Nej Cia Li Xaiv Hnub No

Tus neeg tsis tseeb hu ua Mary Poppins yeej yog ib tug neeg ntiav zov cov me nyuam zoo li lwm tus—tsuas yog nws txawj ua yees siv xwb.¹ Cua hlob tshoob nws tuaj kom pab tsev neeg Banks uas muaj kev ntxhov siab nyob rau ntawm Number 17, Cherry Tree Lane, nyob hauv lub nroog London. Nws txais kev txib saib xyuas ob tug me nyuam, Jane thiab Michael. Nws nruj heev tiam sis nws siab zoo, es nws pib ua tej yam xav tsis thoob qhia nkawd tej yam tseem ceeb.

Jane thiab Michael ua zoo dua ntxiv, tiam sis Mary txiav txim siab tias twb txog lub sij hawm rau nws mus. Nyob hauv kev ua yeeb yam, Mary tus phooj ywg uas cheb raj pa taws hu ua Bert, sim hais kom nws tsis txhob mus. Nws cav hais tias, “Nkawd yog ob tug me nyuam zoo nev.”

Mary teb hais tias, “Kuv yeej ib txwm yuav tsis quav ntsej yog tias nkawd tsis zoo. Tiam sis kuv pab tsis taus nkawd yog nkawd tsis cia kuv, thiab tsis muaj leej twg uas nyuaj qhia tshaj tus me nyuam uas xav tias nws paub txhua yam.”

Bert nug hais tias, “Yog li ntawd ces yuav ua li cas?”

Mary teb hais tias, “Yog li ntawd zaum no nkawd yuav tsum ua nkawd tus kheej xwb.”²

Cov kwv tij thiab cov muam, ib yam li Jane thiab Michael Banks, peb yog “me nyuam zoo” uas tsim nyog muaj neeg hlub peb. Peb Leej Txiv Saum Ntuj Ceeb Tsheej xav pab peb thiab foom koob hmoov rau peb, tiam sis tej lub sij hawm peb tsis cia Nws ua li ntawd. Tej lub sij hawm, peb xav tias peb twb paub txhua yam lawm. Thiab “zaum no” peb kuj yuav tsum ua peb tus kheej. Yog vim li ntawd peb thiaj tau los ntawm peb tsev nyob saum ntuj los txog lub ntiaj teb no. “Zaum no” peb yuav tsum xaiv rau peb tus kheej.

Peb Leej Txiv Saum Ntuj Ceeb Tsheej lub hom phiaj tsis yog kom Nws cov me nyuam ua qhov yog; Nws lub hom phiaj yog kom Nws cov me nyuam xaiv tej yam uas yog thiab thaum kawg hloov los ua neeg zoo li Nws. Yog tias Nws tsuas xav kom peb mloog lus xwb, Nws yuav muab nqi zog thiab rau txim tam sim ntawd kom peb coj li Nws xav.

Tiam sis Vajtswv tsis xav kom peb ua zoo li cov tsiaj uas Nws cob qhia kom mloog lus tsis txhob ua li tus dev uas noj Nws nkawm khau hauv chav nyob ntawm lub nceeg vaj xilethi-aus.³ Tsis yog li ntawd, Vajtswv xav kom Nws cov me nyuam loj hlob tuaj thiab koom tes ua Nws tsev neeg txoj hauj lwm.

Vajtswv tau npaj ib txoj hau kev kom peb yuav txais Nws lub nceeg vaj ua peb qub txeeg qub teg, Nws tau npaj ib txoj kev rau peb ua kev khi lus uas pab peb hloov los ua neeg zoo li Nws, muaj lub neej zoo li Nws muaj, thiab nyob ua ke nrog peb tsev neeg nyob hauv Nws xub ntiag.⁴ Txoj hau kev no, uas peb tau kawm hauv lub neej ua ntej lub neej no, los peb yeej ib txwm yuav tsum xaiv rau peb tus kheej. Peb tau lees txoj hau kev no thiab tau xaiv los rau hauv lub ntiaj teb no.

Xwv kom peb yuav muab siab rau ntseeg thiab kawm siv peb txoj kev ywj siab xaiv raws li kev tsim nyog, muaj ib daim ntaub thaiv uas roos peb lub siab kom peb tsis nco qab txog Vajtswv txoj hau kev. Yog tsis muaj daim ntaub thaiv ntawd, yuav tsis muaj raws li Vajtswv tej lub hom phiaj vim peb yuav tsis muaj peev xwm hloov ua neeg zoo li Nws thiab ua neeg tsim nyog txais Nws qub txeeg qub teg li Nws xav kom peb ua.

Tus yaj saub Lihais hais tias: “Yog li ntawd, tus Tswv Vajtswv cia rau tib neeg muaj kev ywj siab xaiv ua rau nws tus kheej. Yog li ntawd, tib neeg tsis muaj peev xwm xaiv ua rau nws tus kheej tsuas yog nws raug ntxias kom ua li no los sis kom ua li tod.”⁵ Yexus Khetos, Leej Txiv tus Tub Hlob, yeej yog tus uas sawv cev rau sab no. Dab Ntxwg Nyoog, los sis Luxifaws, tus uas xav ua rau kev ywj siab xaiv puas tsuaj thiab txeeb hwj chim rau nws tus kheej, yog tus uas sawv cev rau sab tod.⁶

Hais txog Yexus Khetos, “peb muaj ib tug thov Leej Txiv pab peb.”⁷ Tom qab nws ua nws txoj kev txi theej txhoj tag lawm, Yexus “tau nce mus rau saum ntuj ceeb tsheej … mus aws ntawm Leej Txiv nws tej cai muaj kev hlub tshua uas nws muaj rau noob neej.” Thiab, vim nws tau aws tej cai muaj kev hlub tshua, “nws sawv peb cev hais daws noob neej zaj.”⁸

Qhov uas Khetos sawv peb cev thov Leej Txiv tsis yog Nws ua Vajtswv tus yeeb ncuab. Yexus Khetos, uas cia Nws lub siab nyiam ywj rau Leej Txiv lub siab nyiam,⁹ yeej yuav tsis txhawb nqa ib yam dab tsi tsuas yog tej yam uas Leej Txiv xav tau xwb. Leej Txiv Saum Ntuj Ceeb Tsheej yeej txhawb nqa thiab qhuas peb thaum peb ua yog lawm.

Qhov uas Khetos sawv peb cev thov Vajtswv ua rau peb nco ntsoov tias Nws tau them tus nqi rau peb tej kev txhaum thiab tsis muaj leej twg uas Nws txwv tsis pub los cuag Vajtswv txoj kev tshav ntuj.¹⁰ Rau cov uas ntseeg Yexus Khetos, hloov siab lees txim, ua kev cai raus dej, thiab nyiaj mus kom txog thaum kawg—uas yog tus txheej txheem kom rov qab sib raug zoo¹¹—tus Cawm Seej zam txim, kho, thiab sawv cov ntawd cev thov pab lawv. Nws yog tus uas pab peb, nplij peb lub siab, thiab tus neeg pab daws peb—Nws ua tim khawv thiab ua pov thawj txog peb kom peb rov qab sib raug zoo nrog Vajtswv.¹²

Luxifaws yeej tsis zoo li ntawd, es nws yog ib tug uas liam neeg. Yauhas tus uas Txais Kev Tshwm Sim piav txog thaum kawg yuav kov yeej Luxifaws: “Ces kuv hnov ib lub suab hais nrov mov saum ntuj tuaj rau kuv hais tias, Nim no [muaj kev cawm seej, thiab muaj dag zog, thiab muaj Vajtswv lub nceeg vaj, thiab muaj lub hwj chim ntawm nws tus Khetos].” Vim li cas? Vim “tus uas niaj hnub niaj hmo nkaug peb cov kwv tij ntseeg tab meeg rau ntawm Vajtswv twb raug muab pov saum ntuj los lawm” Tus Me Nyuam Yaj cov ntshav thiab Vajtswv txoj lus … twb ua rau lawv kov yeej [nws].”¹³

Luxifaws yog tus uas nkaug neeg no. Nws hais lus tawm tsam peb nyob hauv lub neej ua ntej yug los hauv ntiaj teb, thiab nws tseem hais lus tawm tsam peb hauv lub neej no. Nws xav cab peb kom poob. Nws xav kom peb muaj kev tu siab kav ib txhis. Nws yog tus uas qhia peb hais tias peb tsis tsim nyog, tus uas hais tias peb zoo tsis txaus, tus uas hais tias tsis muaj kev rov ua zoo thaum yus ua yuam kev. Nws yog tus neeg siab phem loj tshaj plaws, tus uas ncaws peb thaum peb twb vau lawm.

Yog tias Luxifaws qhia ib tug me nyuam txawj mus kev thiab tus me nyuam dawm taw, nws yuav qw rau tus me nyuam, rau txim rau tus me nyuam, thiab hais kom tus me nyuam tsis txhob ua ntxiv. Luxifaws tej kev ua rau peb poob siab thiab nyuaj siab—thaum kawg txhua lub sij hawm. Leej txiv ntawm kev dag no yog tus uas tsim txhua yam cuav¹⁴ thiab ua tib zoo ua hauj lwm kom ntxias peb thiab meem txom peb, “vim nws xav kom tib neeg txhua tus nyuaj siab ib yam li nws tus kheej.”¹⁵

Yog tias Yexus qhia ib tug me nyuam txawj mus kev thiab tus me nyuam dawm taw, Nws yuav pab tus me nyuam sawv thiab yaum kom tus me nyuam mus ob peb ruam ntxiv.¹⁶ Yexus Khetos yog tus uas pab peb thiab nplij peb lub siab. Nws tej kev ua rau peb muaj kev xyiv fab thiab kev cia siab—thaum kawg txhua lub sij hawm.

Vajtswv txoj hau kev muaj tej lus qhia peb, nyob hauv vaj lug kub tej lus no hu ua cov lus txib. Cov lus txib no tsis yog lam pub rau peb los sis tsis yog tej kev cai uas Vajtswv lam tsa kom cob qhia peb mloog lus. Cov lus txib no yeej pab peb coj cwj pwm zoo li Vajtswv, pab peb rov qab mus cuag peb Leej Txiv Saum Ntuj Ceeb Tsheej, thiab txais kev xyiv fab uas kav ib txhis. Kev ua raws li Nws cov lus txib tsis yog ib yam uas peb tsis paub txog; peb yeej paub tias peb xaiv Vajtswv thiab Nws txoj kev rov qab mus tsev. Tus txheej txheem rau peb no yeej zoo ib yam rau Adas thiab Evas, es “Vajtswv tau muab tej lus txib rau lawv, tom qab uas tau ua rau lawv paub txog txoj hau kev uas npaj tseg ntawm txoj kev txhiv dim.”¹⁷ Txawm Vajtswv yeej xav kom peb ua raws nraim li peb tej kev khi lus, Nws cia peb xaiv.

Muaj tseeb tiag, Vajtswv xav thiab coj kom Nws txhua tus me nyuam yuav xaiv rau nws tus kheej. Nws yuav tsis yuam peb. Los ntawm lub txiaj ntsim kev ywj siab xaiv, Vajtswv cia Nws cov me nyuam “ua taus tej yam lawv tus kheej thiab tsis yog raug tej yam.”¹⁸ Kev ywj siab xaiv cia peb xaiv taus kom taug kev, los sis tsis taug kev. Kev ywj siab xaiv cia peb txhob raws kev, los sis cia li raws kev. Ib yam li tsis muaj leej twg yuam tau peb mloog lus, kuj tsis muaj leej twg yuam tau peb kom txhob mloog lus. Tsis muaj leej twg coj tau peb ua yuam kev yog peb tsis kam. (Yuav tsum tsis txhob xav tias qhov no yog hais rau cov uas raug yuam tsis ua raws li lawv txoj kev ywj siab xaiv. Lawv tsis tau tawm txoj kev li; lawv yog neeg raug tsim txom. Lawv txais tau Vajtswv txoj kev hlub thiab kev khuv leej.)

Tiam sis thaum peb ua yuam kev, Vajtswv tu siab vim Nws paub tias txhua lub sij hawm, thaum kawg, peb yuav tsis zoo siab thiab poob peb cov koob hmoov. Nyob hauv vaj lug kub, qhov uas peb tsis taug txoj kev no hu ua kev txhaum, thiab qhov uas peb tsis zoo siab thiab poob peb cov koob hmoov hu ua kev raug txim. Hais li no los, Vajtswv tsis rau txim rau peb; peb raug txim los ntawm tej yam peb xaiv, tsis yog los ntawm tej uas Nws xaiv.

Thaum peb paub hais tias peb tsis taug Vajtswv txoj kev, peb xaiv tau kom cia nyob li ntawd, los sis vim muaj Yexus Khetos txoj Kev Theej Txhoj, peb xaiv tau kom rov qab mus taug kev. Nyob hauv cov vaj lug kub, kev txiav txim tias peb yuav hloov siab thiab rov qab mus taug kev hu ua kev hloov siab lees txim. Yog peb tsis hloov siab lees txim ces peb xaiv kom peb tus kheej tsis tsim nyog txais cov koob hmoov uas Vajtswv xav foom pub rau peb. Yog peb “tsis txaus siab rau tej uas [peb] muaj peev xwm txais,” peb “yuav rov qab mus rau [peb] qhov qub chaw, mus zoo siab rau qhov uas [peb] txaus siab txais”¹⁹—peb xaiv qhov no, tsis yog Vajtswv.

Txawm peb ua yuam kev ntev npaum li cas los yog peb twb mus deb npaum li cas los, txog lub sij hawm uas peb txiav txim hloov siab, Vajtswv pab peb rov qab los cuag Nws.²⁰ Raws li Vajtswv xav, thaum peb hloov siab lees txim tiag tiag thiab txiv mus lawm tom hauv ntej nrog txoj kev ntseeg Khetos uas khov kho, ces thaum peb rov qab taug txoj kev, ces yeej zoo li peb twb tsis tau tawm hlo li.²¹ Tus Cawm Seej them tus nqi rau peb tej kev txhaum thiab tso peb dim kom txhob poob peb txoj kev zoo siab thiab cov koob hmoov. Nyob hauv vaj lug kub qhov no hu ua kev zam txim. Tom qab lawv ua kev cai raus dej, txhua tus mej zeej ua yuam kev—ib txhia ua yuam kev loj heev. Yog li ntawd, kev muab siab rau ntseeg Yexus Khetos, kev hloov siab lees txim, kev txais kev pab los ntawm Nws, thiab kev zam txim, yog tej txheej txheem rau peb lub neej, tej txheej txheem uas peb pheej rov qab ua thiab kawm zuj zus. Ua li ntawd peb thiaj li “nyiaj mus kom txog thaum kawg.”²²

Peb yuav tsum xaiv seb peb yuav teev tiam leej twg.²³ Peb txoj kev zoo siab nyob mus ib txhis yeej nyob ntawm qhov uas peb xaiv Vajtswv uas muaj txoj sia nyob thiab koom tes ua Nws txoj hauj lwm. Thaum peb siv zog kawm “zaum no” ntawm peb tus kheej, peb xyaum siv peb txoj kev ywj siab xaiv raws li qhov yog. Ob tug Tuam Thawj Tswj Hwm ntawm lub Koom Haum Niam Tsev tau hais tias, peb yuav tsum tsis txhob ua li “me nyuam mos liab uas xav neeg qhuas lawv thiab qhia lawv txhua lub sij hawm.”²⁴ Tsis yog li ntawd, Vajtswv xav kom peb loj hlob tuaj ua neeg uas paub tswj peb tus kheej.

Kev xaiv coj raws li Leej Txiv txoj hau kev yog tib txoj kev uas peb yuav txais Nws lub nceeg vaj ua peb qub txeeg qub teg; tsuas yog peb xaiv xwb Nws thiaj li tso siab rau peb hais tias peb yuav tsis thov ib yam dab tsi uas tsis yog raws li Nws lub siab nyiam.²⁵ Tiam sis peb yuav tsum nco ntsoov tias “tsis muaj leej twg uas nyuaj qhia tshaj tus me nyuam uas xav tias nws paub txhua yam.” Yog li ntawd peb yuav tsum txaus siab kawm txog tus Tswv tej kev los ntawm tus Tswv thiab Nws cov tub qhe tej lus qhia. Tsim nyog uas peb ntseeg tias peb yog cov me nyuam ntawm Leej Txiv thiab Leej Niam Saum Ntuj Tseem Ceeb thiab peb tsim nyog kom nkawd “txhawj txog peb” thiab paub tias “ua peb tus kheej” tsis txhais hais tias peb “nyob ib leeg xwb.”²⁶

Tus yaj saub Yakhauj hauv Phau Ntawv Maumoos hais li cas, kuv kuj hais tias:

“Yog li ntawd, nej cia li zoo siab hlo, thiab nco ntsoov tias nej muaj kev ywj pheej xaiv ua rau nej tus kheej—xaiv txoj kev tuag uas kav mus ib txhis los sis xaiv txoj sia nyob mus ib txhis.

“Yog li ntawd, cov kwv tij [thiab cov muam] uas kuv hlub es, rov los sib raug zoo ua raws li Vajtswv lub siab nyiam, thiab tsis ua raws li tus dab phem … ; thiab nco ntsoov tias, tom qab nej rov los sib raug zoo nrog Vajtswv, twb yog nyob hauv thiab dhau los ntawm Vajtswv txoj kev tshav ntuj xwb nej thiaj txais tau kev cawm seej.”²⁷

Yog li ntawd, cia li xaiv kev ntseeg Khetos, xaiv kev hloov siab lees txim, xaiv ua kev cai raus dej thiab txais tus Vaj Ntsuj Plig Dawb Huv; xaiv kev ua tib zoo npaj kom tsim nyog txais lub cim nco txog; xaiv ua kev khi lus hauv lub tuam tsev; thiab xaiv ua hauj lwm rau Vajtswv thiab pab Nws cov me nyuam. Tej yam uas peb xaiv yeej hloov peb lub neej tam sim no thiab thaum yav tom ntej.

Kuv hais Yakhauj tej lus foom koob hmoov ntxiv: “Yog li ntawd, thov kom Vajtswv tsa nej sawv … hauv qhov tuag uas kav ib txhis rov qab los dhau los ntawm txoj kev theej txhoj lub hwj chim, xwv kom Vajtswv yuav txais nej mus rau hauv Vajtswv lub nceeg vaj uas nyob mus ib txhis.”²⁸ Los ntawm Yexus Khetos lub npe, amees.