’Ei roto i te Atua e pārahi ai ’e e tātā’i ai i te ’amahara’a

E ti’a ’ia tātou ’ia fa’ahōhonu i tō tātou ’ite ’e te ha’apa’o i te Metua i te Ao ra. Tō tātou aura’a e ’ōna e mea mure ’ore ïa. E mau tamarii here tātou nāna ’e e’ita te reira e taui. Nāhea tātou i te fāri’i ma te ’ā’au ato’a i tāna anira’a e ha’afātata iāna, ’e ’oia ato’a ’ia pōpou ho’i i te mau ha’amaita’ira’a tāna e hia’ai nei e hōro’a nō tātou i roto i teie orara’a ’e i te ao a muri a’e.

’Ua parau te Fatu i tō ’Īserā’ela tahito ra ’e ia tātou ato’a nei ho’i : « ’Ua herehia ’oe e au i te herera’a mure ’ore ra ; i fa’atae mai ai au ia ’oe i te aroha hāmani maita’i ra ».¹Mai te paraura’a a te Metua, ’ua parau ato’a ’oia ia tātou : « ’Ei roto ’oe iā’u nei e pārahi ai, ’e ’ei roto vau ia ’oe : nō reira, ’a haere mai na muri iā’u ».² ’Ua nava’i ānei tō tātou ti’aturi iāna nō te pārahi i roto iāna ’e ’ia haere nā muri iāna ?

Tei te fenua nei tātou nō te ha’api’i mai ’e nō te tupu rahi, ’e te mea faufa’a roa a’e e tae mai te ha’api’ira’a ’e te tupura’a rahi nā roto mai i tā tātou faufaura’a tū’atihia i te Metua i te Ao ra ’e ia Iesu Mesia. Nā roto i tō tātou aura’a ha’apa’o maita’i ’e rāua e tae mai ai te ’ite hanahana, te here, te mana ’e te ’aravihi nō te tāvini ia vetahi ’ē.

« E hōpoi’a i tā’amuhia i ni’a ia tātou nō te ha’api’i i te mau mea ato’a tā te Atua i heheu mai nō ni’a iāna ».³ .E mea ti’a roa ’ia ta’a tātou ē, ’ua fa’aue te Atua te Metua i tāna Tamaiti ia Iesu Mesia e hāmani i te ao nō tō tātou tupura’a,e ’ua hōro’a mai te Metua i te Ao ra i tāna Tamaiti ’ei ’aufaura’a i te mau tītaura’a a te parau ti’a nō tō tātou fa’aorara’a,e ’ua fa’aho’ihia mai te mana autahu’ara’a a te Metua ’e te ’Ēkālesia mau a te Tamaiti ’e te mau ’ōro’a nō te ha’amaita’i ia tātou. E ti’a ānei ia ’outou ’ia putapū i te here rahi e vai ra i roto i tā rāua mau fa’aineinera’a nō tō tātou ’oa’oa ’e te tupura’a ? Tītauhia ’ia ’ite tātou ē, te fa’anahora’a nō te fa’aorara’a a te Metua i te Ao ra, ’o te ha’apa’ora’a ïa i te mau ture ’e te mau ’ōro’a o te ’evanelia ’e te roa’ara’a te ora mure ’ore,’e e riro ai mai te Atua te huru.⁴ Teie te ’oa’oa mau ’e te vai maoro tā te Metua i te Ao ra e pūpū nō tātou. ’Aita atu e parau mau ’e ’aita atu e ’oa’oa vai maoro.

E nehenehe tō tātou mau tāmatara’a e fa’aātea ia tātou i teie ’ē’a nō te ’oa’oa. E nehenehe tō tātou tū’atira’a ’e te ti’aturi i te Atua e mo’e ’ia arata’i ana’e te mau tāmatara’a ia tātou i te fa’anevanevara’a ’eiaha rā i te tūturira’a i raro.

Teie e piti rēni parau e tāparu nei ia tātou ’ia tīti’a i te mau mea e rave mātāmua roa :

Te mau tuahine e aha te mea au a’e nā ’outou ? E aha te mea e tupu maoro nō ‘outou ? » Hō’ē mea faufa’a e vai maoro nō te Metua, ’oia ho’i, te ha’api’ira’a tātou nō ni’a iāna, te fa’aha’eha’ara’a tātou ’e te fa’arahira’a i tō tātou ha’apa’ora’a i tāna parau i ni’a i te fenua nei. ’Ua hina’aro ’oia ’ia taui tātou i tā tātou peu pipiri ’ei tāvinira’a, tō tātou mata’u ’ei fa’aro’o. E tae roa te tāmatara’a o teie mau mea vai maoro i roto roa ia tātou.

I teienei, i roto i tō tātou mau paruparu tāhuti nei, o tā te Metua e ani mai nei ’ia here tātou, i te taime e mea fifi roa ’ia here, ’ia tāvini tātou, i te taime e mea nahonaho ’ore ’ia tāvini, ’ia fa’a’ore tātou i te hapa, i te taime ’ua oti roa tō tātou pūai e fa’a’ore atu i te hapa. Nāhea ? Nāhea tātou ’ia rave i te reira ? E tītau pāpū tātou i te tauturu a te Metua i te Ao ra, nā roto i te i’oa o tāna Tamaiti, ’e ’ia rave mai te au i tāna ravera’a ’eiaha rā ma te te’ote’o ’e tō tātou iho hina’aro.

Hōho’a

Te fa’ari’i pape

’Ua ’ite au i tō’u te’ote’o i te fa’ahitira’a te peresideni Ezra Taft Benson i te parau nō te tāmāra’a i roto i te fa’ari’i.⁶ E fa’ahōho’a vau iā’u mai te hō’ē fa’ari’i pape. Nāhea vau i te huri i te toe’a te’ote’o i rāpae i ta’u fa’ari’i pape ? Te ha’avīra’a iā’u iho ’ia ha’eha’a ’e ’ia tāmata e ’ia herehia e vetahi ’ē i te rāve’a ateate, e mea marereiao (creux) ho’i ’e e’ita e haere. E fa’atupu tā tātou mau hara ’e te te’ote’o i te ’amahara’a—’aore rā te hō’ē ta’a-’ē-ra’a—i rotopū ia tātou ’e te puna nō te here ato’a, tō tātou Metua i te Ao ra.

Nā te tāra’ehara ana’e a te Fa’aora e nehenehe e tāmā ia tātou i tā tātou mau hara ’e e tāpiri i te ’āpo’o ’aore ra te ’amahara’a.

’Ua hina’aro tātou ’ia tauahihia tātou e te rima here o tō tātou Metua i te Ao ra ’e ’ia arata’ihia, ’e nō reira e tu’u tātou i tōna hina’aro nā mua roa, ’e ma te ’ā’au tātarahapa e tāparu atu ’ia mani’i mai te Mesia i te pape tāmā i roto i tā tātou fa’ari’i. ’Ia ha’amata, e tōpata noa paha, ’ia ’imi ana’e rā tātou, ’ia ani ’e ’ia ha’apa’o, e rahi roa mai ïa te reira. E ha’amata teie pape ora i te fa’a’ī ia tātou, ’e ’ia mani’i roa mai tōna here i rāpae, e ti’a atura ïa ia tātou ’ia fa’a’opa i te fa’ari’i o tō tātou vārua nō te fa’a’ite atu ia vetahi ’ē i te mea i roto, rātou tei po’ihā i te ora, te tīa’ira’a ’e te vāhi e pārahi atu. ’Ia mā o roto tā tātou fa’ari’i, e ha’amata ato’a ai tō tātou mau aura’a tāhuti nei i te ora mai.

Tītauhia ’ia fa’atusia te ta’ata i tāna tārena nō te mau ’ōpuara’a mure ’ore a te Atua. Te Fa’aora, o te parau nei nō te Metua, ’ua ani mai ia tātou, « ’a ha’afātata mai iā’u nei ’e e ha’afātata atu ïa vau ia ’outou nā ».⁷ Te ha’afātatara’a i te Metua, e nehenehe ïa e parau o te ha’api’ira’a i tāna parau mau nā roto i te mau pāpa’ira’a mo’a, te pe’era’a i te a’o a te peropheta ’e te tūtavara’a ’ia rave hope atu ā i tōna hina’aro.

Tē ta’a maita’i ra ānei ia tātou e mana tō te Mesia nō te fa’atae ia tātou i te fa’ahoara’a ’e te Metua, ’e i te tahi ’e te tahi ? E nehenehe tāna, nā roto i te mana o te Vārua Maita’i, e hōro’a ia tātou i te hi’ora’a tītauhia nō te mau aura’a.

’Ua fa’ati’a mai te hō’ē ’orometua Paraimere iā’u i te ’ohipa rahi i tupu ’e tāna piha tamāroa 11 matahiti. Tē vai ra hō’ē i roto ia rātou, e pi’i au iāna ’o Jimmy, e fa’aea ’eta’eta noa i tōna pae. I te hō’ē sābati, ’ua fa’auruhia te ’orometua e vaiiho i tāna ha’api’ira’a ’e e fa’a’ite i te tumu ’oia e here ai ia Jimmy. ’Ua parau ’oia i tōna māuruuru ’e tōna ti’aturira’a i teie taure’are’a. ’Ei reira ’ua ani te ’orometua i te mau melo o te piha ’ia parau ia Jimmy i te mea tā rātou e au nō ni’a iāna. ’A parau ai te mau melo o te piha, hō’ē hō’ē, i tō rātou mana’o ta’a ’ē nō Jimmy, pi’o a’era tōna upo’o ’e ’ua tahe atura tōna roimata. ’Ua patu teie ’orometua ’e tāna piha i te hō’ē ’ē’a turu i te ’ā’au vai mo’emo’e o Jimmy. E hōro’a mai te here ha’avare ’ore, te fa’a’ite-pāpū-ra’a i te tīa’ira’a ’e te faufa’a o vetahi ’ē. E parau vau i te reira te « tātā’ira’a i te ’amahara’a ».

Penei a’e nā te here o te orara’a hou te tāhuti nei i ha’amau i tō tātou hia’ai nō te here mau ’e te vai maoro i te fenua nei. ’Ua ’ōpuahia tātou e te Atua nō te hōro’a ’e nō te fāri’i i te here, nā te hō’ēra’a ’e te Atua e fa’atae mai i te here rahi roa a’e. Tē ani nei te Buka a Moromona ia tātou ’ia « au… [i te Atua] nā roto i te tāra’ehara a te Mesia ».⁸

’Ua parau Isaia nō rātou e ora ha’apa’o maita’i ra i te ture nō te ha’apaera’a mā’a ’e ’ua riro mai rātou ’ei « feiā tātā’i i te ’amahara’a ». ’O rātou tā Isaia i parau, ē « patu fa’ahou i te mau parari tahito ra ».⁹ Mai te reira ato’a, ’ua tātā’i te Fa’aora i te ’amahara’a ’aore ra te ta’a-’ē-ra’a, i rotopū ia tātou ’e te Metua i te Ao ra. Nā roto i tāna tusia tāra’ehara rahi, ’ua ’īriti ’oia i te ’ē’a e fāri’i ai tātou i te mana here o te Atua ’e i muri iho tātou e nehenehe ai e tātā’i i « te mau parari tahito ra » i roto i tō tātou iho orara’a. E tītau te fa’aorara’a i te fa’aāteara’a pae manava i rotopū i te tahi ’e te tahi i tō tātou fāri’ira’a i te here o te Atua, ’āpitihia e te fa’atusiara’a i tō tātou nātura pipiri ’e te peu ha’amata’u.

I te hō’ē pō, ’ua mārō māua te tahi fēti’i nō ni’a i te politita. I reira ra, ’ua fa’ahapa hu’ahu’a ’oia i tā’u i parau ma te fa’a’ite ē ’ua hape au, ’e ’ua fa’aro’o roa mai te ’utuāfare. E au vau i te ma’au ’e te ma’ua—’e ’oia iho ā paha. I te tūturira’a vau i terā pō nō te pure, ’oi’oi roa vau i te fa’ata’ara’a i te Metua i te Ao ra i te fifi o terā fēti’i tuahine ! Haere noa ta’u mau parau. E taime poto paha vau i te fa’aeara’a i ta’u mānianiara’a, i fa’aō mai nei te Vārua Maita’i, inaha i tō’u māere rahi, fa’aro’o a’era vau mai roto atu i tō’u vaha i te parau : « ’ua hina’aro iho ā ïa ’oe ’ia here au iāna ». E here iāna ? ’Ua parau vau i roto i ta’u pure ē : « Nāhea pa’i e here iāna ? ’Aita paha vau i au a’enei iāna. ’Ua māui tō’u ’ā’au, ’ua ’ino’ino vau. E’ita e haere iā’u ».

I reira, pāpū roa ē nā te Vārua i tauturu mai, e mana’o ’āpī tei tae mai i te nā ’ōra’a vau : « ’Ua here rā ’oe iāna, e te Metua i te Ao ra. E ti’a ānei ia ’oe ’ia hōro’a mai i te hō’ē tuha’a o tō ’oe here iāna—’ia here ato’a vau iāna ? » ’Ua marū ri’i mai tō’u ’ino’ino, ’ua ha’amata tō’u ’ā’au i te taui ’e ’ua ha’amata vau i te hi’o ta’a ’ē i teie ta’ata.’Ua ha’amata vau i te ’ite i tōna faufa’a mau o tā te Metua i te Ao ra e hi’o ra. ’Ua pāpa’i Isaia : « [E] vehi… Iehova i te fati o tōna ra mau ta’ata, ’e ’ia fa’aora ’oia i te ma’i nō te papa’i nāna ra ».¹⁰

I te roara’a o te tau, ’ua tāpiri au noa mai te ’āpo’o i rotopū ia māua. Noa atu ’aita ’oia i fāri’i i te tauira’a o tō’u ’ā’au, ’ua ha’api’i mai au ē, e tauturu te Metua i te Ao ra ia tātou ’ia here ato’a i te feiā tā tātou e mana’o ra e’ita e haere ’ia tātou ’ia here atu. ’Ua riro te tāra’ehara a te Fa’aora ’ei tuiō fa’atahe tāmau i te aroha nō ’ō mai i te Metua i te Ra’i. E ti’a roa ia tātou ’ia mā’iti i te fa’atura i teie here ’ia noa’a te aroha nō te tā’āto’ara’a.

I te taime e hōro’a tātou i tō tātou ’ā’au i te Metua ’e i te Tamaiti, tē taui ra ïa tātou i tō tātou ao—noa atu ā ’aita te mau ’ohipa ’ati a’e ia tātou i taui. Tē ha’afātata atu nei tātou i te Metua i te Ao ra ’e tē ’ite nei ho’i tātou i tōna fāri’ira’a au i tā tātou mau tauto’ora’a nō te rirora’a ’ei pipi mau nā te Mesia. E rahi mai tō tātou hāro’aro’a, te ti’aturi ’e te fa’aro’o.

Tē parau nei Moromona ia tātou ’ia pure ma te pūai ato’a o tō tātou ’ā’au nō teie here ’e e hō-mai-hia te reira i ni’a ia tātou nā roto mai i te puna mau—’o te Metua i te Ao ra.¹¹I reira noa tātou e riro ai ’ei feiā tātā’i i te ’amahara’a nō te mau aura’a tāhuti nei.

E toro mai te here mōrohi ’ore o tō tātou Metua ia tātou nei, nō te fa’aho’i ia tātou i tōna hanahana ’e te ’oa’oa. ’Ua hōro’a ’oia i tāna Tamaiti fānau tahi, ’o Iesu Mesia, nō te tātā’i i te ’amahara’a e fa’aātea rahi nei ia tātou iāna. ’O te tāhō’ē-fa’ahou-ra’a i te Metua i te Ra’i te tumu mau nō te here vai maoro ’e te fā mure ’ore. ’Ia fa’atupu tātou i te tū’atira’a ’e ’ōna i teienei nō te ha’api’i mai e aha te mau mea faufa’a mau, ’ia here mai tāna e here nei ’e ’ia tupu rahi mai iāna ra te huru. Tē fa’a’ite pāpū nei au ē, e mea faufa’a mure ’ore tō tātou aura’a ha’apa’o maita’i ’e te Metua i te Ao ra ’e te Fa’aora, nō rāua ’e nō tātou nei. I te i’oa o Iesu Mesia ra, ’āmene.