Pagdala sa Primary ngadto sa Panimalay
Mahimo Kitang mga Miyembro sa Simbahan pinaagi sa Bunyag ug Pagkumpirma
Ang tagsulat nagpuyo sa Utah, USA.
Pagkat-on og dugang mahitungod sa tema sa Primary karong bulana!
Si Mariela miabut sa balay gikan sa eskwelahan nga nagmug-ot ang iyang nawong. “Unsay problema?” Nangutana si Mama samtang nagtanom siya og mga bulak sa tanaman.
“Misaad si Sonia nga makigdula kanako, unya dili diay,” si Mariela miingon. Miyaka siya sa yuta tupad ni Mama.
“Kalooy gud,” miingon si Mama. “Importante gyud nga motuman sa mga saad. Sa sunod semana kon ikaw bunyagan ug kumpirmahan na, mohimo ka og importante kaayo nga mga saad, nga gitawag og mga pakigsaad.”
“Mao ba?” nangutana si Mariela. Siya naghinam-hinam nga magpabunyag.
Gibutang ni Mama ang yellow nga bulak diha sa yuta. “Ikaw mosaad sa pagsunod sa mga sugo. Ikaw usab mosaad sa pagdala sa ngalan ni Jesukristo diha kanimo. Unsa ang saad sa Langitnong Amahan kon imo kining buhaton?”
Gihunahuna ni Mariela ang iyang nakat-unan sa Primary. “Nga ako makabatun sa Espiritu Santo uban kanako.”
“Mao kana,” miingon si Mama. “Mamahimo ka usab nga usa ka miyembro sa Simbahan ni Jesus. Unsaon nimo pagtuman sa imong saad sa pagsunod sa mga kasugoan?”
“Mahimo akong magmabination, ug makasulti ko sa kamatuoran, si Mariela miingon. “Unsay buot ipasabut sa pagdala sa ngalan ni Jesus ngari kanako?”
“Kini nagpasabut nga maningkamot ka nga mahisama Kaniya ug mobuhat sa unsay Iyang gusto nga imong buhaton,” miingon si Mama. “Unsay imong mabuhat aron mahimong mahisama kang Jesus?”
Gipatuyok-tuyok ni Mariela ang morado nga bulak tali sa iyang mga tudlo. “Akong tuparan paglingkod ang bag-ong babaye sa eskwelahan. Ug maningkamot ko nga magbinuotan ngadto ni Sonia,” siya miingon.
“Nindot kana nga mga ideya,” miingon si Mama. “Ug kon ikaw moambit sa sakrament, imong hinumduman ang imong mga saad.”
Mipahiyum si Mariela. “Nasayud ko og lain nga saad—sa pagbisbis sa bulak aron makaangkon ta og matahum nga tanaman!”