Oin Bukin Ara Kantaninga

Tabeua te ririki n nako, Ngai ao Titita Packer ti kawara te Iuniwetiri ae Oxford. Ti kakaei rekooti ibukiia au bakatibu ae te karuaiwa n roro. Atuun te Kuura n reirei ae Christ i Oxford, Dr, Poppelwell, bon te aomata ae nanoanga ao e kanakomaia te aomata are e tabe ma te akaiwe n nikiri rekooti. Te rekooti ibukin te ririki 1583 ikanne ti a kunea aran au bakatibu, John Packer.

Te ririki are imwiina ti a okira Oxford bwa ti na anga ara maroro are e a tia ni baireaki iaon booki aika tabu ibukin ana raiburari te Kuura ae Christ. Kanga e taraa ni kaangaanga teutana ibukin Dr. Poppelwell. Tao e taku n ana iango bwa ti aki raoi ngaira Kiritian. Ngaia are e a wetea te mitinare n te kuura bwa e na butimwaai booki.

Imwaain anganakin te mitinare booki aika tabu, I kauka te Topical Guide ao ni kaota nakoina teuana te bwai: 18 baana, te boreti ae rang kan, kakateuana raainna, ni karinani taeka ibukin kabwarabwaran taekan “Iesu Kristo.” Bon teuana te bariko ni boki ae bwanin ibukin booki aika tabu n aron kabwarabwaran taekan te Tia Kamaiu are e a kaman bobotaki n rongorongo te aonaaba―te kakoaua man O Tetemanti ao te Nu Tetemanti, ana Boki Moomon, te Doctrine ao Covenants, ao te Pearl of Great Price.

“Ma e ngae n anne ko na iri taeka ni kabwarabwara aikai,” I tuangnga, “tabona nako tabona, ieta ao inano, te boki nakon te boki, te bwai nakon te bwai―ko na kunea bwa a na titebo, kakoaua ma te rau nakon tabun ana mwakuri te Uea Iesu Kristo―Bungiakina, Maiuna, Ana reirei, Taurakina, Mangautina, ao Ana Mwakuri ni Kamaiu.”

Imwiin tibwakin tabeua ana reirei te Tia Kamaiu ma te mitinare, e bitaki ana namakin nakoira, ao e kaneweabaira nakon taian kateitei, n raonaki ma te bwangabwanga ae bwakanakotaina ni kaoti banna n tamnei ake a karaoaki ni bongin te embwaea n Room.

Ibuakon taekan kabwarabwara aikai n te Topical Guide bon teuana man ana Boki Moomon: Kakoauan taekan Iesu Kristo: “Ti taetaekina Kristo, ao ti taetae ni burabeti ibukin Kristo, ao ti koroi kanoan ara taetae ni burabeti bwa antai ake a na kawaria ibukin kamaunan aia bure.” (2 Nibwaai 25:26).

N oin Ana taeka, e kabwarabwara te Tia Kamaiu, “Boni Ngai te kawai, ao te koaua, ao te maiu: akea ane e nako n te Tama, ba ti i Rou” (Ioane 14:6).

Ao man ana Boki Moomon, E kabwarabwara: “Nooria, bon ngai are I katauraoaki ma ni moan te aonaaba bwa N na kabooia au botanaomata. Nooria, Ngai Iesu Kristo. … E na reke irouia aomata ni kabane te maiu mairou, ao naake a na kakoaua arau; a na riki bwa natiu mwaane ao natiu aine n aki toki.” (Ita 3:14).

A mwaiti, a mwaiti kurikuri taeka ni kabwarabwara tabeua ni kabutai booki aika tabu ake a taetaekina tabun ana mwakuri Iesu Kristo bwa te Tia Kabooia ni kabane ake a kaman ke n tia ni bungiakin nakon te maiu n rabwata.

Rinanon ana Mwakuri ni Kamaiu Iesu Kristo ti bane ni kabooaki man Bwakan te aomata, are e riki ngke a kana uaan te kai ae tabu Atam ao Ewa n te Onaroka are Eten, n aron ae kamatataki ni I-Korinto: “Ba aroia aomata ngkai a bane ni mate iroun Atam, ao ai aroia naba ba a na bane ni kamaiuaki irouni Kristo” (1 I-Korinto 15:22).

E taekinaki n ana Boki Moomon, “Bwa e bon riai n iai te mwakuri ni kamaiu …, bwa ngkana akea ao aomata nako a na bane ni mate; eng, a bane ni bwaka ao a bua, ao a na bane ni mate ma ti ngkana a rinanon te mwakuri ni kamaiu, … te anga karea ae akea tiana ao akea tokina” (Aramwa 34:9–10).

Ti na bae n aki maiuakin maiu aika tau, ao iai katuaeakira ibukin ara kairua, imwaain rokora iaon te aba, ti kariaia ni kabaeaki nakon Ana tua ao ni butimwaea te rekenikai ibukin uruakan tuua akanne.

“Ba a bane ni bure, ma n aki karekea te neboaki mairoun te Atua;

“A karaoiroaki n aki kaboaki karaoiroaia n ana akoi n te kamaiu are irouni Kristo Iesu.” (I-Rom s 3:23–24).

E karaoa te Mwakuri ni Kamaiu Iesu Kristo, are e a tia n katauraoa te kawai ibukira bwa ti na itiaki. Iesu Kristo bon te Kristo ae e a tia ni kautaki. Ti neboia ao ni kina ibukin marakina ni korakai ibukira ni kabane ao ibukin te maraki are E kaitara ibukira n tatabemaniira nako, n te Onaroka are Ketetemwane ao iaon te kaibangaki. E kaitarai ni kabane ma te nanorinano ao te atatai ae aki toki man tabun Ana mwakuri ao te kantaninga.

Naake a na rairi nanoia ao ni katoki aia bure a na ko na ni kunea bwa e teimatoa n arora baina n nanoanga. Naake a ongo ao ni mutiakina Ana taeka ao aia taeka Ana toro aika rineaki a na karekea te rau ao te atatai ibuakon te maraki n nano ao te rawawata. Mwiin Ana anga karekea e na kainaomataira man mwiin te bure are e a tia ni kamaunaki ao namakina te kantaninga.

Ngke e aki kakoroa bukin te Mwakuri Kamaiu, a na bon akea te kaboomwi. E na riki bwa te aonaaba ae kaangaanga ni maiu te aba iai ngkana aki kona ni kabwaraaki ara bure, ngkana ti aki kona ni kaitiakiira ao ni waaki nako.

Ana nanoanga ao ana akoi Iesu Kristo akea tiaia nakoia naake a karaoa te bure ke ni baika a kairua ao te kabwaka ni karaoan ae eti, ma e mwanei berita ibukin te rau ae akea tokina nakoia ni kabane ake a butimwaia ao n Iriiria ao Ana angareirei. Ana nanoanga bon te kamaiu ae mwaaka, riki nakon naba te tia bure.

I karekea au reta n ae nako mairoun te aine ae ribootinaki bwa e karawawataki inanon maiuna. Te kairua ae kakamaku, are e aki ataia ma e riingnga, ao e bukinaki iai. E kariaia burena aio e korakai ao e namakina te rawawata. Inanon unna, e tang inanona, “Iai temanna ae e na kabooa mwiin a na kairua aei” Inanon te tai ni karawawata ae korakora aei ao te titiraki, e koreia neiei bwa iai te bwai ae e a bon ti kaoti naba inanona ke te kaeka ae tawe inanona, “Iai temanna ae e a tia ni kaboomwi.”

Ngkana ti aki ataa ana anga karea te Tia Kamaiu are e kona ni karaoia ibukira, ti na bae n rinanon te maiu n uringaaba are ti a tia ni karaoa te bwai ae aki eti ke ni kamaraka temanna. Te raraoma are e raonaki ma te kairua e kona ni kaitiakaki. Ngkana ti ukeuke ni kan ota n ana Mwakuri ni Kamaiu, ti na karekea riki te karinerine ibukin te Uea Iesu Kristo, Ana mwakuri iaon te aba, ao Ana mwakuri ae tabu bwa ara Tia Kamaiu.

Ana Ekaretia Iesu Kristo Ibukiia Aika Itiaki ni Boong Aika Kaitira e kaokaki ibukin taetaekinan te rabakau ibukin maiun ao ana Anga reirei te Tia Kamaiu ni kabuta te aonaaba. Te maungatabu ae kakannato aei e kanakobwanaeaki inanon 94 taetae man te tiateraite nakon 101 aaba ma e tauraoi naba iaon te intanete nakon aaba nako ike e mena iai te Ekaretia. Iai ara titeiki aika 3,000. Korakoraia ara mitinare aika bwanin aia tai e riaon 88,000, ao botan kainakin te Ekaretia e roko n te bwaati ae 1.5 te mirion. Waare aikai a riki bwa te kakoaua bwa te “atibu are e koreaki man te maunga n akea baai” e reitinako n roro nako, ao e na bon kaona te aonaaba ae bwanin” (D&C 65:2).

Ma e aki kakawaki bwa buburara n riki aron barongaan te Ekaretia ke iraua te mirion membwa ake a kaaina te aro, e aki kakawaki bwa mwaitira kaontenanti ao aaba ake a mena iai ara mitinare ke mwaitira taetae aika ti taetae iai, te tokanikai ae koaua ibukin ana euangkerio Iesu Kristo e tauaki abwakina man te korakora n tamnei mairouia membwa n tatabemaniia. Ti kainnanoa korakoran te onimaki are e kuneaki inanoia ana reirei Kristo ake a kakaonimaki.

Te kakoaua ibukin te kantaninga n te kaboomwi bon te bwai are e aki kona ni kabotauaki ke ni warekaki. Iesu Kristo bon moan rikin te kantaninga anne.

Ti ukoukora kakorakorakin aia koaua ataei ao ake a ikawai, ake a tia ni mare ao ake a tuai. Ti kainnanoia bwa ti na reireia ana euangkerio Iesu Kristo nakoia mwaane, aine, ao ataei, nakoia reeti ao aaba nako, ake a kaubwai ao ake a kainnano. Ti kainnanoia ake a rairaki ao naake a roko mairouia aia bakatibu ake bwaeoniia n te Ekaretia are ngkoa. Ti kainnanoia bwa ti na ukoukoriia naake a tiotionako man te Ekaretia ao ni buokia bwa a na oki nakon te nanai. Ti kainnanoa wanawanaia aomata ma aia atatai ao te korakora n te tamnei. Membwa n te Ekaretia aio ni kakatemanna bon te bwai ae kakawaki n rabwatan te Ekaretia.

“Ba aron te rabwata, ngkai ti teuana, ni kabane, ngkai a boni bati, bon te rabwata ae ti teuana; ao ai aron naba Kristo.

“Ba ti bane ni babetitoaki nako nanon te rabwata ae ti teuana iroun te Tamnei ae ti temanna. …

“Ba te rabwata tiaki b’ain te rabwata ae ti teuana, ma boni b’aina aika bati” (1 I-Korinto 12:12–14).

Membwa n tatabemaniia a na riki bwa taan kakoaua ibukin maiun ao ana reirei Iesu Kristo. Ti mena n te buaka ma ana kairoro Tatan, ao ti kainnanoira ni bon tatabemaniira nako ngkana ti kan tokanikai n ana mwakuri te Tia Kamaiu are ti na karaoia.

Ko na bae n iango, “Tera ae I kona ni karaoia? Bon tii ngai te aomata.”

Man ni koauana e bon namakina te maroaa Iotebwa Timiti n ana tai. E rikirake ni kakannato, ma e waaki ngaia ngke 14 ana ririki are e titiraki: “Tera te ekaretia ae N na kaainna?” (taraa Joseph Smith–History 1:10). Ana onimaki Iotebwa ao ana koaua ibukin te Tia Kamaiu e rikirake n arora, “te rain iaon te rain, te reirei iaon te reirei, teutana ikai ao teutana ikanne” (2 Nibwaai 28:30; taraa naba D&C 128:21). E katorobubua n tataro Iotebwa, bwaai aika a kamiimi ake a koro nanoia mai mwiin a na tataro anne ao bon te Moan Kaotioti.

Ngkai temanna mairouia Abotoro ake Tengaun ma Uoman, I kaota koauan te Uea Iesu Kristo. E maiu. Bon Ngaia te Tia Kabooi maiura ao ara Tia Kamaiu. “Rinanon ana Mwakuri ni Kamaiu Kristo, a na kamaiuaki aomata ni kabane” (Taekan te Onimaki 1:3). E tararua te Ekaretia aio. Tiaki te iruwa irouia Ana toro. Ngkai ti waaki nakon taai aika imwaaira ma onimakinara, E na raoniira Tamneina. Akea tokin mwaakana ni kakabwaiai ao ni kairii maiuia naake a ukoukora te koaua ao te raoiroi. I kaota au koaua Ibukina n aran Iesu Kristo, amen.