Si Kristo Natawo aron sa Pagluwas

Ganahan ko sa Pasko! Ang asoy sa kasulatan, ang musika, ug ang mga pagbati sa maayong kabubut-on ug ang pagkamanggihatagon ingon og mobaha og maayo sa yuta atol niining sagrado nga panahon.

Sa mga katuigan, ang akong asawa ug ako nakaadto sa daghang mga nasod atol sa panahon sa Pasko. Ganahan kami nga makakita sa nagkadaiya nga mga kustombre ug lain-laing mga paagi nga gisaulog ang Pasko. Ang paghunahuna mahitungod niini nga mga kasinatian nakatabang kanako nga makaamgo nga ang Pasko alang sa tanan. Kini alang sa mga bata, mga ginikanan, mga apohan, mga iyaan, mga uyoan, ug mga ig-agaw. Kini alang sa mga tawo kansang mga kinabuhi hapsay ang dagan ug alang niadtong mga buhi nga adunay balatian, kawad-on, ug mga pagsulay. Kini alang niadtong gisakit sa mga kahadlok sa gubat ug alang niadtong kinsa nagpuyo nga malinawon, malamboon nga mga kahimtang. Kini alang niadtong kinsa naningkamot sa pagsunod sa Manluluwas, alang niadtong kinsa wala pa gayod makadungog sa Iyang ngalan, ug gani alang niadtong kinsa misalikway Kaniya. Alang usab kini niadtong nabuhi sa wala pa Siya natawo. Ang Pasko alang sa tanan!

Ang Pasko alang sa tanan tungod kay ang Dios mipadala sa Iyang Anak alang kanatong tanan ug alang sa matag usa kanato.¹ “Natawo alang kanato ang usa ka bata.”²

Tungod kay ang Manluluwas natawo, nagpakabuhi nga walay sala, miula alang kanato, ug nabanhaw, ang matag usa kanato makadawat sa dakong gasa sa pagkabanhaw gikan sa patay. Walay usa ka kalag nga nabuhi sa yuta nga gihikawan niining talagsaon nga gasa. Agig dugang ngadto niini nga gasa “wala makita sa mata, ni madungog sa dalunggan … ang gikatagana sa Dios alang kanila nga nahigugma kaniya.”³

Dili igsapayan sa panahon o sa mga sirkumstansiya, ang pagkatawo sa Manluluwas kanunay nga usa ka rason sa pagmaya. Siya mianhi aron sa paghalad sa mga anak sa Langitnong Amahan og “kalinaw niii nga kalibotan, ug kinabuhi nga dayon diha sa kalibotan nga umaabot.”⁴

Sukad sa panahon ni Adan ug Eva, ang matarong nga mga tawo nanglantaw sa pagkatawo sa usa ka Manluluwas, kinsa moabot sa yuta sa paghimong posible ang katumanan sa plano sa Amahan alang sa Iyang mga anak.⁵ Si Isaias ug si Nephi nanagna sa Iyang pagkatawo diha sa konteksto sa Iyang misyon.⁶ Ang Iyang pagkatawo dili mabulag gikan sa rason nga Siya mianhi sa yuta.

Hunahunaa sila si Anna ug Simeon, kinsa nakakita sa bata nga si Jesus ug nakaamgo nga kini nga bata mao ang “usa ka kahayag nga magpadayag”⁷ sa tibuok kalibotan ug ang paglaom alang sa katubsanan.⁸ Kini ang “maayong balita sa dakong kalipay, nga magaabot sa tanang tawo.”⁹ Kita magmaya kon ang bisan kinsang bata matawo, apan kini nga pagkatawo ug kining bata lahi.

Si Jesukristo, ang mismong kahayag ug kinabuhi sa kalibotan, natawo nga usa ka gamayng bata diha sa usa ka mapaubsanon nga sabsaban, apan usa ka bag-ong bituon ang nagpakita nga timailhan sa iyang pagkatawo. Ang Basahon ni Mormon nagsugilon bahin sa usa ka makapatandog nga panghitabo—usa ka adlaw, usa ka gabii, ug usa ka adlaw nga walay kangitngit—diin nagtimailhan sa Iyang pag-abot. Kining milagroso nga mga timailhan gihatag aron sa pagpahibalo sa pag-abot sa Kahayag sa Kalibotan,¹⁰ kinsa motubos kanato gikan sa kangitngit sa sala ug kamatayon. Kita makatabang sa pagpakigbahin sa Iyang kahayag ngadto sa kalibotan.

Sa panahon sa Pasko, bisan ang gagmay nga bata makabati sa impluwensya ug epekto sa gugma sa Manluluwas. Pipila ka mga tuig ang milabay, usa sa among mga anak nga babaye, si Sonja, misulat mahitungod sa usa ka panag-istoryahanay uban sa iyang singko-anyos nga anak nga lalaki.

Siya misulat, “Si Andrew misulti nako karong gabhiona sa dihang ako siyang gipahimutang sa higdaanan, ‘Sunod tuig, dili na nako tutokan og maayo ang kabahin sa mga regalo, apan akong tutokan ang unsa akong ikahatag ngadto ni Jesus.’ Ako siyang gipangutana kon diin man siya nakakuha niana nga ideya, ug siya misulti nako nga gikan sa iyang magtutudlo sa Primary. Yeheey alang sa Primary!”¹¹

Oo. Pasalamat alang sa Primary. Karon, 14 ka tuig nang milabay, si Andrew nagserbisyo og misyon ug naggahin niining panahon sa Pasko sa paghatag sa mensahe ni Jesukristo ngadto sa uban. Siya bag-ohay lang misulat, “Si Jesus mihatag kanato sa tanang butang … [ug] motangtang sa tanan natong mga sala. Mao kana nganong ako ania sa misyon.”¹²

Ang panahon sa Pasko usa ka espesyal nga panahon sa paghunahuna sa unsay labing importante nga ihatag. Kita mahimong makatabang sa uban nga makabati sa “kahinam sa paglaom”¹³nga moresulta gumikan sa pagkaila sa Manluluwas ug paghalad sa ilang mga kasingkasing ngadto Kaniya.

Ang among anak nga babaye si Alisa namatay gumikan sa kanser pipila ka tuig nang milabay, ug ganahan ko sa iyang panglantaw mahitungod sa Pasko, bisan kon siya nagsagubang og usa ka mangil-ad nga pagdahom sa pagkaayo sa panglawas. Usa ka tuig siya misulat:

“Ako adunay surprisa gayod alang sa Pasko. Usa ka dako kaayo nga surprisa. … Nakadawat ko og email sa wala pa gayod ang Pasko gikan sa nurse sa opisina sa akong oncologist. Siya miingon og, “Maayong Pasko—ang test sa imong tumor nagpositibo alang sa [usa ka piho nga genetic] nga pag-usab sa porma [mutation].’ … Unsay gipasabot niana alang kanako? Sila miaprobar og … usa ka tambal … nga makababag sa mga timailhan sa dalan [signaling pathways] sa selula sa kanser [alang sa pipila nga aduna niana nga pag-usab]. Dili kadto usa ka tambal, apan usa ka milagroso nga druga nga makapakupos … og dali sa mga tumor. … Subo lang, nga sa kataposan ang lawas makakita gyod og paagi sa pagbatok niini, ug ang kanser mobalik. … Apan mibati ko nga adunay tawo nga mihatag kanako og pila ka bulan nga lugway sa kinabuhi. Ug unsa kaha kadto? … Usa ka lugway nga summer? Laing panahon sa holiday uban sa akong mga batang gagmay? Mihilak ko sa dihang akong giablihan ang email ug mipasalamat sa Dios alang sa labing nindot nga surprisa nga akong naangkon sukad.”¹⁴

Si Alisa nakadawat og dugang nga bililhon nga panahon uban sa iyang pamilya. Siya mipakigbahin og usa ka kasinatian nga naangkon sa ilang pamilya samtang naghatod og usa ka gasa nga wala magpaila kinsa ang naghatag, ngadto sa usa ka silingan. Kini naghulagway nga ang matag detalye sa among pagpanghatag og gasa mahimong dili kanunayng mahingpit. Siya misulat:

“Among gihatod ang usa ka sekreto nga … regalo sa miagi nga gabii. Ang mga batang lalaki miplano sa ilang labing maayo nga pagsibat ug sa mga dapit nga tagoanan.

“‘Apan inkaso lang og ilaha kaming makit-an …,’ Seryoso nga misulti si Sam, ug ang laing duha misandig nga gikulbaan. ‘Mas maayo nga kita adunay gunitan nga mga binola nga niyebe sa atong mga kamot.’

“Nasabtan kini ni James. ‘Okay, sakto. Aron ig-on ang pultahan aron kini molamba nga masira?’

“‘Dili,’ [mitubag si Sam], ‘atong ig-on ang ilang nawong.’”¹⁵

Si Alisa mipakigbahin og mas mahigugmaon nga panag-istoryahay ngadto sa iyang kamanghoran nga anak nga si Luke, kinsa sais anyos pa lamang nianang higayona. Siya misulat:

“Nan karong gabhiona samtang kami nanghigda sa iyang higdaanan nga nahayagan sa dekolor nga mga kutay sa mga suga ibabaw sa iyang bintana, ako nangutana kaniya … , ‘Kanang, unsa ang gusto nimong … pangayoon?’

“‘Kuan, maghunahuna ko og usa ka butang.’

“Oh?’

“‘Mahimo kining gamiton sa tanang mga panahon.’

“Oh?’

“Taudtaod nga kahilom. ‘Usa ka paggakos ug usa ka halok gikan ni mama.’

“Kana angay sa 100 ka ginagmay nga mga halok ug dakong paggakos dihadiha dayon. ‘Naunsa man ka Luke, makadawat man ka niana bisan unsang panahona!’

“Apan samtang migawas ko sa pultahan ang akong kasingkasing medyo nagguol og gamay. Tingali mahimong dili gyod kadto tinuod. Mibati ko nga mapasalamaton kaayo nga niining tuiga siya aduna niana ug mga regalo usab.”¹⁶

Nahingangha kaayo ko sa mga hunahuna ni Alisa mahitungod sa paglaom nga naglibot sa Pasko. Siya misulat:

“Ako nakadayeg kaayo sa paglaom niini nga panahon. Samtang ako maghunahuna mahitungod sa milagro bahin ni Kristo ug sa daghang mga gasa sa Dios, ako mibati og paglaom alang sa tanang butang ug sa tanang tawo. Dili kinahanglan ang matang sa paglaom nga ang tanang butang mahimong hingpit, apan ang tanang butang mamaayo ra, ug sa kataposan ang pagkamaayo mopatigbabaw. Sa tibuok natong kinabuhi. Dili ko motuo nga ulahi na kaayo alang sa mga milagro, alang sa kausaban, alang sa kalinaw. Ako sinsero gayod nga motuo niana sa kahiladman ug sa kinatibuk-an gayod. Moangkon ko nga kini ingon og mas sayon ang pagbati niini nga paglaom alang sa uban, mas lisod ang paggamit niini ngadto sa akong kaugalingon. Apan ako nagkat-on. ‘Motuo sa tanang butang, molaom sa tanang butang, molahutay sa tanang butang.’ Yano. Kaanyag.”

Sa paghisgot sa iyang anak nga lalaki, siya mipadayon, “Si James atol sa Bisperas sa Pasko nagtukar alang kanako sa [usa ka awit sa Pasko ug ako] ganahan sa mga pulong niini nga awit:

Siya natawo aron sa pagluwas. Aron sa pagluwas kanimo ug kanako. Gasa nga walay ikatandi nga Siya lang makahatag. Dili igsapayan sa atong kasamtangang mga kahimtang, hinaot kita mas hingpit nga mobati sa Iyang mga gasa sa atong mga kinabuhi niining panahon sa Pasko.

Sa ngalan ni Jesukristo, amen.