Paggiya Sama sa Manluluwas

Ni Ryan Carr

Mga Magasin sa Simbahan

Imahe

J. Kirk Richards painting of the Savior helping lift a woman.

Woman Healed, ni J. Kirk Richards

Adunay tin-aw nga kalainan tali sa dautan nga mga lider sa kalibutan ug sa hingpit nga lider, ang Manluluwas sa kalibutan. Si Presidente Spencer W. Kimball (1895–1985) mipasabut: “Kadtong mga lider sa kasaysayan nga nakahimo og subo kaayong epekto sa mga katawhan makasubo kaayo tungod kay sila nagkulang sa hapit bisan unsa nga matang sa mga hiyas nga naa nianang Tawo sa Galilea. Diin si Jesus dili hakog, sila mga hakog. Diin si Jesus nagpakabana sa kagawasan, sila nagpakabana sa pagkontrolar. Diin si Jesus nagpakabana sa serbisyo, sila nagpakabana sa kahimtang. Diin nahatag ni Jesus ang tinuod nga mga panginahanglan sa uban, sila naghunahuna lamang sa ilang kaugalingong mga panginahanglan ug gusto. Diin si Jesus nagpakabana sa kalamboan sa iyang mga disipulo, sila nagtinguha sa pagmaniubra sa mga mortal. Diin si Jesus nga puno sa kamanggiloy-on sa pagbalanse sa kaangayan, sila sa kasagaran napuno sa kabangis ug dili makiangayon.”¹

Aron molampus isip mga lider sa Simbahan sa Ginoo, kita kinahanglan nga mosunod sa Iyang ehemplo. Ang mosunod nga mga ideya makatabang nato nga mahimong mas sama kang Kristo sa atong pagpangulo.

Ang mga lider nga sama ni Kristo moserbisyo “uban sa bug-os nga tinguha ngadto sa himaya sa Dios” (D&P 4:5), nagtinguha sa pagbuhat sa kabubut-on sa Langitnong Amahan. Ang Manluluwas miingon, “Kay ako nanaug gikan sa langit, dili sa pagbuhat sa akong kaugalingong kabubut-on, kon dili sa kabubut-on sa nagpadala kanako” (Juan 6:38).

Ang mga lider nga sama ni Kristo dili mosalig sa “gahum sa tawo” (2 Nephi 4:34). Mapainubsanon silang mag-ampo alang sa giya. Maghulat sila sa Ginoo ug magtinguha sa Iyang buluhaton sa Iyang panahon ug sa Iyang paagi kay sa mag-agad sa ilang kaugalingong mga talento ug abilidad.

Mga lider nga sama ni Kristo dili magtinguha og posisyon sa Simbahan; ilang gitan-aw ang mga calling isip mga oportunidad sa pagserbisyo, dili mga promosyon. Ni isipon nila ang pagka-release nga demosyon. Ang pagka-release natural nga kabahin sa matag calling.

Ang mga lider nga sama ni Kristo mga sulugoon; sila motabang, motudlo, ug moawhag niadtong ilang giserbisyohan. Nagtinguha sila sa pagpanalangin sa uban, sama sa gibuhat sa Manluluwas: “Dili siya maghimo og bisan unsa gawas kon kini alang sa kaayohan sa kalibutan” (2 Nephi 26:24). Ilang giisip ang ilang mga kaugalingon nga mga representante sa Ginoo sa pagtabang sa uban nga makabalik ngadto Kaniya.

Ang mga lider nga sama ni Kristo magtinguha sa pagtabang sa uban nga molambo. Si Presidente Kimball mitudlo usab:

“Si Jesus misalig gayud sa iyang mga sumusunod sa pagpakigbahin sa iyang buhat uban kanila aron sila molambo. Mao kana ang usa sa labing importanting mga leksyon sa iyang pagpangulo. Kon atong isalikway ang tabang sa uban aron mas madali ug epektibong mahuman ang buluhaton, ang buluhaton mahimong matuman, apan wala ang kauswagan ug kalamboan sa mga sumusunod nga maoy importante kaayo. …

“Si Jesus mihatag sa mga tawo sa kamatuoran ug mga buluhaton haum sa ilang kapasidad. Dili Niya sila hatagan og labaw sa ilang mahimo, apan mihatag kanila og igo aron madugangan ang ilang pagkaespirituhanon.”²

Si Propeta Joseph Smith mihulagway kon giunsa niya sa pagpangulo pag-ayo ang mga tawo: “Ako mitudlo kanila og husto nga mga baruganan, ug gidumala nila ang ilang mga kaugalingon.”³ Mao kini ang diwa sa pamaagi sa Ginoo sa pagpangulo.

“Apan Wala Akoy Bisan Unsa nga mga Kasinatian sa Pagpangulo!”

Ayaw og kabalaka kon kamo wala pay daghang kasinatian. Gitawag kamo pinaagi sa inspirasyon, sa usa ka tawo nga dunay awtoridad (tan-awa sa Mga Artikulo sa Hugot nga Pagtuo 1:5). Ang Ginoo nakakita unsa inyong potensyal. Ang inyong tawag sa pagpangulo mahimong usa ka oportunidad sa pagpalambo sa inyong mga kalig-on ug pagbuntog sa mga kahuyang.

Sa negosyo ug sa ubang mga organisasyon, ang edukasyon ug kasinatian sa usa ka lider sa maoy kanunayng importante nga mga kwalipikasyon, apan ang pamaagi sa Ginoo lahi. Si Presidente Lorenzo Snow (1814–1901) mitudlo: [Ang] mga apostoles nga gitawag sa Dios, ang gitawag ni Jesus, ang Anak sa Dios, … sila walay grado; wala sila makasabut sa mga siyensya, wala silay tag-as nga posisyon sa Judea—sila kabus ug walay alamag; mga kabus sa katungdanan sa kinabuhi. … Apan, lahi ang Ginoo. Siya mihimo sa Iyang mga pagtawag lahi kay sa niadtong mga pagtawag sa mga tawo.”¹ Maayo na lang, kinsa ang tawagon sa Ginoo Siya mopasarang!²

Alang sa mga Lider Kinsa Motambag sa mga Miyembro sa Simbahan

Samtang kamo makigkita sa mga miyembro sa Simbahan kinsa nagkinahanglan sa inyong tabang, sila tingali gusto nga inyong sulbaron ang ilang mga problema alang nila. Apan sa pagbuhat sa ingon naghikaw kanila sa personal nga paglambo. Tingali moabut sila nga nagdahum og diha-diha dayon nga solusyon, apan ang ilang mga problema sa kasagaran nagkinahanglan og mas daghang panahon aron masulbad. Kini mao ang pipila ka komon nga mga hagit. Ang mosunod nga mga pangutana, gisugyot sa mga lider sa priesthood, makatabang samtang mangandam kamo sa pagtambag sa mga miyembro:

Nagtambag ug nagtabang ba kamo sa mga miyembro sa paagi nga ang pagbuntog sa ilang mga hagit magpabilin nga ilang mga responsibilidad?
Naggiya ba kamo sa mga miyembro aron sila mismo ang mangita sa tubag?
Nag-follow up ba kamo sa mga buluhaton nga ilang giuyunan nga buhaton?
Nagtabang ba kamo nila nga makakita og mga kapanguhaan sa pagsulbad sa ilang kaugalingong mga problema?
Nag-awhag ba kamo nila sa pagpangamuyo ngadto sa Ginoo?
Ang inyo bang tambag nag-awhag sa mga mga miyembro sa pag-uswag?

Siyempre, ang tanang mga sitwasyon managlahi, mao nga importante sa pagsunod sa giya sa Espiritu. Pagserbisyo uban sa gugma, pailub, ug espirituhanong kasensitibo mosangput sa maayong mga resulta.