Pagpakigbahin sa Home-Return Kits

Imahe

illustration of table setting

Paghulagway pinaagi ni Julie Yellow

Ang ulan mibundak samtang ang bugnaw nga hangin mihuros. Akong nakita ang mga kahoy nga nangaibut ug nangalarot ang ilang tanang mga dahon. Ang kuryente napalong sa ubang mga dapit tungod sa nadaot nga mga linya sa kuryente. Ang talan-awon sa akong atubangan sama na karon sa makuyaw nga dapit. Ang tanan nangapalid. Ang mga tawo gipanggutom ug nangita og kapasilongan.

Ang akong kasingkasing napuno sa tinguha sa pag-alagad. Ang akong pamilya ug ubang mga miyembro sa Simbahan mibiyahe ngadto sa kabus nga mga komunidad diin ang bagyo miguba og liboan ka mga balay ug mipatay og liboan ka mga tawo. Didto kami aron sa pagpanghatag og mga relief goods ngadto sa mga biktima.

Sa among unang pag-abut, akong nakita ang pagbangutan diha sa mga nawong sa katawhan. Ako nakaamgo dayon pagkabulahan namo nga ang among mga panimalay wala mangaguba.

Nag-ulan gihapon sa dihang nagsugod kami sa pagpanghatag sa mga relief packs sa usa ka lapukon, walay atop nga gym, apan wala kana makabalda kanamo. Ang mga relief packs—mga plastik tray, mga takuri, mga plato, mga kutsara, mga tinidor, mga baso, ug flasks—among ginganlan og “home-return kits.” Sa dihang ang akong pamilya ug ako nanghatag sa mga relief packs ngadto sa mga tawo, sila mihatag namo og mainiton nga pahiyom ug mga pasalamat.

Ang bililhong pasalamat sa mga tawo nakapabayaw nako, ug akong gibati ang impluwensya sa Espiritu. Makita sa ilang mga pahiyom nga anaa ang paglaum ug nga ang Langitnong Amahan ug si Jesukristo dili gayud mobiya kanato ug makahatag kanunay og kahayag sa atong malisud nga mga adlaw.

Ako nasayud nga kon kita moalagad ug mohigugma sa usag usa, kita makaangkon og mahangturong mga panalangin ug makapanunod sa Kristohanong mga mithi. Ang mga panalangin sa pag-alagad dili dayon moabut, apan kini moabut kon kita magpadayon sa pag-alagad sa uban sa kinasingkasing. Nasayud ko nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).