”Jaqaw jien, Mulej?”

Ma tfakkarniex din l-istorja fi kliem is-Salvatur?

”Xi trid tħares lejn it-tibna li hemm f’għajn ħuk? Għax ma tarax it-travu li għandek f’għajnek int? 

“… Neħħi l-ewwel it-travu li għandek f’għajnek int, ħalli mbagħad tara sewwa tneħħi t-tibna minn għajn ħuk.”²

Is-suġġett tat-travi u t-tiben jidher li huwa relatat ferm man-nuqqas ta’ kapaċità tagħna li naraw sewwa lilna nfusna. Mhux ċert kif aħna daqshekk kapaċi nagħrfu u nirrakkomandaw rimedji għad-deni ta’ ħaddieħor, filwaqt li tant insibuha diffiċli naraw x’ għandna aħna.

Xi snin ilu kien hemm aħbar dwar raġel li kien jemmen li jekk huwa kien jogħrok wiċċu bil-meraq tal-lumi, kien isir inviżibbli quddiem il-kameras. Għalhekk huwa dilek wiċċu kollu meraq tal-lumi, ħareġ barra u seraq żewġ banek. Ma damx ma ġie arrestat meta wiċċu deher fuq l-aħbarijiet kollha ta’ filgħaxija. Meta l-pulizija wrew lir-raġel il-vidjos tiegħu nnifsu li qabdu bil-kameras tas-sigurtà, huwa ma riedx jemmen lil għajnejh. ”Iżda jiena kelli l-meraq tal-lumi fuq wiċċi!” huwa pprotesta.³

Meta wieħed xjentist ġewwa l-Università ta’ Cornell sema’ b’ din l-istorja, huwa mtela bix-xewqa li jkun jaf kif bniedem seta’ jsibha daqshekk diffiċli biex jintebaħ bl-inkompitenza tiegħu. Biex jiddeterminaw jekk din kenitx xi problema ġenerali, żewġ riċerkaturi stiednu numru ta’ studenti tal-università sabiex jipparteċipaw f’ serje ta’ testijiet dwar għadd ta’ ħiliet tal-ħajja u mbagħad talbuhom jiddeċiedu kif jaħsbu li marru. L-istudenti li ma tantx marru tajjeb kienu dawk bl-inqas ħila biex jevalwaw kif marru—xi wħud minnhom ħasbu li l-marki li kienu ġabu kienu ħames darbiet ogħla milli fil-fatt kienu.⁴

Dan l-istudju reġa’ rrepeta ruħu b’ diversi modi oħra, fejn kompla jikkonferma l-istess konklużjoni: ħafna minna insibuha diffiċli naraw lilna nfusna kif verament aħna, u anke nies ta’ suċċess jgħollu l-istima tal-kontribut li huma jagħtu u ma jikkalkulawx wisq il-kontribut li jagħtu l-oħrajn.⁵

Forsi mhux xi ħaġa daqshekk sinifikattiva li ngħollu l-istima tagħna għall-mod kif insuqu l-karozza jew kemm jirnexxielna nixħtu ’l bogħod il-ballun tal-golf. Iżda meta nibdew nemmnu li l-kontribut tagħna fid-dar, fix-xogħol u fil-knisja huwa ferm akbar milli fil-fatt hu, aħna nkunu qed inżommu lilna nfusna milli niksbu ċerti barkiet u opportunitajiet li ntejbu lilna nfusna b’ mod mill-aktar sinifikanti u profond.

Wieħed ħabib tiegħi kien jgħix f’ qasam li kellu uħud mill-ogħla statistiċi fil-Knisja—l-attendenza kienet għolja, in-numru tat-tagħlim tad-dar kien għoli, it-tfal tal-Primarja dejjem kienu jġibu ruħhom b’ mod tajjeb, l-ikliet tal-qasam dejjem kienu jinkludu ikel mill-aqwa li l-membri rari kienu jwaqqgħu l-ikel mal-art tad-dar tal-laqgħat, u naħseb li qatt ma kien inqala’ xi argument waqt l-avvenimenti sportivi.

Sieħbi u l-mara tiegħu sussegwentement ġew imsejħa biex iservu missjoni. Meta reġgħu lura tliet snin wara, huwa stagħġbu meta raw li matul iż-żmien li kienu ilhom iservu ’l bogħod mill-qasam tagħhom, 11-il żwieġ kien spiċċa f’ divorzju.

Għalkemm il-qasam minn barra kien jidher li kien wieħed b’ saħħtu u mimli nies fidili, sfortunatament bdiet isseħħ xi ħaġa fil-qlub u fil-ħajja tal-membri. U l-aktar ħaġa inkwetanti hi li din is-sitwazzjoni mhijiex xi waħda unika. Ħwejjeġ terribli u ħafna drabi xejn neċessarji jseħħu meta l-membri tal-Knisja jitbiegħdu mill-prinċipji tal-evanġelju. Minn barra kienu jidhru li kienu dixxipli ta Ġesù Kristu, iżda ġewwa qalbhom kienu ’l bogħod mis-Salvatur u t-tagħlim Tiegħu. Huma gradwalment tbiegħedu mill-ħwejjeġ tal-Ispirtu u resqu lejn il-ħwejjeġ tad-dinja.

Irġiel li darba kienu jħaddnu s-saċerdozju b’ mod den bdew jgħidu lilhom infushom li l-Knisja kienet post tajjeb għan-nisa u għall-uliedhom iżda mhux għalihom. Jew xi wħud kienu konvinti li l-iskeda mill-aktar mimlija tagħhom jew iċ-ċirkustanzi uniċi tagħhom kienu jeżentawhom mill-atti ta’ kuljum ta’ devozzjoni u servizz li jżommuhom viċin l-Ispirtu. F’ dawn iż-żminijiet ta’ narċisiżmu li ħafna jippruvaw jiġġustifikaw lilhom infushom, huwa faċli li nsiru kreattivi bil-mod li noħolqu l-iskużi għalfejn ma nersqux regolarment lejn Alla permezz tat-talb, għalfejn noqogħdu nitnikkru biex nistudjaw l- iskrittura, nevitaw il-laqgħat tal-Knisja u lejla d-dar mal-familja, jew ma nħallsux dieċmi onesta u offerta tas-sawm.

Għeżież ħuti, tistgħu jekk jogħġobkom tħarsu ġewwa qalbkom u tistaqsu l-mistoqsija sempliċi: ”Jaqaw jien, Mulej?”

Intom tbegħidtu—anke jekk ftit li xejn—minn ”l-…Evanġelju tal-glorja ta’ Alla l-imbierek, fdat f’idejkom”?⁶ Ħallejtu ”l-alla ta’ din id-dinja” jdallam moħħkom għad-”dawl ta’ l-Evanġelju glorjuż ta’ Kristu”?⁷

Għeżież ħbieb tiegħi, għeżież ħuti, staqsu lilkom infuskom, ”Fejn hu t-teżor tiegħi?”

Qalbkom tinsab marbuta mal-ħwejjeġ konvinjenti ta’ din id-dinja, jew tinsab iffukata fuq it-tagħlim tad-diliġenti Ġesù Kristu? ”Għax fejn hemm it-teżor tiegħek, hemm tinsab qalbek ukoll.”⁸

L-Ispirtu ta Alla jinsab jgħammar f’ qalbkom? ”L-għeruq tagħkom” jinsabu fl-imħabba lejn Alla u lejn għajrkom? Tiddedikaw biżżejjed ħin u tkunu kreattivi biżżejjed biex twasslu l-ferħ fiż-żwieġ u fil-familja tagħkom? Tiddedikaw l-enerġiji tagħkom għall-għan sublimi li ssiru tafu u tgħixu ”l-wisa’ u t-tul, l-għoli u l-fond”⁹ tal-evanġelju rrestawrat ta’ Ġesù Kristu?

Ħuti, jekk l-akbar xewqa tagħkom hi li tikkultivaw ċerti kwalitajiet li jixbhu lil Kristu, il-kwalità tal-”fidi, virtù, għarfien, temperament, paċenzja, tjubija ta’ bejn l-aħwa, qdusija, karità, umiltà u servizz,”¹⁰ Missierna tas- Smewwiet jagħmilkom strument f’ idejh għas-salvazzjoni ta’ bosta erwieħ.¹¹

L-aħwa, ħadd minna ma jħobb jammetti meta nkunu qed niżvijjaw mit-triq il-ġusta. Ħafna drabi aħna nippruvaw nevitaw milli nħarsu b’ mod profond ġewwa ruħna u nikkonfrontaw id-dgħjufijiet, il-limitazzjonijiet u l-beżgħat tagħna. Konsegwentament, meta aħna neżaminaw ħajjitna, aħna noqogħdu nħarsu l-ewwel lejn il-preferenzi, l-iskużi u l-istejjer li ngħidu lilna nfusna sabiex inkunu nistgħu niġġustifikaw ċerti ħsibijiet u għemejjel mhux xierqa.

Iżda li nkunu kapaċi naraw lilna nfusna b’ mod ċar huwa essenzjali għat-tkabbir u l-benesseri spiritwali tagħna. Jekk id-dgħjufijiet u n-nuqqasijiet tagħna jibqgħu moħbijin wara d-dell, allura l-qawwa li tifdina tas-Salvatur ma tkunx tista’ tfejjaqhom u tibdilhomna f’ qawwa.¹² Ironikament, l-għama tagħna lejn id-dgħjufijiet umani tagħna tagħmilna għomja wkoll lejn il-potenzjal divin li Missierna irid irawwem ġo kull wieħed minna.

Għalhekk kif nistgħu niddu d-dawl pur tal-verità ta’ Alla f’ ruħna u naraw lilna nfusna bil-mod kif jarana Hu?

Ippermettuli nissuġġerixxi li l-iskrittura mqaddsa u d-diskors mogħti waqt il-konferenza ġenerali huma mera effettiva li nistgħu nużaw biex neżaminaw lilna nfusna.

Hekk kif tisimgħu jew taqraw kliem il-profeti tal-qedem u dawk moderni, ieqfu milli taħsbu kif dan il-kliem jista’ japplika għal xi ħadd ieħor u staqsu din il-mistoqsija sempliċi: ”Jaqaw jien, Mulej?”

Għandna nersqu lejn il-Missier Etern tagħna b’ qalb maqsuma u moħħ lest li jitgħallem. Irridu nkunu lesti nitgħallmu u ninbidlu. U, emmnuni, kemm niggwadanjaw jekk nikkommettu ruħna li ngħixu l-ħajja li jridna ngħixu Missierna tas-Smewwiet!

Dawk li ma jixtiqux jitgħallmu u jinbidlu probabbilment ma jirnexxilhomxu jista’ jkun li jibdew jikkontemplaw jekk il-Knisja għandhiex xi ħaġa x’ toffrilhom.

Iżda dawk li jridu jitjiebu u jimxu ’l quddiem, dawk li jitgħallmu dwar is-Salvatur u jixtiequ jkunu bħalu, dawk li jkunu umli bħal tifel ċkejken u jaraw li ħsibijiethom u l-għemejjel tagħhom ikunu f’ armonija ma’ Missierna tas-Smewwiet—huma jesperjenzaw il-miraklu tal-Att tal- Fidwa tas-Salvatur. Huma, mingħajr dubju jħossu l-Ispirtu risplendenti ta’ Alla. Huma jduqu l-ferħ inspjegabbli li huwa l-frott ta’ qalb umli u mansa. Huma jitbierku bix-xewqa u dixxiplina li jsiru dixxipli vera ta’ Ġesù Kristu.

Tul ħajti, jiena kelli l-opportunità li nagħmilha ma’ wħud mill-aktar nies kompetenti u intelliġenti li hawn fid-dinja. Meta kont għadni iżgħar, kont nimpressjona ruħi b’ dawk in-nies li kienu edukati, u li fid-dinja għamlu isem, irnexxew u saru popolari. Iżda meta għadda żmien, bdejt nirrealizza li sirt aktar nimpressjona ruħi b’ dawk l-erwieħ meraviljużi u mbierka li verament huma nies twajba u mingħajr ħażen.

U mhux dwar dan hu l-evanġelju, u mhuwiex dan l-għan tiegħu? Huwa l-aħbar it-tajba, u jgħinna nsiru tajbin.

Kliem l-Appostlu Ġakbu japplika għalina llum:

”Alla jieqaf lill-kburi u jagħti l-grazzja lill-umli. …

”Iċċekknu quddiem il-Mulej, u hu jerfagħkom.”¹³

L- aħwa, għandna nwarrbu kull kburija, inħarsu lil hinn minn kull vanità, u b’ umiltà nistaqsu, “Jaqaw jien, Mulej?”

U jekk it-tweġiba tal-Mulej tkun ”Iva, ibni, hemm ħwejjeġ li tista’ titjieb fihom, ħwejjeġ li jiena nista’ ngħinek tegħleb,” jiena nitlob li aħna naċċettaw din it-tweġiba, b’ umiltà nagħrfu dnubietna u n-nuqqasijiet tagħna u mbagħad nibdlu triqitna billi nsiru rġiel aħjar għan-nisa tagħna, missirijiet aħjar u wlied aħjar. Jalla aħna minn issa ’l quddiem nfittxu bil-qawwa tagħna kollha li nimxu b’ mod sod fit-triq imbierka tas-Salvatur—li naraw lilna nfusna b’ mod ċar huwa l-bidu tal-għerf.

Hekk kif nagħmlu dan, Alla l-ħanin tagħna jmexxina minn idejna; aħna ”nissaħħu, u nitbierku mill-għoli.”¹⁴

Għeżież ħbieb tiegħi, l-ewwel pass f’ din it-triq mill-isbaħ li timliena bil-hena bħala dixxipli jibda billi nistaqsu din il-mistoqsija sempliċi:

“Mulej, jaqaw jien?”

Ta’ dan jiena nixhed u nagħtikom il-barka tiegħi f’ isem Ġesù Kristu, amen.