Ngano nga gilalang kita sa Dios?
Importante kini nga masabtan nga ang Dios wala “molalang” kanato sa paagi nga kita gipatumaw gikan sa wala. Adunay sukaranang bahin kanato nga anaa na bisan sa wala pa ang pagkatawo sa atong espiritu: “Ang tawo mao usab diha sa sinugdanan uban sa Dios. Ang salabutan, o ang kahayag sa kamatuoran, wala malalang o mabuhat, ni dili gayud mahimo” (D&P 93:29). Tungod kay kita nasayud niini, kita usab nasayud nga ang tinguha sa Langitnong Amahan sa paglalang kanato dili pasagad o binuut-buot apan may halawum nga katuyoan. Si Propeta Joseph Smith mitudlo, “Ang Dios mismo sa kaugalingon, nakakita nga siya anaa sa taliwala sa mga espiritu ug kahimayaan, tungod kay siya mas labaw pa ka maalamon, nakakita nga angayan sa pagmugna og mga balaod diin ang uban makabaton og kahigayunan sa pag-uswag sama sa iyang kaugalingon” (Mga Pagtulun-an sa mga Presidente sa Simbahan: Joseph Smith [2007], 251; tan-awa usab sa Moises 1:39). Tungod kay ang Langitnong Amahan gusto nga kita adunay kahigayunan sa pag-uswag ug mahimong sama Kaniya, Siya milalang sa atong mga espiritu, ug Siya mihatag og usa ka plano sa kaluwasan ug kalipay nga kinahanglan nga maglakip niining yutan-on nga kasinatian. Tingali, ang labing yano ug labing maayo nga tubag niini nga pangutana mao usab ang tubag sa kon ngano ang Dios nagbuhat sa tanan: tungod kay Siya nahigugma kanato.