Si Kristo, Ang Atong Manluluwas, Natawo

Minahal nga kaigsoonan, maayong Pasko!

Malipayon kita nga nagkapundok uban sa atong minahal nga Unang Kapangulohan niining debosyonal sa Pasko. Bisan asa man kamo niining panahon sa Pasko, hinaot nga mabati ninyo ang gugma sa Dios samtang magsaulog kita kang Jesukristo isip ang sentro sa Pasko.

Ang Pasko usa ka panahon sa musika, sa mga humot ug mga lamian, kahinam ug pagkamanggihatagon. Usa ka panahon sa pagpundok, bisan asa kita nagpuyo sa duol o sa layo.

Kasagaran ang Pasko mahimong Pasko kon magdala kita og hingpit nga kalipay sa Pasko ngadto sa uban sa hilom nga paagi. Daghang mga pamilya mopuli kang Santa. Daghang mga indibidwal mopadan-ag sa kalibotan pinaagi sa kahayag ni Jesukristo.

Ang paghinumdom sa miaging Pasko makamugna og bag-ong handomanan sa Pasko. Kon buhaton sa makadaghan, ang mga handomanan sa Pasko mahimong mga tradisyon, nga makapalawom sa atong gugma kang Jesukristo—ang Kordero sa Dios, ang Anak sa Mahangtorong Amahan, ang Manluluwas sa kalibotan.¹

Kon kamo adunay paborito nga mga handomanan sa Pasko, hinaot nga inyo kining tagamtamon sa kamaya niini nga panahon. Kon nagmugna pa kamo sa inyong mga tradisyon sa Pasko, hinaot nga mopalawom kini sa inyong gugma ni Jesukristo ug mopanalangin kaninyo matag tuig.

Mahimo bang mopakigbahin ko og tulo ka paborito nga mga tradisyon sa Pasko sa pamilya Gong?

Una, matag tuig, si Sister Gong ug ako malipay kaayong makakita na usab sa mga dekorasyon sa Pasko nga magsugilanon sa istorya sa among pamilya.

Isip batan-ong minyo nga magtiayon, si Sister Gong ug ako nag-eskuwela sa graduate school sa England. Nagpuyo mi sa gamay nga apartment gamit ang gamay nga budget isip estudyante. Among iphon ang among mga sentimo sa dili pa mopalit og gamay kaayo nga Christmas tree nga bisan gani si Charlie Brown tingali maluoy nga magtan-aw.

Kanunay nga mamugnaon, si Sister Gong migamit og mga kimpit sa sinina aron himoong gagmayng British nga sundalo nga pangdekorasyon alang sa among Christmas tree. Gibutangan niya ang matag usa og itom nga gapason nga kalo ug mapahiyomon nga nawong.

Sulod sa 43 ka tuig, kining hinimo sa kimpit sa sinina nga British nga mga sundalo mabinantayong nagbarog sa among Christmas tree. Nagpahinumdom kini kanamo sa among unang Pasko nga minyo—layo sa panimalay—ug sa matag Pasko nga misunod.

Ang pamilya sa among anak nga lalaki mihimo niining kimpit sa sinina nga mga “tawo-tawo.” Naghulagway kini sa mga misyonaryo sa tibuok kalibotan. Nakita ba ninyo ang ilang mga pahiyom? Internasyonal nga sinina? Mga tsapa sa ngalan? Gisultihan ko nga ang usa niana parehas nako og nawong.

Ang among mga dekorasyon sa Pasko makapabag-o sa maanindot nga handomanan sa mga higala ug mga kasinatian sa daghang lugar. Ang malipayon, nagkalainlaing parada sa mga handomanan sa Pasko matag tuig makapahiyom kanato.

Si propeta Alma nagpamatuod nga ang pagtuyok sa kalibotan sa regular nga porma nagpasabot nga adunay Dios. Ang Pasko nagtimaan sa pamilyar nga punto sa ika 365¼ ka adlaw nga tinuig nga pagtuyok sa kalibotan libot sa adlaw. Samtang kining tinuig nga pagtuyok mopabalik kanato ngadto sa gibahandi nga panahon sa Pasko matag tuig, naghunahuna ko sa gisulat sa tagsulat nga si E. B. White mahitungod sa “The Ring of Time [Ang Tuyok sa Panahon].”²

Misugyot siya nga pinaagi lamang sa kasinatian kita makasabot nga ang “panahon sa tinuod wala gayod magtuyok sa sirkulo.” Ang tuyok sa panahon maingon ta nga “hingpit ang pagkaporma, dili mausab, matag-an, walay sinugdanan o kataposan.” Apan niadto lamang dihang bata pa kita nga naghunahuna kita nga makahimo og kompleto nga kalihokan nga dili pa kaayo matigulang kay sa atong pagsugod.

Para nako, kon moabot na usab ang Pasko ug mao ra gihapon ko, ug sa ubang paagi medyo lahi na kay sa una, maingon ta nga nagtimailhan kini nga ang panahon (ug dapit) parehong deretso ug nagliyok sa samang higayon. Sa unsang paagi ang “higpit ug pig-ot nga dalan”³ ug “walay kataposang nagsunod-sunod nga buhat”⁴ parehong naghulagway sa reyalidad sa pakigsaad nga nakasentro sa batang Kristo nga natawo didto sa Bethlehem.

Niining paagiha, para nako, ang kabahin sa magic sa Pasko mao ang pagpakabata ug pagpakahamtong sa samang higayon. Atong ikahimuot karon isip usa ka hamtong ang makapahimuot kanato sa dihang bata pa kita. Ug mahimuot kita uban sa usa ka bata samtang dungan natong himoon ug balikon ang mga handomanan ug mga tradisyon.

Ang ikaduhang tradisyon sa Pasko sa pamilya Gong mao ang pag-display sa mga belen sa among pamilya, o mga representasyon sa pagkatawo—mga paghulagway sa pagkatawo sa balaang bata nga si Kristo.

Dili ba kamo ganahan nga ang mga representasyon sa pagkatawo [nativity] nakatutok kang Jesukristo, nagdapit kanato sa pagbuhat sa ingon? Sama sa gisulti sa bag-ohay pang nauli nga misyonaryo, “Sa wala pa ang akong misyon, si Jesukristo kabahin na sa akong kinabuhi. Karon Siya ang akong kinabuhi.”

Ang mga belen sa among pamilya makita sa tanang mahunahuna nga gidak-on ug kahimtang, gamit ang tanang mahunahuna nga mga materyal, gikan sa tanang mahunahuna nga lugar. Ang matag belen nagsaksi kang Jesukristo ug sa Iyang pagpanalangin sa tanang nasod, kaliwatan, pinulongan, ug katawhan.

Nalipay kaayo kita nga ang mga anak sa Dios bisan asa naghulagway sa batang Jesus, ni Maria, ni Jose, sa Maalamong mga Tawo, mga tigbalantay sa karnero, ug mga hayop nga anaa sa mga senaryo, mga kaamgid, ug mga detalye nga pamilyar, nga daling masabtan. Kini nga mga belen mopahinumdom usab kanato nga ang Dios naghigugma sa tanan Niyang mga anak; makita nato ang gugma sa Dios diha sa mga mahinungdanong bahin sa atong mga belen ug mga representasyon sa pagkatawo bisan asa kini gikan.

Ang ikatulo nga tradisyon sa pamilya Gong, agig dugang sa dungan nga pagbasa sa mga asoy diha sa kasulatan mahitungod sa pagkatawo sa atong Manluluwas, mao ang lanog nga pagbasa sa A Christmas Carol [Daygon sa Pasko] ni Charles Dickens isip usa ka pamilya.

Kon magsul-ob ko og panwelo [scarf] ug habog nga itom nga kalo, makahunahuna ba mo nako, sa makadiyot, nga mao si Ebeneezer Scrooge sa A Christmas Carol?

Pipila ka tuig, ang among pamilya mibasa sa A Christmas Carol [Daygon sa Pasko] gikan sa sinugdanan ngadto sa kataposan. Nagkutaw mi sa among init nga tsokolate gamit ang mga sungkod nga karmelitos ug nangatawa sa dihang gihisgotan ang “Norfolk biffins” ug “smoking bishop.” Nangurog mi samtang ang kalag ni Jacob Marley mipakagulkol sa iyang mga kadena. Nalipay mi samtang ang diwa sa Miagi, Karon, ug sa Umaabot nga Pasko mitabang kang Ebeneezer Scrooge nga mahimong bag-o nga tawo.

Pipila ka tuig, ang among pamilya mibasa sa minubo nga bersiyon sa A Christmas Carol [Daygon sa Pasko], nga gipamubo sa among umagad nga babaye ug anak nga lalaki aron mapahaom sa mas mubo nga atensiyon sa mas batan-ong mga sakop sa pamilya.

Ug pipila ka tuig, uban sa mga pahiyom ug kasadya, ang among pamilya mibasa sa sticker sa bumper nga A Christmas Carol. Naglangkob lang kini sa duha ka linya nga: “Bah, humbug [Ah, pagpakaaron-ingon]” ug “Ang Dios mopanalangin kanatong tanan.”

Gisugdan ni Charles Dickens sa pagsulat ang A Christmas Carol pagka Oktubre ug gitapos sa sayong bahin sa Disyembre 1843—sa gidugayon nga unom ra ka semana. Ang unang hut-ong sa 6,000 ka kopya gimantala didto sa London niadong Disyembre 19, 1843. Nahalin kini sa Bisperas sa Pasko.

Kadtong mga nagdokumento sa background sa A Christmas Carol mipasabot nga si Charles Dickens nagsulat sa panahon nga ang Victorian England nagrekonsiderar sa kahulogan sa Pasko. Unsa ang mahimo o angay nga mahimong tahas sa panahon sa Pasko, sa mga Christmas tree, mga pagtimbaya sa Pasko, mga panagpundok sa pamilya panahon sa Pasko, mga Christmas card, gani sa mga daygon sa Pasko diha sa katilingban?

Sa panahon nga daghan ang mibati nga wala mahimutang, napalayo, ug magul-anon, ang kang Dickens nga A Christmas Carol mitubag sa lawom nga pangandoy sa pagpakighigala, gugma, ug pagpalig-on sa Kristohanong mga hiyas, sama nga si Ebeneezer Scrooge nakakaplag og kalinaw ug pagkaayo sa iyang nangagi, karon, ug sa umaabot.

Kaniadto sama sa karon, ang tinuod nga kahulogan sa Pasko nagtabang kanato nga mas mopaduol ngadto kang Jesukristo, nga natawo isip usa ka bata didto sa pasongan. Si Jesukristo nasayod sumala sa unod kon unsaon pagtabang kanato uban sa kasingkasing nga puno sa kaluoy. Kaniadto sama sa karon, ang Pasko nagsaulog sa pagkahimong kabahin sa pakigsaad, pagpakig-ambit, ug komunidad diha ni Jesukristo ug sa usag usa.

Karon mangutana ko og lahi nga pangutana mahitungod sa A Christmas Carol. Ngano man, kon maghunahuna kita ni Scrooge, ang unang mosantop sa atong hunahuna mao man ang batig batasan nga dalo nga tigulang, tawo nga nagbugalbugal sa Pasko isip usa ka dako, nga, pagpakaaron-ingnon?

Nganong dili man nato mas ilailahon ang bag-ong Scrooge? Ang bag-ong Scrooge, kinsa sa manggihatagong paagi nagpadala sa regarlo nga pabo isip surprisa sa Pasko? Ang bag-ong Scrooge, kinsa nakig-uli sa iyang madasigon nga pag-umangkon, si Freddie? Ang bag-ong Scrooge, kinsa mipataas sa sweldo ni Bob Cratchit ug miatiman ni Tiny Tim?

Pasagdi nga magbugalbugal ang mga madudahon. Ang bag-ong Scrooge “mihimo niining tanan, ug daghan pa kaayo.” Nahimo siyang ingon ka maayo nga tawo ug ingon ka maayong higala sama sa nailhan sa maayong karaan nga kalibotan.

Nan nganong dili man nato hinumdoman kana nga Mr. Scrooge? Aduna bay mga tawo sa atong palibot, tingali kita mismo, kinsa mahimong lahi nga tawo kon unta lamang mohunong kita sa pagtan-aw o paghusga kanila sa ilang kanhi nga pagkatawo?

Walay tawo ug walay pamilya nga perpekto. Matag usa kanato adunay mga kahuyang ug mga kasaypanan—mga butang nga gipangandoy nato nga mahimong mas maayo. Niini nga Pasko, tingali makadawat kita—ug motanyag—sa bililhong mga gasa ni Jesukristo sa kausaban ug paghinulsol, sa pagpasaylo ug paghikalimot, sa pagahatag niana nga mga gasa ngadto sa uban ug sa atong kaugalingon.

Makig-areglo kita sa sayop nga nahitabo sa miaging tuig. Kalimti ang emosyonal nga mga kabalaka ug kahasol, ang mga panagbingkil ug mga kalagot nga nakapasamok sa atong kinabuhi. Hinaot nga atong hatagan ang usag usa sa atong bag-o nga mga posibilidad imbes maghunahuna kanunay sa atong nangagi nga mga limitasyon. Atong hatagan ang bag-ong Scrooge nga anaa sa matag usa kanato sa kahigaynan nga mausab.

Ang atong Manluluwas miabot panahon sa Pasko aron sa paghatag og kagawasan sa bihag—ug dili lamang niadtong anaa sa bilanggoan. Makapalingkawas Siya kanato gikan sa mga kalag sa atong mga kagahapon, mobadbad sa mga kadena ug mga pagmahay sa atong sala ug sa mga sala sa uban. Makatubos Siya kanato gikan sa atong nakasentro sa kaugalingon, hakog nga pagkatawo pinaagi sa pagpakatawo pag-usab diha Kaniya.

“Kay alang kaninyo natawo karon … ang Manluluwas, nga mao ang Kristo nga Ginoo.”⁵

Busa malipayong Pasko!

Hinaot nga ang inyong mga tradisyon ug mga handomanan sa Pasko mahimong malipayon ug masanagon.

Hinaot nga magmaya kita diha ni Jesukristo, sa panahon sa Pasko ug sa kada adlaw.

Malipayon akong mopamatuod Kaniya sa Iyang sagrado ug balaan nga ngalan, si Jesukristo, amen.