Faariro i te amuiraa ei tuhaa no to tatou oraraa

Ua haapii mai te peresideni Dieter F. Uchtdorf, tauturu piti i roto i te Peresideniraa Matamua e, e nehenehe tatou e ma‘iti ia mauruuru noa, noa’tu eaha te mau mea fifi e tupu mai i roto i to tatou oraraa (api 70). Te riroraa ei taata mauruuru e tauturu ïa ia tatou ia vai oaoa noa e te hamani maitai e e roaa te faaroo e te ti‘aturi i te Atua. Eaha to outou huru ia vai ana‘e te mauruuru i roto ia outou ? Eaha te ti‘a ia outou ia rave no te faatupu i te mauruuru i te mau mahana atoa ?

Ua paraparau mai o Bonnie L. Oscarson, peresideni rahi no te Feia Apî Tamahine no Sarah, te hoê feia apî tamahine tei haere na muri i to’na mama no te tauturu ia Brenda, te hoê vahine tei roohia i te hoê ma‘i rahi. Ua pahere o Sarah i te rouru o Brenda, ua horo‘a i te raau i roto i to’na rima, ua mâro i to’na mau manimani rima e te rima, e ua tauturu i te faaetaetaraa ia’na (api 119). A feruri i ni‘a i te mau rave‘a ta tatou e nehenehe e tavini. Noa’tu e feia apî outou, e rave rahi mau mea ta outou e nehenehe e rave.

Ua haapii mai o Elder L. Tom Perry no te Pŭpŭ no te Tino Ahuru ma Piti Aposetolo e, nahea te hoê taata faahoro ia faaohipa i te mau tavaha e te mau taamu no te arata‘i e no te raatira maruraa i hoê pŭpŭ puaa-horo-fenua (api 100). E mea ite te taata faahoro, e e pee te puaa-horo-fenua i te arata‘i a te taata faahoro, mai te Fatu ua ite eaha te mea maitai a‘e no tatou e e oaoa tatou ia pee ana‘e tatou Ia’na. Te tavaha e te taamu mai te mau muhumuhuraa ïa o te Varua Maitai. I nafea to outou iteraa i te Varua Maitai i te arata‘iraa ia outou ? Eaha ta te reira i faaite mai ?

Ua paraparau mai o Jean A. Stevens, tauturu matamua i roto i te peresideniraa rahi o te Paraimere, no ni‘a i te hoê tamaiti tei ore i roaa ia’na te pereoo mataeinaa hopea e ua ho‘i i te fare na te avae (api 81). E rave rahi maire no te ho‘i, ua ri‘ari‘a oia e ua tuturi no te pure. Tau minuti i muri iho, ua muhumuhu te Varua i te tuahine Stevens faaea e ia tauturu ia’na. A feruri na i te mau taime a pohono ai te Metua i te Ao ra i ta outou pure ? Nahea to outou tautururaa i te pahono i te pure a vetahi ê ?

Ua haapii mai te Peresideni Thomas S. Monson e e hinaaro tatou i « te itoito no te parau atu, aita, i te taime tano, te itoito no te parau atu, e, ia ti‘a te reira, te itoito no te rave i te maitai no te mea ua ti‘a te reira ». A tuatapapa ai outou i ta’na a‘oraa (api 66), a feruri na i te mau tamataraa ta outou e faaruru nei ? Eaha te faanahoraa ta outou e nehenehe e rave no te faatupu i teie huru itoito ?

Ua faahaamana‘o mai o Elder Jeffrey R. Hollande, no te Pŭpŭ no te Tino Ahuru ma Piti Aposetolo, ia tatou e mai te peu ua here tatou i te Faaora, e haapa‘o ia tatou i Ta’na mau faaueraa e e here ia vetahi ê mai Ta’na i na reira (api 6). Noa’tu e te na reira nei tatou, e mea ti‘a ia tatou ia ti‘a ineine noa no te paruru i to tatou mau ti‘aturiraa « ma te faaoroma‘i e ma te aroha ». Ua ite anei outou i te hoê taata tei ore i tuati te mana‘o no te hoê o to outou mau ti‘aturiraa ? Nahea outou ia faaite i te faatura a tau‘a parau ai e a paruru ai outou i te reira mau ti‘aturiraa ?

E rave rahi mau taata a‘o tei parau afaro mai i te feia apî. Ei hi‘oraa, ua horo‘a mai o Elder Neil L. Andersen no te Pŭpŭ no te Tino Ahuru ma Piti Aposetolo, e rave rahi mau mana‘o tauturu i te feia apî e nahea ia upooti‘a i ni‘a i te mau « puahiohio pae varua », na roto i te iteraa i te hau i roto i te hiero (api 18). A tai‘o ai outou i ta’na a‘oraa e i te tahi atu mau a‘oraa o te amuiraa rahi, a feruri ia papa‘i i to outou mana‘o e nahea ia faaea puai noa.

Te hoê o te mau ino rahi i teie mahana o te hoho‘a faufau ia. Ua parau o Linda S. Reeves, tauturu piti i roto i te peresideniraa rahi o te Sotaiete Tauturu e te titi‘a maitai a‘e no teie ino o te hoê ïa iteraa papû hohonu e te tamau no te evanelia a Iesu Mesia (api15). Eaha te puai o ta outou iho titi‘a ? Eaha ta outou e rave no te haapuai i te reira ?

Ua haapii mai te Peresideni Thomas S. Monson e, ia maramarama maitai ana‘e tatou i te « horo‘a faito ore » o te Taraehara, e î tatou i te here no te Metua i te Ao ra, no te Faaora, e no te mau tamarii atoa a te Atua (api 91). Nahea teie iteraa e haamaitai ai i ta outou tuatapaparaa no te oraraa e te Taraehara a te Faaora i roto i te tuatapaparaa i te mau papa‘iraa mo‘a outou ana‘e e te utuafare e i roto i te piha haapiiraa i te fare pureraa.

Ua parau te peresideni Henry B. Eyring, tauturu matamua i roto i te Peresideniraa Matamua e, e hooraa rahi ta’na no to’na oaoa rahi i te hoê metua tupuna o tei amui atu i te Ekalesia, tei tavini haapa‘o maitai, e tei faaea aueue ore noa e tae roa i te hopea, ma te vaiiho mai i te hoê tuhaa ai‘a no te tia‘iraa i to’na utuafare (api 22). A feruri i te hamani i te hoê tapura no te mau taata atoa i roto i to outou utuafare e a papa‘i eaha te mau fafauraa e te mau oro‘a e hinaarohia e ratou no te vai tamau-noa-raa i ni‘a i te e‘a o te fafauraa. A hamani i te hoê faanahoraa no te tauturu i to outou mau melo utuafare ia farii i to ratou fafauraa a muri a‘e. E nehenehe outou e hi‘opo‘a i te mau rave‘a no ta outou fafauraa ma te raveraa i te hoê ti‘araa faufaa a‘e i roto i to outou oraraa, o ta outou e horo‘a i to outou utuafare ei hoê tuhaa ai‘a no te tia‘iraa.

Ua faahiti o Elder David A. Bednar, no te Pŭpŭ no te Tino Ahuru ma Piti Aposetolo e, e nehenehe i te ati e arata‘i ia tatou ia ti‘aturi i ni‘a i « te mana, te aroha e te maitai no te Mesia Moʻa », o te « tauturu mai ia tatou ia amo i ta tatou hopoiʻa ma te haamâmâhia » (api 87). A tai‘o ai outou i ta’na a‘oraa e te mau a‘oraa e haamata i te mau api 9, 18, 70, 81, e 106, a imi i te mau rave‘a e nehenehe ai te Faaora e Ta’na te evanelia e tauturu ia outou ia faaruru i te mau tamataraa o te oraraa.

Te tumu parau no te haapiiraa a te feia apî i te ava‘e no me, e faatumuhia ïa i ni‘a i te mau peropheta e te heheuraa. I roto i ta outou tauaraa parau no te evanelia e te feia apî i te fare e i te fare pureraa, a feruri i te tuatapapa i te mau a‘oraa a na Elder Lawrence E. Corbridge (api 103) e Marcos A. Aidukaitis (api 108) no te Hitu Ahuru, a imi i te mau pahonoraa i te mau uiraa i muri nei : No te aha aita te mau taata hamani ino i vaiiho noa ia Iosepha Semita ona ana‘e ? Nahea tatou e ite ai i te parau mau i roto i te hoê ao e aro tamau nei i te mau haapiiraa o te evanelia ?