iTukutuku ni Mataveiliutaki Taumada
Ni Da Lako Vata Yani ki Liu
Mai vei Peresitedi Russell M. Nelson
Kemuni na taciqu kei na ganequ, au doka vakalevu na noqu mai tiko rawa kei kemuni ena mataka nikua. Ena va na siga sa oti eda a talaca kina vakadua e dua na turaga yaloqaqa, e dua na parofita ni Kalou—o Peresitedi Thomas S. Monson. E sega na vosa me veiraurau rawa ki na levu kei na cecere ni nona bula. Au na vakamareqeta tu ga na neirau veitokani ena vakavinavinaka ena veika a vakavulici au kina. Ia oqo meda na rai yani ki liu ni taucoko tu noda vakabauta na noda Turaga o Jisu Karisito, sa nona Lotu oqo.
Ena rua na siga sa oti a ra laki sota na iApositolo era bula tiko ki na rumu e cake ni Valetabu e Salt Lake. E kea era a lomavata kina ena dua na lewa, imatai, mera tauyavutaka tale na Mataveiliutaki Taumada, kei na ikarua, o ya meu sa na veiqaravi vaka - Peresitedi ni Lotu. E sega na vosa e veiraurau me vakamacalataki kina na veika au vakila ni ratou—kotora na ligadratou na Taciqu—ka tiko vei iratou na idola vakamatabete e vakalesui mai vua na Parofita o Josefa Simici ena tabagauna oqo—ka vakatikori au meu Peresitedi ni Lotu. Sa dua dina na gauna tabu ka rokovi.
Sa yaco kina me noqu ilesilesi meu kila o cei sa vakarautaka tu na Turaga me rau noqu daunivakasala. Meu na digitaka vakacava e rua walega vei ira na Tinikarua na iApositolo, kau sa lomani ira vakaidinadina o ira yadudua? Au sa vakavinavinaka vakalevu vua na Turaga ni a sauma mai na noqu masu ena yalodina. Au vakavinavinaka vakalevu vei Peresitedi Dallin Harris Oaks kei Peresitedi Henry Bennion Eyring ni sa lomadrau sara me rau veiqaravi vata kei au me iMatai ka iKarua ni Daunivakasala. Sa laki tomana tale o Peresitedi Dieter F. Uchtdorf na nona itutu ena Kuoramu ni iApositolo Le Tinikarua. Sa ciqoma oti o koya na veilesilesi lelevu e kenadau sara kina o koya.
Au sa vakacerecerei koya vata kei Peresitedi Eyring ena nodrau veiqaravi totoka dina vakadaunivakasala vei Peresitedi Monson. Rau sa veidonui vinaka sara kina, yalodina, ka vakauqeti. Eda sa vakavinavinakataki rau vakalevu sara. Sa lomadrau dina me rau veiqaravi ena vanua rau sa gadrevi dina kina.
Me vaka ni sa ikarua ni iApositolo veiqaravi vakabalavu, sa yaco talega o Peresitedi Oaks me Peresitedi ni Kuoramu ni iApositolo Le Tinikarua. Ia, ni sa kacivi ki na Mataveiliutaki Taumada ka muria vakadodonu tiko na lawa ni Lotu, sa mai yaco kina o Peresitedi M. Russell Ballard, o koya ka tarava yan na balavu ni nona veiqaravi, me sa na Peresitedi Vakatawa ni kuoramu o ya. Ena cakacaka vata na Mataveiliutaki Taumada kei na Le Tinikarua mera na kila na loma ni Turaga ka tosoya ki liu na Nona cakacaka tabu.
Keimami sa vakavinavinakataka na nomuni veimasulaki. Era sa cabori e vuravura taucoko me baleti keimami. Ena kena mataka ni nona sa mai takali kina o Peresitedi Monson, e dua na masu vakaoqori a cabora e dua na cauravou lailai yabaki va o Benson. Me cavuta mada na tiki ni ivola nei tinana kivei watiqu, o Wendy. A masu o Benson, “Tamaqu Vakalomalagi, vinaka vakalevu ni sa na laki raici watina tale o Peresitedi Thomas S. Monson. Vinaka vakalevu na neimami parofita vou. Ni vukei koya me yaloqaqa ka kakua ni rere ni sa ka vou. Ni vukei koya me vinaka cake na nona bula ka me kaukauwa. Ni vukei koya me tu vua na kaukauwa baleta ni sa tiko vua na matabete. Ka vukea me keimami sa dau lomavinaka.”
Au sa vakavinavinaka vua na Kalou baleti ira na gone vakaoqo kei ira na itubutubu era sa dinata na nodra yalayala mera itubutubu valavala dodonu, ka gugumatua—oqo o ira na itubutubu yadua, qasenivuli, kei na lewenilotu era vakaicolacola bibi ia era veiqaravi ena lomadra dina. Sa kena ibalebale, kivei kemuni yadua sara, au sa vakavinavinaka vakalevu ena veidokai.
Na Turaga sa tu ena Uli
Ni da sa lako vata yani ki liu, au sureti kemuni mo ni vakasamataka mada na ivakarau cecere sa lewa tiko kina na Turaga na Nona Lotu. Ni sa dau takali e dua na Peresitedi ni Lotu, e sega ni dau vunitaki tiko o cei mena vakarau kacivi me na veiqaravi ena itutu o ya. E sega ni dua na veidigidigi, sega na kena vosa ni veidigidigi, ia na cakacaka malua ga ni ituvatuva vakalou ni veisosomitaki, sa na biuta mai Vakai Koya na Turaga.
Na veisiga yadua ni nona veiqaravi e dua na iApositolo sa siga ni vuli kei na vakavakarau ki na veisiga ni mataka. E taura na veiyabaki e vuqa ni nona veiqaravi e dua na iApositolo me toso mai na idabedabe e ra ki na idabedabe e cake ena ilawalawa. Ena gauna oqori, ena sotava taumada tiko na veigauna ni mataqali cakacaka yadua ena Lotu. Sa na yaco talega me kilai ira vinaka na lewei vuravura, oka kina na kedra itukutuku, itovo, ivosavosa, me vaka ena kauti koya na nona ilesilesi e vuravura taucoko. Na cakacaka ni veisosomitaki ena veiliutaki ena Lotu e cecere sara. Au sega ni kila mada e dua tale me vaka oqo. E sega ni dodonu meda kurabui kina, baleta ni oqo na Lotu ni Turaga. E sega ni cakacaka o Koya me vakataka nodra ivakarau na tamata.
Au sa veiqaravi oti ena Kuoramu ni iApositolo Le Tinikarua ena veiliutaki ni lima na Peresitedi ni Lotu. Au a raica na nodra sa ciqoma na Peresitedi yadua oqo na ivakatakila kei na vakaio ki na ivakatakila o ya. Sa dau veivakasalataki tikoga ena veigauna na Turaga ka na vakauqeti ira tiko na Nona parofita. Na Turaga sa tu ena uli. Oi keimami sa tabaki me keimami vakadinadinataka na Yacana tabu e vuravura taucoko ka keimami na tomana me kila na Lomana ka muria.
Mo tiko Ga ena Salatu ni Veiyalayalati.
Oqo, kivei kemuni na lewe yadua ni Lotu au sa kaya, mo ni tiko ga ena salatu ni veiyalayalati. Na nomuni yalataka mo ni muria na iVakabula ena cakava na veiyalayalati kei Koya ka qai maroroya tiko na veiyalayalati oqori ena tadola kina na katuba ki na veivakalougatataki vakayalo yadua kei na madigi vei ira na tagane, yalewa, kei na gone ena veivanua kecega.
Me vaka ni keitou Mataveiliutaki vou, keitou via tekivu ni vakasamataki tiko na icavacava. Ena vuku ni ka oqo, keitou na vosa tiko vei kemuni nikua mai valetabu. Na icavacava eda sa sasaga yadua tiko kina meda laki vakaedaumeni ena kaukauwa ena dua na vale ni Turaga, vauci vakamatavuvale, dinata na veiyalayalati vakayacori e valetabu meda rawata kina na isolisoli cecere duadua ni Kalou—sai koya na bula tawamudu. Na cakacaka tabu vakalotu ni valetabu kei na veiyalayalati o cakava kina sa idola ni vaqaqacotaki na nomu bula, nomu vakamau kei na matavuvale, ka gugumatua rawa mo vorata rawa na ravuravu nei vu-ni-meca. Na nomu sokalou e valetabu kei na nomu veiqaravi kina baleti ira nomu qase e liu ena vakalougatataki iko me vakalevutaka na nomu ivakatakila kei na vakacegu ka na vaqaqacotaka na nomu yalayala mo tiko ga ena salatu.
Ia oqo, kevaka o sa butu tani mai na salatu, au sa sureti kemuni ena vakanuinui taucoko ni yaloqu mo lesu mai. Se cava ga na nomu leqa, se nomu ibolebole, sa tiko na nomu tikina eke, ena Lotu ni Turaga. O iko kei ira na nomu itabatamata se bera ni sucu o ni na kalougata ni ko sa na lesu mai ena gauna oqo ki na salatu ni veiyalayalati. Sa vakamareqeti ira na Luvena na Tamada mai Lomalagi, ka gadreva vei keda yadua meda lesu i vale Vua. Oqo na inaki cecere ni Lotu i Jisu Karisito ni Yalododonu Edaidai—me vukei keda yadua meda lesu mai vale.
Meu kaya ni sa titobu sara na noqu lomani kemuni—na loloma sa tubu tiko mai ena vuqa na yabaki, sokalou vata kei kemuni, ka qaravi kemuni. Sa noda ilesilesi vakalou o ya meda lako yani ki na veimatanitu, veimataqali, duivosavosa, kei na kawatamata, me vakarautaki ko vuravura ki na iKarua ni Lesu Mai ni Turaga. Eda na cakava oqo ena noda vakabauta na Turaga o Jisu Karisito, ni da sa kila ni sa veiliutaki tiko o Koya. Oya na Nona cakacaka kei na Nona Lotu. Eda sa Nona italai.
Au sa vakaraitaka eke niu sa dinata tiko na Kalou na Tamada Tawamudu kei na Luvena, o Jisu Karisito. Au sa kilai Rau, lomani Rau, ka yalataka meu qaravi Rau—kei kemuni—ki na iotioti ni noqu icegu ni bula. Ena yaca tabu i Jisu Karisito, emeni.