Si Nephi Mitubag sa Akong mga Pangutana

Natawo ko sa Simbahan, apan ang akong pamilya panagsa ra mosimba samtang ako nagtubo pa. Bisan pa niini, kanunay kong nakakita og paagi nga makasimba nga ako lang. Sa sayong bahin niadtong 1970 nagserbisyo ko isip usa ka magtutudlo sa seminary sa Pittsburg, Kansas, USA. Sa among pagtuon sa Basahon ni Mormon, akong gihagit ang klase—lakip nako—sa pagbasa sa tibuok nga basahon. Usa ka adlaw samtang nagbasa, nakadawat ko og usa ka gamhanan nga pagpamatuod nga kini tinuod.

Pipila ka tuig ang milabay ang akong mga ginikanan mibisita. Samtang sila nagbisita, ang akong amahan mihisgot sa mga butang nga wala kami magkauyon nga dili nako hisgutan uban niya. Namugos siya, hinoon, bisan pa niana, hangtud hapit na ako masuko. Nananghid kong mobiya makadiyot ug miadto sa kwarto, diin ako miluhod ug nag-ampo sa Langitnong Amahan ug nangayo Kaniya og panabang sa pag-atubang sa akong amahan. Ang tubag miabut sa akong hunahuna: ang asoy ni Nephi ug sa naguba nga pana.

Mibasa ko sa istorya sa 1 Nephi kapitulo 16. Naghunahuna ko kabahin ni Nephi nga nagpaubos sa pagduol sa iyang amahan, kinsa nagbagulbol batok sa Ginoo, sa pagpangutana kon asa siya moadto sa pagkuha og pagkaon (tan-awa sa bersikulo 23). Uban niana nga hunahuna, gibati nako nga naaghat nga moduol sa akong amahan ug mangayo sa iyang giya ingon man usab panalangin sa priesthood.

Sa dihang mibalik ko sa sala ug nangayo ni Papa og panalangin, ang iyang kasingkasing natandog ug siya misugod sa paghilak. “Hunahunaon usa nako kana,” siya miingon.

Sulod sa misunod nga pipila ka adlaw siya nagpuasa ug nag-ampo. Dayon, sa wala pa si Papa ug Mama mibiya, siya mihatag nako og maanindot nga panalangin.

Human niana nga kasinatian, si Papa nag-usab sa iyang kinabuhi. Sa ilang pagpauli gikan sa Kansas, ang akong mga ginikanan mibisita sa Adan-ondi-Ahman, Missouri, USA, diin ang akong amahan nakaangkon og gamhanan nga espirituhanong kasinatian.

Sa wala madugay, akong mga ginikanan nahimong aktibo ug mapasaligon nga mga Santos sa Ulahing mga Adlaw. Sa misunod nga mga tuig, nagserbisyo sila og duha ka mga misyon—usa sa Germany ug usa sa Temple Square sa Siyudad sa Salt Lake. Si papa nagserbisyo isip patriyarka sa stake sa dihang siya namatay sa tuig 1987.

Ang Ginoo nasayud nga si Papa usa ka maayong tawo. Pinaagi sa Basahon ni Mormon nga akong nadawat ang akong tubag, ug pinaagi sa akong pagbuhat sa aghat nga si Papa nasayud nga siya kinahanglan nga mahimong usa ka lider alang sa among pamilya. Kini nga kasinatian nakapausab namong tanan.

Akong nakat-unan nga ang Basahon ni Mormon sa tinuod mao ang lain nga tugon ni Jesukristo ug nga kini gisulat alang sa atong panahon. Ako nasayud nga ako makasalig niini kon ako mawad-an og kadasig ug sa bisan unsang sitwasyon. Ang mga tubag anaa diha.

Sa pagkatinuod, ang “mga pulong ni Kristo mosulti [kanato] tanan nga mga butang unsay [atong] buhaton” (2 Nephi 32:3).