អំណោយដ៏ទេវភាព
ដោយប្រធាន រ័សុល អិម ណិលសុន
ថ្ងៃទី ៦ ខែ ធ្នូ ឆ្នាំ ២០២០
បងប្អូនប្រុសស្រីជាទីស្រឡាញ់ នេះជារាត្រីដ៏អស្ចារ្យមួយ ។ វិញ្ញាណរបស់យើងត្រូវបានលើកតម្កើងដោយតន្រ្តី និងសារលិខិតដ៏ពីរោះនេះ ។ ស៊ិស្ទើរ ក្រេវិន រម្សាយដួងចិត្តយើងជាមួយនឹងគំនិតគាត់អំពីការឱបពីសួគ៌ា និងភួយនៃការលួងលោមចិត្ត ។ អែលឌើរ នែលសុន បានធ្វើឲ្យយើងរំជួលចិត្ត ពេលលោកបាននិទានពីជីវិតរបស់ឪពុកលោក ដោយសារតែកាតព្វកិច្ចយោធារបស់គាត់បានធ្វើឲ្យគាត់គ្មានបុណ្យគ្រីស្ទម៉ាស់រយៈពេលបីឆ្នាំជាប់ៗគ្នា ។ អែលឌើរ ហូឡិន បានបំផុសគំនិតយើង ខណៈពេលបង្រៀនអំពីព្រះជន្មរបស់ព្រះអង្គសង្គ្រោះនៃពិភពលោក ។
ខ្ញុំសូមយកឱកាសនេះដើម្បីអរគុណចំពោះការឆ្លើយតបរបស់បងប្អូនទៅនឹងការអញ្ជើញថ្មីៗនេះរបស់ខ្ញុំឲ្យពន្លិចប្រព័ន្ធផ្សព្វផ្សាយសង្គមជាមួយនឹងការសម្ដែងការដឹងគុណចំពោះពរជ័យជាច្រើនរបស់យើង ។ មានមនុស្សរាប់លាននាក់បានឆ្លើយតប ។ ហើយខ្ញុំមានអំណរគុណជាពិសេសដែលបងប្អូនកំពុងតែបន្តអធិស្ឋានរៀងរាល់ថ្ងៃទៅកាន់ព្រះវរបិតាសួគ៌យើង ដើម្បីអរព្រះគុណទ្រង់ចំពោះការដឹកនាំ ការការពារ ការបំផុសគំនិតរបស់ទ្រង់ ហើយសំខាន់បំផុតចំពោះអំណោយទាននៃព្រះរាជបុត្រាដ៏ស្ងួនភ្ងារបស់ទ្រង់ គឺព្រះយេស៊ូវគ្រីស្ទ ។
បុណ្យគ្រីស្ទម៉ាស់ធ្វើឲ្យយើងនឹកឃើញអនុស្សាវរីយ៍ជាច្រើន ។ កាលឆ្នាំទៅ វិនឌី និងខ្ញុំបានមានឱកាសអបអររដូវនេះជាមួយនឹងក្មេងស្រីតូចគួរឲ្យស្រឡាញ់ម្នាក់ឈ្មោះ ក្លែរ ក្រូសបាយ ដែលបានច្រៀងចម្រៀងគ្រីស្ទម៉ាស់ដ៏ពីរោះ ។ ខ្ញុំសូមចែកចាយផ្នែកមួយនៃវីដេអូរបស់យើងដែលបានធ្វើសម្រាប់កម្មវិធី « បំភ្លឺពិភពលោក » ។១
ដូចដែលអែលឌើរ ហូឡិនបានរឮកដល់យើងថា យប់ដ៏មានពរនោះកាលពីជាងពីរពាន់ឆ្នាំមុន គឺជាយប់មួយដែលបានធ្វើឲ្យបរិសុទ្ធដោយសារតែការប្រសូតរបស់ព្រះមួយអង្គដែលត្រូវបានតែងតាំងជាមុនដើម្បីនាំយកសេចក្ដីសុខសាន្តមកកាន់ផែនដីនេះ និងដើម្បីបំផុសទង្វើល្អនៅក្នុងចំណោមមនុស្ស ។២ ព្រះយេស៊ូវគ្រីស្ទបានប្រសូតមកដើម្បីប្រទានពរដល់មនុស្សលោកគ្រប់រូបទាំងពីអតីតកាល បច្ចុប្បន្នកាល និងអនាគតកាល ។
សូម្បីតែពេលយើងច្រៀងបទ « យប់ដ៏សុខសាន្ត » ក៏យើងដឹងថា ព្រះជន្មរបស់ព្រះឱរសនៃបេថ្លេហិមមិនបានចាប់ផ្ដើមនៅទីនោះទេ ហើយក៏មិនបានបញ្ចប់នៅកាល់វ៉ារីដែរ ។ ពីមុនជីវិតនៅលើផែនដី ព្រះយេស៊ូវត្រូវបានចាក់ប្រេងតាំងដោយព្រះវរបិតារបស់ទ្រង់ឲ្យធ្វើជាព្រះមែស៊ី ព្រះគ្រីស្ទ ព្រះអង្គសង្គ្រោះ និង ព្រះប្រោសលោះនៃមនុស្សលោកទាំងអស់ ។ ទ្រង់ត្រូវបានតែងតាំងជាមុន ដើម្បីធ្វើដង្វាយធួនសម្រាប់យើង ។ ទ្រង់ត្រូវរបួសដោយព្រោះអំពើរំលងរបស់យើង ក៏ត្រូវវាយជាំដោយព្រោះអំពើទុច្ចរិតរបស់យើង ។៣ ទ្រង់បានយាងមកដើម្បីធ្វើឲ្យអមតភាពក្លាយជាការពិត ហើយជីវិតដ៏នៅអស់កល្បជានិច្ចអាចកើតមានដល់មនុស្សគ្រប់រូបដែលមានជីវិតរស់នៅ ។៤
ការណ៍នោះមានន័យថា យើងគ្រប់គ្នានឹងបានរស់ឡើងវិញ—រួមទាំងមនុស្សជាទីស្រឡាញ់របស់បងប្អូនដែលបានឃ្លាតឆ្ងាយទៅនៅអំឡុងឆ្នាំដ៏វឹកវរនេះ ហើយដែលឥឡូវនេះរស់នៅផ្នែកម្ខាងទៀតនៃវាំងននផងដែរ ។ វាមានន័យថា យើងម្នាក់ៗអាចបន្តរីកចម្រើនបាន ។ វាមានន័យថា យើងអាចសង្ឃឹមចំពោះរឿងល្អៗនៅពេលខាងមុខ ។
តើបងប្អូនធ្លាប់ឆ្ងល់ដែរទេថា ហេតុអ្វីបានជាព្រះអម្ចាស់បានជ្រើសរើសដើម្បីប្រសូតនៅកន្លែងនោះ ? ទ្រង់អាចប្រសូតនៅទីកន្លែងណាក៏បាននៅលើផែនដីនេះ ។ ប៉ុន្តែទ្រង់បានជ្រើសរើសដែនដីនោះ ដែលទ្រង់បានធ្វើឲ្យបរិសុទ្ធ ។
ព្រះយេស៊ូវបានប្រសូតនៅភូមិបេថ្លេហិម ។ ពាក្យនោះជាភាសាហេព្រើរគឺ bet lehem មានន័យថា « ផ្ទះនំប៉័ង » ។ វាសមរម្យខ្លាំងណាស់ដែលទ្រង់មានដើមកំណើតមកពី « ផ្ទះនំប៉័ង » ដោយសារទ្រង់គឺជា « នំប៉័ងជីវិត » ។៥
ការប្រសូតរបស់ទ្រង់បានកើតឡើងក្នុងស្ថានភាពដ៏រាបសាក្នុងចំណោមសត្វពាហនៈ ។ « កូនចៀមនៃព្រះ »៦បានប្រសូតនៅទីនោះអំឡុងរដូវបុណ្យរំលងក្នុងចំណោមសត្វពាហនៈ ដែលបានរៀបចំជាយញ្ញបូជាសម្រាប់បុណ្យចម្លង ។ ហើយនៅថ្ងៃមួយ ទ្រង់បាន « ដូចជាកូនចៀមដែលគេដឹកទៅសម្លាប់ » ។៧ ទ្រង់គឺ ជាកូនចៀមផង និងជាអ្នកគង្វាលផង ។
នៅឯការប្រសូតរបស់ទ្រង់ ដែលត្រូវបានហៅថា « អ្នកគង្វាលល្អ »៨ នោះពួកអ្នកគង្វាលគឺជាមនុស្សដំបូងគេដែលបានទទួលការប្រកាសអំពីការប្រសូតដ៏បរិសុទ្ធរបស់ទ្រង់ ។៩
នៅឯការប្រសូតនៃទ្រង់ ដែលត្រូវបានហៅថា « ផ្កាយព្រឹកដ៏ភ្លឺចិញ្ចែង »១០ នោះមានផ្កាយថ្មីមួយបានរះឡើងនៅលើមេឃ។១១
នៅឯការប្រសូតនៃទ្រង់ ដែលបានហៅអង្គទ្រង់ថាជា « ពន្លឺលោកិយ៍ »១២ នោះគ្មានសេចក្ដីងងឹតនៅទូទាំងពិភពលោក ដែលជាទីសម្គាល់នៃការប្រសូតដ៏បរិសុទ្ធរបស់ទ្រង់ ។១៣
ព្រះយេស៊ូវបានជ្រមុជទឹកនៅក្នុងទឹកទន្លេដ៏ទាបបំផុតនៅលើផែនដី ជាតំណាងឲ្យជម្រៅដែលទ្រង់នឹងចូលទៅដើម្បីសង្គ្រោះយើង ហើយដែលទ្រង់នឹងយាងក្រោកឡើងលើសអ្វីៗទាំងអស់—ដើម្បីសង្គ្រោះយើងម្ដងទៀត ។១៤ ទ្រង់បានបង្រៀនចេញ ពីគំរូរបស់ទ្រង់ថា យើងក៏អាចក្រោកចេញពីជម្រៅនៃឧបសគ្គផ្ទាល់ខ្លួនរបស់យើងម្នាក់ៗផងដែរ—ដូច ជា ភាពសោកសៅ ភាពទន់ខ្សោយ និងការព្រួយបារម្ភរបស់យើង ដើម្បីឈានទៅដល់ទីខ្ពស់នៃសក្ដានុពលដ៏រុងរឿង និងជោគវាសនាដ៏ទេវភាពរបស់យើងផ្ទាល់ ។ ការណ៍ទាំងនេះអាចកើតឡើងតែតាមរយៈសេចក្ដីមេត្តាករុណា និងព្រះគុណរបស់ទ្រង់ប៉ុណ្ណោះ ។
នៅទីរហោស្ថាននៃវាល ខ្សាច់ដ៏ស្ងួតហែង ព្រះអង្គសង្គ្រោះបានបង្រៀនមេរៀនដែលអាចយល់ បានយ៉ាងពេញលេញតែចំពោះអ្នកដែលបានដឹងពីអត្ថន័យនៃការស្រេកឃ្លានប៉ុណ្ណោះ ។
ដល់ស្ត្រីនៅឯអណ្ដូងទឹក ព្រះយេស៊ូវបានបង្រៀនថា ៖
« អស់អ្នកណាដែលផឹកទឹកនេះ នឹងត្រូវស្រេកទៀត ៖
« តែអ្នកណាដែលផឹកទឹកខ្ញុំឲ្យនោះនឹងមិនស្រេកទៀតឡើយ ទឹកដែលខ្ញុំឲ្យនឹងត្រឡប់ជារន្ធទឹកនៅក្នុងអ្នកនោះដែលផុសឡើងដល់ទៅបានជីវិតអស់កល្បជានិច្ច » ។១៥
បទគម្ពីរនេះរឭកខ្ញុំពីបទពិសោធន៍ដ៏ទន់ភ្លន់មួយដែលខ្ញុំមានជាមួយនឹងអែលឌើរ ម៉ាក អ៊ី ភីធើរសិន ។១៦ នៅពេលនោះ លោកគឺជាសមាជិកមួយរូបក្នុងកូរ៉ុមនៃពួកសាវកដប់ពីរនាក់ ហើយពីមុនការហៅរបស់ខ្ញុំទៅក្នុងកូរ៉ុមនោះ ខ្ញុំបានមានឯកសិទ្ធិអមដំណើរលោកទៅកាន់ដែនដីដ៏បរិសុទ្ធនោះ ដែលជាដំណើរចុងក្រោយរបស់លោកក្នុងជីវិតរមែងស្លាប់ ។
អែលឌើរ ភីធើរសិន បានរងទុក្ខយ៉ាងខ្លាំងដោយសារជំងឺមហារីក ។ អំឡុងពេលយប់ដែលលោកមានការឈឺចាប់យ៉ាងយូរ ខ្ញុំបានព្យាយាមអស់ពីលទ្ធភាពដើម្បីលួងលោមលោក ។ ខ្ញុំបានឃើញថា លោកអាចបរិភោគអាហារ និងទទួលទានទឹកតិចតួច បំផុត ។ នៅថ្ងៃបន្ទាប់ លោកត្រូវឡើងថ្លែងសុន្ទរកថាដ៏សំខាន់មួយ ។
ពេលព្រឹកបានមកដល់ ។ អែលឌើរ ភីធើរសិន បានទៅមាត់ទន្លេកាលីឡេភាគខាងជើងដោយក្លាហាន ជាកន្លែងដែលក្រុមជំនុំមួយក្រុមធំបានរង់ចាំលោក ។ លោកបានជ្រើសបង្រៀនចេញពីការបង្រៀនរបស់ព្រះអង្គសង្គ្រោះនៅលើភ្នំនោះ ។ ពេលអែលឌើរ ភីធើរសិន បានសូត្របទគម្ពីរ « មានពរហើយ អស់អ្នកដែលស្រេកឃ្លាននូវសេចក្តីសុចរិត »១៧នោះលោកបានស្រក់ទឹកភ្នែក ។ លោកបានដាក់កំណត់ចំណាំលោកទៅម្ខាង ងើយមើលទៅលើ ហើយសួរថា « តើបងប្អូន ពិតជា ដឹងពីអត្ថន័យនៃការ ស្រេក និងការ ឃ្លានដែរឬទេ ? » ខ្ញុំបានដឹងថា លោក ពិតជា បានដឹងមែន ។ បន្ទាប់មក លោកបានបង្រៀនថា « ពេលបងប្អូនពិតជាស្រេកឃ្លាននូវសេចក្ដីសុចរិត នោះបងប្អូនអាចក្លាយកាន់តែដូចជាព្រះគ្រីស្ទ » ។ អែលឌើរ ភីធើរសិន គឺជាគំរូដ៏រស់រវើកមួយនៃការបង្រៀននោះ ។ ក្រោយមកមិនយូរប៉ុន្មាន លោកបានបញ្ចប់ជីវិតរមែងស្លាប់នេះ ។១៨
នៅពេលណាដែលខ្ញុំសញ្ជឹងគិតពីការស្រេកឃ្លាននូវសេចក្ដីសុចរិត នោះខ្ញុំគិតដល់សាវកដ៏គួរឲ្យគោរពរូបនេះ ដែលបានឧទ្ទិសការបង្រៀនចុងក្រោយមួយរបស់លោកដើម្បីបង្រៀនពីអត្ថន័យ ពិត នៃការស្វែងរកព្រះអម្ចាស់ព្រះយេស៊ូវគ្រីស្ទ ការស្រេកឃ្លាននូវសេចក្ដីសុចរិត និងការប្រែក្លាយកាន់តែដូចជាទ្រង់ ។
នៅឆ្នាំនេះ ស៊ិស្ទើរ ណិលសុន និងខ្ញុំបានចាប់ផ្ដើមលឿនក្នុងកិច្ចការនៃសេចក្ដីស្រឡាញ់ចំពោះគ្រួសាររបស់យើងសម្រាប់បុណ្យគ្រីស្ទម៉ាស់ ។ នៅដើមខែវិច្ឆិកា វិនឌីបានប្រកាសថា យើងរួចរាល់ហើយសម្រាប់បុណ្យគ្រីស្ទម៉ាស់ ។ ការឆ្លើយតបភ្លាមៗរបស់ខ្ញុំគឺ« អូ៎! ល្អ ឥឡូវ យើងអាចផ្ដោតលើព្រះអង្គ សង្គ្រោះ » ។
នៅឆ្នាំដ៏វឹកវរនេះ ពេលដែលមនុស្សគ្រប់រូបនៅទូទាំងពិភពលោកបានរងទុក្ខនូវជំងឺរាតត្បាតជាសាកល នោះគ្មានរឿងណាដែលយើងអាចធ្វើបាននៅបុណ្យគ្រីស្ទម៉ាស់នេះ ជាងការផ្ដោតលើព្រះអង្គសង្គ្រោះរបស់យើង និងលើអំណោយនៃអត្ថន័យពិតនៃព្រះជន្មរបស់ទ្រង់ចំពោះយើងម្នាក់ៗឡើយ ។
ព្រះវរបិតាសួគ៌ជាទីស្រឡាញ់របស់យើង « ស្រឡាញ់មនុស្សលោក ដល់ម៉្លេះបានជាទ្រង់ ប្រទាន ព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ។១៩
បន្ទាប់មក ព្រះរាជបុត្រានៃព្រះបានសន្យានឹងយើងថា « ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ » ។ ២០ឱ នោះជា អំណោយទាន មកពីព្រះវរបិតា និងព្រះរាជបុត្រាដែលមានតម្លៃដ៏ធំធេង !
ខ្ញុំអរព្រះគុណព្រះចំពោះអំណោយនៃព្រះរាជបុត្រាដ៏ស្ងួនភ្ញារបស់ទ្រង់ ។ ហើយខ្ញុំអរព្រះគុណចំពោះព្រះអម្ចាស់ព្រះយេស៊ូវគ្រីស្ទរបស់យើងចំពោះពលិកម្ម និងបេសកកម្មរបស់ទ្រង់ដែលមិនអាចប្រៀបផ្ទឹមបាន ។ នៅការយាងមកជាលើកទីមួយរបស់ទ្រង់ ព្រះយេស៊ូវបានយាងមកស្ទើរតែដោយសេចក្ដីអាថ៌កំបាំង ។ ប៉ុន្តែនៅឯការយាងមកជាលើកទីពីររបស់ទ្រង់ នោះសិរីល្អរបស់ព្រះអម្ចាស់ « នឹងសម្ដែងមក គ្រប់មនុស្សទាំងឡាយនឹងបានឃើញព្រមគ្នា » ។២១ បន្ទាប់មក ទ្រង់នឹង « គ្រងជាស្តេចលើអស់ទាំងស្តេច ជាព្រះអម្ចាស់លើអស់ទាំងព្រះអម្ចាស់ » ។២២
បងប្អូនប្រុសស្រីជាទីស្រឡាញ់របស់ខ្ញុំ ឥឡូវនេះ ក្នុងនាមជាអ្នកបម្រើដែលមានសិទ្ធិអំណាចមួយរូបរបស់ព្រះអង្គសង្គ្រោះ ខ្ញុំសូមផ្ដល់ពរជ័យមួយដល់បងប្អូនម្នាក់ៗ ។ សូមឲ្យបងប្អូន និងក្រុមគ្រួសារបងប្អូនមានពរជាមួយនឹងសេចក្ដីសុខសាន្ត សមត្ថភាពកើនឡើងដើម្បីស្ដាប់ឮព្រះសូរសៀងរបស់ព្រះអម្ចាស់ ហើយទទួលវិវរណៈជាមួយនឹងការបង្កើនសមត្ថភាពដឹងពីទំហំនៃសេចក្ដីស្រឡាញ់ និងការខ្វល់ខ្វាយដែលព្រះវរបិតាយើង និងព្រះរាជបុត្រាទ្រង់មានចំពោះបងប្អូន ហើយត្រៀមព្រះកាយដើម្បីដឹកនាំអស់អ្នកដែលស្វែងរកទ្រង់ទាំងទ្វេ ។ ខ្ញុំសូមថ្លែងស្របនឹងសម្ដីរបស់មរ៉ូណៃ ហើយ « ទូន្មានអ្នករាល់គ្នាឲ្យស្វែងរកព្រះយេស៊ូវគ្រីស្ទ ដែលពួកព្យាការី និងពួកសាវកបានសរសេរមកនេះ សូមឲ្យព្រះគុណនៃព្រះវរបិតា និងព្រះយេស៊ូវគ្រីស្ទ និងព្រះវិញ្ញាណបរិសុទ្ធ … អាចមកសណ្ឋិតនៅក្នុងអ្នករហូតតទៅ » ។២៣ ខ្ញុំសូមអធិស្ឋានសម្រាប់ពរជ័យនេះ ក្នុងព្រះនាមនៃព្រះយេស៊ូវគ្រីស្ទ អាម៉ែន ៕