Tina Bane ni Waaki Nako

Tariu ao mwaneu aika a tangiraki, ngkai ti roko ni kainan te maungatabu ae e na ururingaki aei, I raoni ngkami ni kakaitau nakon te Uea ibukin Ana kaetieti ao ana bitaki aika a riinga te nano. Te katangitang e rangi n tamaroa ao ni kaunganano. E aki ti kaitiaki nanora rongorongo, ma a bitii naba maiura!

N te bootaki ae tabu ti kamatoa te Moan Beretitentii ae boou. Uoman mwaane aika korakora a tia ni katokaaki n te Kooram n Abotoro n te Tengaun ma Uoman. Ao waniman Mataniwi ni Kabuta n te Itingaun aika boou aika a tia ni weteaki.

Ngkai te kuna are ti tatangiria e kauarerekea ao e kabooua katokan ara kaangaanga, ara kakaewenako, ao tibwangara ni waaki nako:

I kaungai ngkami bwa kam na kamatebwaia rongorongon te maungatabu aei n tainako—riki ni kaokiokia—inanon onoua namwakaina aika a na roko. N tainako taratara raoi ni kakai kawai n karekerekei rongorongo aikai inanon am kainutu n te tairiki, am angareirei n te euangkerio, am maroro ma utu ao rao, riki am maroro ma naake tiaki kain te aro. A mwaiti aomata aika a raraoi aika a na kaeka nakon te koaua are e reiakinaki n te maungatabu aei ngkana ko anga ma te tangira. Ao nanomi n ongotaeka e na kakorakoraaki ngkai kam uringa ao ni manga iangoa te bwai are kam a tia n namakinna inanon uoua te bong n nako.

Te maungatabu ni kabuta aei e mwaakena moan te ririki ae boou n te ibuobuoki. Te Uea e a tia ni karaoi bitaki aika kakaawaki n te aro are tina tararua iai i marenara. Mwaneu ao tariu—aika kaara ao kairake—a na ibuobuoki imarenaia n te kawai ae boou, ae mimitong riki. Kooram n unimwaane a na kakorakoraaki ni kakabwaia maiuia mwaane, aine, ao ataei ni kabuta te aonaaba. Tititati n te Bootaki n Aine a na reitinako n ibuobuoki n aia kawai ae onoti ao n tangira, ni karekea aia tai tititati aika kairake n raoniia n aron are e a tia ni baireaki raoi.

Ara rongorongo nakon te aonaaba e beebete ao e nano: ti kaoia ni kabane natin te Atua n iteran te rabuna aika uoua bwa a na nakon aia Tia Kamaiu, ni karekei kakabwaia n te tembora ae tabu, ni karekea te kimwareirei ae teimatoa, ao n tau ibukin te maiu ae akea tokina.²

Reken te karietataaki e kainnanoa ara kakaonimaki ae bwanin ngkai nakon berita ake ti karaoi ao otenanti ake ti karekei n ana auti te Uea. N te tai aei, iai 159 tembora aika a mwakuri, ao e mwaiti riki aika a tabe ni karaoaki. Ti tangiria ni uotii tembora ni kaniia riki nakon mwaitin rikirakeia kain te Ekaretia. Ngaia are ti kukurei n te tai aei ni katanoatai babaire ni katean itiua riki tembora. Tembora akanne a na kateaki n taabo aikai: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; ao n te kaawa ae bubura are e na kakaeaki i Russia.

Tariu ao mwaneu aika tangiraki, katean tembora aikai e kona n aki bitii maiumi, ma ami tai n te tembora ni koauana e na kona. N te tamnei anne, I kakabwaiai ngkami bwa kam na atai bwaai ake kam kona ni katikui bwa kam aonga ni kabanea riki ami tai inanon te tembora. I kakabwaiai ngkami ma te rau ae korakora riki ao te tangira inanon mweengami ao te nano ae nano riki n tararua ibukiia ami reitaki n utu ae akea tokina. I kakabwaiai ngkami bwa e na rikirake ami onimaki iroun te Uea Iesu Kristo ao te konabwai ae korakora riki n iriiria n riki bwa Ana reirei ni koaua.

I kakabwaiai ngkami bwa kam na tabeka bwanaami n ami kakoaua, ngkai I karaoia ngkai, bwa ti kabaeaki n ana mwakuri te Atua ae Moan te Mwaaka! Iesu bon te Kristo. Aio Ana Ekaretia, are E kairaki rinanon Ana toro ae rineaki. I kakoaua, man kaotan au tangira nakoimi n tatabemani ngkami, n aran Iesu Kristo, amen.