Te Mwakuri n Ibuobuoki
Ti na karaoa te kawai ae boou, ao ni mimitong riki n tabeakinaia ao buokaia aomata.
Ko rabwa, Unimwaane Gong ao Unimwaane Soares, ibukin namakinan te tangira iroumi. Ti rangin ni kakaitau ibukimi ao ibukiia raomi aika kam tangiriia.
Tariu ao mwaneu aika tangiraki, ti reitinako n ukoukora te kaetieti mairoun te Uea bwa ti na kanga ni buokiia ara membwa ni kawakin ana tua te Atua, riki iaon tuua ake uoua n tangira te Atua ao kaain rarikira.1
N namwakaina aika nako ti a tia n ukoukora te kawai ae tamaroa riki ni buoki kainnanoia ara membwa n tamneia ao n rabwataia n ana kawai te Uea.
Ti a tia ni karaoa te babaire ni katoka te reirei n te mweenga ao te kakawari n reirei ngkai ti a bon kinaia. Irarikin anne, ti a tia ni karaoa te kawai ae boou riki, ao ni mimitong riki n tabe ibukiia ao ni buokiia tabeman. Ti na kona n atong mwakuri aikai bwa mwakuri n “ibuobuoki.”
Mwakuri n ibuobuoki aika nakoraoi a kona ni katauraoaki man aia bwaintangira aine ao man mwaakan te nakoanibonga ae akea kabotauana. Ti kainnanoa te aeka ni kamanomano anne man ana anainano te tia kakaitara.
Unimwaaner Jeffrey R. Holland man te Kooram n Abotoro n te Tengaun ma Uoman ao Titita Jean B. Bingham, Te Beretitenti ni Kabuta n te Bootaki n Aine, a na kabwarabwara bwa a kanga taari n te nakoanibonga ao aine n te Bootaki n Aine ni aron aia waaki ngkai ni beku ao n tararuaia membwa n te Ekaretia ni kabuta te aonaaba.
Te Moan Beretitentii ao te Tengaun ma Uoman ana katiteuanaaki ni kakoroi nanon aia rongorongo. Ma te kakaitau ao te tataro mwaaka ti kauka rongorongon te Ekaretia ae boou aei. N aran Iesu Kristo, amen.