Te tauturu nei te mau opuaraa pape mâ i te mau milioni taata i Afirika

Hau atu i te piti ahuru matahiti teie nei to te Ekalesia ohiparaa i roto i te mau opuaraa pape mâ i roto hau atu i te 100 fenua. I Afirika ana‘e, ua haamaitai teie mau opuaraa i te oraraa o te hau atu i te maha milioni taata na roto i te horoaraa i te mau apoo pape, te fariiraa pape e te mau rave‘a opereraa pape e te tamâraa pape.

Ua tupu taua huru opuaraa ra i te Motu no Iduga, atea atu i te tatahi miti no Mozambique. Te rave nei te rahiraa o na 15.000 taata e ora nei i ni‘a i te motu i te ohipa i roto i te mau faaapu utuafare, e te tai‘a nei i roto i te moana Inidia, aore râ te ohipa nei i roto i te mau vahi tara‘iraa miti no te ohi i te miti popaa. Aore e pape, e uira, e poromu aore râ e pereoo i ni‘a i teie motu. E mea na ni‘a i te mau poti hamanihia e te rima taata aore râ te mau vaa taraihia no te haere atu i te motu.

E rave rahi mau tenetere te maoro, te pape inu i Iduga no roto mai ïa i te mau apoo papa‘u tei heru-rima-hia. E tamau noa te mau apoo pape i te î i te one e te pehu. E mea vari e eita te pape e noaa ohie noa i roto i teie mau apoo. I te tau ûa, e viiviihia te pape, e na te reira e faatupu i te ma‘i torera, te hĭ, e te tahi atu mau ma‘i.

I to te mau misionare totauturu a te Ekalesia faarooraa i te huru oraraa i Idugo, ua farerei ratou i te feia faatere no te motu. Ua faanaho amui ratou i te hoê opuaraa e na te Piha Ohiparaa Totauturu a te Ekalesia e horo‘a i te mau tauihaa, te mau mauihaa e te mau arata‘iraa no te patu e 10 apoo pape tima e te mau tapo‘i auri, e nehenehe e 1 000 taata e fana‘o i te pape. E horo‘a ïa te mau misionare i te haapiipiiraa no ni‘a i te ea e te tamâraa, e e horo‘a mai te huiraatira i te rima ohipa no te paturaa e te atuaturaa i te mau apoo pape.

Mai te hoê vahi faaineineraa i ni‘a i te fenua, ua faahaerehia i ni‘a i te motu na ni‘a i te pahi e maha pereoo uta iriiri, 300 pute tima, e piti pereoo one, te mau auri, e te mau pa‘epa‘e auri timahia. I reira ua tari-avae-hia aore râ na ni‘a i te pereoo tura‘i te mau tauihaa i ni‘a i te motu. E rave rahi te mau melo no te Ekalesia no Quelimane, Mozambique tei puhapa e toru ava‘e i ni‘a i te motu no te tauturu i te haapiipiiraa e te paturaa.

Ua patuhia te mau apoo ia nehenehe i te pape ûa ia faatahehia e ia ore hoi e viivii. I te tahi mau vahi nohoraa, ua patu te huiraatira i te mau aua raau e te mau e‘a tima no te haati i te mau apoo pape, ma te faaohipa i te mau piriti ta ratou iho i haapii i te hamani e te mau materia ta te Ekalesia i horo‘a’tu.

I te mau oro‘a avariraa, ua hurihia te faturaa o te mau apoo pape i te huiraatira o te oire tata‘itahi. Ua faaite mai te mau taata e rave rahi e faaea ra i ni‘a i te motu e tei rave i te ohipa i ni‘a i te mau apoo pape i to ratou mauruuru no to ratou ite apî i te hamaniraa i te mau piriti, te raveraa i te tima e te haapaariraa i te reira e te auri, e te faaohiparaa i te mau mauihaa ia nehenehe ia noaa ia ratou te tahi atu ohipa. Ua faaite te tahi atu mau taata i to ratou mauruuru i te haapiiraa i te faatere.

I muri mai i te tau ûa, aore roa e ma‘i no roto mai i te pape i itehia i roto i te mau oire e vai nei te mau apoo pape.

Mai te au i te Faanahonahoraa Ea no te Ao nei, hau atu i te hoê milia taata na te ao nei e ere nei i te pape mâ. Aua‘e te opuaraa pape mâ a te Ekalesia, i iti mai ai taua numera ra na roto i te hoê raveraa e faaohipa i te mau huiraatira i roto i te faanahoraa e te faaohiparaa i te mau opuaraa, te horo‘araa i te rima ohipa no te patu i te mau fare hinaarohia, te fariiraa, te haapiipiiraa e te atuaturaa i te mau rave‘a tei rave-faaoti-hia.

Taa ê noa’tu i te mau opuaraa pape mâ na Afirika, te tauturu nei te Ekalesia i te mau opuaraa pape mâ i Asia, i Amerika Ropu, i Europa Hitiaa o te râ, i Inidia, Indonesia, te mau Motu no Patifita, Amerika Apatoa, Asia Apatoa hitia o te râ, e i te tahi atu mau vahi na te ao nei.