Pagpangandam nga Mahimong Mahangturong Pamilya

Ang akong asawa ug ako nakaobserbar uban sa kaguol ug katingala nga pipila sa among mga higala misinati og diborsyo. Ang una namong gibati mao ang kahadlok nga kini mahitabo namo kon kami moatubang og lisud nga mga hagit sa among kaminyoon. Sa dihang adunay dakong krises nga miabut sa among kaminyoon, kami mihukom nga hatagan ang among kaugalingon og katapusang higayon—apan buhaton kini sa hustong paagi. Taud-taud na nga kami naningkamot sa pagsulbad sa among mga problema pinaagi sa pagkonsiderar sa hunahuna ug pagbati sa usag usa. Ang among relasyon temporaryong molambo, apan sa dili madugay mobalik na usab ang among problema.

Hangtud nakaamgo mi nga ang Ginoo kinahanglang adunay dakong parte sa among kaminyoon nga nakapausab sa among relasyon sa kaminyoon. Kami nakaamgo nga dili gyud namo mahusay, ni gamayng paglaum nga masulbad, ang among panagsumpaki nga kami-kami lang. Gihiklin ang among garbo, gibuhat namo ang usa ka butang nga wala pa namo mahimo sukad. Among gikalimtan ang among kaugalingong mga opinyon ug nangamuyo sa Ginoo kon unsay Iyang gusto para namo. Sa dihang giapil na namo Siya misugod paglambo ang among kaminyoon—sa hinay-hinay ug sa Iyang paagi ug panahon.

Pipila na ka tuig ang milabay sukad miluhod mi sa altar sa Santiago Chile Temple, ug kami nakaatubang og daghang mga hagit ug kalisud. Sa paghinumdom, kami makaingon nga ang tanang butang nga among nasinati para lang sa among kaayohan. Ang kalisdanan nagtudlo kanamo nga magpaubos ug mas naglig-on namo. Nagkat-on gihapon mi kon unsaon paghan-ay ang among kinabuhi—kaming duha nagkat-on isip patas nga magkauban diha sa gugma ug pagsabut—ug angay ra gyud ang among paningkamot.

Walay magic nga resipe sa kalampusan sa kaminyoon. Ang mga sangkap makit-an, anaa ra gyud kanunay, diha sa ebanghelyo ni Jesukristo. Busa, isip pamilya, kami misulat og deklarasyon nga among gigamit kauban sa pamahayag sa pamilya nga giisyu sa Unang Kapangulohan ug sa Korum sa Napulog Duha ka mga Apostoles.¹ Ang among deklarasyon, giulohan og “Pagpangandam nga Mahimong Mahangturong Pamilya,” nagsugod niining mga pulong: “Kami, ang pamilyang Castro Martínez, nagpamatuod nga ang kaminyoon gi-orden sa Dios ug ang relasyon sa pamilya magmahangturon pinaagi sa Pag-ula ni Jesukristo kon kita masulundon sa mga balaod ug mga ordinansa sa ebanghelyo.”

Gisundan kini sa 17 ka mga baruganan nga sa among paghukom naglangkob sa sukaranang mga mithi sa ebanghelyo nga maghatag kanamo og dako nga kahigayunan nga magmalampuson sa among kaminyoon ug sa among pamilya. Dili na bag-ong mga butang ang anaa sa among listahan; kini naglakip sa personal ug pamilya nga pag-ampo, pagtuon sa kasulatan, matag semana nga family home evening, pagtambong sa mga miting sa Dominggo, pagtambong kanunay sa templo, pagtratar sa usag usa uban sa gugma ug pagtahud, ug pagserbisyo. Nakaamgo usab mi nga ang mga baruganan lang mismo wala gayuy epekto—kinahanglan nga amo kining i-apply.

Ang paghiklin sa among garbo, ug pagpa-apil sa Ginoo ug sa Iyang kabubut-on sa among kaminyoon nakapahimutang namo sa dalan aron mahimong usa ka mahangturong pamilya.