Nakomai ao Nooria

Ana reirei Iesu Kristo aika a tia ni kakaonimaki n taainako ao n taainako a na riki bwa mitinare aika ninikoria. Te mitinare bon te tia iriira Kristo are e kaota ana kakoaua Ibukina bwa te Tia Kabooia ao n tataekina koauan Ana euangkerio.

Ana Ekaretia Iesu Kristo e a tia n riki n taainako ao n taai aika a na roko bwa te ekaretia ni mitinare. Kaain nako ana Ekaretia te Tia Kamaiu a tia ni butimwaea te tabe ni koaua n ibuobuoki ni kakoroan nanon te tabe ae tabu are e anga te Uea nakoia Ana Abotoro n aron are e rekootinaki n te Nu Tetemanti:

“Ma ngaia ae kam na nako ni kakiritiania botanaomata n kabaneia, ni bwabetitoia nakon nanon aran te Tama, ma te Nati ma te Tamnei are Raoiroi:

“Reireia bwa a na kabane baike I tuangkami n tauu: ao noria, I a memena naba iroumi ni boongi ni kabane ni karokoa tokin aonaaba. Amen” (Mataio 28:19–20).

Aomata aika Itiaki ni Boong aika Kaitira a taua te tabe aio ma te nano ni koaua n reireia aomata ni bane n aaba ni kabane ibukin te Uea Iesu Kristo ao Ana euangkerio are e kaokaki. Ti kakoaua bwa te ekaretia ae titebo are e kateaki iroun te Tia Kamaiu ngkoa e a tia ni manga kateaki iaon te aba i Rouna ni boong aika kaitira. Reirei, koaua, kariaia n te nakoanibonga, otenanti, ao berita aika tabu n Ana euangkerio a kuneaki n Ana Ekaretia ni boong aikai.

Ngkana ti kaoiko bwa ko na irira n taromauri ke n reirei ma mitinare aika bwanin aia tai, ti aki kataia ni kabooa te bwai nakoim. N tabera ae ngaira kaain te Ekaretia, ti aki karekei kaniwanga ke te kamoamoaki n te kaboo n te tamnei. Ti aki ti ukoukora karikirakean buburan te Ekaretia. Ao ae te kabanea ni kakawaki, ti aki tauko ma te matoa bwa ko na kakoaua are ti karaoia. Ti kaoiko n ongora koauan ana euangkerio Iesu Kristo are e kaokaki bwa ko aonga ni kamatebwaia, iangoia raoi, n tataroakinna, ao n ataia i bon iroum bwa bwaai ake ti tibwauaia ma ngkoe a koaua.

Tabeman mai iroumi a na kona ni kaeka, “Ma I a tia ni kakoaua Iesu ao n irii Ana reirei,” ke “I aki koaua ngkana boni iai te Atua.” Ara kakao nakoim bon tiaki kataakin kauarerekean katein am aro ke am taneiai n te maiu. Kawakinna ni kabane bwaai ake ko atai bwa a koaua, tamaroa, ao ni kamoamoaki—ao ni katai ara rongorongo. N aron are Iesu e tuangiia uoman Ana Reirei “mai ao nooria” (Ioane 1:39), ngaia are ti kaumakiko n nakomai ao nooria ngkana ana euangkerio Iesu Kristo are e kaokaki e reita ao ni katamaroa are ko a kaman ataia bwa e bon koaua.

E koaua, ti namakina te tabe ni koaua ni uota te rongorongo aio nakoia aaba, koraki, neewe, aomata ni kabane. Ao anne raoi ae ti a karaoia ngkai ma mwaitiia mitinare ae raka iaon 87,000 ake a mwakuri n aaba aika a inaomata ae raka iaon 150 ni katobibia te aonaaba. Kairake n ataeinimwaane ao aine ao taanga aika a ikawai a buokiia kaain ara Ekaretia ni kakoroa bukin te tabe ae tabu are e baireaki nakoira n tatabemaniira n tataekina ana euangkerio Iesu Kristo ae akea tokina (taraa D&C 68:1).

Ma ingaingara n tataekina te rongorongo aio bon tiaki tii mwiin te namakin n te tabe n tamnei. Ma, nanora n tibwaua ana euangkerio Iesu Kristo ae kaokaki ma ngkoe bon kaotana bwa kakawakira koaua aikai nakoira. I kakoaua bwa I kona ni kabwarabwara n au kabanea n tamaroa bwa bukin tera ngkai ti rangi ni kaineti n ukoukoran kabwarabwaraan ara onimaki nakoim rinanon ara taneiai ngai ma kainabau are ti rinanona n ririki aika nako ma natira mwaane aika uoman.

N te tairiki teuana Susan ao ngai ti tei irarikin te winto i nanon mweengara ao ni mataku irouia uoman natira aika uarereke n takakaro itinaniku. Inanon aia tai n takakaro, teuare te ataei riki e ikoaki teutana n te kabuanibwai ae uarereke. Ti waekoa ni kinaa bwa e aki rangi ni kakaiaki ikoakina, ao ti baireia bwa ti na aki buokiia n te tai naba anne. Ti tangiria ni kamwataua ao n taraia ngkana iai te akoi ni kiritian are e maroroakinaki n ara utu n rin inanoia. Tera are e riki imwiina e bon kakaongora ao man reke te rongorongo ae manena.

Te tari are ikawai riki e anga te karaunano ao ni buoka raoi tarina are e uarereke riki n oki rikaaki nakon te auti. Susan ao ngai ti tei irarikin te ru ni kuuka bwa ti aonga n noora tera are e na karaoaki imwiina, ao ti katauraoira n anga te ibuobuoki ae tawe ngkana iai riki ikoakin te rabwata ae e na riki ke te bwai ae kaakaiaki ae e nang riki.

Te tari are e ikawai riki e katikitika te kaintekateka nakon te ru ni kuuka nakon te tabo n teboraurau. E toka iaon te kaintekateka, ni buoka tarina ni katoka n te kaintekateka, ni katiia te ran, ao ni waaki ni kabwaroa te tobu n irebwainamwarake ae mwaiti iaon ikoakin bain tarina are e uarereke. E karaoa ana kabanea n tamaroa ni karaua ni kaitiaka te bareka. Aron teuare e uarereke nakon te mwakuri aio e kona n tii kabwarabwaraaki n teina raoi ni kamanenaan taeka man te boki ae tabu: “ao e na reke bukin tangiroaia, ao tangiia, ma bwaebwaetiia, ma ngengeen wiia” (Motiaea 16:2). Ao te tei ane uarereke e tangiroa (ni maraki)!

Imwiin tian te kaitiaki, e a karauaki ni kamwauaki te bai n te kaoa. N tokina ao e a toki te tang n takarua. Te tari are e ikawaki riki imwiina e tamwarakea te kaunta n te tabo ni kuuka e kauka te kaebineti, ao ni kunea te kabira ni bwai n aoraki. E ngae ngke e aki rangi ni bubura ke n rababa nako te nananga iaon bain tarina are e uarereke, te tari are e ikawai e kamanena te bwai n aoraki ni kabuta te bai are e ikoaki ni karokoa ae kuri ni bane te kuriim. E aki manga reitinako te tang n takarua, ngkai te tari are uarereke e mataata bwa e tangira mwiin te bwainaoraki riki nakon mwiin te toobu n irebwainamwarake.

Te tari are e ikawai riki e oki rikaaki riki nakon te kaebineti ao ni kunea te baoki ae boou ma kanoana baenteti aika itiaki. E kabwarai ao man niira rake iai bain tarina ao n nako naano—man tounbaina nakon bubuan baina. Ma te kabuanibwai ae e a tia ni karaoaki, ao ma te kabira ae buroburon te toobu ao bwai ni kabaebae n raea inanon te tabo ni kuuka, uoman ataeinimwaane aika uarereke a kiba n ruo man te kaintekateka ma te momoangare ae itiaki ao te ubu ni kukurei.

Tera are e riki imwiina e rangi ni kakawaki. Te tari are e ikoaki e booti nikiran kabaebae, ao te kuriim are e a kaan ni bane kanoana, ao e oki rikaaki n nako tinaniku. E waekoa ni kakaeia raoraona ao ni moanna ni kabirii ao ni kabaei kabaebae iaoni baia. Susan ao ngai ti bon mimii n te nano ae koaua, ingainga n nano, ao waekoan ana mwakuri.

Bukin tera ngkai te ataeinimwaane ae uarereke anne e karaoa arei? Taiaoka n taraia bwa e waekoa ao n tangiriia n anganiia raoraona te bwai ae titebo are e buokaki iai ngke e ikoaki. Te ataeinimwaane are e uarereke anne e aki manga tuangaki bwa e na kawaekoa, kaewenakoaki, kairaki, ke ni imanonoaki bwa e na karaoia. Nanona ni kan tibwauaia bon mwiin te taneiai ae riki ae rangi ni ibuobuoki are bon mairoun temanna.

A bati ibuakora ngaira ikawai aika a karaoa raoi ae titebo ngkana ti kunea katokan te aoraki ke te bwainaoraki are e katoka te maraki are ti a tia ni korakai iai n te tai ae maan, ke ni karekea te taeka n reirei are ti na kona ni kaitarai kakaewenakoara ma te ninikoria ao ni kaitarai kamangaongao ma te taotaonnano. N tibwauai ma aomata tabeman bwaai aika a rangi n nano nakoira ke a tia ni buokiira bon te bwai ae e aki kakubanako.

Te banna ae titebo aio e bon rangi ni mataata inanon bwaai aika a rangi ni kakawaki n tamnei ao mwiina nako. Ibukin te katooto, te karaki inanon te waoirum n te boki ae tabu ae ataaki bwa ana Boki Moomon e reirei ibukin te mii are e karekea te burabeti ni kairiiri ngkoa ae arana Riaai. Te bwai ae kakawaki ni miin Riaai bon te kai ni kamaiu—are e bon tei ibukin “tangiran te Atua” are bon “moamoa tangirana nakon tangiran bwaai ni kabane” ao “moan baan te kakukurei nakon te tamnei” (1 Nibwaai 11:22–23(; tara naba (1 Nibwaai 8:12, 15().

E kabwarabwaraa Riaai:

“Ao e koro bukina bwa I a waaki ni katoonga uaana; ao I nooria bwa karewerewen uaana e riaon karewen bwaai nako ake I a tia ni katoonga mai imwaina. Eng, ao I nooria naba bwa e riao mainainan uaana nakon mainainan bwaai nako ake I a tia n noori mai imwaina.

“Ao ngke I a katoonga uaan te kai aei ao e onrake tamneiu n te kimwareirei ae moan te bati; mangaia are I a tangiria kaain au utu bwa a na katoonga naba” (1 Nibwaai 8:11–12; e kairaki ma katuruturuana).

Kaotan ana tangira te Atua ae moan te bati ibukiia Natina bon ana mwakuri ni mitinare iaon te aba, mwakuri ni kamaiu n angakarea, ao Mangautin te Uea Iesu Kristo. Uaan te kai are iaona a kona n iangoaki bwa te kanikina ibukin kakabwaia man ana Mwakuri ni Kamaiu Te Tia Kamaiu.

Waekoan ana mwakuri Riaai ni katoongan uaan te kai ao n rinanon te kakukurei ae korakora bon te nano ae rikirake ni kan tibwaua uaana ao ni mwakuria ma ana utu. Ai ngaia are, ngke e rairaki nakon Kristo, e rairaki naba nakoia tabeman man tangiriia ao ni mwakuri ibukiia.

Te bwai teuana ae riki ae kakawaki n ana Boki Moomon e kabwarabwara tera te bwai ae riki nakon te mwaane ae arana Enoti imwiin ana tataro ae korakora ao ni bubuti e ongo ao ni kaekaki iroun te Atua.

E taku:

“Ao e baki tamneiu; ao I katorobubua imatan te Tia Karikai, ao I wewete nakoina inanon te tataro ma nanou ma tamneiu ni kabane; ao e bwanin au bong ni wewete nakoina; eng, ao ngke e a bong ao I kabaibati riki bwanaau ni wewete ao e roota karawa.

“Ao e a roko te bwanaa nakoiu ni kangai: Enoti, a na kabwaraaki am bure, ao kona kakabwaiaki.

“Ao ngai ae Enoti, I ataia bwa e aki kona ni kewe te Atua; mangaia ae a mauna namakinan te bure mairou.

“Ao I taku nakon te Uea, e kanga ni karaoaki aio?

“Ao E taku nakoiu: E kona ni karaoaki ibukin korakoran am onimaki iroun Kristo, ae ko tuai n ongo taekana ke n nooria … Mangaia ae toua nako kawaim, e kamaiuko am onimaki.

“Ao e koro bukina bwa ngke I ongo taeka aikai ao e roko irou te nano ni kan karekea maiuia tariu aika Nibwaite; mangaia are I a tataro nakon te Atua ma tamneiu ni kabane ibukiia” (Enoti 1:4–9; e kairaki ma katuruturuana).

Ngke e rairaki Enoti nakon te Uea “ma nanona ni kabane” (2 Nibwaai 31:13), raraomana ibukin mweraoia ana utu, raoraona, ao aomata ake e irekereke ma ngaia a rikirake n te tai ae titeuana.

Te reirei ae akea tokina ae ti reiakinna man karaki aika uoua aikai bon kakawakin are ti rinanona inanon oin maiura kakabwaia man ana Mwakuri ni Kamaiu Iesu Kristo bwa bwaai aika a na iai iroura imwain ae ti anga mwakuri n ibuobuoki aika namakinaki man te nano ao aika koaua are a riki tiaki bwa ti te mwakuri n akea te namakin.” N ai aron Riaai, Enoti, ao ara ataei are uarereke inanon te karaki are I karakinna, ngaira ae kaain Ana Ekaretia Iesu Kristo ni Boong aika Kaitira a tia n namakina te maraki ae korakora are e irekereke ma nanououa n tamnei ao te bure. Ti a tia naba n rinanon te kaitiakaki, te rau n te nano, te kamaiuaki ao te kabouaki n te tamnei, ao te kairiiri ake a tii karekei man reirei ao maiuakinan koauan ana euangkerio te Tia Kamaiu.

Ana Mwakuri ni Kamaiu Iesu Kristo e katauraoa te mwaaka ni kaitiaki ae riai ni karikaki ni kororaoi ao n itiaki, te mwaaka ni kamaiu ni kamaiuia ikotaki n te tamnei ao ni kanakoa te kairua, ao te otanga are e na kona ni karikiira ni kakaonimaki n taai aika tamaroa ao aika buakaka

Nakoimi kaain te utu ao rao aika tiaki kaain ana Ekaretia Iesu Kristo ni Boong aika Kaitira, I a tia ni kataia ni kabwarabwara bukina aika kakawaki bwa bukin tera ngkai ngaira mitinare.

Te koaua ae bon koaua iai inanon te aonaaba ae e rikirake ni kakeaa te karinerine ao te iango are iai koaua aika a bon koaua raoi. Inanon boong aika a na roko, “a na bane ni katorobubua bubuani wae” ao “a na bane neewe ni kaotia bwa Iesu Kristo bon te Uea, bwa e aonga n neboaki te Tama iai” (I-Biribi 2:10–11). Iesu te Kristo bon ngaia te koaua ao bon ana Riki Temanna te Tama are akea Tokina. Ngkai kaain Ana Ekaretia, ti kakoaua bwa E maiu ao Ana Ekaretia e a tia ni kaokaki nakon arona ae bwanin ni boong aika kaitira.

Taian kakao nakoim bwa ko na reirei taekan ara rongorongo ao ni kataia e rikirake man tamaroan mwiin ana euangkerio Iesu Kristo are e a tia n riki inanon maiura. N tabetai ao ti kabwana ke n taraa n aki tamaroa ke n teimatoa n ara waaki, ma oin nanora bon tibwauaana ma ngkoe koaua ake a rangi ni bongana nakoira.

Ngkai ngai temanna ana Abotoro te Uea, ao ma ni kabanea korakoran tamneiu, I kaota au koaua n tabuna ao koauana. Ao I kaoingkami n “nakomai ao nooria” (Ioane 1:39) n aran te Uea Iesu Kristo ae tabu, amen.