko.

Tiaki te kakabwaia karekeaia burabeti, taan mamata, ao taan kaotioti iaon te aba ni boong aikai ae ti maeka iai, aika a ukoukora ana kantaninga te Uea ao a iria? E karaunano ataakina bwa ti aki aki maroa n te aonaaba, ni kaitarai kaangaangan te maiu. Karekean te burabeti bon kanikinaean ana tangira te Atua ibukiia Natina. A kaoti berita ao aron te Atua ni koaua ao Iesu Kristo nakoia Aia aomata. I a tia n reiakin akanne rinanon ae I a tia n rinanona.

Tebwi ma waniua te ririki n nako, kainnabau ao ngai ti karekea te tareboon mai iroun Beretitenti James E. Faust, n te tai anne te Kauoman ni Kauntira n te Moan Beretitentii. E weteira bwa tina beku bwa beretitenti n te mition ao rao i Portugal. E tuangiira bwa tii onoua ara wiiki imwain ae ti waakina te mition. E ngae ngke ti namakina te aki tauraoi ao te aki tau, ti butimwaea te wewete. Ara raraoma ae korakora n te tai anne bon karekean ara visa are e kainnanoaki ni beku n te aba anne ibukina, ni kaineti ma ara taneiai imwaina, ti ataia bwa karaoana e nakon onoua nakon waniua te namwakaina katiakina.

Beretitenti Faust ngkanne e titiraki ngkana iai ara onimaki bwa te Uea e na karaoi kakai ao tina kona ni katia te kaangaanga iaon te visa n ae birimwaaka. Ara kaeka bon te bubura “eng,” ao ti waaki ni karaoi babaire n te tai ae waekoa. Ti katauraoi beeba ake a kainnanoaki ibukin te visa, kairiia ara utu ma natira aika uarereke, ao ti nakon te tia tei n te tai ae waekoa. Te aine ae tikiraoi e kaitibo ma ngaira ikekei. N rinanoan ara beeba ao ni karekean te bwai ae tina karaoia ngkana ti roko i Portugal e titirakiniira, “Kam na bon buokiia raoi au aomata i abau?” Ti kamatoa ara kaeka “eng” ao ti kabwarabwara bwa tina tei ibukin Iesu Kristo ao ni kakoaua irouna ao Ana mition iaon te aba. Ti okira ikekei aua te wiiki imwiina, karekei ara visa, ao ti roko n te mition inanon onoua te wiiki, n aron are e a tia ni butiira ana burabeti te Uea bwa tina karaoia.

Tariu ao mwaneu, I kakoaua bwa te burabeti e taetae ni mwaakan te Tamnei ae Raoiroi. A kakoaua iroun Kristo ao Ana mition iaon te aba. A tei ibukin ana iango ao nanon te Uea ao a weteaki bwa a na tei Ibukina ao n reireiniira bwaai ake ti riai ni karaoi n oki ni maeka ma te Atua ao Natina, Iesu Kristo. Ti kakabwaiaki ngkai ti kamwakuri ara onimaki n irii aia reirei. Man iriirakiia, maiura tina kukurei riki ao n aki mangaongao, ara kanganga ma nakobuakara a na kabebeteaki uotaia, ao tina karekea katanara n tamnei ni katobibira are e na kataniira mai irouia ara kairiribai n ara bong.

Ni bongin te Itita aei I kakoaua ma nanou bwa Iesu Kristo e maiu ao E kaira Ana Ekaretia iaon te aba rinanon Ana burabeti, taan mamata, ao taan kaotioti. I kakoaua bwa Ngaia te Tia Kamaiu ao te Tia Kabooa te aonaaba ao bwa rinanona ti kona ni kamaiuaki ao ni karietataaki i matan te Atua. I tangiria, I nano Irouna. I tangiria n iriiria ao ni karaoi Ana kantaninga ao n riki n ai Arona riki . I nanorinano n taekin bwaai aikai n aran ara Uea Iesu Kristo, amen.