John S. Tanner

Mai to’na na‘ina‘iraa, ua oaoa John Sears Tanner i te haapiiraa.

Ua tae roa taua anaanataeraa ra i roto i ta’na tau haapiiraa, ta’na ohipa, e ta’na mau taime e rave rahi ia haapii i te evanelia: a tahi, ei misionare i te misioni no Berezilia Apatoa e i muri iho ei episekopo, peresideni tĭtĭ, melo apooraa teitei, orometua Haapiiraa Sabati, peresideni no te misioni Berezilia no Sao Paulo Apatoa (o te hope i teie tau mahanahana), e teie nei ei tauturu matamua i roto i te peresideniraa rahi no te Haapiiraa Sabati.

Ua parau te peresideni Tanner e « Ia tupu maitai ana‘e te [haapiiraa], tei reira ïa te Varua Maitai e e ite ïa outou i te anaanataeraa no te haapiiraa ; e au ra tei ni‘a outou i te fenua mo‘a ».

Fanauhia i Roto Miti, Utaha, i te 27 no tiurai 1950 ia William Coats Tanner Jr. e Athelia Sears Tanner, ua paari te peresideni Tanner i Pasadena Apatoa, California, HAM, te paeraa o na 13 tamarii. Ua faatupu to’na na metua i te hoê vahi haapiiraa faufaa rahi i roto i te utuafare, e te hoê haapiiraa evanelia puai. Ua parau oia e « Aita vau i haamana‘o i te haapii i te tahi mea i te ekalesia tei ore i haapiihia mai e au i te utuafare ». Ua faatupu atoa oia i te here i te mau buka tei faarahihia a tautoo ai oia i te hoê parau tu‘ite no te reo peretane i te fare haapiiraa tuatoru no Brigham Young e te hoê parau tu‘ite doctorat [parau tu‘ite teitei roa a‘e] i roto i te reo peretane i te fare haapiiraa tuatoru no California, Berkeley.

Ua farerei oia ia Susan Winder i BYU. Ua haamata raua i te hoê hoaraa puai ta raua hoi i faariro mai ei auraa here i muri iho. Ua faaipoipohia raua i roto i te Hiero no Roto Miti i te matahiti 1974. Ua atuatu raua e pae tamarii.

Ua haamata te peresideni Tanner i ta’na ohipa haapiiraa ei tauturu orometua i te fare haapiira teitei no Florida State. Ua riro mai oia i muri mai ei orometua haapii i BYU i te matahiti 1982 ; e ua rave oia i te ohipa mai te reira mai taime ei mono, ei tauturu e ei orometua tamau no te reo peretane, e ei faatere no te piha toro‘a no te reo peretane e ei mono peresideni no te pae haapiiraa.

Te parau ra oia, e te tufaa faufaa rahi roa‘e no te haapiiraa evanelia, e tae mai ïa na roto i te tahi mea ta’na i haapii i te omuaraa o ta’na ohipa haapiiraa: e ti‘a i te haapiiraa ia tae mai eiaha na roto mai i te hoê vahi mata’uhia aore râ te‘ote‘o na roto mai râ te hoê vahi no te here—na roto mai i te aroha, te aroha mau o te Mesia.