E tauturu te mau pû haapiipiiraa misionare i te haapeepee atu â i te ohipa no te faaoraraa
Na roto i te ao nei, te horoa nei na 15 pû haapiipiiraa misionare i te haapiipiiraa i na 85 000 misionare no na 143 fenua. Te haapii nei te taatoaraa o te mau misonare e 55 reo i raro a‘e i te haapiipiiraa o na 1.600 orometua haapii, e e tavini ratou e piti matahiti i roto i na 405 misioni i roto i na 150 fenua.
No te rahi o te mau misionare mai te tauiraahia te faito matahiti i te ava‘e Atopa 2012, ua rahi atu â ïa te mau misionare e fariihia nei i roto i te mau PHM. Ma te hoê PHM i roto i na pae e piti o te ao nei, aita ïa te haapiipiiraa i te mau misionare e hoperaa.
I te rahiraa o te taime e tae mai te mau misionare i te hoê PHM ma te hoê niu no te iteraa faaroo tei noaa na roto i te haapiiraa i roto i te utuafare e i te fare pureraa. Te horo‘a nei te mau pû i te tahi atu â haapiipiiraa, e nahea ia haapii mai ta Iesu Mesia i haapii e nahea ia ani i te taata ia pee atu Ia’na. Te haapiipii nei te mau misionare i te mau huru haapiiraa, te farii nei ratou i te haapiipiiraa i te reo, te faaroo nei ratou i te mau a‘oraa hebedoma a te mau Hui Mana Faatere o te Ekalesia e te feia haapii no te PHM, e te rave nei ratou i te mau ohipa taviniraa.
Tei Provo, Utaha, HAM, te PHM rahi roa‘e. Te haapiipiihia nei e mau tauasini misionare na roto i na 55 reo ĕê. Tei te Oire no Mexico, Mexico te piti o te PHM rahi roa‘e. I te ava‘e Tiunu 2013 ua tauihia te reira pû mai te hoê fare na‘ina‘i i te hoê aua e 36,35 tâ te rahi tei farii na i te hoê fare haapiiraa tuarua a te Ekalesia, te Benemerito de las Americas. Ua nehenehe i te vahi tahito i te farii 125 misionare i te taime hoê ; e nehenehe te vahi apî e farii hau atu i te 1 000 misionare.
Te vai nei te tahi atu mau PHM i Buenos Aires, Labarata ; São Paulo, Berezilia ; Santiago, Tileni ; Bogotá, Colombia ; Santo Domingo, Repupirita Dominica ; Preston, Paratae ; Accra, Ghana ; Guatemala City, Guatemala ; Auckland, Niu Zelani ; Lima, Peru ; Manila, Philippines ; Johannesburg, Afirika Apatoa ; e Madrid, Paniora.