Rau Nws

Hmo no, kuv qhia txog kuv txoj kev hlub nej txhua tus, kuv cov niam laus thiab cov niam hluas. Txawm muaj hnub nyoog li cas, nyob qhov twg, los yog muaj xwm txheej dab tsi los, peb koom siab hmo no, koom dag zog, koom lub hom phiaj, thiab koom ua tim khawv tias Leej Txiv Saum Ntuj Ceeb Tsheej, peb tus Cawm Seej, Yexus Khetos, thiab peb tus yaj saub, Thawj Tswj Hwm Russell M. Nelson hlub peb thiab coj peb txoj hau kev.

Thaum kuv tus txiv thiab kuv wb yog ib khub niam txiv hluas, tus npisov hu wb kom mus xyuas thiab txhawb pab ib tsev neeg uas tsis tau mus rau lub koom txoos tau ntau xyoos. Wb txaus siab lees yuav nws txoj kev txib thiab ob peb hnub tom qab ntawd twb mus rau lawv lub tsev. Lawv qhia meej rau wb hais tias lawv tsis xav kom cov neeg los ntawm lub Koom Txoos tuaj xyuas lawv.

Yog li ntawd lwm zaus wb mus xyuas, wb tau muab qhob noom rau lawv noj, vim wb paub tias qhob noom chocolate yuav ua rau lawv lub siab mos muag. Tsis tau muaj li ntawd. Khub niam txiv tsis qhib qhov rooj ntxaij hlau hais lus rau wb, wb thiaj paub meej tias nkawd tsis zoo siab txais tos wb. Tiam sis thaum wb tsav tsheb mus tsev, wb twb xav hais tias yog wb nqa qhob noom Rice Krispies Treats rau nkawd ces ntshe wb yuav ua tau.

Qhov uas wb tsis pom ntawm sab ntsuj plig uas rau wb nyuaj siab thaum wb ua tsis tau. Peb yeej tsis txaus siab thaum tib neeg xyeej peb. Sij hawm dhau mus ces wb nug wb tus kheej, “Vim li cas wb ua no? Wb lub hom phiaj yog dab tsi?”

Txwj Laug Carl B. Cook tau hais li no tias: “Kev pab ua hauj lwm hauv lub Koom Txoos no kuj nyuaj tsawv thiab yog tias lawv hais kom peb pab ua ib txoj hauj lwm uas ua rau peb ntshai, los yog tias peb nkees nkees pab, los yog tias peb raug hu los mus ua ib txoj hauj lwm uas thaum xub thawj peb tsis tshua nyiam.”¹ Wb tau paub tias Txwj Laug Cook tej lus muaj tseeb thaum wb txiav txim siab wb yuav tsum nrhiav tej lus qhia los ntawm ib tug Neeg uas muaj lub zeem muag loj dua li wb.

Tom qab wb thov Vajtswv tiag tiag thiab kawm vaj lug kub, wb tau txais lus teb vim li cas wb xav pab lwm tus. Wb tau hloov wb txoj kev to taub, hloov wb lub siab, thiab tau txais kev tshwm sim.² Thaum wb nrhiav tej lus qhia hauv vaj lug kub, tus Tswv tau qhia wb kom paub ib txoj kev yooj yim dua thiab ib txoj kev uas muaj nqis dua ntxiv thaum wb pab lwm tus. Nov yog nqe uas wb nyeem uas tau hloov wb ob leeg lub siab thiab wb tus txheej txheem: “Nej yuav tsum hlub tus Tswv nej tus Vajtswv kom kawg nej lub siab lub ntsws, thiab kawg nej lub dag lub zog; thiab nej yuav tsum ua hauj lwm rau nws los ntawm Yexus Khetos lub npe.”³ Txawm yog wb paub nqe no ua ntej, zoo li nqe no qhia ib yam tshiab thiab tseem ceeb rau wb.

Wb paub hais tias thaum wb muaj siab xav pab tsev neeg no thiab pab wb tus npisov, tiam sis wb tau nug wb tus kheej seb wb puas xav pab lwm tus vim wb hlub tus Tswv. Vaj Ntxwv Npeyamis qhia meej txog qhov no thaum nws hais tias, “Saib seb, kuv hais rau nej tias vim kuv tau hais rau nej tias kuv tau siv kuv lub neej ua hauj lwm rau nej, kuv tsis xav tau ntsej muag, vim kuv tsuas tau ua hauj lwm rau Vajtswv xwb.”⁴

Yog li ntawd Vaj Ntxwv Npeyamis pab leej twg? Leej Txiv Saum Ntuj Ceeb Tsheej thiab tus Cawm Seej. Qhov uas peb paub peb pab leej twg thiab vim li cas peb pab lwm tus yeej pab peb to taub tias kev hlub loj tshaj plaws yog kev muab siab npuab Vajtswv.

Thaum wb txoj kev tsom ntsoov hloov zuj zus, wb tej lus thov Vajtswv twb hloov thiab. Wb tau pib tos ntsoov thaum wb yuav mus xyuas tsev neeg no vim wb hlub tus Tswv.⁵ Wb ua rau Nws. Nws tau ua kom tsis nyuaj rau wb ntxiv. Tom qab ntau lub hli uas wb sawv ntawm lawv lub qhov rooj, tsev neeg no twb pib cia wb nkag mus hauv tsev. Ces tom qab ntawd, peb tau thov Vajtswv thiab sib tham txog txoj moo zoo ua ke. Peb tau ua phooj ua ywg zoo heev. Wb yeej teev tiam thiab hlub Vajtswv los ntawm qhov uas wb hlub Nws cov me nyuam.

Cia li xav txog ib lub sij hawm thaum nej muaj siab hlub ncav tes pab lwm tus tiag tiag thiab xav tias tej zaum qhov uas nej tau ua los tib neeg tsis pom los sis lawv tsis ris txiaj los sis lawv tsis xav txais kev pab ntawd. Thaum ntawd, nej puas tau xav hais tias nej tej hauj lwm tsis muaj nqis? Yog nej xav li ntawd, thov kom Vaj Ntxwv Npeyamis tej lus ua rau nej txoj kev ua xyem xyav thiab nej txoj kev mob siab ploj mus: “Nej tsuas ua hauj lwm rau nej tus Vajtswv xwb.”⁶

Peb yuav tsis tsim kev ntxub, tiam sis los ntawm kev pab lwm tus, peb yuav tsim ib txoj kev sib raug zoo nrog peb Leej Txiv Saum Ntuj Ceeb Tsheej. Peb txoj kev hlub thiab kev teev tiam Nws yeej ua rau peb tsis tas muaj nqi zog los sis lwm tus txoj kev ris txiaj thiab ua rau peb txais tau Vajtswv txoj kev hlub nyob hauv peb.

Tej lub sij hawm thaum pib ua peb ua vim peb xav tias peb yuav tsum ua tej dej num ntawd, tiam sis kev pab lwm tus li ntawd yuav ua rau peb txais ib yam siab dua nyob hauv peb, uas ua rau peb siv “ib txoj kev zoo dua”⁷ kom pab lwm tus—zoo li Thawj Tswj Hwm Nelson caw peb kom siv “ib tug txheej txheem tshiab thiab dawb huv ntxiv kom saib xyuas thiab txhawb pab lwm tus.”⁸

Thaum peb tsom ntsoov rau tag nrho tej yam uas Vajtswv tau ua rau peb, ces peb pab lwm tus vim peb ris Vajtswv txiaj. Yog peb tsis tshua xav txog peb tus kheej thaum peb ua hauj lwm pab lwm tus, ces peb paub tias peb yeej yuav tsom ntsoov rau Vajtswv xwb.⁹

Thawj Tswj Hwm M. Russell Ballard qhia hais tias, “Tsuas yog thaum peb hlub Vajtswv thiab Khetos kawg siab kawg ntsws peb thiaj li yuav txawj faib txoj kev hlub no nrog rau peb cov neeg zej zog los ntawm peb txoj kev ua siab dawb pab lawv.”¹⁰

Thawj nqe ntawm Kaum Nqe Lus Txib qhia li no hais tias: “Kuv yog tus Tswv nej tus Vajtswv. … Tsis txhob pe lwm tus vaj tswv, tiam sis pe kuv tib leeg xwb.”¹¹ Qhov uas nqe lus txib no yog thawj nqe lus pab peb to taub tias yog peb saib Nws yog tus tseem ceeb tshaj plaws, ces txhua yam yuav zoo—tsis hais peb txoj kev pab lwm tus. Thaum Nws yog tus tseem ceeb tshaj plaws hauv peb lub neej, ces Nws thiaj li yuav foom koob hmoov rau tej yam peb ua kom zoo rau peb thiab kom zoo rau lwm tus.

Tus Tswv ntuas hais tias, “Ntsia ntsoov kuv nrog txhua txoj kev xav.”¹² Thiab txhua lub lim tiam peb khi lus tias peb yuav ua li ntawd—“nco ntsoov txog nws.”¹³ Kev tsom ntsoov rau tus Tswv puas muaj feem nrog txhua yam peb ua? Qhov uas peb ua ib yam hauj lwm me me xwb puas yog ib lub cib fim rau peb qhia tias peb hlub thiab muab siab npuab Nws? Kuv ntseeg tias qhov no yeej muaj tseeb.

Peb muaj peev xwm muab txhua yam peb yuav tsum ua hloov ua ib txoj kev qhuas Nws. Peb saib txhua yam peb yuav tsum ua yog ib lub cib fim rau peb ua hauj lwm rau Nws, txawm yog txog sij hawm peb yuav tsum ua tiav, los sis peb hloov tus me nyuam daim ntaub diaper.

Ib yam li Amoos hais tias, “Muaj tseeb tiag, kuv paub tias kuv tsis tseem ceeb dab tsi; hais txog kuv lub zog los kuv yeej tsis muaj zog; yog li ntawd kuv yuav tsis khav txog kuv tus kheej, tiam sis kuv yuav khav txog kuv tus Vajtswv, vim nrog nws lub zog kuv yeej muaj peev xwm ua tau txhua yam.”¹⁴

Thaum peb tsom ntsoov rau kev ua hauj lwm rau Vajtswv, peb tsis xav txog peb tus kheej, thiab thaum kawg, peb nrhiav tau peb tus kheej.¹⁵

Tus Cawm Seej qhia lub ntsiab cai no meej heev: “Yog li ntawd cia nej lub teeb ci li no rau cov neeg no, xwv kom lawv yuav pom tej yam uas nej ua zoo thiab muab yeeb koob rau nej Leej Txiv tus uas nyob saum ntuj ceeb tsheej.”¹⁶

Thov cia kuv qhia nej tej lus tswv yim uas luag nrhiav tau rau ntawm ib phab ntsa hauv ib qhov chaw pab cuam me nyuam ntsuag nyob hauv Calcutta, India: “Yog koj muaj siab dawb, tej zaum tib neeg yuav liam koj hais tias koj qia dub, thiab muaj hom phiaj phem. Li cas los cia li ua siab dawb xwb. Qhov uas koj siv ntau xyoo ua los ib tug txawj siv ib hmo xwb kom ua puas tsuaj. Li cas los cia li ua xwb. Qhov uas koj ua zoo hnub no los tib neeg yeej yuav tsis nco qab tag kis. Li cas los cia li ua zoo xwb. Muab qhov zoo tshaj plaws rau neeg ntiaj teb, thiab ntshe yeej yuav tsis txaus. Li cas los cia li muab qhov zoo tshaj plaws uas koj muaj xwb. Vim hais tias, thaum kawg, tej koj ua li cas los yeej nyob ntawm koj thiab koj tus Vajtswv.”¹⁷

Cov viv ncaus, tej ntawd yeej nyob ntawm peb thiab tus Tswv. Zoo li Thawj Tswj Hwm James E. Faust hais tias: “‘Qhov uas tib neeg xav tau ntau tshaj plaws hauv lub ntiaj teb yog dab tsi?’ … ‘Puas yog qhov uas tib neeg xav tau ntau tshaj plaws hauv lub ntiaj teb yeej yog kom txhua tus neeg muaj kev sib raug zoo niaj hnub nrog tus Cawm Seej?’ Qhov uas peb sib raug zoo li ntawd yuav pab peb ua neeg zoo li Vajtswv, thiab tsis muaj dab tsi uas yuav pab zoo dua li qhov uas peb paub thiab to taub hais tias peb txheeb ze Vajtswv li cas.”¹⁸

Ib yam li ntawd, Amas piav rau nws tus tub hais tias, “Muab txhua yam uas koj ua rau tus Tswv, thiab txawm yog koj yuav mus qhov twg cia koom siab nrog tus Tswv; muaj tseeb tiag, cia tag nrho koj tej kev xav taw mus rau tus Tswv; muaj tseeb tiag, muab txoj kev hlub hauv koj lub siab tso rau tus Tswv mus ib txhis.”¹⁹

Thiab Thawj Tswj Hwm Russell M. Nelson tau qhia peb hais tias, “Thaum peb xav txog Nws txoj Kev Theej Txhoj, yog peb txoj kev txi pub yam dab tsi los tsis muaj nqis npaum li peb txoj kev ris Nws txiaj rau qhov peb muaj cib fim ua hauj lwm rau Nws.”²⁰

Cov viv ncaus, kuv ua tim khawv tias thaum Yexus Khetos, los ntawm lub hwj chim ntawm Nws txoj Kev Theej Txhoj, ua hauj lwm rau peb thiab nyob hauv peb lub siab, ces Nws cia li pib ua hauj lwm los ntawm peb kom foom koob hmoov rau lwm tus. Peb pab lawv, tiam sis peb ua li ntawd thaum peb hlub thiab ua hauj lwm rau Yexus Khetos. Peb pib ua li nqe vaj lug kub no hais: “Txhua tus neeg nrhiav qhov zoo rau nws tus neeg zej zog, thiab ua txhua yam nrog lub qhov muag ntsia ntsoov rau Vajtswv lub yeeb koob.”²¹

Tej zaum peb tus npisov paub tias kuv thiab kuv tus txiv yuav kawm los ntawm tej kev siv zog kom txhawb pab Vajtswv cov tub thiab ntxhais. Kuv ua tim khawv txog kev zoo thiab kev hlub uas Nws foom pub rau peb thaum peb siv zog ua hauj lwm rau Nws. Los ntawm Yexus Khetos lub npe dawb ceev, amees.