Atsi’ Yił Aha’deet’ánígíí

Díí tł’éé’ diyin k’ehjí bidzilgo bee nidanihi’di’neeztą́ą́’. Biká sodisziníí éí díí sáanii naat’áanii danilínígíí yee hadahisdzíí’ígíí nihijéí biyi’ ííti’ dooleeł, shí shijéí biyi’ íít’i’gi’ át’ao.

K’ad íinda kót’éego at’ééké yázhí bił áłah dasiidlį́į́’. Sáanii t’áá’át’é diyin yił aha’deest’ą́ą́nígíí tseebíí dóó náásgó béédááhai’ígíí, díí tł’́éé nihił álah díileeł dabi’doo’niid. T’óó’ aho’nii’yóí Diyin Íi’sizį́įnii nihił hólǫ́ dooleełgo bíká sodasidiilzin. Nihik’ijosdlíí’ díí sáanii nihich’į yádááłtí’ígíí dóó sin nizhónígo dasidiits’ą́ą́’. Shí biká sodisdzin’ígíí éí Diyin Ii’sizíinii t’áá nihił hólǫ́ǫdo, saad bee ha’óníinii dóó she’oodlą́’, saad t’áá’íídą́ą́’ bee hada’isdzíí’ígíí łá bíish’aah—dóó bee nihił dahóóne’ígíí éí t’áá’anii Bóhólníihii deididoots’į́į́ł́go nihá yinízin .

Díí tł’éé’ éí e’etiin baa hadeesdzih—dííshjį́įdi nizhónígo baa ch’ídahast’ánigíí—ts’ída bikáá’ yiikago Azhé’é Yá’ąąshdi Hólónii bich’į náikahdo. E’etiin éí Diyin God baa hastí’go bił áłhada’diit’ą́go át’e. Aha’diit’ah ílínígíí ádeelyaago bist’ą́ą́dóó nihił hózhǫ́ǫdo dóó náánáła’ ałdó’ deidísin’ígíí bee bíká anéiijahgo baa hadesdzih.

Dikwííshį́į́ nółté, áníih tó bee dahnihi’doolzį́į́’ dóó nitsiitah bikáagi dah a’déesnii’go Diyin Ii’sizíinii nihaa daheesyá. Éí ániih áhoodzaago béédaołnii. Ła’ éí ałk’idą́ą́’ tó bee da’bi’diilzį́į́’, áko bi’deesnáá’ę̨́́ę dóó bee ałha’deet’ą́ ádayiilaa yę́ę doo hazhó’ó yéédaalníih da, ndi bááh dóó tó bik’í sonáhodilzįįhgo deésíníilts’ą́ągo nihiyi’ deesnáá’ę́ę ła’ béé deilnii łeh.

Nidiniilt’éego, éí baa hasti’go tó bee nihi’doolzį̨́į́’ ę́ędą́ą́ dóó Diyin Ii’sizíinii nihaiyílyáhę́ę doo aheeł t’éígo béédeelnih da. Ndi Diyin God yee lą́’ asłį́į’go yee nihideesnáá’. Dóó diné baanádi’diit’áałgo niidzingo nihideesnáá’ dóó nihídó’ nihaándi’doot’ááł daniidzin dóó t’áá’íyisíí ak’eh ádahwiil’į́į́do daniidzin.

Haanízah góyaa nijéí biyi’ íít’i’ éí hait’áo diné ayóó’ádano’nínígíí, hasht’é ádaniilaago bee bééhozin. Baa laanaa nisíníí éí ánii tó bee danihi’diilzih dóó Diyin God bił haz’ą́ądį’ atah dasoolį́į’, nihimá bíighagii dah síndao nihk’ihojosdlíí’ . Ákó t’éédą́ą́ t’áá k’ad ’oodlo bił ahéhee’ bidiní. Shí éí Philadelphia, Pennsylvaniadi tó bee shi’diilzį́į́’ yę́ędą́ą́’ baa shił hozhǫ́ dóó baa ahénisingo bénáshnii. Áád́ę́ę́’ hooghangóó nihił ná’oolwółgo shimá bine’dę́ę́’ dahsídao ałdó bénáshniih.

Shimá éíyá ałha’deet’ahígíí yiká hast’e’ áshiilaa dóó t’áá’ ałtso a’dididoot’ááł’íí ałdó’ yee nashineestą́ą́’. Bóhólníihii yoodlą́ągo ba’deet’ánígíí áyiilaa:

“Dóó naaná, azhe’é dóó amá Ziongi ba’áłchíní holǫ́ǫgo, éí doodaó sodizin Bahoghan naazniljí Bił hoo dzohjí biyi éí Diyin bisodizin báhooghan hasht’é’ ádalyaa, bá’áłchíni tseebíí bináághaigo díí dashijaa’ígíí, Iina’ Łahgo Ánálnéeh dóó Diyin God hiináago Biye’ Jesus Christ Woodlánigíí dóó To’ Bee Ałzį́́į́h, dóó atsiit’ááh dah’adéesniigo Níłch’i Diyinii Ii’sizíinii Aa Yílyéii, doo yee neeneestą́ą́’gó éí bááhági át’éii, amá dóó azhe’é t’áá’ áłah bik’ijį si’ą́ą dooleeł.

“Ákoh díí Zíongi kéédahat’ínii bá beehaz’áanii át’é, éí doodao sodizin Bahoghan naazniljí Bił hoo dzohjí biyi éí Diyin bisodizin bá hooghan hasht’e’ adaalyaa.

“Dóó ba’áłchíni tó bee bidi’dolzį́į́ł binajį bą́ą́hági át’éii baanááhidii’t’áhdo, tseebíí bi náághaigo, dóó [Níłch’i Diyin Iisizíinii] baa doolyééł.”¹

Shimá baa dee t’ánígíí áyiilaa. Ba’ áłchíní, Alma gi’át’áo saad yee hasht’e áyiilaa, Naaltsoos Mormon Wolyéhígíí biyidi kótáo ak’e’eshchį́:

Áádóó kwíídííniid: Jó, kǫ́ǫ́ Mormongi tó naazyį́ (ákót’áo dawójí) dóó k’ad, Diyin God bisodizin bá hooghan bedidiikah danohsinígíí dóó bidine’é nihidi’níi dooígíí, dóó t’áá nihí íiniidzingo nihich’į’ ndahwee’nánígíí bee ahíłká ańdeiijah dooleeł, áko bee ádaniilzóli doo;

“Aoo’, dóó yinííł danilíinii bił yínííł danohsingo bíká adoohjah; aoo’, dóó doo bił dahatsi’íidii bee bił hats’ííd bee bíká oohjeeh, dóó t’áá áłahjį’ dóó t’áá ałtsoní bii’, dóo t’áá ałtsogóó naháago bii’, Diyin God bá ndasoozį́, azhą́ ádin dasoolį́į’’jį’ ndi, áko Diyin God nihá niná’nídláa dooleeł, dóó ts’ídá áłtsé náa’diijeehdi da’nohtah dooleełm áko hool’áágóó Diyin bił hinohnáa dooleeł---

“K’ad ánihidishní, díí t’áá íiysíí danohsingo, ha’át’íísh éí biniiyé doo Bóhólníihii bizhi’ binahjį’ tó bee danihi’diilzį́įh da, bidááhdóó bił ahada’dinooht’ánígíí bee bééhózin doo, bá ndaahłnish dóó bibeehaz’áanii bik’eh dahonoł’įį dooleeł, áko biíSizíinii hózhǫ́ yee nihik’ijidoodliił?

“Dóó k’ad dine díí deideezts’ą́ąa’go, bił dahózhǫ́ǫgo bíla’ ahídaazkad, dóó hadadoolghaaz: Díí t’áá íiyisíí nihijéí biya’dóó daniidzin.”²

Doo shį́į́ nihíla’ bee ahídasookad da, áłtsé hágo, tó bee nidi’doolzį́į́ł dóó bee ałha’deet’ááhíí ádíílííł nihi’ dooniid yę́ędą́ą́’, ndi Yisda’iiníiłii ayóó’áanhó’níigo ts’ídá baa ákohdanoozį́į́’ dóó Diyin God Yá’ąąshdi Hólóonii bi diné hazhó’ó bá baa’ áháshyą́ą dooleełgo ádee’ahadasodzíí. Shí “ts’ídá” ádishnǫ́ǫ, Nihizhé’é Diyin God Bi’tsi’ danoolį́ bininaa nihijéí nízaagóyaa yidiyeesnáá’. Éí B́íts’ą́ądę́ę́’ diyiníí nihéiinilá.

T’ahdoo nihi’diichííhę́ędą́ą́’ t’áá Bí nanihineeztą́ą́’. Bí níká’eelwodgo bik’ídasidootą́ą́ dóó bee lą́ dasoołį́įgo éí kad nihich’į anáhazt’ido dóó nanihidínootah, dóó ła’ nihá ch’í’hást’i’ ts’ídá ni t’éiyá ná bitaheesdláá’. NihiZhé’é Diyin God éí iłhózhǫ́ǫ yee nihá nahaz’ą́, éí binahjį’, ándahazti’ígíí bii’ ch’íhidookahgo bídahooł’ą́ą́ dóó nánáła’ biká adíilwołgo biyi’dę́ę́’ ch’ídadíít’ish. Díí Diyin God binahat’a’ígíi éí bee bił ahadasidiit’ą́.

Ałha’diit’aa’ ádadiilniłdo dóó bik’e ádahwil’į́įdo éí t’áá nihí nihił bóhólį́į́. Bitsi’ké éí t’áá dikwíiyee’ dahiináago bá ch’íhast’igo ałha’diit’aa’ígíí yaa ’íhidooł’ááł. Ni éí azhą́ sínlį́į́’. Háshinee’ sáani dóó at’ééké, nihí t’áánołá’í dasoozį́įgo Bitsi’ yił’aha’deest’ánígíí nilį́.

Azhé’é Yá’ąąshdi Holóónii t’ahdo bits’ą́ą́dóó dahdináago dóó t’áhdo nidichííhę́ędą́ą́’ éí díí nahasdzáán bikáagi hinínáago ádadidíílííł’ígíí yee naninéeztą́ą́’. Nighaangó nát’ą́ą́’ Bich’į ńdíídáałgo éí ayóo nánantł’ah dooleełgo bee nanihi’di’neeztą́ą́. T’áásáhi nát’ą́ą́’ náádáałgo éí doo nihá bíighada. Bí biłbééhózin, t’ásáhigo éí doo ná bíighada, áko níká’a’oowodgo téiyá.

Bee nihik’ihojísdlį́į’ éí ahiłha’diit’aahíí ádíílíiłgo díí iiná biyi’ niłbeehóozį́įd dóó níká adoojahígíí ninaagó da hólǫ́ǫdo---éí nigi’át’áo Nizhé’é Yá’ąąshdi Hólóonii yił ahadadeest’ánígíí danilį́.

T’áá’anółtso nihik’ijosdlíí’ díí tł’éé’ sáanii Diyin God bitsi’ bił atah danohłín, éí aldo yił aha’da’deest’ą́ áko nihíká’adooja dóó ndanhi’eeshdo, jó kót’áo yee lą́ da’asłį́į́. Shí éí ni yiniłtsánę́ę yiiłtsą́, jó atsi’ yił aha’deests’ą́nígíí binahjį ha’óní dóó áká’andaajah’--- dóó bił da hózhǫ́ǫ adeił’į́.

Sister Ruby Haight éí bił hózhǫ́ǫ go bénáshnii. Éí Eldir David B. Haight, be’esdzą́ą́ nilį́į nt’ę́ę́’, bí éí Hastóí Náakits’áadah Dahnahéiztą́ąjí atah nilį́ nt’ę́ę́’. T’ah anii naagháago éí sodizin Báhoghan naaznilji Bił hoo dzohjí Palo Alto, Californiadi naat’áanii aląąjį dahsidáh nilí nt’ę́ę́’. At’ééké Mia Maid danilínee, yił yaa’anájahígíí, yaabini’go yá sondi’lįį nt’ę́ę́’.

Áko Naat’áanii Haight diyin k’ehjí bił iishja ályaa, jó Ruby Haight éí at’ééké neinitin dooleeł, áko díí bi bishib yił ch’íidiní’ą́. Bił bééhózin, Ruby éí Diyin God yá’oo’íinii nilį́įdo dóó at’ééké báhózhǫ́ dóó yaajooba’do dóó ayóoi’íí’níido.

Sister Haight éí azhą́ at’ééké ta’diin biláágó binááhai ndi neeneeztą́’. Shich’ooné dízdiin nááhai yę́ędą́ą́’ neinéeztą́ą, áko yił náá’ahiiłséeigo, bił hózhǫ́ǫgo, bíla’ yee Kathy yich’į’ dah diilnih dóó íłniih łeh nt’ę́ę́, “Oh! Shí Mia Maid.” Doo bił hózhǫ́nígíí t’eiyá yiłtsą́ąda. T’áá bí bich’é’é nahalingo ayóó’áyó’níigo shi’ deesnáá’. K’e nizhin dóó yaa bił hózhǫ́ jó Diyin God bitsi’ yił aha’diit’ánígíí, nilį́įgo t’ahndi diyin bighanjigo é’e’tiingó náád́ááł.

Yá’ąąshdi Nihizhé’é Hólóonii Bitsi’ yił aha’deest’ą́ńgíí hool’áágo iiná yichį́’ é’e’tiin yikáá’ náádááłgo Bitsi’ bíká’ anánílwo’go yaa bił hózhǫ́ łeh. Dóó t’áá hoshch’į yá’át’ééhígíí nínízingo ałdó’ yaa bił hózhǫ́ǫ łeh. Doo t’óó k’ad ánít’éhígíí t’éiyá yoo’į́įda. Náásgó díileeł’ígíí ałdó’ yoo’į́.

Ni daats’í díí nahasdzáán bikáagi ádaantsínkees’ígíí nimá dóó nizhé’e éí niláágó naanitsíkeees. Shimá ákót’ao shaantsikees nt’ę́ę́.

Anii naasháhę́ędą́ą́’ díí doo shił beehózin da nt’ę́ę́’, Shizhé’é Yá’ąąshdi Hólǫǫnii, NiniZhé’e Yá’ąąshdi Hóloonii éí Ba’áłchíní tsídá yídanéel’ánígíí yoo’į́, nihí dóó nihízhé’é dóó nihimá yoo’ínígíí biláágó nihoo’į́. E’e’tiin bideíníil’ánígíí náásgó bikáá’ yiikahgo yaa bił hózhǫ́. Dóó Diyin God yee lą́ asłį́į’go nihideesnáá’.

Diyin God éí Bitsi’ t’áá’íyisíí diyingo yídahnééł’ą́nígíí yoo’į́, t’áá haadida naagháandi, K’ad t’áá’ánółtso nihinaanish holǫ́. Bí éí díígi’ at’ao na’nihólí, t’áá ałtso bił ahi’dini’áázh’ígíí nizhónígo Diyin God ba’áłchíní danilíigo biniinaa bich’į k’é ninzindo. Éí biniinaa t’áá Bí ánihałné, diné ayóó’ííní’ní, t’áá nihí ayóó’ádaa’ínígi’ at’ao, dóó baándi’díí’ááł. Nánáła’ baajííníba’ dóó baándí’áahdo, éí Bitsi’ danílį́įgo bininaa Bí diyingo nihá’ályaa. T’ááłá’í niitínigo éí diyin k’ehgo Ba’á’chíni ayóó’áyó’ní.

Adeezhí dóó shádí éí t’áá’íyísíí ahil k’e daniidlį́igo, éí ał’ąą ádaniit’é daniidzin’ígíí éí nahó hódoonííł. Jó, adeezhí dóó shádí ałchį yadaałt’igo, shééhósin lą́ dóó bił ałkis niishlį́ niizindo. Ła’ doo bił ałheenisht’éeda danosin ndi Diyin God Bitsi’ danołį́, éí binajį aláágo aheedanołt’éego át’é.

Akó ákót’ao danół’į́įgo, at’eek’é Sáanii Diyin K’ehjí yił ya’ahnájahgo shádi t’á hoozhch’į lą’í shee haslį́į́’ ákoh sáanii yéédahodosįįł dóó yidaneedlį́įdo dóó ayói’ádayóníido.

Éí beełt’ao bídaniil’áán’ígíí éí hooghandi dóó sodizin báhóghandi áłchíní yázhí yaa’anájahji, Primary wolyé binajį nihił beehózin. Hoghandi na’nitin, Family Home Evening wolyé’ígíí dóó Primaryjí binajį ’íhoo’aah. Ałchíni Yázhí éí diyin k’ehjí saad ts’ídá aláádi ílínígíí yee hadahazhih Yisdá’iiníiłii bits’ís náádilyá hę́ędą́ą́’ áłchíní yázhí neineestą́ą́ áádóó bik’ijį áłchíní yázhí bitsoo’ yee hadaheesdzíí’go áyiilaa yę́ędą́ą́’ gi’át’ao k’ad áłchíní yázhí hadahaziih.³

Ch’į́įdii éí at’ééké t’a ndi ániid nidaakaigo yeigo yich’ą́ą́ nilíi ndi Bóhólníihii éí at’ééké náásgó hódagóó diyin k’ehjí yoo’ish. Jó at’ééké éí bimá Family Search wolye’hígíí, azází yee hadaintáago yichi’ yóhooł’aah. Ła’ at’ééké béédahosin’ígíi’ t’áá bí ádeenízingo t’aa abííndą́ą́’ azází bá tó bee bi’di’doolzį́ł biniyé Diyin God Bighan Ntsaagó ałnánákah doo ábi’di’níinda ndi Elijah diyin k’ehji na’nitin biláágó.

T’áá’ át’éendę́ę́’ nahasdzaan bikáagi éí Diyin God Bina’nitin, áko ch’ikę́ę́h éí ła’ naat’áanii bi naanishgo bá ályaa. Bóhólníihii éí díí naanish nidzingo ch’ikę́ę́h bijéí yídiyeesnáá’go k’ad lą’í nida’nitingó adahakáá silį́į́. Diyin God Bina’nitin bi Naat’áanii danilínígíí éí ch’ikę́ę́h nida’nitingo t’áá’íyisíí bina’nitin bidzil lą́ dóó naat’áanii ayóó dajooba’ígíí danilį́.

Diyin God Bina’nitiní ninaanish íinlaa doodao doo na’nitini’ nílį́įda ndi díí bíínígha, asíníghehgo ’iiná nizhónígo ádíílííł dóó na’áłchíní bee ’iiná t’áá’íyisíí nizhónígo biyaa hahodiyíł’ááł, jó sáanii nihináał ádayiilaa biké k’ehgo ádíílííł.

Eve baantsínkees, ts’idah t’áá ałtso hiináanii yimá nilį́. Eldir Russell M. Nelson kóníigo Eve yaa haadzíí’: “Ts’ídá t’áá áníits̨oh dahii’nánigíí Eve bitah hódziil dóó ayóó’ nitsíkeesgo yee hadi’t’éigo binaji’ hool’áágo nihi k’ihjisdlíí. Jó neest’ą́ yiyiiyą́ą́’ęedą́ą́’ éí t’áá’ádoolnííłígíí áyiilaa. Adam ałdó’ hóyą́ągo neest’ą́ yiyííyą́ą́’.”⁴

T’áá at’é Eve bich’é’é bídeet’ánígíí yídáagha áko nihí niha’áłchíní ałdó bikihojidiyosdlíido, Eve ba’áłchíni bik’ihojosdlíí’gi át’ao. Hooghandi bił kééhániit’ínígíí nihá áyiilaago, kót’ao Eve ábi’diilyaa’ígíí baa hane: “Dóó Yá’ą̨ąshdi Diyin danilínígíí kódadííniid: Hastiin yił hiináado’ígíí ła’ bá ádadiilnííł, háálą́ hastiin t’áásáhí naagháago doo yá’át’ééhda, áko yił hiináado’ígíí ła’ bá ádadiilnííł.”⁵

Eve t’áá’íyisíí hait’ao Adam dóó ba’áchíní yiká’eelwod’ę́ę doo nihił bééhózinda. Ndi ts’ída nihił bééhózingíí éí ílíinii niheenílá, nidó’ aadíílééłgo át’é: ba’áchíní yíká eelwod, e’e’tiin yá’ą́ą́shgo nídoodááłgo yich’į áyiilaa azhą́ náásgóó yiidáałgo doo bíighada nahalin ndi. “Dóó Eve, be’esdą́ą́, t’áá át’é yidizts’ą́ą́ dóó baa bił hózhǫ́ kóníigo: Doo asiilzįįhgóó éí niha’áłchíní doo holǫ́ǫda do nít’ę́ę́’; dóó yá’át’éehii dóó doo yá’át’éehii éí doo nihił bééhózin da dooleeł nít’ę́ę́’; ínida yisdáná’iildééh baa hózhǫ́ dóó hooł’áágóó hózhóonii t’áá ałtso Diyin God yik’eh dahół’į́įgo éí yaa yiiléhígíí, éí tsi’ídá doo baa nihił bééhodoozįįł da nít’ę́ę́’ .”⁶

Eve nihinááł áyiilaago bééda’dohdlííł.

Hait’ao Diyin God baándikahgo éí Eve bił iishjáá ályaa. Díí bił beehózin, Jesus Christ be’iina’ yee nihá niná’nídlá áko binahjį hool’áágó niha’áłchíní bił kéédahwiit’į́į dooleełgo éí bíigha. T’áá’iyisíí bił bééhózin, nidó’ nił beehozindo, jó Nihizhé’é Yá’ąąshdi Hólóonii baahasti’go yił ałha’dest’ą́nígíí ałtso yik’éhóół’įįd, Diyin Niná’nidláanii dóó Níłch’i Diyin Ii’sizíinii éí bí dóó ba’álchíní bich’į andahóót’i’ dóó yinííł danilį́įgo yee yiká’oolwod. Tsídá Ya’óolíigo bił beehozin.

“Nijéí t’áá át’é bee Bóhólníihii baa dzíínílí t’áá ni nił bééhózinii éí t’áadoo ba’íínílíhí.

Hidínááhgóó t’áá ałtsojį’ t’áá bí t’éí baa ákonínízingo yá’át’ééhgo dahonít’i’góó niyoołaał doo.”⁷

Shił beehozin, Eve bich’į ándahost’i’ dóó yinííł hwiinidzin łeh nit’ę́ę́’ ákondi nááná shił beehózin éí Diyin God yił kénáádahót’į́į dooleełgo báhaz’ą́ągo bił beehozingo yaa bił hózhǫ́ nit’ę́ę́’. Shił beehozin, lą’í noołį́, nich’į andahost’i’dóó yinííł hwiinidzin danołį́ łeh. Nihá sodizin, Eve gi’átao, nihiłdahózhǫ́ǫdo, yá’ąąshdi nihighaan bich’į e’e’tiin bikáá nídaínókáágo.

T’áá’íyisíí shił beehozin, Diyin God Nihizé’é éí ayóó’ánóní bee niníkáá’ déez’į́į́’. T’áálá’i’ soozínígo ayóó’ánó’ní. Bitsi’ yił aha’deest’ą́nígíí nilį́. Bí ayóó’ánó’ní ákoh Bí níká’análwo’ dooleeł t’ááni bikéé’ yínáałgo dóó náánáła’ biká anéelwogo.

Shił beehozin, Yisdá’iiníiłii nihi bą̨ąhígi’ á’téí yik’é ni’nílá dóó Níłch’i Diyin Ii’sizíinii éí t’áá’aníinii nihich’i’ ííł’į́. Díí áłah siilį́į́’ígíí binahjį nihita yaa’áhoot’éh. Shí shee’ oodłą éí hasti’go bił ałha’dasidiit’ánígíí t’áá át’é nahasdzaan bikáá’ niná’nil. Diyin Yá Yá’łti’í President Thomas S. Monson éí t’áá ałtso Diyin bebee’óhólníihii dah yoleeł. Dii saad t’áá náninishłé nihita yá’áhoot’éedo dóó laanaa nił holǫ́ǫdo, Bí bitsi’ ayóo’ayónínígíí yił aha’deest’ánígíí, Jesus Christ bízhi’ Diyingo binahji ádíshní. amen