Mwakuri n Ibuobuoki ma Mwaakan ao Ana Kariaia te Atua

Tariu aika kam tangiraki, kam rabwa ibukin ami tangira nakon te Uea ao Ana mwakuri ae mimitong. I rangin kimwareirei ngkai raou ngkami. Ngkai ngaira kaain te Moan Beretitentii ae boou, ti kaitaui ngkami ibukin ami tataro ao ami kateibai ni boutoka. Ti kakaitau ibukin maiumi ao ibukin ami beku nakon te Uea. Nanomi n mwakuri ao kabanean ami tai n nakoami a kakawaki n aron naba nakoara are ti weteaki nako iai. Inanon au mwakuri n te Ekaretia, I a tia n reiakinna bwa e aki kakawaki bwa e mwakuri iaa temanna. Te bwai ae tabeakinna riki te Uea bwa e kanga temanna n ibuobuoki.

I kaota te kakaitau ae korakora ibukin Beretitenti Thomas S. Monson, are bon te banna ni katooto nakoiu n te maan ae raka iaon 50 te ririki. Ao ibukiia ana kauntira, Henry B. Eyring ao Beretitenti Dieter F. Uchtdorf, I kaota au karinerine ae korakora. I kamoamoaia ibukin aia mwakuri nakon te Uea ao Ana burabeti. A tia tooro aika uoman aikai ni karekea tabeia ae boou. A teimatoa ni beku ma te korakora ao te motinnano. I karineia ao n tangiriia ni kauoman.

Bon te kakabwaia ae kamimi ni beku n ana Ekaretia ae koaua ae maiu te Uea ma Ana kariaia ao mwaakana. Kaokan ana nakoanibonga te Atua, e raonaki ma kingin te nakoanibonga, aika tauraoi nakoia Aika Itiaki ni Boong aika Kaitira te kabanea ni korakora ni kakabwaia n tamnei. Ti noori kakabwaia aikanne n anganaki aine, mwaane, ao ataei ni kabuta te aonaaba.

Ti nooria aine aika kakaonimaki aika ataa te mwaaka are e reke man aia wewete ao n te entaumente ao otenanti n te tembora ake tabeua. Aine aikai ata aron weteakin mwaaka mai karawa ni kataniia ao ni kakorakoraia kainabaia, ataei, ao tabeman aika tangiriia. Aikai bon aine aika a korakora n tamneia aika a kairiiri, reirei, ao ni kabwarabwara n akea te maaku n aia wewete ma te mwaaka ao ana kariaia te Atua!¹ I rangin ni kakaitau ibukiia!

Ai arona naba, ti noriia mwaane aika a kakaonimaki aika a maeka bwa ana tau n tibwanga ake a kona n taabeia bwa taan kabongana te nakoanibonga. A kairiiri ao a beku n ana kawai n anga karea te Uea ma te tangira, te akoi, ao te taotaonaki n nano. A kakabwaia, a kairi, kamanoi, ao ni kakorakoraia tabeman man mwaakan te nakoanibonga are irouia. A uoti kakai nakoia ake a beku ibukiia ngkai a kawakin oin aia mare ao aia utu. A kararoa te buakaka ao bon unimwaanen Iteraera aika korakora.² I rangin ni kakaitau ibukiia!

Ngkai, I kona n taekina te tabeaianga? Bon aei: A rangin ni mwaiti tarira ao mwanera aika a aki ota raoi n nanon mwaakan ao te kariaikaki n te nakoanibonga. A karaoia n aron ae kanga a tangiria n kakukureia oin nanoia aika a aki raoiroi nakon are ana kabongana mwaakan te Atua ni kakabwaiaia Natina.

I namakinna bwa a rangin ni mwaiti tarira ao ara titita aika aki ata te kabwaia are e kona n riki bwa kabwaiaia.³ Tabeman tarira, n te katooto, a mwakuri n ae kanga aki ataia bwa tera te nakoanibonga ao tera ae ana kona ni karaoia mai iai. N na angani ngkami tabeua katooto aika onoti.

E aki maan n nako, I kaea te bootaki n toa are e na anganaki iai aran ao ana kakabwaia te tama te ataei ae boou. Te kairake ni karo e taua natina ae kakawaki ni baina, e anganna arana, ao imwiina e anganna te tataro. Ma e aki angan te ataei te kakabwaia. Te ataeinnaine ae tikiraoi anne e a reke arana ma akea ana kakabwaia! Te unimwaane ae tangiraki anne e aki ata te kaokoro imarenan te tataro ao te kakabwaia n te nakoanibonga. Ma te kariaiaki ao te mwaaka n te nakoanibonga are irouna, e na tia ni kakabwaia natina, ma e aki. Ma I taku n au iango, “Bon te tai ae bakataeaki!”

N na taekin tabeua taian katoto. Ti ataia tarira ake a kaokoroia titita bwa mataniwi n te Moanrinan, Ataeinnaine, ke Bootaki n Aine ao taan reirei ma aki kakabwaiakaki ma te mwaaka ni kanakoraoa aia wewete. A ti anga kaetaia ao kaetieti. Ti nora te karo ae tau ae aki angan buuna ao natina kakabwaia n te nakoanibonga ngke anne raoi ae a kainnanoia. E a tia mwaakan te nakoanibonga ni kaokaki nakon te aonaaba aei, ao a rangin mwaiti tarira ao mwanera aika a rinanon kataaki n aekaia nako inanon maiuia n aki karekea te kakabwaia n te nakoanibonga ae koaua. Ai kananokawakira! E kananokawaki bwa e bon kona ni buokaki.

Tariu, ti taua ana nakoanibonga te Atua ae tabu! Iai iroura Ana kariaia ni kakabwaiaia Ana aomata. Ti iangoa te koaua ae kamimi ae anganiira te Uea ngke E taku, “Ane ko kakabwaiaa N na kakabwaiaa.”⁴ Bon ara karinerine ni mwakuri n aran Iesu Kristo ni kakabwaiaia Natin te Atua ni kaineti nakon Ana kantaninga ibukiia. Beretitenti n titeiki ao bitiobi, taiaoka ni kakoaua kaain te kooram ni kabane inanon ami tararua bwa ataa aron karaoan te kakabwaia n te nakoanibonga—n raonaki ma te katauraoi n tau n rabwata ao n tamnei are e kainnanoaki mai irouia bwa ana kona ni wetea mwakan te Atua.⁵

Nakoia taari ake iai irouia te nakoanibonga, I kaoi ngkami bwa kam na kaungaia membwa bwa ana kawakin berita aika tabu, aki mamatam ao n tataro, reirei taekan booki aika tabu, nebonebo n te tembora, ao ni beku ma te onimaki bwa natin te Atua aine ao mwaane. Ti kona ni buokiia bwa ana bane n noria ma mataia n onimaki bwa te ongotaeka ao te etieti e na kaniia nakon Iesu Kristo, kariaia bwa ana kimwareirei ma ana iraorao te Tamnei ae Raoiroi, ao n taneiai ma te kimwareirei n te maiu!

Ana kanikina te Uea ao te Ekaretia ae koaua ae maiu e na barongaaki n tainako, kairii mwakuri n ibuobuoki nakoia Natin te Atua n tatabemaniia ao aia utu.⁶ Bukina bwa bon Ana Ekaretia, ngaira aika Ana toro ti na buoka temanna, n aron ae E karaoia.⁷ Ti na ibuobuoki n Arana, ma Mwaakana ao ana kariaia, ao ma Ana tangira n akoi.

Te taneiai ae i karekea e raka iaon 60 te ririki n nako i Boston e reireinai bwa e kanga mwakan reken te tai n ibuobuoki n temanna ma temanna. Ngai n te tai anne te taokita ae i reirei aron te korokoro n te Massachusetts General Hospital—i mwakuri ni katoabong, n tairiki ake tabeua, ao n wikente ake tabeua. E uarereke au tai ma kainabau, natira aman, ao waaki inanon te Ekaretia. Ibukin anne, ara beretitenti n te mwaanga e mwiokoai bwa n na kawara mwengan Wilbur ao Leonora Cox ma te kantaninga bwa te Tari Cox e na irii ana bootaki te Ekaretia. Ngaia ao Leonora a tia ni kabaeaki n te tembora.⁸ Ma, e a tia Wilbur n aki iriiri inanon ririki aika mwaiti.

Toau ao ngai ti nakon mwengaia. Ngke ti rin, e butimwaira Titita Cox ma te tangira,⁹ ma te Tari Cox e nakon te ru teuana ao e kaina mataroana.

I nakon te mataroa are e kainaki ao I karebwerebweI. E aki maan, I ongo te bwana ae bebete “Mai riin.” I kauka te mataroa ao i kunea te Tari Cox n tekateka irarikin bwain te rerio. Inanon te ruu ae uarereke, e kairoa ana moko te tikaa. E mataata, bwa e aki rangin kukurei ngke I roko.

I taratara te ruu ma te miimi ao n taku, “Te Tari Cox, I tangiria n tainako n reirei aron mwakurin bwain te rerio. Ko kukurei n reireinai arona? N na karautaeka bwa n na aki tiku ni maan n te tairiki aei, ma I kona n oki n te taina?”

E aki kukurei n te tai ae uarereke, ma imwiina e taku eng. Anne moan reken te iraorao ae kakukurei. I oki ao e reireinai. I moanna n tangiria ao ni karinea. Rinanon kakawarana ni katoa tai, tamaroan te aomata aei e moanna n oti. Ti riki bwa raao aika tamaroa, n aron are a karaoia toara aika tangiraki n akea tokina. Imwiina, inanon te tai, a mwaing nako ara utu. Mataniwi n te tabo a reitinako ni kakorakoraia ana utu Cox.¹⁰

Tao waniua te ririki imwin te moan n roko anne, e a tei te Boston Titeiki.¹¹ Ko kona ni ketinna bwa antai te moan ni beretitenti n te titeiki? Eng! Te Tari Cox! Inanon ririki imwin te tai anne, e riki naba ngaia bwa te mition beretitenti ao te beretitenti n te tembora.

Ririki imwiina, ngke ngai kaain te Kooram n te Tengaun ma Uoman, I mwiokoaki bwa n na katea te titeiki ae boou i Sanpete County, Utah. N tain intawiu ae tataneiai te aba iai, I kukurei ni manga kaitibo ma raoraou ae tangiraki te Tari Cox! I namakina ana wirikiriki te Tamnei ae Raoiroi bwa n na weteia bwa te tamanuea n te titeiki. Imwin are I katabua, ti inga bon iroura ao n tang. Aomata inanon te ru a mimi bwa bukin tera a tang mwaane aika uoman aikai. Ma ti ataia. Ao e ataia Titita Cox. Rannimatara bon rannimata ni kimwareirei! Ti karaurau n uringa te mwananga ae kamimi n te tangira ao te rairannano are e moanaki 30 te ririki n nako, teuana te tairiki ni mwengaia.

E aki toki te karaki ikekei. Ana utu te Tari ao Titita Cox a rikirake ni mwaiti are iai inanona 3 ataei, 20 tibuna, ao 54 tibutoruna. N ikotaki nakon anne mwiina iaoia bubua mitinare, e ngaa riki n te tembora, ao bubua riki aika a karekei aia kakabwaia n te tamanuea ni bain Wilbur Cox. Ana kairoro ao Leonora e na reitinako n anai nanoia te roro ae mwaiti ni kabuta te aonaaba.

Taneiai n aron aei ma Wilbur ao Leonora Cox a riki ni katoa wiiki—au katantaninga ni katoa bong—inanon te Ekaretia aei. Ana toro te Uea Iesu Kristo aika a korakora nanoia ni karaoa Ana mwakuri, ma Mwaakana ao Ana kariaia.

Taari, iai mataroa aika ti kona ni kauki, kakabwaia n te nakoanibonga aika ti anga, naano aika ti kamaiu, karawawata aika ti na kabebetei, kakoaua aika ti na ni kakorakorai, maiu aika ti kamanoi, ao kimwareirei aika ti na uoti nakon mwengaia Aika Itiaki ni Boong aika Kaitira—bukina ni kabane bwa iai iroura ana nakoanibonga te Atua. Ngaira mwaane aika ti a tia ni “weteaki man katauraoaki man moan tein te aonaaba n aron ana moan n atatai te Atua, ibukin [aia onimaki] ae e rianako,” ni karaoa te mwakuri aei.¹²

N te tairiki aei I kaoi ngkami bwa kam na bane n teirake ma ngai n ara itaritari n akea tokina ae tamaroa. Ngkana I atonga am aobiti n te nakoanibonga, taiaoka teirake ao n teimatoa n tei. Rikan taiaoka teirake! Taan Reirei, teirake! Ibonga! Bitiobi! Unimwaane! Ibonga aika rietata! Tamanuea! Itingaun! Taian Abotoro!

Ngkai, taari, taiaoka n teimatoa n tei ao raoniia ara koritita n anenei teniua kibun ni kabane “Rise Up, O Men of God”¹³ Ngkana kam anene, iangoa tabem ae ana taanga ni buaka te Atua ae mimitong ni buokia ni katauraoa te aonaaba ibukin Kauaokin te Uea. Aio tabera. Aio karineara. I kakoaua n aran Iesu Kristo, amen.