Te Kaotioti ibukin te Ekaretia, Te Kaotioti ibukin Maiura
Ma inanon boong aika imwaiira, e na boni kaangaanga kamaiuakin te tamnei n akean te kairi, te kaetieti, ao ana kairoro ni karaunano te Tamnei ae Raoiroi.
E kakukurei te tai aei ni bukamarua te Itita ma ngkami n Tabatin te maungatabu ni kabuta aei! Akea te bwai ae tau nakon kauringakin te tai ae moan te kakawaki n te aonaaba aei nakon neboakin te aomata ae moan te kakawaki ae e a tia ni maeka n te aonaaba aei. Inanon Ana Ekaretia Iesu Kristo ibukiia Aika Itiaki ni Boong aika Kaitira, ti Neboia n Ana Mwakuri ni Kamaiu ae akea tokina n te Onaroka are i Ketetemwane. E kukurei nanona ni maraki ibukin ara bure ao mamaraara, te karawawataaki are E a karika “wawanakon te rara man bwangabwangan kunna.”1 E tauraki iaon te kaibangaki i Kaewari2 ao e na manga uti n te katenibong n riki bwa te moan aomata ae manga kautaki irouia Natin Tamara are i Karawa. I Tangiria ao ni kakoaua bwa E bon maiu! Ngaia ae kaira ao n tararua Ana Ekaretia.
N akean Ana mwakuri ni Kamaiu te Tia Kabooira, akea mai ibuakora ae e na karekea te kantaninga n oki nakon Tamara are i Karawa. N akean Mangautina, te mate bon tokin maiura. Ana Mwakuri ni Kamaiu ara Tia Kamaiu e karekea te maiu ae akea tokina ao te maiu ae mamate ibukira ni kabane.
Bon ibukin Ana mition ae akea kabotauana ao te rau ae E anganiia taan Iriiria n aron kainnabau, Wendy, ao Ngai ti namakina te aki mwengaraoi n Tianuare 2, 2018, ngke ti kautaki n te tareboon n tuangaki bwa e a mate Beretitenti Thomas S. Monson .
Ti uringa Beretitenti Monson! Ti karinea maiuna ao ana motinnano n ana onimaki. Te mwaane ae korakora n tamneina, e katuka te mwaaka ae korakora ae teimatoa iaoia ake a kinaa ao iaon te Ekaretia ae tangiria.
N te Tabati, Tianuare 14, 2018, n ruun te Salt Lake Tembora are mai ieta, e a manga barongaaki te Moan Beretitentii n te baeten ae bebete man mimitong ae kateaki iroun te Uea. N te bootaki ae mimitong ngkoananoa, kaain te Ekaretia ni kabuta te aonaaba a tabeki baia ni kamatoa te mwakuri ae karaoaki mai imwaaina irouia Abotoro. I kakaitau ngkami ibukin ami kateibai ni boutoka.
I kaitauia naba naake a mena n te nakoa aei mai imwaaina. E reke au tai ni beku n te Kooram n Abotoro n te Tengaun ma Uoman inanon 34 te ririki ao ni kinaia 10 mai ibuakoia 16 Beretitenti n te Ekaretia ake mai imwaaina. I reiakina ae bati mairouia n tatabemania.
E na bae naba n ae mwaiti mairouia au bakatibu. Tibutoru mwaane aika waniman a bane n rairaki nakon te Ekaretia i Eurobe. Tamnei ni kabane aika ninikoria aikai anga aia bwai ni kabane nakon Tion. E ngae n anne, inanon rooro ake imwiina, aki teimatoa nanoia au bakatibu. Ibukin aei, I aki ikawairake n te mweenga ae mena iai te euangkerio.
I rangin n tangiriia au karo. A kakawaki nakoiu bwa a reireinai reirei aika kakawaki. E aki tau au kakaitau nakoia ibukin te maiu ae kakukurei n te mweenga ae a kateia ibukiu ao tariu ma mwaneu. Ao riki ngke I ataeinimwaane, I ataia ae iai te bwai ae bua ni maiu. N te bong teuana I toka n te kaa nakon ana titoa ni boki te LDS ni kakaea bokin te Ekaretia. I tangiria n reiakina te euangkerio.
Ngke I a oota n Tuan te Mauri, I tangiriia au karo bwa a na maiuakina te tua anne. Ngaia, are n te bong teuana ngke I kairake, I nakon te ruu are iaan tano ao ni bouai ni kabane bwatoro ni kamanging iaon te burooa! I kantaninga tamau bwa e na katuaeai ma akea te taeka ae taekinna.
Ngke I tabe ni ikawai ao ni moanna n ataa kakawakin ana babaire Tamara are i Karawa, I aki toki n taekinna nakoiu, “I aki manga tangira te bwaintangira n te Kiritimati! I ti tangiria bwa N na kabaeaki nakoia au karo n te maiu arei.” Te tai ae rangin ni maan akea te bwai ae riki ni karokoa ae e riaon 80 aia ririki au karo. I aki kona ni kabwarabwara te kimwareirei ae I namakinna n te bong anne,3 ao ni katoa bong I namakina te kukurei anne ni kabaeaki ma ngaiia.
N te 1945, ngke I mena n te reirei n taokita, I mare ma Dantzel White n te Salt Lake Tembora. Ngai ma ngaia ti kakabwaiaki ma natira aine aika ruaman ao temanna natira te mwaane ae moan te kakawaki. N te bong aei ara utu ae rikirake bon teuana te kabanea ni kakimwareirei inanon maiu.
N 2005, imwiin ae kania 60 te ririki ni mare, Dantzel ae tangiraki irou e aki kantaningaaki matena. N te tai anne, nanokawakiu e moanna n akea. Ma te rongorongo n te Itita ao te berita n te mangauti e kateimatoaai.
Ngkanne te Uea e kaira Wendy Watson nako rarikiu. Ti kabaeaki n te Salt Lake Tembora n Eberi 6, 2006. I tangiria! Te aine ae moan te kamiimi—te kakabwaia ae korakora nakoiu, nakoia ara utu, ao nakon te Ekaretia.
A reke kakabwaia aikai rinanon ukoukoran ao te ongora nakon ana wirikiriki te Tamnei ae Raoiroi. E taku Beretitenti Lorenzo Snow, “Aio bon aia tai ae kakawaki Aika Itiaki ni Boong aika Kaitira … bwa bon inaomatara ni karekea te kaotioti n te Tamnei ni katoa bong ni maiura.”4
Teuana te bwai ae aki toki n okioki n au iango bon te Tamnei ibukin weteau ae boou bwa te Beretitenti ngai n ana Ekaretia bwa e kanga nanon te Uea ni Kaota Ana iango ao nanona. Reken te tai ni karekea te kaotioti bon teuana ana bwaintangira ae korakora te Atua nakoia Natina.
Rinanon ana kaotioti te Tamnei ae Raoiroi, e na buokiira te Uea n ara kekeiaki aika raoiroi. Inanon te ruu ni korokoro, I tei iaon te aoraki—n aki koaua raoi bwa N na kanga ni karaoa te korokoro ae aki ataaki—ao n namakina te Tamnei ae Raoiroi ni kabwarabwara kawai n au iango.5
Kakorakoraan au bubuti nakon Wendy, I taku nakoina, “I ata te kaotioti ao ko na kanga ni karekea.” E na kamoamoaki n ana kaeka—ao, n te kawai are I a tia n reiakinna, aron kateina—e a tia ni kaman ukoukoria ao ni karekea ana kaotioti ibukira, are e a kaungaa ni kangai eng.
Ngkai kaain te Kooram n Abotoro n te Tengaun ma Uoman, I tataro ni katoabong ibukin te kaotioti ao ni kaitaua te Uea n tainako ngkana E taetae i nanou ao n au iango.
Iangoa te kakai man karekean te kaotioti! Tera weteara n ara Ekaretia, ti kona n tataro nakon Tamara are i Karawa ao ni karekei kairi ao kaetieti, ni kaman kauringaaki ibukin bwaai aika kakamaaku ao ni kamangaongao, ao n anganaki te kona ni kakoroi nanon bwaai aika tiaki kona ni karaoi iroura. Ngkana ti na karekea raoi te Tamnei ae Raoiroi ao n reiakina aron kaokoroan ao ataakin Ana wirikiriki, ti na kairaki ni kaangaanga aika bubura ao ni uarereke.
Ngkana I rinanon te mwakuri ae kaangaanga n rineakiia uoman kauntira, I miimi bwa N na kanga n rineia tii uoman mai ibuakoia tengaun ma uoman mwaane aika I tangiriia ao ni karineia.
Ibukina bwa I ataia bwa te kairi mai eta e boboto iaon te rongorongo ae tamaroa, I tataro bwa N na kaitibo ma Abotoro n taai aika kakaokoro temanna i mwiin temanna.6 I nakon te ruu ae onoti inanon te tembora ao ni ukoukora ana kaantaninga te Uea. I kakoaua bwa e tuangai te Uea bwa N na rinea Beretitenti Dallin H. Oaks ao Beretitenti Henry B. Eyring bwa a na riki bwa au kauntira n te Moan Beretitentii.
N te kawai naba anne, I kakoaua bwa e a tia te Uea ni kaira wetean Unimwaane Gerrit W. Gong ao Unimwaane Ulisses Soares bwa a na katabuaki nakon tabeia n Abotoro. I butimwaia nakon te mwakuri n ibuobuoki n te nakoantari aei.
Ngkana ti booti tabera n ana Kauntira te Moan Beretitentii ao te Kooram n te Tengaun ma Uoman, ara ruu ni bootaki a riki bwa ruu ni kaotioti. Te Tamnei ae Raoiroi e kai kanamakinaki. Ngkana ti kaunrabwata ma bwaai aika kaangaanga, te kawai ae kamimi e rikirake ngkana e kabwarabwara ana iango ao te bwai ae nooria te Abotoro. E ngae ngke ti kaokoro n ara taratara n te moan waaki, ara tangira i bon imarenara e teimatoa. Katiteuanakira e buokira ni kinaa ana kantaninga te Uea ibukin Ana Ekaretia.
Inanon ara boowi, te kabanea ni korakora ni mwaiti e aki kona n tautaeka! Ti tataro mwaaka ni kakauongo ao n taetae imarenara ni karokoa ti katiteuanaki. Ngkana ti a bane ni boraoi iaona, mwiin te katiteuanaki n te Tamnei ae Raoiroi e rangin ni kamiimi! Ti taneiai ma te bwai are e ataia te Burabeti Iotebwa Timiti ngke e reirei, “Ngkana iai te katiteuanaki n te namakin ti karekea te mwaaka ma te Atua.”7 Akea kaain te Moan Beretitentii ke te Kooram n te Tengaun ma Uoman ae e na karaoa te babaire ibukin te Ekaretia n aki titirakina te Uea!
Tariu ao mwaaneu, ti na kanga n riki bwa mwaane ao aine—n aroia ana toro Kristo—ae kainnanoira te Uea bwa ti na riki iai? Ti na kanga ni kakaei titiraki ake a kamangaoira? Ngkana ana atatai Iotebwa Timiti mai i karawa n te Buakonikai ae Tabu e reireiniira bwaai ni kabane, e kangai ba e nora karawa ba e kaukaki ao e taetae te Atua nakoia natina.
Te Burabeti Iotebwa Timiti e katea te baeten ibukira n iangoi ara titiraki. E kaungaaki n ana berita Iakobo are ngkana akea ana rabakau temanna i buakomi, ao e na butia te Atua,8 te kairake ae Iotebwa e uota ana titiraki nakon te Tama are i Karawa. E ukoukora te kaotioti ae onoti, ao ana ukeuke e kauka te euangkerio ni kabanean boong aikai.
N te kawai naba anne, tera ae ko ukoukoria ae kaukaki nakoim? Tera te wanawana ae akea iroum? Tera te kainnano ae ko tangiria n ataia ao n ota iai n ae waekoa? Ira ana katooto te Burabeti Iotebwa. Kakaea te tabo ae rau ae ko kona n nako iai n tainako. Kananorinanoko imatan te Atua. Tataro i nanom nakon Tamam are i Karawa. Nakoina ibukin te kaeka ao ibukin mwengaraoim.
Tataro n aran Iesu Kristo ibukin tabeaiangam, maakum, mamaaram—eng, te bwai ae tangiria nanom. Ao imwiina kakauongo! Koroi iango ake a roko n am iango. Taui mwiin am namakin ao rinanoi ma te mwakuri aika ko kaungaaki bwa ko na anai. Ngkana ko kaokioka te kawai aei ni katoabong, ni katoa namwakaina, ni katoa ririki, ko na “rikirake inanon reirein te kaotioti.”9
E koaua bwa e tangiria te Atua ni kan taetae nakoim? Eng! “N ai aron te aomata ae arora baina ae uarereke ni katoka te Karaanga are Missouri ni kawaina ae e baireaki, ke ni bita kawaina, n aron … totokoan Teuare Mwaaka n nurakin atatai mai karawa nako aoia Aomata aika Itiaki ni Boong aika Kaitira.”10
Ko na aki mimi n te bwai ae koaua.11 Ko na aki mimi bwa antai ae kona ni kawakiniko raoi. Rinanon am kaotioti, ko kona ni karekea oin am kakoaua bwa Ana Boki Moomon bon ana taeka te Atua, bwa Iotebwa Timiti bon te burabeti, ao aio bon ana Ekaretia te Uea. E ngae ngke koaki tabe bwa tera ae a na taekinna ke ni karaoia tabeman, akea temanna ae kona n ana te koaua ae kanakoaki nakon am iango ao inanon te bwai ae koaua.
I kaungako bwa ko na karikirakea am konabwai n tamneim ae ngkai ni karekea am kaotioti, ibukina bwa e a tia te Uea ni berita bwa “Ngkana ko [bubuti], ko na karekea te kaotioti teuana i mwin te kaotioti teuana, te atatai teuana i mwin te atatai teuana, bwa ko aonga n ataa ana bwai aika raba ao bwaai aika rau—aika a uota te kimwareirei, aika a uota te maiu ae akea tokina.”12
A mwaiti riki bwaai aika e tangiria Tamara are i Karawa bwa kam na atai. N aron are e reirei Unimwaane Neal A. Maxwell, “Nakoia naake iai mataia n noraba ao taningaia n ongo, e rangin ni mataata raoi bwa te Tama ao Natina anganako ana bwai te aonaaba ae raba!”13
Akea te bwai ae kauka karawa ae ti tebo ma ikotakin rikiraken te itiaki, te ongotaeka ae koaua, te ukeuke ni koaua, te amwarake n ana taeka Kristo inanon Ana Boki Moomon,14 ao n teimatoa n nakon te tembora ao te mwakuri n rongorongon te utu.
Ni koauana, e na iai taai aika ko na namakinna ae kanga ko aki karekea te kaeka. Ma I berita bwa ngkana ko teimatoa n ongotaeka, kaota te kakaitau ibukin kakabwaia ae e a tia n anganiko te Uea, ao ngkana ko karinea ana tai te Uea ma te taotaonaki n nano, ko na anganaki te atatai ao te oota aika ko ukoukori. Kakabwaia ni kabane aika e katauraoi te Uea ibukim—riki kakai—ake a na roko. Akanne am kaotioti ae uoti ibukim.
I kantaningai taai aika a na roko. E na kaonaki ma taai aika riai ibukira n tatabemanira n rikirake, n anganano, ao ni uota te euangkerio nako maninganingan te aonaaba ake aua. Ma I aki atai boong aika a a roko. Ti maeka n te aonaaba ae kaangaanga ao n rikirake te kauntaeka. Teimatoan tauraoin bwaai n rabakau n reitaki ao bwaai ni kareke rongorongo n te ngaina ao te bong e buakaniira ma rongorongo aika kananokawaki. Ngkana ti na karekea te kantaninga ni ukoukora te bwai ae kakawaki ma iango aika mwaiti ao aia ataibwai aomata ake a buakan koaua, ti riai n reirei aron karekean te kaototi.
Ara Tia Kamaiu ao te Tia Kabooi maiura, Iesu Kristo, e na karaoi tabeua Ana mwakuri aika mimitong imarenan ngkai ao n te kauaoki. Ti na noori kaotan kakai ae te Atua te Tama ao Ana Rikitemanna ae Tangiraki e tararua te aonaaba aei inanon te kakannato ao te mimitong. Ma inanon boong aika imwaira, e na bon aki kona ni kamaiuaki te tamnei n akean te kairi, te kaetieti, ao ana kairoro ni karaunano te Tamnei ae Raoiroi.
Tariu aio mwaaneu aika kam tangiraki, I bubuti ma ngkami ni kakorakorai ami konabwai n tamnei ni karekea te kaotioti. E na riki Tabatin te Itita aei bwa te tai are e na bita aron maium mwiina. Rineia ni karaoa te mwakuri ae kainnanoaki ni karekea ana bwaintituaraoi te Tamnei ae Raoiroi ao n ongo nakon bwanaan te Tamnei n tainako ao n ae e itiaki riki.
Ma Moronaai, I kaungai nanomi n Tabatin te Itita aei bwa “kam na nakon Kristo, ma n tauii bwaai n tituaraoi ni kabane aika a raraoi,”15 ni moa ma ana bwaintituraoi te Tamnei ae Raoiroi, are te bwaintituaraoi ae kona ni bita maium.
Ngaira bon taan iriira Iesu Kristo. Te kabanea ni kakawaki ni koaua ae kona kakoaua bon te Tamnei ae Raoiroi e na nakoim ni kangai bwa Iesu bon te Kristo, Natin te Atua ae maiu. E maiu! Ngaia te Tia Tei Ibukimi iroun te Tama, ara Banna ni Katooto, ao te Tia Kabooi maiura. N Tabatin te Itita aei, ti kauringa Ana mwakuri ni kamaiu, Mangautina ae koaua, ao Arona mairoun te Atua.
Aio Ana Ekaretia, ae kaokaki rinanon te Burabeti Iotebwa Timiti. I kakoaua, ma kaotan au tangira ibukimi n tatabemani ngkami, n aran Iesu Kristo ae tabu, amen.