“Dali, Simbahon Ta Siya”

Minahal nakong kaigsoonan, dakong kamaya nga magsugod og lain nga panahon sa Pasko diin atong saulogon ang pagkatawo sa atong Manluluwas ug Manunubos, ang Ginoong Jesukristo.

Usa ka sagrado nga panghitabo matag higayon nga ang usa ka bata matawo. Tan-awa ang reaksiyon sa usa sa akong mga apo sa tuhod nga lalaki samtang siya nagkupot sa iyang masuso nga igsoong lalaki sa unang higayon.

[video]

Dili ikatingala nga sa labing balaan nga gabii sobra sa 2,000 ka tuig na ang milabay duol sa gamayng lungsod sa Betlehem, ang langitnong mga pundok mikanta sa kamaya! Usa ka anghel ang nagtudlo sa mga magbalantay sa karnero niining halangdon nga kamatuoran:

“Ania ako nagdalag maayong balita alang kaninyo nga makalipay kaayo sa tanang katawhan.

“Kay alang karong gabhiona, natawo sa lungsod ni David ang inyong Manluluwas, ang Kristo nga Ginoo.”¹

Ug karon akong minahal nga kaigsoonan, “Dali, simbahon ta Siya.”²

Sama sa daghan kaninyo, ang Pasko nausab alang nako sa paglabay sa mga tuig. Ang akong panumdoman sa pagkabata gikulit atol sa Dakong Pagkahagsa sa Ekonomiya [Great Depression] sa mga 1930. Ang kwarta nagnihit. Ang mga gasa labihan ka bililhon.

Ang akong mga ginikanan mihimo sa Pasko nga talagsaon alang nako ug sa akong mga igsoon. Matag tuig kami nahimong “puli-ni-Santa” nga pamilya alang sa lain nga pamilya. Mag-andam kami og tukma nga mga gasa ug ihatod kini sa Bisperas sa Pasko. Samtang nagbiyahe kami palayo sa ilang panimalay, ang ilang nagkaway-kaway nga mga kamot ug may luha nga mga panagway ang naghatag namo sa tinuod nga kamaya sa paghatag.

Ganahan ko sa musika sa Pasko kaniadto—ug hangtod karon. Matag tuig, si Sister Nelson ug ako ganahan nga maminaw ug mokanta dungan sa kang Handel nga Messiah [Mesiyas]. Ganahan ko sa Hebreohanon nga kahulogan sa pulong nga hallelujah. Kini literal nga nangahulogan og “daygon ang Ginoong Dios nga Jehova.”³ Ang mga pulong nga gikanta niini nga oratorio dili lang magamit sa pagkatawo sa Ginoo apan ngadto sa Iyang milenyal nga paghari:

Atol kadto sa mga tuig sa akong pagka-batan-ong hamtong nga ako nagsugod sa pagbaton og usa ka lawom nga pagpamatuod sa Dios nga Amahan ug sa Iyang Pinalanggang Anak, si Jesukristo. Akong nahibaloan sa akong kaugalingon nga si Jesukristo natawo sa birheng Maria, kinsa usa ka “bililhon ug pinili nga tawo.”⁵ Nakahibalo ko nga Siya gayod mao ang Anak sa Dios⁶ ug ang labing mahinungdanon nga imahe sa tanan nga kasaysayan sa katawhan.

Hunahunaa lang ang mahitungod sa dili masukod nga gidak-on sa nabuhat ni Jesukristo—tanan sumala sa kabubut-on sa Iyang Amahan! Si Jesus usa na ka Dios sa dihang Siya mipaubos sa Iyang kaugalingon aron moanhi sa kalibotan sa pagkompleto sa labing lisod nga kahimoan alang sa matag usa kanato. Usa ka kahimoan nga sa literal nga paagi makaluwas sa kinabuhi ug makapausab sa kinabuhi. Usa ka kahimoan nga walay bisan usa kanato ang makabuhat alang sa atong kaugalingon.

Ang Manluluwas “ [nag]-antos sa mga sakit ug mga kasakit ug mga pagtental sa matag matang”⁷ nga Siya mahimo nga masayod “sumala sa unod unsaon pagtabang [kanato] sumala sa [atong] mga kahuyang.”⁸

Atol sa miaging pipila ka bulan, ako nakat-on og dugang pa mahitungod sa kasakit ug ang makapalunsay nga impluwensiya niini. Ako adunay halawon nga pagbati ngadto sa atong Manluluwas samtang akong gisulayan sa paghunahuna ang giabotan sa Iyang pag-antos. Ang akong mortal nga panghunahuna dili makasabot kon giunsa Niya pagdala diha sa Iyang Kaugalingon ang tanan nga sakit, tanan nga sala, tanan nga kagul-anan, ug tanan nga kasakit sa tanang tawo nga nabuhi sukad kaniadto pa!

Sa labing halangdon nga buhat sa kaluoy nga molabaw sa mortal nga panabot ug paghulagway, ang Manluluwas mitugyan sa Iyang Kaugalingon ngadto sa dili hitupngan nga espirituhanon ug pisikal nga pag-antos.

Balaan ang atong pagtahod sa Bata sa Betlehem sa tukma gayod kay Siya sa wala madugay mihalad sa dili matugkad, walay kataposan nga sakripisyo diha sa Tanaman sa Getsemane ug diha sa krus sa Kalbaryo. Kini nga halad motubos sa matag usa kanato samtang kita mopili nga maghinulsol ug mosunod Kaniya. Dayon, isip Iyang kataposang buhat sa kalibotan, Siya mibangon gikan sa lubnganan pagka ikatulo nga adlaw, naghatag sa matag usa kanato sa wala pa mailhi sukad nga panalangin sa pagkabanhaw ug kinabuhi human sa kamatayon.

Niini nga panahon, kanunay kita nga malipayong mokanta o moingon, “Kami nanghinaot kanimo og malipayon nga Pasko.” Minahal nako nga kaigsoonan, ang panghinaot sa akong kasingkasing alang sa matag usa kaninyo karong gabhiona adunay pipila ka sangkap. Sa pagkatinuod, dili kini akong panghinaot alang kaninyo; kini mao ang akong pag-ampo alang kaninyo niining balaan nga panahon sa Pasko.

Una, ako mag-ampo nga inyong bation ang lawom, mahangtorong gugma sa atong Manluluwas alang kaninyo sa personal nga paagi. Si Jesukristo nakaila kaninyo sukad pa sa kinabuhi nga wala pa dinhi sa kalibotan. Siya nakaila ug nakakita kaninyo karon. Siya nakakita sa inyong mga kamaya ug inyong mga kasubo. Siya nakasinati sa matag usa niini.

Siya adunay hingpit nga kaluoy alang sa inyong mga pakigbisog ug magmaya sa matag higayon nga kamo magpadayon sa unahan diha sa katarong, atol sa mga maayo ug dili maayo nga mga higayon.

Ako mag-ampo nga kamo makabaton sa inyong kaugalingong personal nga pagsaksi nga si Jesukristo mao ang Anak sa Dios, nga Siya napuno sa diosnong gahom ug nga tungod sa Iyang mahimayaong maulaon nga sakripisyo, dili na ninyo kinahanglan nga mobati nga kamo kinahanglan nga moatubang sa mga kalisod sa kinabuhi nga mag-inusara. Samtang kamo tinud-anay nga mangayo, mangita, ug manuktok,⁹ kamo adunay makanunayon nga akses sa Iyang gahom sa pagtabang ninyo, sa paglig-on ninyo, ug sa pag-ayo ninyo.¹⁰

Ako mag-ampo nga kamo mopahimulos og maayo sa Pag-ula sa Manluluwas pinaagi sa paghinulsol matag adlaw, paghimo sa inyong kinabuhi nga magpadayong putli, ug mangita sa langitnong giya sa tanan ninyong buhaton. Sa laing pagkasulti, ako mag-ampo nga kamo makasinati sa kamaya sa kanunay nga paghunahuna og celestial.

Ako usab mag-ampo nga gamiton ninyo kini nga panahon sa holiday aron magsugod og panahon sa mas malukpanon nga personal nga pagsimba. Pagsugod og usab sa pagtuon sa mga pagtulun-an ug sa Pag-ula ni Jesukristo. Walay bisan kinsa dinhi sa kalibotan nga nahigugma ninyo sama sa Iyang gihimo. Walay bisan usa dinhi nga mas nakasabot ninyo o nga nakahibalo gayod sa inyong mga kasubo ug mga kahuyang. Walay bisan usa sa kalibotan nga adunay gahom sama sa naa ni Jesukristo. Walay bisan usa dinhi nga mas mahinamon nga ikaw mahimong tanan nga ikaw angayan nga mahimo. Walay bisan usa nga nangamuyo sa Amahan alang kanimo sama sa Iyang gibuhat.

Ang Ginoong si Jesukristo mao ang atong Manluluwas ug atong Manunubos. Siya mao ang Anak sa Dios, ang Usa nga Balaan sa Israel. Siya mao ang Usa nga Dinihogan.¹¹ Ubos sa direksiyon sa Amahan, Siya mao ang Tiglalang sa tanan nga nalalang na.¹² Si Jesukristo mao ang Gamhanan nga Jehova, ang Dios sa Daang Tugon.¹³ Siya mao ang gisaad nga Emmanuel.¹⁴ Siya mao ang atong dako nga Panig-ingnan¹⁵ ug ang atong Manlalaban ngadto sa Amahan.¹⁶ Tungod sa Iyang napahiuli nga ebanghelyo, ang tanang panalangin sa Iyang pagkapari anaa na sa tanang katawhan samtang sila moduol Kaniya ug mahingpit diha Kaniya.

Mga kaigsoonan, magpuyo kita diha sa espiritu sa “hallelujah,” kanunay nga magdayeg sa Ginoong Dios nga Jehova. Niining mahimayaon nga panahon sa Pasko, dali, simbahon ta Siya, si Kristo ang Ginoo!

Nasayod ko nga ang Dios buhi! Si Jesus mao ang Kristo! Kini ang Iyang Simbahan. Iyang gigiyahan ang nagpadayon nga Pagpahiuli sa Iyang ebanghelyo. Niini ako mopamatuod sa sagradong ngalan ni Jesukristo, amen.