Notebook sa Komperensya sa Oktubre 2013
Samtang kamo magribyu sa kinatibuk-ang komperensya sa Oktubre 2013, inyong magamit kining mga pahina (ug mga Notebook sa Komperensya sa umaabut nga mga isyu) aron sa pagtabang kaninyo sa pagtuon ug paggamit sa bag-o nga mga pagtulun-an sa buhi nga mga propeta ug mga apostoles ug ubang mga lider sa Simbahan.
“Unsa nga Ako ang Ginoo namulong, Ako namulong; … bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Propetikanhon nga Saad
“Dili kita makapugos sa mga anak sa Dios sa pagpili sa dalan sa kalipay. Ang Dios dili makahimo niana tungod sa kabubut-on nga iyang gihatag nato.
“Ang Langitnong Amahan ug ang Iyang Pinalangga nga Anak nahigugma sa tanang anak sa Dios bisan unsa pa ang ilang pilion nga buhaton o unsa sila mamahimo. Ang Manluluwas mibayad sa bugti sa tanang sala, bisan unsa pa ka dautan. Bisan kon dunay kaangayan, ang oportunidad alang sa kalooy gihatag diin dili kini mohikaw sa kaangayan. … Makakuha kita og kadasig gikan sa kasiguroan nga makausa gibati nato ang kalipay nga manag-uban isip usa ka sakop sa pinalangga nga pamilya sa atong Langitnong Amahan. Uban sa tabang sa Dios mabati nato pag-usab kana nga paglaum ug kalipay.”
Presidente Henry B. Eyring, Unang Magtatambag sa Unang Kapangulohan, “Ngadto sa Akong mga Apo,” Liahona, Nob. 2013, 71, 72.
Propetikanhong mga Pulong sa Mental ug Emosyonal nga mga Hagit
“Unsay kaha ang labing maayo ninyong buhaton kon ang mga hagit sa pangisip o emosyon miabut kaninyo o sa inyong minahal? Labaw sa tanan, ayaw pagkawala og pagtuo sa inyong Amahan sa Langit, kinsa nahigugma kaninyo labaw pa sa inyong panabut. … Ayaw gayud, pagduhaduha niana, ug ayaw ipatig-a ang inyong kasingkasing. Tinguhaa sa matinud-anon ang nasulayan na nga mga buhat sa pagpahinungod nga makadala sa Espiritu sa Ginoo sa inyong kinabuhi. Tinguhaa ang pagtambag niadtong naghupot sa mga yawe alang sa inyong espirituhanong kaayohan. Pangayo ug ibahandi ang mga panalangin sa priesthood. Moambit sa sakrament matag semana, ug mohupot gayud sa makahingpit nga mga saad sa Pag-ula ni Jesukristo. Motuo sa mga milagro. Ako nakasaksi og daghan niini nga miabut dihang ang tanang indikasyon nag-ingon nga wala nay paglaum. Ang paglaum dili gayud mawala. Kon kadtong mga milagro dili dayon mahitabo o sa hingpit dili gayud mahitabo, hinumdumi ang mismong ehemplo sa kalisud sa Manluluwas: kon ang mapait nga kopa dili mapasa, inom niini ug magmalig-on, nga magsalig sa malipayong adlaw nga moabut. …
“… Ako mopamatuod niana nga adlaw nga ang atong mga minahal nga may kakulangan dinhi sa mortalidad mobarug sa atong atubangan nga mahimayaon ug halangdon, sa makapatingala nga hingpit nga lawas ug hunahuna.”
Elder Jeffrey R. Holland sa Korum sa Napulog Duha Ka mga Apostoles, “Sama sa Usa ka Sudlanan nga Nabuak,” Liahona, Nob. 2013, 40–41, 42.