Phau Ntawv Maumoos lub Luag Hauj Lwm hauv Kev Hloov Siab Los Ntseeg

Los ntawm Qhia Kuv txoj Moo Zoo, peb nyeem hais tias: “Nco ntsoov tias peb txoj kev to taub [Leej Txiv Saum Ntuj Ceeb Tsheej thiab Nws txoj hau kev zoo siab] yog los ntawm cov yaj saub niaj hnub no—Yauxej Xamiv thiab cov uas muaj tom qab nws—uas txais kev tshwm sim los ntawm Vajtswv los. Yog li ntawd, qhov thib ib uas ib tug neeg yuav tsum xav paub yog nug seb Yauxej Xamiv puas yog ib tug yaj saub, thiab nws yuav teb tau lus nug no thaum nws nyeem thiab thov Vajtswv txog Phau Ntawv Maumoos.”²

Kuv zaj lus tim khawv txog qhov uas Vajtswv tau hu tus Yaj Saub Yauxej Xamiv twb tau muaj zog tuaj vim kuv tau thov Vajtswv thiab kawm Phau Ntawv Maumoos: Ib Zag Ntxiv Uas Ua Tim Khawv txog Yexus Khetos. Kuv twb ua raws li Maulaunais hais kom “nug Vajtswv, Leej Txiv Nyob Mus Ib Txhis, los ntawm Yexus Khetos lub npe,” kom paub tias Phau Ntawv Maumoos muaj tseeb.³ Kuv ua tim khawv tias kuv paub tias phau no muaj tseeb. Kuv paub li no, ib yam li nej yuav paub, “los ntawm tus Vaj Ntsuj Plig Dawb Huv lub hwj chim.”⁴

Phau Ntawv Maumoos zaj lus piav hais tias: “Cov uas tau kev ua tim khawv tseem ceeb los ntawm tus Ntsuj Plig Dawb Huv no kuj yuav paub los ntawm tib lub hwj chim ntawd tias Yexus Khetos yog neeg ntiaj teb tus Cawm Seej, paub tias Yauxej Xamiv yog Nws tus txais kev tshwm sim thiab yog Nws tus yaj saub hauv hnub nyoog kawg no, thiab paub tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tus Tswv lub nceeg vaj uas tsa dua rov qab los ib zaug ntxiv nyob hauv lub ntiaj teb, los npaj tos tus Mexiyas txoj Kev Los Zaum Ob.”⁵

Thaum kuv yog ib tug tub txib nyob hauv Chile, kuv tau kawm ib yam uas hloov tau yus lub neej txog qhov uas Phau Ntawv Maumoos muaj hwj chim pab tib neeg hloov siab los ntseeg. Mr. Gonzalez tau ua ib txoj hauj lwm tseem ceeb hauv nws lub koom txoos tau ntau xyoo. Nws twb kawm kev teev ntuj ntau, nws muaj ib daim ntawv pov thawj rau kev kawm kev teev ntuj. Nws txaus siab tias nws paub ntau txog Phau Vaj Lug Kub Npaiv Npaum. Peb twb paub zoo tias nws yog ib tug kws txawj ntse txog kev teev ntuj.

Nws twb paub zoo txog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg cov tub txib thaum lawv ua hauj lwm hauv nws lub nroog Lima, Peru. Nws yeej ib txwm xav ntsib lawv nws thiaj li qhia tau lawv txog Phau Vaj Lug Kub Npaiv Npaum.

Muaj ib hnub, nws xav tias zoo li Vajtswv muab ib lub txiaj ntsim rau nws, es ob tug tub txib hais kom nws nres nug seb nws puas kam nkawd tuaj rau nws lub tsev thiab qhia vaj lug kub rau nws. Zoo li nws ua npau suav muaj tseeb tiag! Vajtswv tau teb nws tej lus thov. Thaum kawg no, nws yuav qhia ob tug tub hluas uas ntseeg yuam kev. Nws qhia nkawd tias nws zoo siab kom nkawd tuaj rau nws lub tsev sib tham txog vaj lug kub.

Nws tos tsis tau txog lub sij hawm uas tau teem tseg. Nws twb npaj siab siv Phau Vaj Lug Kub Npaiv Npaum kom ua pov thawj tias tej yam nkawd ntseeg tsis muaj tseeb. Nws paub tseeb hais tias Phau Vaj Lug Kub Npaiv Npaum yuav qhia meej tias nkawd twb yuam kev lawm. Twb txog hmo uas yuav sib ntsib, thiab ob tug tub txib khob qhov rooj. Nws zoo siab kawg. Twb txog lub sij hawm lawm.

Nws qhib qhov rooj thiab caw ob tug tub tib los tsev. Ib tug tub txib twb muab ib phau ntawv xim xiav rau nws thiab tus tub txib no tau ua tim khawv tias nws paub phau no muaj Vajtswv txoj lus. Tus tub txib thib ob kuj ua tim khawv txog phau no, ua tim khawv tias Vajtswv tus yaj saub tau muab txhais lus, nws lub npe hu ua Yauxej Xamiv, thiab phau no qhia txog Khetos. Ob tug tub txib twb hais tias nkawd yuav tsum mus ces nkawd tawm mus.

Mr. Gonzalez poob siab heev. Tiam sis nws muab phau ntawv nthuav thiab saib ob peb nplooj ntawv. Nws tau nyeem phab ntawv thib ib. Nws nyeem ib phab dhau ib phab mus txog thaum tag kis yav tav su. Nws twb nyeem phau ntawv tag nrho thiab paub tias phau ntawv no muaj tseeb. Nws paub tias nws yuav tsum ua li cas. Nws hu ob tug tub txib, tau kawm nkawd tej zaj, thiab tso nws lub qub neej tseg xwv kom ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Tus txiv neej ntawd yog kuv tus xib hwb nyob hauv Qhov Chaw Cob Qhia cov Tub Txib hauv Provo, Utah. Tij Laug Gonzalez txoj kev hloov siab los ntseeg thiab lub hwj huam ntawm Phau Ntawv Maumoos ua rau kuv txais kev tshoov siab heev.

Thaum kuv los txog Chile, kuv qhov chaw tshaj tawm txoj moo zoo tus thawj tswj hwm, Thawj Tswj Hwm Royden J. Glade, caw peb nyeem tus Yaj Saub Yauxej Xamiv zaj lus tim khawv nyob huav Yauxej Xamiv—Keeb Kwm txhua lub lim tiam. Nws qhia peb tias ib zaj lus tim khawv txog Thawj Zaj Ua Yog Toog Pom yuav pab txhawb nqa peb zaj lus tim khawv txog txoj moo zoo thiab Phau Ntawv Maumoos.

Kuv twb ua tib zoo ua raws li nws tej lus caw peb. Kuv tau nyeem tej zaj hais txog Thawj Zaj Ua Yog Toog; kuv tau nyeem Phau Ntawv Maumoos. Kuv tau thov Vajtswv raws li Maulaunais qhia thiab tau thov “Vajtswv, Leej Txiv Nyob Mus Ib Txhis, los ntawm Yexus Khetos lub npe”⁶ seb Phau Ntawv Maumoos puas muaj tseeb. Kuv ua tim khawv hnub no hais tias kuv paub, zoo li tus Yaj Saub Yauxej Xamiv hais tias Phau Ntawv Maumoos yog “phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv.”⁷ Tus Yaj Saub Yauxej Xamiv kuj hais tias: “Muab Phau Ntawv Maumoos thiab tej kev tshwm sim tshem mus, ces peb txoj kev teev ntuj yog dab tsi? Ntshe peb tsis muaj li.”⁸

Thaum peb to taub zoo ntxiv tias peb yog leej twg thiab Phau Ntawv Maumoos lub hom phiaj yog dab tsi, peb txoj hloov siab los ntseeg muaj zog tuaj thiab peb paub tseeb lawm. Ua rau peb haj yam xav ua raws li peb tej kev khi lus nrog Vajtswv.

Ib lub hom phiaj tseem ceeb ntawm Phau Ntawv Maumoos yog kom muab Ixayees sib sau ua ke. Kev sib sau no ua rau tag nrho Vajtswv cov me nyuam muaj cib fim taug txoj kev ntawm kev khi lus thiab, thaum lawv ua raws li tej kev khi lus ntawd, lawv rov qab mus rau hauv Leej Txiv xub ntiag. Thaum peb qhia txog kev hloov siab lees txim thiab muab cov neeg hloov siab los ntseeg ua kev cai raus dej, peb muab Ixayees sib sau ua ke.

Phau Ntawv Maumoos hais txog tsev neeg Ixayees 108 zaus. Nyob hauv Phau Ntawv Maumoos thaum xub thawj, Nifais qhia hais tias, “Vim tag nrho kuv lub hom phiaj tsuas yog kom kuv yaum tau neeg los cuag Anplaham tus Vajtswv, thiab Ixaj tus Vajtswv, thiab Yakhauj tus Vajtswv, thiab txais kev cawm dim.”⁸ Anplaham tus Vajtswv, thiab Ixaj tus Vajtswv, thiab Yakhauj tus Vajtswv yog Yexus Khetos, tus Vaj Tswv ntawm Phau Qub. Peb txais kev cawm dim thaum peb los cuag Khetos los ntawm peb txoj kev ua neej raws li Nws txoj moo zoo.

Tom qab ntawd, Nifais sau hais tias:

“Muaj tseeb tiag, kuv txiv twb tau hais ntau yam txog Lwm Haiv Neeg, thiab kuj tau hais txog tsev neeg Ixayees tias, yuav muab lawv piv rau ib tsob ntoo txiv roj, uas tej ceg yuav lov thiab yuav tawg khiav ri niab mus thoob plaws hauv lub ntiaj teb. …

“Thiab tom qab tsev neeg Ixayees tau tawg khiav ri niab tus Tswv yuav sau lawv los ua ke dua; los sis; lub ntsiab yog li no hais tias, tom qab Lwm Haiv Neeg tau txais qhov txhij txhua ntawm Txoj Moo Zoo, ces yuav muab tej ceg ntoo txiv roj nyeg, los sis cov uas seem tshuav nyob hauv tsev neeg Ixayees, coj los txuas rau, los sis los paub txog tus Mexiyas tseeb, lawv tus Tswv thiab lawv tus Txhiv Dim.”¹⁰

Ib yam li ntawd, nyob hauv Phau Ntawv Maumoos, tus yaj saub Maulaunais hais kom peb nco txog peb tej kev khi lus, hais tias, “Xwv kom nej tsis txhob raug kev ntxhov hnyo ntxiv lawm, xwv kom yuav muaj raws li Leej Txiv tus uas Nyob Mus Ib Txhis tej kev khi lus uas nws tau khi rau nej, auj tsev neeg Ixayees.”¹¹

“Leej Txiv tus uas Nyob Mus Ib Txhis tej kev khi lus” uas Maulaunais hais txog yog dab tsi? Peb nyeem nyob hauv phau Anplaham:

“Kuv lub npe yog Yehauvas, thiab kuv paub qhov kawg txij thaum chiv keeb los; yog li ntawd kuv txhais tes yuav thaiv koj.

“Thiab kuv yuav muab koj ua ib haiv neeg coob, thiab kuv yuav foom koob hmoov rau koj tshaj qhov ntsuas tau, thiab ua kom koj lub npe nto moo mus rau txhua haiv neeg, thiab koj yuav ua ib txoj koob hmoov rau koj cov tub ki tom qab koj, kom los ntawm lawv cov neeg lawv yuav coj txoj kev qhuab qhia thiab lub Pov Thawj Hwj no mus rau txhua haiv neeg.”¹²

Nyob hauv kev tshaj tawm rau thoob lub ntiaj teb Thawj Tswj Hwm Russell M. Nelson qhia tias “nov yeej yog hnub nyoog kawg, thiab tus Tswv khiav Nws txoj hauj lwm ceev zog kom muab Ixayees sib sau ua ke. Kev sib sau no yeej yog qhov tseem ceeb tshaj plaws uas muaj hauv lub ntiaj teb no. Tsis muaj ib yam loj dua, tsis muaj ib yam tseem ceeb dua, tsis muaj ib yam uas muaj yeeb koob dua ntxiv. Thiab yog nej xaiv, yog nej xav ua, ces nej yuav muaj feem ua txoj hauj lwm no. Nej yuav muaj feem ua ib yam tseem ceeb, ib yam loj, ib yam uas muaj yeeb koob!

“Thaum peb hais txog kev sib sau, peb tsuas hais qhov tseeb no hais tias: txhua tus ntawm Leej Txiv Saum Ntuj Ceeb Tsheej cov me nyuam, nyob ob sab ntawm daim ntaub thaiv, tsim nyog hnov txog Yexus Khetos txoj moo zoo. Lawv txiav txim siab rau lawv tus kheej yog lawv xav paub ntxiv.”¹³

Peb cov uas yog mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua li no: peb nrhiav kev kom neeg ntiaj teb to taub—thiab hloov siab los ntseeg—Yexus Khetos txoj moo zoo. Peb yog cov uas “muab neeg sib sau ua ke hauv hnub nyoog kawg.”¹⁴ Peb lub luag hauj lwm los meej heev. Cov kwv tij thiab cov muam, thov kom lwm tus yuav paub peb yog cov neeg uas tau ua raws li Maulaunais tau cog lus tseg lawm, thov Vajtswv thiab tau txais lus teb kom paub tias Phau Ntawv Maumoos muaj tseeb, ces cia li muab kev txawj ntse ntawd qhia rau lwm tus los ntawm peb tej lus, thiab qhov tseem ceeb tshaj, los ntawm tej yam peb ua.

Phau Ntawv Maumoos muaj txhij txhua ntawm Yexus Khetos txoj moo zoo.¹⁵ Phau no coj peb mus rau Leej Txiv tej kev khi lus, es yog peb ua raws li tej kev khi lus ntawd peb yeej yuav txais tau Nws lub txiaj ntsim zoo tshaj plaws—txoj sia nyob mus ib txhis.¹⁶ Phau Ntawv Maumoos yog qhov tseem ceeb tshaj kom tag nrho Leej Txiv Saum Ntuj Ceeb Tsheej cov tub thiab cov ntxhais hloov siab los ntseeg.

Thawj Tswj Hwm Nelson kuj hais tias: “Thaum nej … nyeem Phau Ntawv Maumoos txhua hnub, nej yuav kawm cov lus qhuab qhia txog kev sib sau ua ke, qhov tseeb txog Yexus Khetos, Nws txoj Kev Theej Txhoj, thiab Nws txoj moo zoo txhij txhua uas tsis muaj nyob hauv Phau Vaj Lug Kub Npaiv Npaum. Phau Ntawv Maumoos yeej tseem ceeb kom muab Ixayees sib sau ua ke. Yog tias tsis muaj Phau Ntawv Maumoos, ces yuav muab tsis tau Ixayees sib sau ua ke.”¹⁷

Cia kuv xaus lus thaum kuv hais tus Cawm Seej tej lus qhia rau cov Neeg Nifais txog cov koob hmoov: “Nej yog cov yaj saub tej me nyuam; thiab nej yog los ntawm tsev neeg Ixayees; thiab nej yog los ntawm txoj kev khi lus uas Leej Txiv tau khi nrog nej cov yawg koob, uas tau hais rau Anplaham tias: Thiab los ntawm koj cov tub ki txhua pab neeg ntawm lub ntiaj teb yuav tau koob hmoov.”¹⁸

Kuv ua tim khawv tias peb yog Vajtswv cov tub cov ntxhais, Anplaham cov tub ki, tsev neeg Ixayees. Peb muab Ixayees sib sau ua ke zaus kawg thiab peb siv Phau Ntawv Maumoos kom ua li ntawd—yog ib phau ntawv uas muaj hwj huam loj tshaj plawg kom tib neeg hloov siab los ntseeg, thaum koom nrog tus Tswv tus Ntsuj Plig. Vajtswv tus yaj saub, Thawj Tswj Hwm Russell M. Nelson, coj peb txoj hau kev, tus uas coj peb txoj kev muab Ixayees sib sau ua ke hauv peb lub caij nyoog. Phau Ntawv Maumoos muaj tseeb. Nws twb hloov kuv lub neej lawm. Kuv cog lus rau nej, ib yam li Maulaunais thiab lwm tus yaj saub hauv txhua lub caij nyoog hais tias, phau no yuav hloov nej lub neej thiab.¹⁹ Los ntawm Yexus Khetos lub npe, amees.